लुका 8

येसुन चेलापन

1एरे बाद चू सोहोर-सोहोर एने गाव-गाव प्रचार कोरतू जायीन, एने परमेश्वरोन राजोन वारली खोबर सोमवावतू जायीन फिरने बाज गोयू, एने चे बारा जोना तेरे साते होता, 2एने काहनास बायरा होता जे भुंडली आत्मामा गोथा एने बिमारीमा गोथा छुळावला होता, एने चे ये छे, मरीया जी मगदलीनी कोवायती होती, जीनीमा गोथी सात भुंडली आत्मा निकोवली होती, 3एने हेरोदोन कारभारी खुजा एरी लाडी योअन्ना एने सुसन्ना, एने ओवी घोन सोवटा बायरा ये आपना पोयशासी तेरी सेवा कोरता होता.

बीज वेरने वावान दाखलू

(मत्ती 13:1-17; मरकुस 4:1-12)

4जेतार घोनी मोटी गोरदी एखठी होयी एने देस-देसोन माणसे तेरेनचा आव्या कोरता होता, ती चू दाखलामा गोथू कोयू. 5“एक वेरणेवावु बीज वेरणे निकव्यू वेरणेन टेमे काहनोस वाटी धोळे पोळ्यो, एने रोंदवाय गोयो एने वादवा मायला चिल्ला तीनुक खाय गोया. 6काहनोस चाफऱ्या वावे जागे पोळ्यो, एने उग्यो बाकीन सोरदावु नी जोळनेन वजेसी सुक गोयो. 7काहनोस झाडवाट्यामा पोळ्यो, एने काटाव्या साते-साते वोदीन तीनाक डाब देदा. 8काहनोस वारले जागे पोळ्यो, एने उगीन सोव गुणा फोव लाव्यो” यो कोयीन चु उचा बुलोमा कोयू, “जिंदरा सोमोवणेन कानटा छे चे सोमवी लेये.”

दाखलान महत्व

(मत्ती 13:18-23; मरकुस 4:13-20)

9तेरा चेला तीना काजे पुछ्या कि इना दाखलान काय मतलब छे? 10येसु कोयू, “तुमु काजे परमेश्वरोन राजोन भेद सोमजणेन कोरता सोमोज आपली छे, बाकीन दिसरा काजे दाखलासी सोमवाय जातलो छे, इनान कोरता”

चे देखीन बी नी देखे,

एने सोमवीन बी नी सोमजे.

बीज वेरने वावान दाखलान मतलब

11“दाखलान मतलब यो छे बीज परमेश्वरोन वचन छे. 12वाटी धोळे वावो चे जे छे, जे सोमव्या; तेत्यार भुतडा आवीन तिंदरे मोनोमा गोथो वचन चुटीन ली जाती रोयतलु कि कोदि ओसो नि होये कि चे भुरसू कोरीन छुटकारू लेये. 13चाफऱ्या पोरला चे छे कि जेतार सोमवतला, ती खुशीमा वचन काजे स्वीकार ते कोरतेला बाकीन मुवे नि धोरणेसी चे थुलिक वार तोक भुरसू कोरतेला एने पारखोन टेमे घाबराय जातला. 14जो झाडक्यामा पोळ्यो, यो चे छे जे सोमोवतला, बाकीन ओगा चालीन चींता, एने धोन, एने जीवनोन सुखोमा फोस जातला छे एने तिंदरो फोव नी पाकतलो. 15बाकीन वारली जागा मायला ये चे छे, जे वचन सोमवीन वारू एने घोनो वारू आपना मोनोमा सोमावीन राखतला एने धीर धोरीन फोवे लावतेला छे.

दिवान दाखलू

(मरकुस 4:21-25)

16“कुदू दिवू धोपाळीन ठाहरे कोरीन नि ढाकतेला, एने नी खाटला तोवे मेकतेला, बाकीन पाटळी पोर मेकतेला कि माहाय आवने वावाक विजावो देखाये. 17काहीन डूकायलो नी जो जोळे नी, एने नि काहीन डूकायलो छे जो सोमजी नी सोके एने सामने नी होये. 18इनान कोरता हुशारीमा रोयू कि तुमु काहना रितीसी सोमवतला? काहाकि जीना जुव छे तीनाक आपायसे, एने जीना जुव नि होय तिना जुव चो बी मांगाय जासे, जीना काजे चू आपनु सोमोजतेलु.”

येसुन खोरलो घरबार

(मत्ती 12:46-50; मरकुस 3:31-35)

19तेरी आया एने तेरा भाश तेरेनचा आव्या बाकीन गोरदीन वोजेसी तीनाक भेटी नी सोक्या. 20तीनाक कोया, “तारी आया एने तारा भाश बारथे उबरोय रोया तुसेक भेटने कोर रोया.” 21चू इना जोवाबमा तीनु काजे कोयू, “मारी आया एने मारा भाश येत छे, जे परमेश्वरोन वचन सोमवतेला एने मानतला.”

आंजी एने वाहवाक शांत कोरनो

(मत्ती 8:23-27; मरकुस 4:35-41)

22ओवतेन एक दाहळे चू एने तेरा चेला ढोंड्यामा चोळ्या, एने चू तीनु काजे कोयू, “आवू, दोरीयान पोरले धोळे जाता” आखरी चे ढोंड्यो छुळ देदा. 23बाकीन जेतार ढोंड्यो चालतोत होतो, ती चू सुव गोयू; एने दोरीयामा आंजी आवी, एने ढोंड्यो पाणीसी भोरायने बाज गोयो एने चे घाबरायला होता. 24तेत्यार चे साते आवीन तीनाक जागाळ्या एने कोया, “माहाराज! माहाराज! आपनु नाश होयने बाज रोयू” तेत्यार चू उठीन आंजी काजे एने पाणीन लेहेरो काजे धोमकाव्यू एने चे हुगरोया एने आराम होय गोयो. 25तेत्यार चू तीनु काजे कोयू, “तुमरू भुरसू का होतु?” बाकीन चे बिह गोया एने वाहारायीन आपोसमा कोयने बाज गोया, “यु कून छे जू आंजी एने पाणी काजे आग्या आपतलु, एने चे तेरी मानतेला?”

भुंडली आत्माक निकावनो

(मत्ती 8:28-34; मरकुस 5:1-20)

26ओवतेन चे गिरासेन देसोमा पुग्या, जो पोरले धोळे गलीलोन सामने छे. 27जेतार चू काठे उतऱ्यु ती तीना सोहोरोन एक माणूस तीनाक भेट्यू जीनामा भुंडली आत्मा होती चू घोना दाहळा गोथू नी छिंदरा पेहेरतू होतु एने नी घोरमा रोयतू होतु एने मोळवाट्यामा रोया कोरतू होतु. 28चू येसु काजे देखीन आयळ्यु एने तेरे सामने दौडीन मोटात बुलोमा कोयू, “हे परमप्रधान परमेश्वरोन पुऱ्या येसु! मेसेक तारे पुठी काय काम? मे तुसेक विनता कोरो, मेसेक तोकलीत मा देये.” 29काहाकि चू तिनी भुंडली आत्मा काजे तीना माणसोमा गोथू निकोवनेन आग्या आपने बाज रोयू होतु, इनान कोरता कि ची तीना पोर घोळी-घोळी ताबू कोरती होती न्या तोक माणसे साकव्या एने बेळ्या कोरीन बांदता होता ते बी चू बांदला काजे तुळ नाखतू होतु, एने भुंडली आत्मा तीनाक बोयळामा दोवळावती फिरवती होती. 30येसु तीना काजे पुछु, “तारो काय नाव छे?” चू कोयू, “सेना,” काहाकि घोन सोवटी भुंडली आत्मा तेरेमा भोराय रोय होती. 31चे तीनाक विनता कोऱ्या कि आमु काजे उंडा खाडामा जाणेन आग्या मा आपे. 32चा बोयळा पोर सुवऱ्यान एक मोटूत टूवू चोरणे बाज रोयू होतु, इनान कोरता चे तीनाक विनता कोऱ्या कि आमुक तीनुमा भोरायने दे, चू तीनुक जाने देदू. 33तेत्यार भुंडली आत्मा तीना माणसोमा गोथी निकवीन सुवऱ्यामा गोयी एने चू टूवू आडखा पोर गोथा झोळवायीन दारीयामा जायीन पोळ्या एने डूबीन मोर गया.

34गुवाव्या यो जो होयलो होतो देखीन दोवळ्या एने सोहोरमा एने गावोमा जायीन तेरी खोबर कोऱ्या. 35माणसे यो जो होयलो होतो तीनाक देखणे कोरीन निकव्या, एने येसुनचा आवीन जीना माणसोमा गोथी भुंडली आत्मा निकोवली होती, तीनाक येसुन पायोनचा छिंदरा पेहेरीन एने सुदपोर बोस रोयलू देखीन बिह गोया;. 36एने देखणे वावा तीनु काजे कोया कि चू भुंडली आत्मान तोकलीत वावू माणूस काहना रितीसी वारू होयू. 37तेत्यार गिरासेनोन आळी-छेळीन आखा माणसे येसु काजे विनता कोऱ्या कि आमरेनचा गोथू जात रोय; काहाकि तिंदरेमा घोनी बिक भोराय गोयली होती आखरी चू ढोंड्यामा चोळीन पोछु जातू होतु ती. 38जीना माणसोमा गोथी भुंडली आत्मा निकोवली होती चू तीना काजे विनता कोरणे बाज गोयू कि मेसेक तारे साते रोयने दे, बाकीन येसु तीनाक मुकेलतू जायीन कोयू, 39“तारे घोर पोछु जात रोय एने माणसो काजे देखाळ कि परमेश्वर तारेन कोरता कोसा मोटा कामे कोरलु छे” चू जायीन आखा सोहोरोमा प्रचार कोरणे बाज गोयू कि येसु मारेन कोरीन कोसा मोटा-मोटा कामे कोऱ्यु.

मांदली बायर एने मोरली पुराय काजे वारू करनो

(मत्ती 9:18-26; मरकुस 5:21-43)

40जेतार येसु पोछु आव्यु ती माणसे तीना काजे खुशीमा मेव्या, काहाकि चे आखा तेरी वाट जुव रोया होता. 41तेत्यारुत याईर नावोन एक माणूस जु प्रार्थना घोरोन सरदार होतु, आव्यु एने येसुन पायो पोर पोळीन तीना काजे विनता कोरणे बाज गोयू कि मारे घोर चाल, 42काहाकि तेरी बारा सालोन एकुत पुराय होती, एने ची मोरणे पोर होती जेतार चू जातू होतु ती माणसे तीना पोर हिट पोळता होता. 43एक बायोर जीनीक बारा सालोन लुय वोयनेने बिमारी होती, एने ची तेरी आखी कोमाय दवाखाना पोछोव खोरचू कोर देदली होती, ते बी कुदान हाते वारू नि होयी, 44पोछोव गोथी आवीन तेरा छिंदरा छेवळा काजे छिमी, एने तेत्यारुत तेरो लुय वोयनो बोंद होय गोयो. 45इनापोरसी येसु कोयू, “मेसेक कुन छिम्यो?” जेतार आखा वोवीन देखणे बाज गोया, ती पतरस एने तेरा सातीदार कोया, “हे माहाराज, तुसेक ते गोरदी डाबणे बाज रोयी एने तारे पोर हिट पोळतेली.” 46बाकीन येसु कोयू, “कुन तोरी मेसेक छिमलो छे, काहाकि मे जान लेदलु छे कि मारेमा गोथो ताकत निकोवलो छे.” 47जेतार बायोर देखी कि मे डूकाय नी सोकती, तेत्यार कापती जायीन आवी एने तेरा पायो पोर पोळीन आखा माणसो सामने कोयी कि ची काहना वोजेसी तीनाक छिमली, एने कोसी तेत्यारुत वारू होय गोयी. 48येसु तिनी काजे कोयू, “बेटी, तारा भुरसा पोरसी तुसेक वारू कोरलु छे, खुशालमा जात रोय.” 49चू यो कोयनेत बाज रोयू होतु कि कुन तोरी प्रार्थना घोरोन सरदारोन चा गोथू आवीन कोयू, “तारी पुराय मोर गोयी गुरु काजे तोकलीतमा आपे.” 50येसु यो सोमवीन तीनाक जोवाब आप्यू, “मा बिहे; निस्तु भुरसू मेक, ती ची वाच जासे.” 51घोरोमा आवीन चू पतरस, योहान, याकुब, एने पुऱ्या आसी-बासाक छुळीन दिसरा कुदाक तेरे साते माहाय आवने नी देदू. 52आखा तीनिन कोरीन रोडापीट वोव रोया होता, बाकीन येसु कोयू, “रोडू मा; जी मोरी नी बाकीन सुवने बाज रोयी.” 53चे यो सोमज्या कि ची मोर गोयली छे तेरी मोजाक कोरणे बाज गोया. 54बाकीन चू तेरु हात धोऱ्यु, एने जुरेत कोयू, “हे पुराय, उठ” 55तेत्यार तेरु जीव पोछु आव्यु एने ची तेत्यारुत उठीन बोसी ओवतेन चू आग्या आप्यू कि इनीक काजे काहीन खाणे आपे. 56तेरा आसी-बासा वाहराय गोया, बाकीन चू तीनु काजे जोताळ्यु कि यो जो होयलो छे कुदा काजे झुन कोयता.

Currently Selected:

लुका 8: BFBNT

Highlight

Copy