पठालोबितामन 11
11
पतरस चो यरूशलेम फिरून ऐतोर
1फेर पठालोबिता आउर भाईमन जोन यहूदिया ने रवत सुनला कि दुसर जातिमन बले माहापुरू चो बचन मानला सोत।
2आउर जिदलदाय पतरस यरूशलेम ने ईलो, तेबे खतना करलो लोग हुनचो ले बहस करूक मुरयाला,
3“तुय खतना नी करलो लोगमन थाने जाऊन भाती हुनमन चो संगे खादलिस।”
4तेबे पतरस हुनमन के मुर ले लाईन ले बोलुन सुनालो:
5मय याफा नंगर ने पारथना करते रले, आउर बेसुद होऊन भाती गोटक दरशन दकले कि गोटक बरतन, बड़े चदर चो असन चारो कोना ले लटकालोर, बादरी ले उतरून भाती मोचो लगे ईली।
6जिदलदाय मय हुनचो उपरे धिआन करले, तेबे हुन थाने धरतनी चो चार पाँया आउर रान पशु आउर रेंगतो बिती जंतु आउर बादरी चो चड़ीई दकले;
7आउर ऐ शब्द बले सुनले, हे पतरस उठ, मार आउर खा।
8मय बल्ले, नाई परबु, नाई; कसनबल्लोने कोनी अपवितर नाहले अशुद्ध तीज मोचो मुंह ने केबीई नी गेली।
9ऐचो जबाप ने बादरी ले दुसरहार शब्द होली, जोन काई माहापुरू शुद्ध ठेबालो से, हुनके अशुद्ध नी बोल।
10तीन हार ले असने ची होली; तेबे सपाय काई फेर बादरी ने झिकुन धरा गेली।
11आउर दका, तुरते तीन झान माने जोन कैसरिया ले मोचो लगे पटाया जाऊ रवत, हुन घर ने जोन थाने आमी रलु, ऐऊन उबा होला।
12तेबे आत्मा मोचो ले हुनमन चो संगे बिना संका होतो काजे बल्लो, आउर ऐ छय भाई बले मोचो संगे होला; आउर आमी हुन माने चो घरे गेलु।
13हुन आमके सांगलो, कि हुन गोटक सरगदूत के आपलो घरे उबलोर दकलो, जोन हुनके बल्लो, याफा ने माने पटाऊन भाती शिमोन के जोन पतरस बलाया जाऊ आय, हाग देस।
14हुन तुमचो ले असन गोठ बले दे, जोनमन चो लागुन तुय आउर तुचो सपाय घर मुक्ति पाये दे।
15जिदलदाय मय गोठयाऊक मुरयाले, तेबे पवितर आत्मा हुनमन उपरे हुनी रीति ले उतरली जोन रीति ले मुर ने आमचो उपरे उतरू रये।
16तेबे मोके परबु चो हुन बचन सुरता ईली; जोन हुन बोलु रलो, यूहन्ना तो पानी ले डूबन दिलो, मान्तर तुमी पवितर आत्मा ले डूबन पाहा से।
17आउर जिदलदाय माहापुरू हुनमन के बले हुनी बर दिलो, जोन आमके परबु ईशु मसीह चो उपरे बिश्वास करलो ले मिरू रये; तेबे मय कोन रले जोन माहापुरू के थेबाक सकते?
18ऐ सुनुन भाती हुनमन ओगाय रला, आउर माहापुरू चो बड़ाई करून बोलुक धरला, तेबे तो माहापुरू दुसर जातिमन के बले जीवन चो काजे मन फिराव चो बर दिलो से।
अन्ताकिया ने शाऊल आउर बरनबास
19जोन लोग हुन कलेश चो लागुन जोन स्तिफनुस चो कारन पडु रली, जतखत होऊन जाऊ रवत, हुनमन फिरते-फिरते फिनिके आउर साइप्रस आउर अन्ताकिया ने पोंचला; मान्तर यहूदीमन के छांडुन कोनी आउर के बचन नी सुनाते रवत।
20मान्तर हुनमन थानले कितलो साइप्रस बासी आउर कुरेनी रवत, जोन अन्ताकिया ने ऐऊन भाती यूनानीमन के बले परबु ईशु चो नगतखबर चो गोठमन सुनाऊक मुरयाला।
21परबु चो हाथ हुनमन उपरे रली, आउर खुबे लोग बिश्वास करून परबु चो बाटे फिरला।
22जिदलदाय हुनमन चो चरचा यरूशलेम चो कलीसिया चो सुनतोर ने ईली, तेबे हुनमन बरनबास के अन्ताकिया पठाला।
23हुन हुता अमरून भाती आउर माहापुरू चो अनुग्रह के दकुन भाती हरिक होलो, आउर सपाय के उपदेश दिलो कि तन-मन लगाऊन भाती परबु ले लेपटून राहा।
24हुन गोटक अच्छा माने रलो, आउर पवितर आत्मा आउर बिश्वास ले समपूरन रलो; आउर दुसर खुबे असन लोग परबु ने ऐऊन मिसला।
25तेबे हुन शाऊल के डगरातो काजे तरसुस ने जाते गेलो।
26जिदलदाय हुन हुनके भेटलो तेबे हुनके अन्ताकिया आनलो; आउर असन होली कि हुनमन गोटक बरक ले कलीसिया चो संगे मिलतोर आउर खुबे लोगमन के उपदेश देते रला; आउर चेलामन सपाय ले पयले अन्ताकिया ने ची मसीह बलाया गेला।
27हुनी दिनमन ने कितलो अगम गिआनी यरूशलेम ले अन्ताकिया ईला।
28हुनमन थानले अगबुस नाव चो गोटक उबा होऊन आत्मा चो सिक्या ले ऐ सांगलो कि पुईतराय जगत ने बड़े अकाल पड़े दे हुन अकाल क्लौदियुस चो समया ने पड़ली।
29तेबे चेलामन ठानला कि हरकोनी आपलो-आपलो पुंजी चो अनुसार यहूदिया ने रतो बिता भाईमन चो सायता काजे काई पटाऊं।
30हुनमन असने ची करला; आउर बरनबास आउर शाऊल चो हाथे सियानमन चो लगे काई पटाऊन दिला।
Currently Selected:
पठालोबितामन 11: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
