पठालोबितामन 7
7
माहासभा ने स्तिफनुस चो भाषण
1तेबे माहायाजक बल्लो; “काय ऐ गोठमन सत आय?”
2इस्त्फनुस बल्लो,
“हे भाईमन, आउर बुआमन सुना। आमचो बुआ अब्राहाम हारान ने बसतो ले पयले जिदलदाय मेसोपोटामिया ने रलो; तेबे तेजमय माहापुरू हुनके दरशन दिलो।”
3“आउर हुनचो ले बल्लो, ‘तुय आपलो देश आउर आपलो कुटुम ले निकरून भाती हुन देश ने जा, जोन के मय तुके दकायें दें।’”
4तेबे हुन कस्दीमन चो देश ले निकरून भाती हारान ने जाऊन बसलो। हुनचो बुआ चो मरना चो पाचे माहापुरू हुनके हुन थानले ऐ देश ने आनुन भाती बसालो जोन थाने अदायं तुमी बसेसास,
5आउर हुनके खिन्डिक ठान मान्तर पाँय संगातोर भर बले हुन थाने जगा नी दिला, मान्तर बायदा करलो कि मय ऐ देश तुचो आउर तुचो पाचे तुचो बंश चो हाथे करून देयें दें; आउर हुन समया हुनचो कोनी बेटा बले नी रला।
6आउर माहापुरू असन बल्लो, तुचो पिला चो लोग दुसर देश ने परदेशी हो दे, आउर हुनमन-हुनमन के दास बना दे आउर चार सव बरक ले दुक देदे।
7फेर माहापुरू बल्लो, जोन जाति चो हुनमन दास हो दे, हुनके मय डण्ड देयें दें, आउर ऐचो पाचे हुनमन निकरून भाती ऐई जगा मोचो सेवा कर दे।
8आउर हुन हुनचो ले खतना चो बायदा बान्दलो; आउर ऐई दसा ने इसाक हुनचो ले पयदा होलो आउर आंटवा दिने हुनचो खतना करा गेली; आउर इसाक ले याकूब आउर याकूब ले बारहों कुलपती पयदा होला।
9“कुल पतिमन यूसुफ ले इरका होऊन हुनके मिस्र देश जातो बितामन चो हाथे बिकला; मान्तर माहापुरू हुनचो संगे रलो।”
10आउर हुनके हुनचो सपाय कलेशमन ले छंड़ाऊन भाती मिस्र चो राजा फिरोन चो नजर ने अनुग्रह आउर अकल दिलो, आउर हुन हुनके मिस्र थाने आउर आपलो सपाय घर थाने हाकिम बनालो।
11तेबे मिस्र आउर कनान चो सपाय देश ने अकाल पड़ली; जेचो ले भारी कलेश होली, आउर आमचो बुआ दादीमन के अरन नी मिरते रये।
12मान्तर याकूब ऐ सुनुन भाती कि मिस्र ने अनाज आसे, आमचो बुआ दादीमन के पईल हार पठालो।
13दुसरहार यूसुफ खुद के आपलो भाईमन थाने उजागर करलो आउर यूसुफ चो जाति फिरोन के जान पड़ली।
14तेबे यूसुफ आपलो बुआ याकूब आउर आपलो सपाय कुटुम के जोन पच्चतर माने रवत, हाग देऊक पठालो।
15तेबे याकूब मिस्र ने गेलो; आउर हुन थाने हुन आउर आमचो बुआ दादी मरून गेला।
16हुनमन चो लाश शकेम ने पहुँचाया जाऊन भाती हुन कबर ने संगाया गेली, जेके अब्राहाम चाँदी देऊन भाती शकेम ने हमोर चो पिला ले घेनुन रलो।
17“मान्तर जिदलदाय हुन बायदा चो पुरा होतोर समया लगे ईली जोन माहापुरू अब्राहाम ले करून रये, तेबे मिस्र ने हुन लोगमन बडुन गेला आउर खुबे होला।”
18तेबे मिस्र ने दुसर राजा होलो जोन यूसुफ के नी जानते रलो।
19हुन आमचो जाति ले चलाकी करून आमचो बुआ दादीमन चो संगे ऐथा ले खराप बेवहार करलो, कि हुनमन के आपलो लेकामन के पकाऊन देऊक पड़ली कि हुनमन जीव नी रवत।
20हुनी समया मूसा पयदा होलो। हुन माहापुरू चो नजर ने खुबे ची सुन्दर रलो। हुन तीन मयना ले आपलो बुआ चो घर ने पोसा गेलो।
21जिदलदाय पकाऊन दिया गेलो तेबे फिरोन चो बेटी हुनके उठाली, आउर आपलो बेटा समजुन पोसली।
22मूसा के मिस्रीमन चो सपाय बिदया पड़ाया गेली, आउर हुन बचन आउर करम दुनो ने सामरती रलो।
23“जिदलदाय हुन चालीस बरक चो होलो, तेबे हुनचो मन ने ईली कि मय आपलो इस्राएली भाईमन ले भेट करें।”
24हुन गोटक माने उपरे अनियाय होतोर दकुन भाती हुनके बचालो, आउर मिस्री के मारून भाती कन्दरालो बिती चो पलटा धरलो।
25हुन बिचार लो कि हुनचो भाई समज दे कि माहापुरू हुनमन चो हाथ ले हुनमन चो मुक्ति करे दे, मान्तर हुनमन नी समजला।
26दुसर दिने जिदलदाय हुनमन आपस ने लड़ते रवत, तेबे हुन हुता ऐऊन निकरलो; आउर ऐ बोलुन भाती हुनमन के मिसातो काजे समजालो, हे मानेमन, तुमी तो भाई-भाई आहास, गोटक दुसर उपरे केंव अनियाय करेसास?
27मान्तर जोन आपलो पड़ोसी उपरे अनियाय करते रलो, हुन हुनके ऐ बोलुन भाती गुचालो, तुके कोन आमचो उपरे हाकिम आउर नियाय करू ठेबालो से?
28काय जोन रीति ले तुय काली मिस्री के मारून दिलीस मोके बले मारूक चाहाय सीस?
29ऐ गोठ सुनुन भाती मूसा परालो आउर मिधयान देश ने परदेशी होऊन भाती रऊक मुरयालो, आउर हुन थाने हुनचो दुय ठान बेटा पयदा होला।
30“जिदलदाय पुरा चालीस बरक बितली, तेबे गोटक सरगदूत सीनै डोंगरी चो रान ने हुनके जरतो बिती बुटा चो आईग ने दरशन दिलो।”
31मूसा के ऐ दरशन दकुन भाती अकचकित होली, आउर जिदलदाय दकतो काजे हुन लगे गेलो, तेबे परबु चो ऐ शब्द होली,
32“मय तुचो बुआ दादीमन, अब्राहाम, इसाक आउर याकूब चो माहापुरू आंय।” तेबे मूसा थरथरुन गेलो, ऐथा ले कि हुनके दकतोर हिम्मत नी रली।
33तेबे परबु हुनचो ले बल्लो, आपलो पाँयमन ले पनही हिटाव, कसनबल्लोने जोन जगा ने तुय उबा आसिस, हुन पवितर भूईं आय।
34मय सत-सत आपलो लोगमन चो जोन मिस्र ने आसोत, दूरगति के दकले से; आउर हुनमन चो करलानी आउर हुनमन चो गागतोर सुनले से; ऐईकाजे हुनमन के छंड़ातो काजे उतर ले से। अदायं आव, मय तुके मिस्र ने पठायेंदे।
35“जोन मूसा के हुनमन ऐ बोलुन भाती धुकारून रवत, ‘तुके कोन आमचो उपरे हाकिम आउर नियाय करू ठेबाला से?’ हुनी के माहापुरू हाकिम आउर छंड़ातो बिता ठेबाऊन भाती, हुन सरगदूत चो बाटले जोन हुनके बुटा ने दरशन देउन रये, पठालो।”
36ऐई माने मिस्र आउर लाल समुन्द आउर रान ने चालीस बरक ले भयंकर काम आउर चिना दकान-दकान भाती हुनमन के निकराऊन आनलो।
37ऐ हुनी मूसा आय, जोन इस्राएलीमन के बल्लो, माहापुरू तुमचो भाईमन थानले तुमचो काजे मोचो असन गोटक अगम गिआनी उठाये दे।
38ऐ हुनी आय, जोन रान ने कलीसिया चो मंजी हुन सरगदूत चो संगे सीनै डोंगरी थाने हुनचो ले गोठयालो, आउर आमचो बुआ दादीमन चो संगे रलो, हुनी के जीवता बचन मिरो, कि आमचो लगले अमराओत।
39मान्तर आमचो बुआ दादीमन हुनचो मानुक नी चाहला, मान्तर हुनके गुचाऊन भाती आपलो मन मिस्र चो बाटे फिराला।
40आउर हारून ले बल्ला, आमचो काजे असन देव बनाव, जोन आमचो पुरे-पुरे चलो, कसनबल्लोने ऐ मूसा जोन आमके मिस्र देश ले निकराऊन आनलो, आमी नी जानु कि हुनके काय होली?
41हुन दिनमन ने हुनमन गोटक बचा बनाऊन भाती हुनचो मुरती चो पुरे पुजा चेगाला, आउर आपलो हाथ चो काममन ने मतभुल होऊक मुरयाला।
42आउर माहापुरू मुंह मोडुन भाती हुनमन के छांडुन दिलो, कि बादरीगण के पुजोत, जसन अगम गिआनीमन चो किताब ने लिकलोर आसे,
हे इस्राएल चो घरलोगमन,
काय तुमी रान ने चालीस बरक ले पशु पुजा आउर अनबलि मोके ची
चेगा ते राआस?
43तुमी मोलेक चो तम्बू
आउर रिफान देव चो तारामन के धरून फिरते राआस,
बल्लोने हुन मुरतीमन के जोनमन के तुमीमन पाँय पढ़तो काजे बनाऊन रलास।
आउर मय तुमके बेबीलोन चो लापी नेऊन भाती बसायें दें।
44“गोहई चो तम्बू रान ने आमचो बुआ दादीमन चो मंजी ने रये, जसन हुन ठेबालो जोन मूसा के बल्लो, ‘जोन नाप तुय दकली सीस, हुनचो अनुसार ऐके बनाव।’”
45हुनी तम्बू के आमचो बुआ दादीमन पयले जुग ले भेटुन भाती यहोशु चो संगे ऐ थाने धरून आनला; जोन समया चो हुनमन हुन दुसर जातिमन थाने अधिकार पावला, जोनमन के माहापुरू आमचो बुआ दादीमन चो पुरे ले निकराऊन दिलो, आउर हुन तम्बू दाऊद चो समया ले रली।
46हुन थाने माहापुरू अनुग्रह करलो; आउर हुन बिनती करलो कि हुन याकूब चो माहापुरू चो काजे रतो जगा बना ओ।
47मान्तर सुलेमान हुनचो काजे घर बनालो।
48मान्तर परमपरधान हाथ चो बनालोर घरमन ने नी रये, जसन कि अगम गिआनी बल्लो,
49परबु बले से, सरग मोचो सिंघासन
आउर धरतनी मोचो पाँय खाले चो चौंकी आय,
मोचो काजे तुमी कोन परकार चो घर बनाआ से?
आउर मोचो आराम चो कोन जगा होये दे?
50काय ऐ सपाय तीजमन मोचो हाथ चो बनालोर नुआय?
51“हे हठाआ, आउर मन आउर कान चो खतना नी करलो लोगमन, तुमी सदा पवितर आत्मा चो बिरूद करू आस। जसन तुमचो बुआ दादीमन करते रवत, असने ची तुमी बले करेसास।”
52अगम गिआनीमन थानले कोके तुमचो बुआ दादीमन नी कन्दराला? हुनमन हुन धरमी चो आगमन चो पयले जुग ले खबर देतो बितामन के मारून दिला; आउर अदायं तुमी बले हुनचो धरतो बितामन आउर मारून देतो बिता होलास।
53तुमनमन “सरग दूतमन चो बाटले ठेबालो बिती नियम तो पावलास, मान्तर हुनचो पालन नी करलास।”
स्तिफनुस चो हत्या
54ऐ गोठमन सुनुन भाती हुनमन जलुन गेला आउर हुनचो उपरे दात कड़रूक मुरयाला।
55मान्तर हुन पवितर आत्मा ले समपूरन होऊन भाती सरग बाटे दकलो आउर माहापुरू चो महिमा के आउर ईशु के माहापुरू चो उजा बाटे उबा होलोर दकुन भाती
56बल्लो, “दका, मय सरग के उगाढ़ा होलोर, आउर माने चो बेटा के माहापुरू चो उजा बाटे उबा होलोर दकें सें।”
57तेबे हुनमन बड़े शब्द ले चिचयाऊन भाती कान के ढ़ाकला, आउर गोटक संगे हुनचो उपरे झपटला;
58आउर हुनके नंगर चो बहारे निकराऊन भाती हुनचो उपरे पकना मारला। गोहईमन आपलो फटीई शाऊल नाव चो गोटक जुआन चो पाँयमन चो लगे हिटाऊन भाती संगाला।
59हुनमन स्तिफनुस उपरे पकना मारते रवत, आउर हुन ऐ बोलुन भाती पारथना करते रलो, “हे परबु ईशु, मोचो आत्मा के गरहन कर।”
60फेर मांडी पाडून भाती जोर ले हाग दिलो, “हे परबु, ऐ पाप हुनमन उपरे नी लगाव।” आउर ऐ बोलुन भाती हुन मरून गेलो। शाऊल हुनचो बद ने शामिल रलो।
Currently Selected:
पठालोबितामन 7: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
