पठालोबितामन 8
8
शाऊल चो बिश्वासीमन उपरे दूर बेवहार
1शाऊल हुनचो मरना चो संगे सलाह रये।
हुनी दिने यरूशलेम चो कलीसिया उपरे बड़े उपद्रव होऊक मुरयाली आउर पठालोबितामन के छांडुन सपाय ले सपाय यहूदिया आउर सामरी देशमन ने जत-खत होऊन गेला।
2बाकी भगतमन स्तिफनुस के मोट ने संगाला आउर हुनचो काजे बड़े विलाप करला।
3शाऊल कलीसिया के उजराते रलो; आउर घरे-घरे ओलुन भाती मनुकमन आउर बायले लेकीमन के ओड़गड़ते-ओड़गड़ते जयलघर ने ढ़ाकते रये।
सामरिया ने फिलिप्पुस
4जोन जतखत होऊन रवत, हुनमन नगतखबर सुनाते बुल्ला;
5आउर फिलिप्पुस सामरिया नंगर ने जाऊन भाती लोगमन ने मसीह चो परचार करूक मुरयालो।
6जोन गोठमन फिलिप्पुस बल्लो हुनके लोगमन सुनुन भाती आउर जोन चिना हुन दकाऊन रये हुनमन के दकुन-दकुन भाती, गोटक चित होऊन भाती मन लगाला।
7कसनबल्लोने खुबेमन ले अशुद्ध आत्मामन बड़े जोर ले चिचयाते निकरून गेला, आउर खुबे असन लकवा चो बेमारी आउर खोड़ीयामन बले चेंगा कराया गेला;
8आउर हुन नंगर ने बड़े हरिक छाऊन गेली।
शिमोन जादूबिता
9ऐचो ले पयले हुन नंगर ने शिमोन नाव चो गोटक माने रये, जोन झाड़ा फुका करून सामरिया चो लोगमन के भकवा करते आउर आपन खुद के गोटक बड़े माने सांगते रये।
10नानी ले बड़े तक सपाय हुनचो मान करते रवत, “ऐ माने माहापुरू चो हुन बल आय, जोन माहान बलाया जाऊ आय।”
11हुन खुबे दिनमन ले हुनमन के आपलो जादु चो काममन ले भकवा करून संगाऊन रलो, ऐईकाजे हुनमन हुनके खुबे मानते रवत।
12मान्तर जिदलदाय हुनमन फिलिप्पुस चो बिश्वास करला जोन माहापुरू चो राज आउर ईशु मसीह चो नाव चो नगतखबर सुनाते रलो तेबे लोग, काय माने, काय बायले लेकी, डूबन धरूक मुरयाला।
13तेबे शिमोन खुद बले बिश्वास करलो आउर डूबन धरून भाती फिलिप्पुस चो संगे रऊक मुरयालो। हुन चिना आउर बड़े-बड़े सामरत चो काम होतोर के दकुन भाती भकवा होते रलो।
सामरीमन चो पवितर आत्मा पावतोर
14जिदलदाय पठालोबितामन जोन यरूशलेम ने रला, सुनला कि सामरीमन माहापुरू चो बचन मानला सोत तेबे पतरस आउर यूहन्ना के हुनमन चो लगे पठाला।
15हुनमन जाऊन भाती हुनमन चो काजे पारथना करला कि पवितर आत्मा पाओत।
16कसनबल्लोने हुन ऐबे तक हुनमन थानले काचीई उपरे नी उतरून रये; हुनमन तो मात्र परबु ईशु चो नाव ले डूबन धरून रला।
17तेबे हुनमन-हुनमन उपरे हाथ संगाला आउर हुनमन पवितर आत्मा पावला।
शिमोन चो पाप
18जिदलदाय शिमोन दकलो कि पठालोबितामन चो हाथ संगालो ने पवितर आत्मा दिया जाऊ आय, तेबे हुनमन चो लगे रूपया आनुन भाती बल्लो,
19“ऐ अधिकार मोके बले दिआस, कि जोन कोचीई उपरे हाथ संगायें दे हुन पवितर आत्मा पाओ।”
20पतरस हुनचो ले बल्लो, “तुचो रूपया तुचो संगे नष्ट होओ, कसनबल्लोने तुय माहापुरू चो दान रूपया ले घेनतोर बिचार कर सीस।”
21ऐ गोठ ने ना तुचो हिस्सा आसे, ना भाग; कसनबल्लोने तुचो मन माहापुरू चो पुरे सीदा निआय।
22ऐईकाजे आपलो ऐ खराप ले मन फिराऊन भाती परबु ले पारथना कर, होऊक सके तुचो मन चो बिचार छमा करा जाओ।
23कसनबल्लोने मय दकेंसें कि “तुय पित चो असन पीता आउर अधरम चो बांदन ने पड़ली सीस।”
24शिमोन जबाप दिलो, “तुमी मोचो काजे परबु ले पारथना करा कि जोन गोठमन तुमी बले साहास, हुनमन ले कोनी मोचो थाने नी ऐऊन पड़ो।”
25आउर हुनमन गोहई देऊन भाती आउर परबु चो बचन सुनान भाती यरूशलेम बाटे बाहाडून गेला, आउर सामरीमन चो खुबे असन गाँवमन ने नगतखबर सुनाते गेला।
कूश चो खोजा के फिलिप्पुस चो उपदेश
26फेर परबु चो गोटक सरगदूत फिलिप्पुस ले बल्लो, “उठ आउर दक्षिण चो घाई हुन बाटे ने जा, जोन यरूशलेम ले गाजा चो घाई जाऊ आय।” ऐ बारूसरा बाट आय।
27हुन उठून भाती जाते गेलो, आउर दका, कूश देश चो गोटक माने ऐते रलो जोन खोजा आउर कुशीयामन चो रानी कन्दाके चो मंत्री आउर मुनीम रलो। हुन आराधना करतो काजे यरूशलेम ने ऐऊ रलो।
28हुन आपलो रत उपरे बसुन रलो, आउर यशाया अगम गिआनी चो किताब पढ़ते-पढ़ते फिरून जाते रलो।
29तेबे आत्मा फिलिप्पुस ले बल्लो, “लगे जाऊन भाती ऐ रत चो संगे हो।”
30फिलिप्पुस हुनचो बाटे परालो आउर हुनके यशाया अगम गिआनी चो किताब पढ़ते सुनलो, आउर पचारलो, “तुय जोन पढ़ सीस काय हुनके समजु बले आस?”
31हुन बल्लो, “जिदलदाय ले कोनी मोके नी समजा ओत तो मय कसन समजेंदें?” आउर हुन फिलिप्पुस ले बिनती करलो कि हुन चेगुन भाती हुनचो लगे बोसो।
32पवितर शास्त्र चो जोन
अध्या हुन पढ़ते रलो, हुन ऐ रये:
“हुन मेंडा चो समान पुजाय होतो काजे अमराया गेलो,
आउर जसन मेमना आपलो ऊन कतरातो बितामन चो पुरे ओगाय रऊ आय, असने ची
हुन बले आपलो मुंह नी खोललो।
33हुनचो दिनता ने हुनचो नियाय नी होऊक पावली।
हुनचो समया चो लोगमन चो बरनन कोन करेदे?
कसनबल्लोने धरतनी ले हुनचो जीव उठाऊन निया जाऊ आय।”
34ऐ थाने खोजा फिलिप्पुस के पचारलो, “मय तुचो ले गुहार करेंसे, ऐ सांग कि अगम गिआनी ऐ काचो बारे ने सांगे से, आपलो नाहले कोचीई दुसर चो बारे ने?”
35तेबे फिलिप्पुस आपलो मुंह खोललो, आउर ऐई पवितर शास्त्र ले मुरयाऊन हुनके ईशु चो नगतखबर सुनालो।
36बाट ने हिन्ड़ते-हिन्ड़ते हुनमन कोनी पानी चो जगा ने अमरला। तेबे खोजा बल्लो, “दक ऐथा पानी आसे, अदायं मोके डूबन धरतो ने काय अड़चन आसे।”
37फिलिपुस बल्लो, “अगर तुय पुरा मन ले बिश्वास करे सीस तो धरूक सकीस।” हुन जबाप दिलो, “मय बिश्वास करें से कि ईशु मसीह माहापुरू चो बेटा आय।”
38तेबे हुन रत उबा करतोर हुकुम दिलो, आउर फिलिप्पुस आउर खोजा दुनो पानी ने उतरला, आउर हुन खोजा के डूबन दिलो।
39जिदलदाय हुनमन पानी थानले निकरून भाती उपरे ईला, तेबे परबु चो आत्मा फिलिप्पुस के उठाऊन निलो, आउर खोजा हुनके फेर नी दकलो, आउर हुन हरिक करते आपलो बाट थाने जाते गेलो।
40फिलिप्पुस अशदोद ने ऐऊन निकरलो, आउर जिदलदाय ले कैसरिया ने नी अमरलो, तेबे तक नंगर-नंगर नगतखबर सुनाते गेलो।
Currently Selected:
पठालोबितामन 8: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
