लुका 9

बारा चेला काजे मुकोलनो

(मत्ती 10:5-15; मरकुस 6:7-13)

1जेतार येसु बारा जोना काजे बुलावीन तीनुक आखी भुंडली आत्मा पोर एने बिमारी काजे वारू कोरणेन ताकत एने होक आप्यू, 2एने तीनुक परमेश्वरोन राजोन प्रचार कोरणेन एने बिमारी वावा काजे वारू कोरणेन कोरता मूकल्यु. 3चू तीनुक कोयू, “वाटे जुगू काहीन झुन लेता, नि ते लाकळी, नि झुवनो, नि रुटा नि पोयशा एने नि दुय-दुय डोगला. 4जीना कुदान घोरमा तुमु जासू चा रोयू एने चांत गोथा जावू.” 5“जू कुदू तुमरू स्वीकार नी कोरे, तीना सोहोरोमा चालता जायीन आपना पायोन छोयळू झोटकी देवू कि तीनु पोर गोवायी होये.” 6आखरी चे निकवीन गाव-गाव वारली खोबर सोमवावता, एने होर एक माणसो काजे वारू कोरता जायीन फिरता रोया.

हेरोदोसोन बिहनो

(मत्ती 14:1-12; मरकुस 6:14-29)

7देसोन चौथायीन राजा हेरोद यो आखो सोमवीन बिह गोयू, काहाकि काहनास कोया कि योहान मोरलामा गोथू जीव उठलु छे, 8एने कहानास यो कि एलिया देखाय पोळ्यु, एने कुदू यो कि जूनला भविष्य कोरता मायलु कुदु जीव उठलु छे. 9बाकीन हेरोद कोयू, “योहानोन ते मे मुनको काटाळलु, हीमी यु कुन छे जेरा बारामा मे ओसी वात सोमवतलु?” एने चू तीना काजे देखणेन मोर्जी कोऱ्यु.

पाच हजार काजे खावाळनो

(मत्ती 14:13-21; मरकुस 6:30-44; योहान 6:1-14)

10ओवतेन प्रेषितोन पोछा आवीन जो काहीन चे कोरला होता, तीना काजे कोया; एने चू तीनु काजे ओलोग कोरीन बेथसदा नावोन सोहोरोमा लीगोयू. 11यो सोमवीन गोरदी तेरे पोछोव चाल पोळी, एने चू खुशीसी तीनुक भेट्यू, एने तिंदरे पुठी परमेश्वरोन राजोन वाते कोरणे बाज गोयू, एने जीनुक आरगाई जुवती होती तीनुक आरगाई आप्यू. 12जेतार दाहळू ढोवणे बाज गोयू ती बारा जोना आवीन येसु काजे कोया, “गोरदी काजे मुकली दे कि चारू धोळेन गावे एने वोसत्यामा जायीन रोये एने खाणेन सोय कोरे, काहाकि आपनु न्या सुनसान जागे छे.” 13चू तीनुक कोयू, “तुमुत तीनु काजे खाणो आपु” चे कोया, “आमरे जुव पाच रुटा एने दुय माछा छुळीन ओवी काहीन नी होय; बाकीन होव हीमी आमु जायीन इनू आखा माणसो जुगू खाणो मुले लेये ती होय सोकसे” चे माणसे ते पाच होजारोन आस पास ओदमीत होता. 14तेत्यार चू आपना चेला काजे कोयू, “तीनु काजे पोचास-पोचास कोरीन पोंगात ने पोंगात बोसाळ देवू.” 15चे तोसात कोऱ्या, एने आखा काजे बोसाळ देदा. 16तेत्यार चू पाच रुटा एने दुय माछा लीन एने सोरगो भूनी भावीन धन्यवाद कोऱ्यु, एने भांग भांगीन चेला काजे आपतू गोयू कि माणसो काजे वाटे. 17तेत्यार आखा खायीन आफरी गोया, एने चेला रोयला भूकरान बारा टूपला भोरीन चुट्या.

पतरसोन येसु काजे मसिहा कोरीन माननो

(मत्ती 16:13-19; मरकुस 8:27-29)

18जेतार चू सुनले जागे प्रार्थना कोरने बाज रोयू होतु एने चेला तेरे पुठी होता, ती चू तीनु काजे पुछु, “माणसे मेसे काजे काय कोयतेला?” 19चे जोवाब आप्या, “योहान बाप्तिस्मा आपनेवावू, एने काहना-काहना एलिया, एने काहना यो कि जूनला भविष्य कोरता मायलु कुदू एक जीव उठलु छे.” 20चू तीनु काजे पुछु, “बाकीन तुमु मेसेक काय कोयतेला?” पतरस जोवाब आप्यू, “परमेश्वरोन मसिह.” 21तेत्यार चू तीनु काजे जोताळीन कोयू कि यो कुदा काजे झुन कोयता.

येसुन मोरनेन भविष्यवाणी

22ओवतेन चू कोयू, “माणसोन पुऱ्यान कोरता जोरुरी छे कि चू घोनो दुख उठावसे, एने डाह-डाहान एने प्रधान पुजारू एने शास्त्री तीनाक विटाव सोमजीन मार नाखसे, एने चू तिसरे दाहळे जीव उठसे.”

येसुन पोछोव चालनेन मतलब

(मत्ती 16:21-28; मरकुस 8:30)

23चू आखा काजे कोयू, “अगर कुदाक मारे पोछोव आवने लागे, ती आपना खुदो काजे नाकार कोरे एने होर दाहळे आपनु ख्रुस हाकलीन मारे पोछोव चाले. 24काहाकि जू कुदू आपनु जीव वाचाडने देखसे चू तीनाक खुवसे, बाकीन जू कुदू मारेंन कोरता आपनु जीव खुवसे चू तीनाक वाचाडसे. 25अगर माणूस आखा जोगो काजे मेव्वीलेये एने आपना जीवो काजे खुवाळ देये नि ते तिंदरो नुकसान कोर लेये ती तीनाक काय लाभ होये? 26जू कुदू मेसेक एने मारी वातोक लाजवायसे, माणसोन पुऱ्यु बी, जेतार आपनी एने आपना बास तोरोफसी एने चुखला सोरग दूतोन महिमा साते आवसे, ती तीनासी लाजवायसे. 27मे तुमु काजे छाचलीन कोयो, कि जे न्या उबरोय रोया, इनुमा गोथा काहनास ओसा छे कि जेतार तोक परमेश्वरोन राज नि देख लेये, तेत्यार तोक मोतोन सोवाद नी चाखे.”

येसुन साते मुसा एने एलिया

(मत्ती 17:1-8; मरकुस 9:2-8)

28इनी वातोन ओवतेन आठ दाहळा ओवते चू पतरस, योहान एने याकुब काजे साते लीन प्रार्थना कोरणेन कोरता बोयळा पोर गोयू. 29जेतार चू प्रार्थना कोरणेत बाज रोयू होतु, ती तेरा चेहरान रूप बोदोल गोयो, एने तेरा छिंदरा धोव्वा सोप होयीन चोमोकने बाज गोया. 30एने देखू, मुसा एने एलिया ये दुय माणसे तेरे साते वाते कोरणे बाज रोया होता. 31ये महिमा पुठी देखाय पोळ्या एने तेरी मोरणेन बारामा वात कोरता होता, जो यरुशलेममा होयने वावो होतो. 32पतरस एने तेरा सातीदार निंदराव्वा होता, एने जेतार वारू सुद्दीपोर आव्या, ती तेरी महिमा एने इनू दुय ओदमी काजे, जे तेरे साते उबरोय रोया होता, देख्या. 33जेतार चे तेरे साते गोथा जाने बाज गोया, ती पतरस येसु काजे कोयू, “हे माहाराज, आमरो न्या रोयनो वारू छे, आखरी आमु तीन मंडप बोनावसु एक तारेन कोरता, एक मुसान कोरता, एने एक एलियान कोरता” चू जान रोयू होतु कि काय कोयने बाज रोयू. 34चू कोयनेत बाज रोयू होतु ती एक वादवो आवीन तिंदरे पोर छावाय गोयो, एने जेतार चे तिना वादवो मा घेरायणे बाज गोया ती बिह गोया. 35तेत्यार तीना वादवामा गोथू यु बुल निकव्यू, “यु मारू पुऱ्यु एने मारू नेवाळलु छे, एरी सोमवू.” 36यु बुल होयताच येसु एखलुत देखायू; एने चे हुगात रोया, एने जो काय देखला होता तेरी कानलीत वात तीनु दाहळामा कुदा काजे नि कोया.

भुंडली आत्मासी पुऱ्याक छुळवनो

(मत्ती 17:14-18; मरकुस 9:14-27)

37दिसरे दाहळे जेतार चे बोयळा पोर गोथा उतऱ्या ती एक मोटीत गोरदी तीनु काजे भेटायी. 38एने देखू, गोरदीमा गोथू एक माणूस आयळीन कोयू, “हे गुरु, मी तुसे काजे विनता कोरो कि मारा पुऱ्या पोर मोंगोन नोजोर कोर; काहाकि चू मारू एखलुत पुऱ्यु छे. 39एने देख, एक भुंडली आत्मा तीनाक धोरतेली, एने चू उचकालुन आयळने बाज जातलू; एने ची तीनाक ओसी पिवोवतेली कि चू मुयोमा फेस भोर लावतेलु; एने तीना काजे छेंदीन पोरीशान कोरीन छुळतली. 40मे तारा चेला काजे विनता कोऱ्यु कि तीनाक निकावू, बाकीन चे नि निकाव सोक्या” 41येसु जोवाब आप्यू, “हे कोम भुरस्या एने एक हेटी माणसो, मे का तोक तुमरे पुठी रोयीस एने तुमरो वेठीस? तारा पुऱ्या काजे न्या लाव.” 42चू आवनेत बाज रोयू होतु ती भुंडली आत्मा तीनाक आसटीन पीव्वी देदी, बाकीन येसु भुंडली आत्मा काजे धोमकाव्यू एने पुऱ्या काजे वारू कोरीन तेरा बासोन होवाले कोर देदू. 43तेत्यार आखा माणसे परमेश्वरोन महान ताकत पोरसी वाहराय गोया.

येसुन मोरनेन दुसरी कावा भविष्यवाणी

(मत्ती 17:22-23; मरकुस 9:30-32)

बाकीन जेतार आखा माणसे इना आखा कामो पोरसी जो चू कोरतू होतु वाहारायता होता, ती आपना चेला काजे कोयू, 44“तुमु इना वातो पोर कानटा लागाळू काहाकि माणसोन पुऱ्यु माणसोन हाते धोरवायने वावू छे.” 45बाकीन चे इनी वातो काजे नी सोमज्या, एने यो तिंदरेमा डूकायलो रोयो कि चे तीनाक सोमजी नि सोक्या; एने चे इनी वातोन बारामा तीना काजे पुछ्ने बिहता होता.

आखान मोताळू कुन

(मत्ती 18:1-5; मरकुस 9:33-37)

46ओवते तिंदरेमा ओसा विचार आवने बाज गोया कि आपने गोथू मोटू कून छे. 47बाकीन येसु तिंदरा मोनो मायला विचार जान लेदू, एने एक पुऱ्या काजे लीन आपने साते उबराख्यू, 48एने तीनु काजे कोयू, “जू कुदू मारे नावोसी ओसला पुऱ्या काजे स्वीकार कोरतेलू चू मेसेक स्वीकार कोरतेलु; एने जू कुदू मेसेक स्वीकार कोरतेलु, चू मेसेक मुकोलने वावान स्वीकार कोरतेलु, काहाकि जू तुमरेमा आखान नानामा गोथू नानू छे, चू मोटलु छे.”

जू खिलापमा नि चू पक्षमा छे

(मरकुस 9:38-40)

49तेत्यार योहान कोयू, “हे माहाराज, आमु ते एक माणसो काजे तारा नावोसी भुंडली आत्मा काजे निकावतलु देख्या, एने आमु तीनाक मोना कोऱ्या, काहाकि चू आमरे पुठी आवीन तारे पोछोव नी चालतलु.” 50येसु तीनु काजे कोयू, “तीनाक मोना मा कोरु; काहाकि जू तुमरा खिलापमा नि होय, चू तुमरे भूनी छे.”

यरुशलेममा जाणो

51जेतार तेरा उपोर चूटाय जाणेन दाहळा पुरा होयने वावा होता, ती चू यरुशलेममा जानेन विचार पाक्कू कोऱ्यु. 52चू आपना ओगोव दुत मुकोल्यू चे सामरी एक गावमा गोया कि तेरेन कोरता जागू तीयार कोरे. 53बाकीन चे माणसे तीनाक आवने नी देदा, काहाकि चू यरुशलेममा जातू होतु. 54यो देखीन तेरा चेला याकुब एने योहान ये कोया, “हे प्रभू, काय तारी मोर्जी होय ती आमु आग्या आपजे कि सोरगोमा गोथी आगठाम तीनुक धोपाळ देये?” 55बाकीन येसु पोछु वोवीन तीनु काजे कोयू, “तुमु नि जानतेला कि तुमु कोसला आत्मान छे काहाकि माणसोन पुऱ्यु माणसोन जीवन नाश कोरणे नि बाकीन वाचाडनेन कोरता आवलु छे.” 56एने चे काहना एक दिसरा गावोमा जात रोया.

येसुन पोछोव चालनेन मतलब

(मत्ती 8:19-22)

57जेतार चे वाटे जाता होता ती काहनुस तीनाक कोयू, “जा-जा तू जायीस, मे तारे पोछोव आवीस.” 58येसु तीनाक कोयू, “कुल्या काजे बिळो एने वादवा मायला चिल्ला काजे पुतरा रोयतेला, बाकीन माणसोन पुऱ्या काजे मुनको मेकनेन बी जागू नि होय.” 59चू दिसरा काजे कोयू, “मारे पोछोव आव” चू कोयू, “हे प्रभू, मेसेक पेहेल जान दे कि मारा बासो काजे गाळ दोम.” 60येसु तीनु काजे कोयू, “मोरला काजे आपनो मोरलो गाळणे दे, बाकीन तू जायीन परमेश्वरोन राजोन वात सोमवाळ.” 61दिसरू एक जोनू एने कोयू, “हे प्रभू, मे तारे पोछोव आवीस; बाकीन पेहेल मेसेक जाने दे आपना घोरोन माणसो काजे कोयीन आवो.” 62येसु तीना काजे कोयू, “जू कुदू आपनु हात होवोपोर मेकीन पोछोव देखे, चू परमेश्वरोन राजोन लायोक नि होय.”

Currently Selected:

लुका 9: BFBNT

Highlight

Copy