पठालोबितामन 12
12
हेरोदेस पलटा धरलो
1हुन समया हेरोदेस राजा कलीसिया चो कितलो मानेमन के कन्दरातो काजे हुनमन उपरे हाथ लगालो।
2हुन यूहन्ना चो भाई याकूब के खंडा ले मराऊन दिलो।
3जिदलदाय हुन दकलो कि यहूदी लोग ऐचो ले हरिक होऊ आत, तेबे हुन पतरस के बले धरलो। हुन दिन अखमीरी रोटी चो दिन रये।
4हुन हुनके धरून जयलघर ने डाललो, आउर चार-चार पलटनमन चो चार पाहारा ने संगालो; ऐ बिचार ले कि फसह चो पाचे हुनके लोगमन चो पुरे आनो।
पतरस जयलघर ले निकरतोर
5जयलघर ने पतरस बंद रलो; मान्तर कलीसिया हुनचो काजे मन लगाऊन भाती माहापुरू ले पारथना करते रली।
6जिदलदाय हेरोदेस हुनके लोगमन चो पुरे आनतोर ने रलो, हुनी राती पतरस दुय सिकरामन ले बान्दी होलोर दुय पलटनमन चो मंजी ने सोहते रलो; आउर पाहराकरूमन बाट थाने जयलघर चो राका करते रवत।
7तेबे दका, परबु चो गोटक सरगदूत ऐऊन उबा होलो आउर हुन बाकरा ने उजर बरली, आउर हुन पतरस चो पंजरा ने हाथ मारून हुनके चेतालो आउर बल्लो, “उठ, झटके कर।” आउर हुनचो हाथमन ले सिकरा हिटुन भाती घसरुन पढ़ली।
8तेबे सरगदूत हुनचो ले बल्लो, “करांड बांद, आउर आपलो पनही पिंद।” हुन असने ची करलो। फेर हुन हुनचो ले बल्लो, “आपलो फटीई पिन्दुन भाती मोचो पाटकुती आव।”
9हुन निकरून भाती हुनचो पाटे होलो; मान्तर ऐ नी जानते रलो कि जोन काई सरगदूत करे से हुन सत आय, मान्तर ऐ समजते रलो कि मय दरशन दकें सें।
10तेबे हुन पयला आउर दुसरा पाहारा ले निकरून भाती हुन लुआ चो कपाट थाने पोंचला, जोन नंगर चो घाई आसे। हुन हुनमन चो काजे खुद ले खुद उगाढ़ी होली, आउर हुनमन निकरून भाती गोटक ची खोर होऊन भाती गेला, आउर तुरते ची सरगदूत हुनके छांडुन भाती जाते गेलो।
11तेबे पतरस हुसीयार होऊन भाती बल्लो, “अदायं मय सत जानले से कि परबु आपलो सरगदूत पटाऊन भाती मोके हेरोदेस चो हाथ ले छंडालो, आउर यहूदीमन चो सपाय आशा टुटाऊन दिलो से।”
12ऐ जानुन भाती हुन यूहन्ना चो आया मरियम चो घरे ईलो, जोन मरकुस बलाया जाऊ आय। हुता खुबे असन लोग रूंड़ा होऊन भाती पारथना करते रवत।
13जिदलदाय हुन कपाट चो खिड़की ठक-ठकालो, तेबे रूदें नाव चो गोटक दासी दकुक लाय ईली।
14पतरस चो शब्द चिताऊन भाती हुन हरिक चो मारून कपाट नी उगाढ़ली, मान्तर पराऊन भाती भीतरे गेली आउर सांगली कि पतरस बाट थाने उबा आसे।
15हुनमन हुनके बल्ला, “तुय बोई आस।” मान्तर हुन हिम्मत ले बल्ली कि असने ची आय। तेबे हुनमन बल्ला, “हुनचो सरगदूत होये दे।”
16मान्तर पतरस ठक-ठकाते ची रलो: आउर हुनमन खिड़की उगाढ़ला, आउर हुनके दकुन भाती चकित रऊन गेला।
17तेबे हुन हुनमन के हाथ ले सोयका दकालो कि ओगाय राहा; आउर हुनमन के सांगलो कि परबु कसन रीति ले हुनके जयलघर ले निकराऊन आनलो से। फेर बल्लो, “याकूब आउर भाईमन के ऐ गोठ सांगुन दिआस।” तेबे निकरून भाती दुसर जगा जाते गेलो।
18बिहाने पलटनमन ने बड़े हड़-बड़ होऊन गेली कि पतरस चो काय होली।
19जिदलदाय हेरोदेस हुनचो जाच करलो आउर नी मिरालो, तेबे राका करूमन चो जाच करून हुकुम दिलो कि हुनमन मारून दिया जाओत: आउर हुन यहूदिया के छांडुन भाती कैसरिया ने जाऊन भाती रऊक मुरयालो।
हेरोदेस चो कीड़ा पडुन भाती मरतोर
20हेरोदेस सूर आउर सयदा चो लोगमन ले खुबे हरिक नी रलो। ऐईकाजे हुनमन गोटक मन होऊन भाती हुनचो लगे ईला, आउर बलास्तुस के जोन राजा चो गोटक करमचारी रलो, मानाऊन भाती मिलुक लाय चाह लो; कसनबल्लोने राजा चो देश ले हुनमन चो देश चो पालन पोषन होते रली।
21ठेबालो दिने हेरोदेस राज फटीई पिन्दुन भाती सिंघासन थाने बसलो, आउर हुनमन के सांगुक मुरयालो।
22तेबे लोग चिचयाऊन उठला, “ऐ तो माने चो नाई ईश्पर चो शब्द आय।”
23हुदलीदाय परबु चो गोटक सरगदूत तुरते हुनके बेमार करलो, कसनबल्लोने हुन माहापुरू के महिमा नी दिलो; आउर हुन कीड़ा पडुन मरून गेलो।
24मान्तर माहापुरू चो बचन बाड़ते आउर फयलते गेली।
25जिदलदाय बरनबास आउर शाऊल आपलो सेवा पुरा करून चुकला तेबे यूहन्ना के जोन मरकुस बलाया जाऊ आय, संगे धरून यरूशलेम ले आपस ईला।
Currently Selected:
पठालोबितामन 12: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
