मरकुस 10

वियावोन एने छुळनेन वारामा

(मत्ती 19:1-12)

1ओवतेन येसु चा गोथू उठीन यहुदियान हदमा एने यरदन नोंदीन पोरले धोळे आव्यु गोरदी तेरेनचा आवीन एखठी होय गोयी, एने येसु तेरी रिती नुसार तीनु काजे ओवी सिकाळने बाज गोयू.

2तेत्यार फरुशी तीना साते आवीन तेरी पारोक कोरीन तीना काजे पुछ्या, “काय यो वारू छे कि ओदमी आपनी लाडी काजे छुळे?” 3चू तीना काजे जोवाब आप्यू, “मुसा तुमु काजे काय आग्या आपलु छे?” 4चे कोया, “मुसा छुट चिट्ठी लिखने एने छुळनेन आग्या आपलु छे.” 5येसु तीनु काजे कोयू, “तुमरा मोनोन काठलान वोजेसी चू तुमरेन कोरता जी आग्या लिख्यू. 6बाकीन कोव बोनावनेन टेमे परमेश्वर नोर एने नारी कोरीन तीनु काजे बोनावलु छे. 7एरे वोजेसी माणूस आपना आसी-बासासी ओलोग होयीन आपनी लाडी पुठी रोयसे, एने चे दुय एक डील होयसे;. 8इनान कोरता चे हिमी दुय नि बाकीन एक डील छे. 9इनान कोरता जीना काजे परमेश्वर जुळलू छे तीना काजे माणूस ओलोग नि कोरनो.” 10एने घोरमा चेला एरा बारामा येसु काजे ओवी पुछ्या. 11चू तीनु काजे कोयू, “जू कुदू आपनी लाडी काजे छुळीन दिसरी पुठी वियाव कोरसे ती चू तिनी पेहेलीन खिलापमा व्यभिचार कोरतेलू.” 12एने जेतार लाडी आपना पाहणा काजे छुळीन दिसरा साते वियाव कोरे ती ची व्यभिचार कोरतेली.

पुऱ्या एने सोरगोन राज

(मत्ती 19:13-15; लुका 18:15-17)

13ओवतेन माणसे पुऱ्या काजे तेरेनचा लावणे बाज गोया कि चू तिंदरे पोर हात मेके, बाकीन चेला तीनु काजे लोडणे बाज गोया. 14येसु यो देख्यू रीसवायीन तीनु काजे कोयू, “पुऱ्या काजे मारेंचा आवने देयू एने तीनु काजे मोना मा कोरू, काहाकि परमेश्वरोन राज ओसला जून छे. 15मे तुमु काजे छाचलीन कोयो कि जो कुदू परमेश्वरोन राज काजे पुऱ्या सारको स्वीकार नि कोरे, चू तीनामा कोबी नि जाय सोके.” 16एने चू तीनु काजे खुवामा लेदू, एने तिनु पोर हात मेकीन तीनु काजे आशिष आप्यू.

मालदार पुऱ्यु एने परमेश्वरोन राज

(मत्ती 19:16-30; लुका 18:18-30)

17जेतार चू चा गोथू निकवीन वाटे जातु होतु, ती एक माणूस तेरेनचा दोवळीन आव्यु, एने तेरे ओगोव मांडा टेकविन तीना काजे पुछु, “हे वारला गुरु, ओमोर जीवनोन ओधीकारी होयनेन कोरता मे काय कोरो?” 18येसु तीना काजे कोयू, “तू मेसेक वारला काहा कोयतेलु? कुदू वारला नि होय, निस्तु एक छे मतलब परमेश्वर, 19तु आग्या काजे ते जानतलु छे, ‘खुन नि कोरनो, व्यभिचार नि कोरनो, चुरी नि कोरनो, झुटी गोवा नि आपनो, बुराई नि कोरनो, आपना बासोन एने आपनी आशोन मान कोरनो.’” 20चू तीना काजे कोयू, “हे गुरु, इना आखा काजे मे नानलु होतु तिहिन मानतू आव रोयू.” 21येसु तिना पोर नोजोर नाखीन तीना पोर मोंग कोऱ्यु, एने तीना काजे कोयू, “तारेमा एक वातोन कोमी छे जा जो काहीन तारो छे तीना काजे वेचीन गोरीबो काजे आप दे, एने तुसे काजे सोरगोमा धोन जोळसे, एने आवीन मार पोछोव चाल.” 22इनी वातो पोरसी तेरो मुय नोराज होय गोयो, एने चू दुख कोरतू जात रोयू, काहाकि चू घोनु मालदार होतु.

23येसु चारू धोळे भावीन आपना चेला काजे कोयू, “मालदारोन परमेश्वरोन राजमा जाणेन कोरता कोसो काठो छे.” 24चेला तेरी वातोसी वाहराय गोया इना पर सी येसु एने तीनु काजे कोयू, “हे पुऱ्या, जू धोनोपोर भुरसू राखतेलू, तिंदरेन कोरता परमेश्वरोन राजमा जानो कोसो काठो छे. 25परमेश्वरोन राजमा मालदारोन जानेसी उटळान सुयोन नाचकामा गोथो निकवीन जाणो सोपो छे.” 26चे घोन जुदा वाहरायीन एक दिसरा काजे कोयने बाज गोया, “ती ओवतेन कुनीन छुटकारू होय सोकसे?” 27येसु तिंदरे भुनी भावीन कोयू, “माणसोसी ते यो नि होय सोकतेलो, बाकीन परमेश्वर सी होय सोकतेलो; काहाकि परमेश्वर सी आखो काहीन होय सोकतेलो.” 28पतरस तीना काजे कोयने बाज गोयू, “कि देख, आमु ते आखो काय छुळीन तारे पोछोव आवला छे.” 29येसु कोयू, “मे तुमु काजे छाचलीन कोयो कि ओसो कुदू नि होय, जू मारे एने वारली खोबरन कोरता घोर एने भाशोक एने बहोनिशाक एने आशोक एने बासोक एने पुऱ्या-पारीक एने खेतोक छुळ देदला छे, 30एने हिमी इनी टेमे सोव गुणा नि जोळे, घोरे एने भाशे एने बहोनिशा एने आया एने पुऱ्या-पारी एने खेतो काजे, एने तोकलीतो साते एने आवने वावा संसारमा ओमोर जीवन. 31बाकीन लोकेत जे पेहेला छे, पोछोव होय जासे; एने जे पोछोव छे, चे पेहेल होय जासे.”

येसुन मोरनेन तिसरी भविष्यवाणी

(मत्ती 20:17-19; लुका 18:31-34)

32येसु एने हेरा चेला यरुशलेममा जानेण वाटे होता, एने येसु तिंदरे ओगोव-ओगोव जातु होतु चे वाहराय गोयला होता एने चे तेरे पोछोव-पोछोव चालता होता चे बिह गोयला होता तेत्यार येसु ओवी तीनु बारे जोनाक लीन तीनु काजे चे वाते कोयने बाज गोयू, जी तीना पोर आवने वावी होती, 33“देखू, आमु यरुशलेममा जाने बाज रोया, एने माणसोन पुऱ्यु प्रधान पुजारान एने शास्त्रीन हाते धोरवाय जासे, एने चे तीना काजे घात कोरनेन सही ठेरावसे, एने दिसरा जातीन हातोमा आप देसे. 34एने चे तीना काजे मोजाकमा उळावसे, एने तिना पोर थूपसे, एने तीना काजे चापका मार से एने तेरु जीव लेसे, एने तीन दाहळामा चू पोछु जीवतु होय जासे.”

याकुब एने योहानोन विनता

(मत्ती 20:20-28)

35तेत्यार जब्दिन पुऱ्यु याकुब एने योहान तेरेनचा आवीन कोया, “हे गुरु, आमरी मोर्जी छे कि जो काहीन आमु तार जु मागजे, चो तू आमरेन कोरता कोर.” 36चू तीना काजे कोयू, “तुमु काजे काय जुवे कि मे तुमरेन कोरता कोरो?” 37चे तीना काजे कोया, “आमु काजे यो आप कि तारी महिमामा आमरे मायीन एक तारे जेवळे एने दिसरू तारे डाखरे बोसे.” 38येसु तीनु काजे कोयू, “तुमु नि सोमोजतेला कि काय मांगणे बाज रोया? जो प्यालू मे पिणे वावु छे, काय तुमु पी सोकसू? एने जु बाप्तिस्मा मे लेणे वावु छे, काय तुमु ली सोकसू?” 39चे तीना काजे कोया, “आमरेसी होय सोकसे” येसु तीनु काजे कोयू, “यो प्यालू मे पीने वावु छे; तुमु पिसू एने जू बाप्तिस्मा मे लेणे वावु छे, चू लेसू. 40बाकीन जिनान कोरीन तीयार कोरलु छे, तीना काजे छुळीन एने कुदा काजे मारे जेवळे एने डाखरे बोसाळनेण मारो काम नि होय.”

41यो सोमवीन दोस याकुब एने योहानपोर रीसवाया. 42एने येसु तीनु काजे साते बुलावीन तीनु काजे कोयू, “तुमु सोमेजतेला कि जे दिसरा जातीन सुबेदार सोमोजतेला, चे तीनु पोर हुकुम कोरतेला; एने तिंदरेमा जे मोटला छे, तिंदरे पोर होक चालाळतेला. 43बाकीन तुमरेमा ओसा नि होय, नीती जू कुदू तुमरेमा मोटू होयनेन देखे चु तुमरू सेवक बोने. 44एने जु कुदू तुमरेमा प्रधान बोनने देखे, चू तुमरू पावोर बोनने जुवे. 45काहाकि माणसोन पुऱ्यु इनान कोरता नि आव्यु कि तेरी सेवा चाकरी कोरावने, बाकीन इनान कोरता आव्यु कि खुद सेवा कोरे, एने घोणा सोवटा काजे छुळावनेन कोरता तेरु जीव आपने.”

आन्दवा बर्तीमाय काजे देखायनो

(मत्ती 20:29-34; लुका 18:35-43)

46एने चे यरीहो सोहोरोमा आव्या, एने जेतार चू एने तेरा चेला, एने एक घोनी मोटी गोरदी यरीहोमा गोथी निकवती होती, तेत्यार तिमाईन पुऱ्यु बरतिमाई एक आंदवू भिकारी, वाटी धोळे बोस रोयू होतु. 47चू जो सोमवीन कि येसु नासरी छे, आयळीन-आयळीन कोयने बाज गोयू, “हे मसिह दाऊदन पुऱ्या, येसु मार पोर दया कोर.” 48लोकेत जोना तीना काजे दोटाव्या कि हुग रोय, बाकीन चू एने आयळने बाज गोयू, “कि हे दाऊदन पुऱ्या, मार पोर दया कोर” 49तेत्यार येसु उबरोयीन कोयू, “हिना काजे बुलावू” एने माणसे तीना आंदवा काजे बुलावीन तीना काजे कोया, “हिंमत बाद! उठ! चू तुसेक बुलावे.” 50चू तेरा कापळा नाखीन मामार उठ्यू, एने येसुनचा आव्यु. 51इनापोरसी येसु तीना काजे कोयू, “तारी काय मोर्जी छे कि मे तारेन कोरता कोरो?” आंदवू तीना काजे कोयू, “हे रब्बी, यो कि मे देखणे बाजजाम.” 52येसु तीना काजे कोयू, “जात रोय तारु भुरसू तुसेक वारू कोरलु छे” चू तेत्यारुत देखणे बाज गोयू, एने वाटे तेर पोछोव चाल देदू.

Currently Selected:

मरकुस 10: BFBNT

Highlight

Copy