पठालोबितामन 27
27
पौलुस चो रोम ने पटाया जातोर
1जिदलदाय ऐ तय होऊन गेली कि आमी जाहाज ले इटली जांवा, तेबे हुनमन पौलुस आउर खिन्डिक दुसर बन्दीमन के बले यूलियुस नाव चो अगुस्तुस चो पलटन चो गोटक सुबेदार चो हाथे सोपुन दिला।
2अद्रमुत्तियुम चो गोटक जाहाज थाने जोन आसिया चो रेटे चो जगामन ने जातो थाने रलो, चेगुन भाती आमी हुनके खोलुन दिलु, आउर अरिस्तर्खुस नाव चो थिस्लुनिके चो गोटक मकिदूनी आमचो संगे रलो।
3दुसर दिने आमी सयदा ने लंगर डाललु, आउर यूलियुस पौलुस उपरे किरपा करून हुनके मीतमन थाने जाऊक दिलो कि हुनचो मान करा जाओ।
4हुता ले जाहाज खोलुन भाती लेहरा उलटा होतोर लागुन आमी साइप्रस चो आड़ ले होऊन भाती गेलु;
5आउर किलिकिया आउर पंफूलिया चो लगे चो समुन्द ने होऊन भाती लुसिया चो मूरा ने उतरलु।
6हुता सुबेदार के सिकन्दरिया चो गोटक जाहाज इटली जाते मिरली, आउर हुन आमके हुन थाने चेगाऊन दिलो।
7जिदलदाय आमी खुबे दिनमन ले धीरे-धीरे जाऊन मशकिल ले कनिदुस चो पुरे पोंचलु, तेबे ऐईकाजे कि लेहरा आमके पुरे बडुक नी देते रली, आमी सलमोने चो पुरे ले होऊन भाती क्रेते चो आड़ ने गेलु;
8आउर हुनचो रेटे-रेटे मशकिल ले जाऊन भाती “शुभलंगरबारी” नाव चो गोटक जगा पोंचलु, जोन थानले लसया नंगर लगे रये।
पौलुस चो सलाह नजर अंदाज
9जिदलदाय खुबे दिन बितुन गेली आउर पानी यातरा ने खतरा ऐईकाजे होते रली कि उपास चो दिन अदायं बितुन चुकुन रली। आउर पौलुस हुनमन के ऐ बोलुन भाती समजालो,
10“ऐ सियानमन, मोके असन जान पड़े से कि ऐ यातरा ने बिपत्ति आउर खुबे हानि, ना मात्र माल आउर जाहाज चो मान्तर आमचो जीव चो बले होतो बिती आय।”
11मान्तर सुबेदार पौलुस चो गोठमन ले कप्तान आउर जाहाज चो मालिक चो गोठमन के बडुन भाती मानलो।
12हुन बंदरगाह सीत बितातो काजे अच्छा नी रली, ऐईकाजे खुबे लोगमन चो बिचार होली कि हुता ले जाहाज ढ़िलुन भाती अगर कोनी रीति ले होऊक सको तो फीनिक्स पोंचुन भाती सीत बिताऊ। ऐ तो क्रेते चो गोटक बंदरगाह आय जोन दक्षिण पश्चिम आउर उतर पश्चिम चो बाटे खुलु आय।
समुन्द ने लेहरा धुका
13जिदलदाय खिन्डिक-खिन्डिक दक्षिणी लेहरा बहुक मुरयाली, तेबे ऐ समजुन भाती कि आमचो कोशिश पुरा होऊन गेली, लंगर उठालु आउर खंडी धरून भाती क्रेते चो लगे जाऊक मुरयालु।
14मान्तर खिन्डिक बेरा पाचे भुईं चो बाटले गोटक बड़े लेहरा धुका उठली, जोन “युरकुलिन” बलाया जाऊ आय।
15जिदलदाय बड़े लेहरा धुका जाहाज थाने पावली तेबे हुन हुनचो पुरे थेबुक नी सकली, आउर आमी हुनके बोहडूक दिलु आउर असने ची बोहड़ते जाते गेलु।
16तेबे कवदा नाव चो गोटक नानी असन टापु चो आड़ ने बोहड़ते-बोहड़ते आमी मशकिल ले डोंगा के थामलु।
17फेर जहाज चलाऊमन हुनके उठाऊन भाती अनेक उपाय करून जाहाज के खाले ले बान्दला, आउर सूरतिस चो चोरबारू उपरे टेकतोर डर ले पाल आउर समान उतराऊन भाती बोहड़ते जाते गेलु।
18जिदलदाय आमी बड़े लेहरा धुका ले खुबे हेचकना आउर ठेगला-मसका खादलु, तेबे दुसर दिने हुन जाहाज चो माल पकाऊक मुरयालु;
19आउर तीसर दिने हुनमन आपलो हाथ ले जाहाज चो सज समान बले पकान दिला।
20जिदलदाय खुबे दिन ले ना बेर, ना तारा दका दिला आउर बड़े लेहरा धुका चलते रली, तेबे आखरी ने आमचो बाचतोर सपाय आशा टुटते रली।
21जिदलदाय हुनमन खुबे दिन ले भुके रऊन गेला, तेबे पौलुस हुनमन चो मंजी उबा होऊन भाती बल्लो, हे लोगमन, जरूरत रली कि तुमी मोचो गोठ मानुन भाती क्रेते ले ना जाहाज खोलतास आउर ना ऐ बिपत्ति ऐती आउर ना ऐ हानि उठातास।
22मान्तर अदायं मय तुमके समजाय से कि हिम्मत करा, कसनबल्लोने तुमचो ले कोचीई जीव चो हानि नी होये, मान्तर मात्र जाहाज चो।
23कसनबल्लोने माहापुरू जेचो मय आंय, आउर जेचो सेवा करू आंय, हुनचो सरग दूतमन आजी राती मोचो लगे ऐऊन भाती बल्ला,
24हे पौलुस, नी डर! तुके राजा चो पुरे उबा होतोर जरूरी आय। दक, माहापुरू सपाय के जोन तुचो संगे यातरा करे सोत, तुके दिलो से।
25ऐईकाजे, हे सियानमन, हिम्मत करा; कसनबल्लोने मय माहापुरू चो बिश्वास करू आंय, कि जसन मोचो ले बोला गेली से, असने ची होये दे।
26मान्तर आमके कोनी टापु थाने जाऊन थेबुक पड़े दे।
जहाज चो टुटतोर
27जिदलदाय चवदवां राती ईली, आउर आमी अद्रिया समुन्द ने भुलकुन फिरते रलु, तेबे अधघर राती चो लगे जाहाज चलाऊमन अंदाजा ले जानला कि आमी कोनी देश चो लगे पोंचु से।
28नाप धरतो के हुनमन एक सव बीस फीट गड़ीयां पावला, आउर खिन्डिक पुरे जाऊन भाती फेर नाप धरला तेबे नबे फीट पावला।
29तेबे पकना जगा ले ठठाय होतोर डर ले हुनमन जाहाज चो पाटकुती चार लंगर लगाला, आउर बिहान होतोर बिनती करते रला।
30मान्तर जिदलदाय जाहाज चलाऊ जाहाज थानले पराऊक चाह ते रवत, आउर गलही ले लंगर लगातोर बाहना ले डोंगा समुन्द ने उतराऊन दिला;
31तेबे पौलुस सुबेदार आउर पलटनमन ले बल्लो, “अगर ऐ जाहाज थाने नी रओ, तो तुमी बले नी बाचुक सकास।”
32तेबे पलटनमन डोरीमन काटून भाती डोंगा घसराऊन दिला।
33जिदलदाय उजर होतो थाने रली, तेबे पौलुस ऐ बोलुन भाती, सपाय के भात खातो काजे समजालो, आजी चवदा दिन होली कि तुमी आशा दकुन-दकुन भुके रलास, आउर काई भात नी खादलास।
34ऐईकाजे तुमके समजाय से कि काई खाआ, जेचो ले तुमचो बचाव होओ; कसनबल्लोने तुमचो ले कोचीई मुण्ड चो गोटक केश बले नी झड़े।
35ऐ बोलुन भाती हुन रोटी धरून भाती सपाय चो पुरे माहापुरू चो धन्यबाद करलो आउर टुटाऊन भाती खाऊक मुरयालो।
36तेबे हुनमन सपाय बले हिम्मत करून भात खाऊक मुरयाला।
37आमी सपाय मिसुन भाती जाहाज थाने दुय सव छिंहत्तर झान रलु।
38जिदलदाय हुनमन भात खाऊन संतुष्ट होला, तेबे गऊँ के समुन्द ने पकान भाती जाहाज उसास करूक मुरयाला।
39जिदलदाय दिन निकरली तेबे हुनमन हुन देश के नी चिताला, मान्तर गोटक खाड़ी दकला जेचो खंडी चार कोनया रली, आउर बिचार करला कि अगर होऊक सको तो ऐथाय जाहाज के टेकाऊ।
40तेबे हुनमन लंगरमन के ढ़िलुन भाती समुन्द ने छांडुन दिला आउर हुदलीदाय ड़ोंगा चो गांट ढ़िलुन दिला, आउर लेहरा चो पुरे दुसर पाल चेगाऊन भाती खंडी रेटे गेला।
41मान्तर दुय समुन्द चो जोड़ान चो जगा पडुन भाती हुनमन जाहाज के टेकाला, आउर गलही तो धुनकी होऊन गड़ली आउर गुचुक नी सकली; मान्तर जाहाज चो पाटकुती हरलामन चो बल ले टुटुक मुरयाली।
42तेबे पलटनमन चो ऐ बीचार होली कि बन्दीमन के मारून देऊ, असन नी होओ कि कोनी पोंअरून भाती निकरून परा ओत।
43मान्तर सुबेदार पौलुस के बचातोर इच्छा ले हुनमन के ऐ बिचार ले थेबालो आउर ऐ बल्लो, कि जोन पोंअरूक सकोत, पयले डगाऊन भाती खंडी थाने निकरून जाओत;
44आउर बाकी कोनी पटरीमन थाने, आउर कोनी जाहाज चो दुसर तीजमन चो साहारा निकरून जाओत। ऐई रीति ले सपाय कोनी भूईं थाने बाचुन निकरला।
Currently Selected:
पठालोबितामन 27: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
