पठालोबितामन 5
5
पवितर आत्मा ले झूठ बोलतोर
1हनन्या नाव चो गोटक माने आउर हुनचो बायले, सफिरा खिन्डिक भुईं बिकला
2आउर हुनचो दाम थानले खिन्डिक गुचाऊन संगाला; आउर ऐ गोठ हुनचो बायले बले जानते रली, आउर हुनचो गोटक हिस्सा आनुन भाती पठालोबितामन चो पाँयमन चो पुरे संगाऊन दिलो।
3पतरस बल्लो, “हे हनन्या! शयतान तुचो मन ने ऐ गोठ केंव डाल्लो कि तुय पवितर आत्मा ले झूठ बोल, आउर भुईं चो दाम थानले खिन्डिक गुचाऊन संगाव?”
4जिदलदाय ले हुन तुचो लगे रली, काय तुचो नी रली? आउर जिदलदाय बिकरी होली तेबे काय तुचो अधिकार नी रली? तुय ऐ गोठ आपलो मन ने केंव बिचार लिस? “तुय मानेमन ले नाई, मान्तर माहापुरू ले झूठ बल्ली सीस?”
5ऐ गोठमन सुनते ची हनन्या घसरुन पड़लो आउर जीव छांडुन दिलो, आउर सपाय सुनतो बितामन थाने बड़े डर बसली।
6फेर जुआनमन उठून भाती हुनचो टनडरी बनाला आउर बाहरे नेऊन भाती माटी दिला।
7लगभग तीन घंटा चो पाचे हुनचो बायले, जोन काई होऊ रली नी जानुन भाती, भीतरे ईली।
8तेबे पतरस हुनके बल्लो, “मोके सांग काय तुमी हुन भुईं ईतलो ने ची बिकु रलास?” हुन बल्ली, “हव, ईतलो ने ची।”
9पतरस हुनके बल्लो, “ऐ काय गोठ आय कि तुमी दुनो परबु चो आत्मा चो परीक्षा चो काजे एक करलास? दक, तुचो मुनुक चो माटी देतो बितामन दुआर ची थाने उबा आसोत, आउर तुके बले बाहरे नेदे।”
10तेबे हुन तुरते हुनचो पाँयमन थाने घसरुन पड़ली, आउर जीव छांडुन दिली; आउर जुआनमन भीतरे ऐऊन भाती हुनके मरलोर भेटला, आउर बाहरे नेऊन भाती हुनचो मुनुक चो लगे माटी दिला।
11पुईतराय कलीसिया थाने आउर ऐ गोठमन चो सपाय सुनतो बितामन चो उपरे बड़े डर बसली।
पठालोबितामन बाटले चिना आउर चमत्कार
12पठालोबितामन चो हाथमन ले खुबे चिना आउर भयंकर काम लोगमन चो मंजी ने दकाया जाते रये, आउर हुनमन सपाय गोटक मन होऊन भाती सुलेमान चो बरांदा ने रूंड़ा होते रवत।
13मान्तर आउर मन थाने कोकीई ऐ हिम्मत नी होते रये कि हुनमन ने जाऊन मिसोत; तेबले बले लोग हुनमन चो बड़ाई करते रवत।
14बिश्वास करतो बितामन खुबे असन माने आउर बायले लेकीमन परबु चो कलीसिया ने बड़े गेनती ने मिसते रवत।
15ऐथा ले कि लोग बेमारमन के सड़क थाने आनुन-आनुन, खटियामन ने आउर तखतमन थाने सुआऊन देते रवत कि जिदलदाय पतरस ऐओ, तेबे हुनचो छांय ची हुनमन थानले काचीई उपरे पडुन जाओ।
16यरूशलेम चो लगे-लगे चो नंगरमन ले बले खुबे लोग बेमारीमन आउर अशुद्ध आत्मामन ले कन्दराय होलोर बितामन के आनुन-आनुन, रूंडा होते रवत, आउर सपाय चेंगा करून दियाय जाते रवत।
पठालोबितामन के जयलघर ने ढ़ाकतोर
17तेबे माहायाजक आउर हुनचो सपाय संगवारी जोन सदूकीमन चो पंथ चो रवत, डाह ले भरला
18आउर पठालोबितामन के धरून भाती जयल ने ढ़ाकुन दिला।
19मान्तर राती बेरा परबु चो गोटक सरगदूत जयलघर चो बाट उगाढुन भाती हुनमन के बाहरे आनुन भाती बल्लो,
20“जाआ, मंदिर ने उबा होऊन भाती ऐ जीवन चो सपाय गोठमन लोगमन के सुनाआ।”
21हुनमन ऐ सुनुन भाती बिहान पावते ची मंदिर ने जाऊन भाती उपदेश देऊक मुरयाला। तेबे माहायाजक आउर हुनचो संगवारीमन ऐऊन भाती माहासभा के आउर इस्राएलीमन चो सपाय पुरनिमन के रूंड़ा करला, आउर जयलघर ने खबर पठाला कि हुनमन के आनोत।
22मान्तर जगवारमन हुता पोंचुन भाती हुनमन के जयलघर ने नी पावला, आउर बाहाडुन ऐऊन भाती खबर दिला,
23“आमी जयलघर के बड़े तिआर ने ढ़ाकलोर; आउर पाहारा बितामन के बाहरे बाटमन थाने उबा होलोर पावलु; मान्तर जिदलदाय उगाढ़लु, तेबे भीतरे कोनी नी मिरला।”
24जिदलदाय मंदिर चो सरदार आउर परधान याजकमन ऐ गोठमन सुनला, तेबे हुनमन चो बारे ने भारी चिन्ता ने पडुन गेला कि हुनमन चो काय होली!
25ईतलो ने कोनी ऐऊन भाती हुनमन के सांगलो, “दका, जोनमन के तुमी जयलघर ने ढाकुन संगाऊन राआस, हुन मानेमन मंदिर ने उबा होऊन लोगमन के उपदेश देये सोत।”
26तेबे सरदार, जगवारमन चो संगे जाऊन भाती, हुनमन के धरून ईलो, मान्तर जबरन नाई, कसनबल्लोने हुनमन लोगमन के डरते रवत कि आमचो उपरे पकना नी मारोत।
27हुनमन-हुनमन के आनुन भाती माहासभा चो पुरे उबा करून दिला; तेबे माहायाजक हुनमन के पूछलो,
28“काय आमी तुमके जनाऊन भाती हुकुम नी देऊ रलु। कि तुमी ऐ नाव ले उपदेश नी करा? तेबले बले दका, तुमी पुईतराय यरूशलेम के आपलो उपदेश ले भरून दिलासास आउर हुन माने चो लऊ आमचो टोडरा थाने आनुक चाहायसास।”
29तेबे पतरस आउर दुसर पठालोबितामन जबाप दिला, “मानेमन चो हुकुम ले बडुन भाती माहापुरू चो हुकुम के मानतोर ची आमचो काम आय।”
30आमचो बुआ दादीमन चो माहापुरू ईशु के जिआ लो, जेके तुमी कुरूस थाने लटकाऊन भाती मारून दिलास।
31हुनी के माहापुरू परबु आउर मुक्तिकरू थेबाऊन भाती, आपलो उजा हाथ थाने डेंग करून दिलो, कि हुन इस्राएलीमन के मन फिराव चो शक्ति आउर पापमन चो छमा देओ।
32“आमी ऐ गोठमन चो गोहई आंसु आउर असने ची पवितर आत्मा बले, जेके माहापुरू हुनमन के दिलो से जोन हुनचो हुकुम मानु आत।”
33ऐ सुनुन भाती हुनमन कुचर होला, आउर हुनमन के मारून देऊक चाहला।
34मान्तर गमलीएल नाव गोटक फरीसी जोन नियमकारी आउर सपाय लोगमन ने मानतो लायक रलो, माहासभा ने उबा होऊन भाती पठालोबितामन के डण्डिक काजे बाहार करतोर हुकुम दिलो।
35तेबे हुन बल्लो, “हे इस्राएलीमन, तुमी जोन काई ऐ मानेमन ले करूक चाहायसास, सोचुन समजुन करा।”
36कसनबल्लोने ऐ दिनमन ले पयले थिऊदास ऐ बोलते-बोलते उठलो, कि मय बले काई आंय; आउर कोनी चार सव माने हुनचो संगे होला, मान्तर हुन मारा गेलो आउर जितरो लोग हुनके मानते रवत, सपाय जत-खत होला आउर मेटून गेला।
37हुनचो पाचे नाव लिकाई चो दिनमन ने यहूदा गलीली उठलो, आउर खिन्डिक लोग आपलो बाटे करलो; हुन बले नष्ट होऊन गेली आउर जितरो लोग हुनके मानते रवत, सपाय जत-खत होऊन गेली।
38ऐईकाजे अदायं मय तुमके बलें सें, ऐ मानेमन ले लापी ची राहा आउर ऐ मन ले काई काम नी संगाआ; कसनबल्लोने अगर ऐ धरम नाहले काम मानेमन चो बाटले होओ तेबे तो मेटून जाये दे;
39“मान्तर अगर माहापुरू चो बाटले आय, तेबे तुमी हुनमन के केबीई बले मेटाक नी सका से। काहांय असन नी होओ कि तुमी माहापुरू ले बले लड़तो बिता ठेबा।”
40तेबे हुनमन हुनचो गोठ मानला; आउर पठालोबितामन के हाग देऊन भाती पेटाला; आउर ऐ हुकुम देऊन छांडुन दिला कि ईशु चो नाव ले फेर कोनी गोठ नी करा।
41हुनमन ऐ गोठ ले हरिक होऊन भाती माहासभा चो पुरे ले जाते गेला, कि आमी हुनचो नाव चो काजे बेईजित होतो लायक तो ठेबलु।
42हुनमन रोजे दिना मंदिर ने आउर घर-घर ने उपदेश करतोर, आउर ऐ गोठ चो नगतखबर सुनातो ले कि ईशु ची मसीह आय।
Currently Selected:
पठालोबितामन 5: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
