पठालोबितामन 21
21
यरूशलेम चो यातरा
1जिदलदाय आमी हुनमन ले अलग होऊन भाती जाहाज खोललु, तेबे सीदा बाट ले कोस ने ईलु, आउर दुसर दिने रूदुस ने आउर हुता ले पतरा ने।
2हुता गोटक जाहाज फिनिके ने जातोर मिरली, आउर आमी हुन थाने चेगुन भाती हुनके खोलुन दिलु।
3जिदलदाय साइप्रस दका दिली, तेबे आमी हुनके डेबरी हाथ छांडलु, आउर सीरिया बाटे जाऊन भाती सूर ने उतरलु; कसनबल्लोने हुता जाहाज चो माल उतरातोर रली।
4चेलामन के भेटुन भाती आमी हुता सात दिन ले रलु। हुनमन आत्मा चो सिकालोर पौलुस के बल्ला कि यरूशलेम ने पाँय नी संगाव।
5जिदलदाय हुन दिन पुरा होऊन गेली, तेबे आमी हुता ले जाते गेलु; आउर सपाय बायले लेकीमन आउर लेकामन संगे आमके नंगर चो बाहार ले पोंचाला; आउर आमी रेटे मांडी पाडून भाती पारथना करलु,
6तेबे गोटक दुसर ले बिदा होऊन भाती, आमी तेबे जाहाज थाने चेगलु आउर हुनमन आपलो-आपलो घरे बाहडून गेला।
7तेबे आमी सूर ले पानी नाकुन भाती पतुलिमयिस ने पोंचलु, आउर भाईमन के जुहार करून हुनमन चो संगे गोटक दिन रलु।
8दुसर दिने आमी हुता ले जाऊन भाती कैसरिया ने ईलु, आउर फिलिप्पुस नगतखबर परचारकरू चो घर ने जोन सात झान मन थानले गोटक रलो; जाऊन भाती हुनचो थाने रलु।
9हुनचो चार कुंआरी बेटीमन रला, जोन अगम गोठ करते रवत।
10जिदलदाय आमी हुता खुबे दिन रऊन गेलु, तेबे अगबुस नाव चो गोटक अगम गिआनी यहूदिया ले ईलो।
11हुन आमचो लगे ऐऊन भाती पौलुस चो कटीबंद धरलो, आउर आपलो हाथ पाँय बान्दुन भाती बल्लो, “पवितर आत्मा ऐ बले से कि जोन माने चो ऐ कटीबन्ध आय, हुनके यरूशलेम ने यहूदी ऐई रीति ले बांद दे, आउर दुसर जातिमन चो हाथे सोप दे।”
12जिदलदाय आमी ऐ गोठमन सुनलु, तेबे आमी आउर हुता चो लोगमन हुनचो ले बिनती करला कि यरूशलेम बाटे नी जाओ।
13मान्तर पौलुस जबाप दिलो, “तुमी काय करसास कि गागुन-गागुन भाती मोचो मन टुटायासास? मय तो परबु ईशु चो नाव चो काजे यरूशलेम ने ना मात्र बान्दा जातोर ची काजे मान्तर मरतो काजे बले तिआर आसे।”
14जिदलदाय हुन नी मानलो तेबे आमी ऐ बोलुन भाती ओगाय होऊन गेलु, “परबु चो इच्छा पुरा होओ।”
15ऐ दिनमन चो पाचे आमी तिआर करलु आउर यरूशलेम चो बाटे जाते गेलु।
16कैसरिया ले बले कितलो चेलामन आमचो संगे होला, आउर आमके मनासोन नाव चो साइप्रस चो गोटक जुना चेला चो थाने धरून आनला, कि आमी हुनचो थाने ठेबु।
यरूशलेम ने पौलुस चो ऐतोर
17जिदलदाय आमी यरूशलेम ने पोंचलु, तेबे भाई बड़े हरिक चो संगे आमचो ले मिलला।
18दुसर दिने पौलुस आमके धरून भाती याकूब चो लगे गेलो, जोन थाने सपाय सियान रूंड़ा रवत।
19तेबे हुन हुनमन के जुहार करून, जोन-जोन काम माहापुरू हुनचो सेवा चो बाटले दुसर जातिमन ने करू रलो, गोटक-गोटक करून सपाय सांगला।
20हुनमन ऐ सुनुन भाती माहापुरू चो महिमा करला, फेर हुनचो ले बल्ला, हे भाई, तुय दक सीस कि यहूदीमन थानले कितलो हजार बिश्वास करला से; आउर सपाय नियम चो काजे बाय होला सोत।
21हुनमन के तुचो बारे ने सिकाया गेली से कि तुय दुसर जातिमन ने रतो बिता यहूदीमन के मूसा ले फेरून जातो काजे सिकाय सीस, आउर बोलु आस, कि ना आपलो पिलामन चो खतना करावा आउर ना रीतिमन थाने चला।
22तेबे फेर काय करा जाओ? लोग जरूर सुन दे कि तुय ईली सीस।
23ऐईकाजे जोन आमी तुचो ले बोलु आंव, हुन कर। आमचो थाने चार माने आसोत जोनमन बर मांगला सोत।
24हुनमन के धरून भाती हुनमन चो संगे आपन खुद के शुद्ध कर; आउर हुनमन चो काजे खरचा देस कि हुनमन मुण्ड खुरा ओत। तेबे सपाय जानुन जादे कि जोन गोठमन हुनमन के तुचो बारे ने सांगा गेली, हुन थाने काई सत निआय मान्तर तुय खुद बले नियम के मानुन भाती हुनचो अनुसार चलु आस।
25“मान्तर हुन दुसर जातिमन चो बारे ने जोनमन बिश्वास करला से, आमी ऐ फयसला करून भाती लिकुन पठालु से कि हुनमन मुरतीमन चो पुरे पुजलो बिती मास ले, आउर लऊ ले आउर टोडरा अलटलो बिती चो मास ले, आउर बेबीचार ले बाचुन रओत।”
26तेबे पौलुस हुन मानेमन के धरून भाती, आउर दुसर दिने हुनमन चो संगे शुद्ध होऊन भाती मंदिर ने गेलो, आउर हुता सांगुन दिलो कि अशुद्ध होतोर दिने, बल्लोने हुनमन थानले हरकोनी चो काजे चढ़ावा चेगाय जातोर दिन केबे पुरा होये दे।
मंदिर ने पौलुस चो गिरफ्तारी
27जिदलदाय हुन सात दिन पुरा होतो बिती रये, तेबे आसिया चो यहूदीमन पौलुस के मंदिर ने दकुन भाती सपाय लोगमन के हुच हुचाला, आउर असन चिचयाऊन भाती हुनके धरला,
28“हे इस्राएलीमन, सायता करा; ऐ हुनी माने आय, जोन लोगमन चो, आउर नियम चो, आउर ऐ जगा चो बिरूद ने हर जगा सपाय लोगमन के सिकाऊ आय, ऐथा ले कि यूनानीमन के बले मंदिर ने आनुन भाती हुन ऐ पवितर जगा के अशुद्ध करलो से।”
29हुनमन ऐचो ले पयले इफिसिमन त्रुफिमुस के हुनचो संगे नंगर ने दकु रला, आउर समजु रवत कि पौलुस हुनके मंदिर ने धरून ईलो से।
30तेबे सपाय नंगर ने कोलार मातली, आउर लोग पराऊन भाती रूंड़ा होला आउर पौलुस के धरून भाती मंदिर चो बाहरे ओड़गडुन आनला, आउर तुरते बाट बंद करा गेली।
31जिदलदाय हुनमन हुनके मारून देतोर मन करते रवत, तेबे पलटन चो सरदार के खबर पोंचली कि पुईतराय यरूशलेम ने कोलार होये से।
32तेबे हुन तुरते पलटनमन आउर सुबेदारमन के धरून भाती हुनमन चो लगे खाले पराऊन ईलो; आउर हुनमन पलटन चो सुबेदार के आउर पलटनमन के दकुन भाती पौलुस के मारतोर पेटतोर छांडुन दिला।
33तेबे पलटन चो सरदार लगे ऐऊन भाती हुनके धरलो; आउर दुय सिकरामन ले बान्दतोर हुकुम देऊन भाती पचारूक मुरयालो, “ऐ कोन आय आउर ऐ काय करलो से?”
34मान्तर भीड़ ले कोनी काई आउर कोनी काई चिचयाते रला। जिदलदाय कोलार चो लागुन हुन ठीक सत नी जानुक सकलो, तेबे हुनके गढ़ ने धरून जातोर हुकुम दिलो।
35जिदलदाय हुन पयटा थाने पोंचलो, तेबे असन होली कि भीड़ चो दबाव चो लागुन पलटनमन के हुनके उठाऊन भाती नेऊक पड़ली।
36कसनबल्लोने लोगमन चो भीड़ ऐ चिचयाते-चिचयाते हुनचो पाटकुती पडु रली, “हुनचो खात्मा करून दिआस।”
37जिदलदाय हुनमन पौलुस के गढ़ ने धरून जातो थाने रवत, तेबे हुन पलटन चो सरदार ले बल्लो, “काय मोके हुकुम आसे कि मय तुचो ले काई बलें दें?” हुन बल्लो, काय तुय यूनानी जानीस?
38काय तुय हुन मिस्री नुआस, जोन ऐ दिनमन ले पयले बिदरोही बनाऊन भाती, चार हजार हत्यार धरलो लोगमन के रान ने धरून गेलो?
39पौलुस बल्लो, “मय तो तरसुस चो यहूदी माने आंय! किलिकिया चो नामचीन नंगर चो रतो बिता आंय। मय तुचो ले बिनती करें से कि मोके लोगमन ले गोठयाऊक देस।”
40जिदलदाय हुन हुकुम दिलो, तेबे पौलुस पयटा थाने उबा होऊन भाती लोगमन के हाथ ले सोयका दिलो। जिदलदाय हुनमन ओगाय होला तेबे हुन इब्रानी भाषा ने बोलुक मुरयालो:
Currently Selected:
पठालोबितामन 21: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
