पठालोबितामन 28
28
माल्टा द्वीप ने पौलुस चो आवभगत
1जिदलदाय आमी बाचुन निकरलु, तेबे पता चलली कि ऐ दिप माल्टा बलाया जाऊ आय।
2हुता चो रतो बितामन आमचो उपरे भयंकर किरपा करला; कसनबल्लोने पानी घसरतोर कारन सीत रली, ऐईकाजे हुनमन आईग जराऊन भाती आमी सपाय के ठेबाला।
3जिदलदाय पौलुस दारुमन चो छिलपा सकलुन भाती आईग थाने संगालो, तेबे गोटक सांप आंच पाऊन निकरलो आउर हुनचो हाथ ले लेपटून गेलो।
4जिदलदाय हुन रतो बितामन सांप के हुनचो हाथ ले लटकलोर दकला, तेबे आपस ने बल्ला, “सत-सत ऐ माने हत्यारा आय कि अगर समुन्द ले बाचुन गेलो, तेबले बले नियाय जीव रऊक नी दिलो।”
5तेबे हुन सांप के आईग ने झठकुन दिलो, आउर हुनके काई घाटा नी होली।
6मान्तर हुनमन बाट दकते रला कि हुन फुलुन जाये दे नाहले उधापड़े घसरुन मरून जाये दे, मान्तर जिदलदाय हुनमन खुबे बेर ले दकते रला आउर दकला कि हुनचो काई बले नी नशली, तेबे आपलो बिचार बदलुन भाती बल्ला, “ऐ तो कोनी देव आय।”
7हुन जगा चो लगे-लगे हुन टापु चो मुखिया पुबलियुस चो भुईं रली। हुन आमके आपलो घरे नेऊन भाती तीन दिन मीत बनान मानदान करलो।
8पुबलियुस चो बुआ जर आउर आंवसा लऊ ले बेमार पडु रलो। आउर पौलुस हुनचो लगे घर ने जाऊन भाती पारथना करलो आउर हुनचो उपरे हाथ संगाऊन हुनके चेंगा करलो।
9जिदलदाय असन होली तेबे हुन दिप चो आदो बेमारी ईला आउर चेंगा करा गेला।
10हुनमन आमचो खुबे मानसमान करला, आउर जिदलदाय आमी जाऊक मुरयालु तेबे जोन काई आमचो काजे जरूरी रली, जाहाज थाने संगाऊन दिला।
माल्टा द्वीप ले रोम चो बाटे
11तीन मयना चो पाचे आमी सिकन्दरिया चो गोटक जाहाज थाने जाते गेलु, जोन हुन द्वीप ने सीतकार भर रऊन रलो, आउर जेचो चिना दियुसकूरी रये।
12सुरकुसा ने लंगर डालुन भाती आमी तीन दिन ठेबु रलु।
13हुता ले आमी बुलुन भाती रेगियुम ने ईलु; आउर गोटक दिन चो पाचे दक्षिणी लेहरा बोहली, तेबे आमी दुसर दिने पुतियुली ने ईलु।
14हुता आमके भाई मिरला, आउर हुनमन चो बोलतो के आमी हुनमन चो थाने सात दिन तक रलु; आउर ऐई रीति ले आमी रोम बाटे गेलु।
15हुता ले भाई आमचो खबर सुनुन भाती अप्पियुस चो जोड़ान आउर तीन धरमशाला तक आमके भेट करतो काजे निकरून ईला, जोनमन के दकुन भाती पौलुस माहापुरू चो धन्यबाद करलो आउर हिम्मत बान्दलो।
16जिदलदाय आमी रोम ने पोंचलु, तेबे पौलुस के गोटक पलटन चो संगे जोन हुनचो राका करते रलो, ऐकला रतोर हुकुम मिरून गेली।
पौलुस रोम ने
17तीन दिन चो पाचे हुन यहूदीमन चो मुखिया लोगमन के हाग दिलो, आउर जिदलदाय हुनमन रूंड़ा होला तेबे हुनमन ले बल्लो, हे भाईमन, मय आपलो लोगमन चो नाहले बुआ दादीमन चो बेवहारमन चो बिरूद ने काई बले नी करले, तेबले बले बन्दी बनाऊन भाती यरूशलेम ले रोमिमन चो हाथे सोपा गेले।
18हुनमन मोके जाचुन भाती छांडुन देऊक चाहला, कसनबल्लोने मोचो ने मरना चो लायक काई दोष नी रये।
19मान्तर जिदलदाय यहूदी ऐचो बिरूद ने बोलुक मुरयाला, तेबे मोके राजा चो दुहाई देऊक पढ़ली; ऐ नाई कि मोके आपलो लोगमन उपरे कोनी दोष लगातोर रली।
20ऐईकाजे मय तुमके हाग दिले से कि तुमचो ले मिलें दें आउर गोठ बात करें दें; कसनबल्लोने इस्राएल चो आशा काजे मय ऐ सिकरा ले बान्दलोर आंसे।
21हुनमन हुनचो ले बल्ला, ना आमी तुचो बारे ने यहूदिमन ले चिठ्ठीमन पावलु, आउर ना भाईमन थानले कोनी ऐऊन भाती तुचो बारे ने काई सांगला आउर ना खराप बल्ला।
22मान्तर तुचो बिचार काय आसे? हुनी आमी तुचो ले सुनुक मन करूं से, कसनबल्लोने आमी जानु से कि हर जगा ऐ मत चो बिरूद ने लोग गोठमन करू आत।
23तेबे हुनमन हुनचो काजे गोटक दिन ठेबाला, आउर खुबे असन लोग हुनचो थाने रूंड़ा होला, आउर हुन माहापुरू चो राज चो गोहई देते, आउर मूसा चो नियम आउर अगम गिआनीमन चो किताबमन ले ईशु चो बारे ने समजाऊन-समजाऊन भाती बड़े बिहान ले सांज तक बरनन करते रलो।
24तेबे कितलो तो हुन गोठमन के मानला, आउर कितलो तो बिश्वास नी करला।
25जिदलदाय हुनमन आपस ने गोटक मत नी होला, तेबे पौलुस चो ऐ गोठ के बोलतो के जाते गेला, पवितर आत्मा यशाया अगम गिआनी चो बाटले तुमचो बुआ दादीमन ले ठीक ची बल्लो,
26“‘जाऊन भाती ऐ लोगमन ले बोल,
कि सुनते तो राआ से, मान्तर नी समजा से,
आउर दकते तो राआ से, मान्तर नी जाना से;
27कसनबल्लोने ऐ लोगमन चो मन ठोसर
आउर हुनमन चो कान भारी होऊन गेली से,
आउर हुनमन आपलो आँईकमन लिमटला से,
असन नी होओ कि हुनमन केबीई आँईकमन ले दकोत
आउर कानमन ले सुनोत
आउर मन ले समजोत
आउर फिरोत,
आउर मय हुनमन के चेंगा करें।’”
28“आउर तुमी जाना कि माहापुरू चो ऐ मुक्ति चो कथा दुसर जातिमन चो लगे पटाया गेली से, आउर हुनमन सुन दे।”
29जिदलदाय हुन ऐ बल्लो तेबे यहूदी आपस ने खुबे बहस करूक मुरयाला आउर हुता ले जाते गेला।
30हुन पुरा दुय बरक आपलो किराया चो घर ने रलो,
31आउर जोन हुनचो लगे ऐते रवत, हुन सपाय ले मिलते रलो आउर बिना रोक-टोक खुबे निडर होऊन भाती माहापुरू चो राज चो परचार करते आउर परबु ईशु मसीह चो गोठमन सिकाते रलो।
Currently Selected:
पठालोबितामन 28: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
