लुका 24

येसुन जीव उठनो

(मत्ती 28:1-10; मरकुस 16:1-8; योहान 20:1-10)

1बाकीन हाप्तान पेहेले दाहळे सोंदारे वेगोत चे यो वारू इत्तर चे तीयार कोरलो होतो, लीन मोळवाट्यामा आया. 2चे दोगळा काजे मोळवाट्या पोर गोथू धेकली मेक्यू देख्या, 3बाकीन माही जायीन प्रभू येसुन धोळ नि जोळ्यो. 4जेतार चे इनी वातोसी शोंकामा होता ती देख्या, दुय माणसे चोमोकने वावा डोगला पेहेरीन तिंदरे साते आवीन उभा रोया. 5जेतार चे बिह गोया एने धोरती भूनी मुई वाकाड रोया ती चे तीनाक कोया, “तुमु जीवतला काजे मोरलामा काहा हेरे रोया? 6चू न्या नि होय, बाकीन जीव उठलु छे. फोम कोरु कि चू गलीलमा रोयतू होतु ती तुमु काजे कोयलु होतु. 7गोरोज छे कि माणसोन पुऱ्यु पापीन हाते धोराय जाय, एने ख्रुस पोर चोळाय जासे एने दिसरे दाहळे जीव उठे.” 8ती तेरी वाते तीनु काजे फोम आवी, 9एने मोळवाट्यामा चा गोथा निकवीन चे तीनुक ग्यारा जोना काजे, एने दिसरा आखा काजे, जी वाते कोयीन सोमवाळ्या. 10जे प्रेषित काजे जी वाते कोया चे मरीयम मगदलीनी एने योअन्ना एने याकुबोन आया मरीया एने तेरे साते वावा दिसरा बायराबी होता. 11बाकीन तिंदरी वात काहणी सारखी लागे, एने चे तिंदरे पर भुरसू नी कोऱ्या. 12तेत्यार पतरस उठीन मोळवाट्या भूनी दोवळीन गोयू, एने वाकू वोवीन देख्यू ती निसता छिंदरा पोळला देख्यू, एने यो होयलो होतो तीनाक नवलाई कोरतू जायीन तेरे घोर जात रोयू.

इम्माऊस वाटे चेलाक दर्शन

(मरकुस 16:12-13)

13तिने दाहळे तिंदरे मायला दुय जोना इम्माऊस नावोन एक गाव काजे जाणे बाज रोया होता, चो यरुशलेममा गोथो काहीन दोस किलोमीटर नांबे पोर होतो. 14जे इनी आखी वातोपर जी होयली होती, तिंदरेमा वाते कोरता जाता होता, 15एने जेतार चे आपसमा वात एने पुस-पास कोरता होता, ती येसु आपसुत आवीन तिंदरे पुठी चाल पोळ्यु. 16बाकीन तिंदरा डूवा ओसा बंद कोर देदला होता कि तीनाक उवखी नि सोक्या. 17येसु तीनुक पुछु, “जी काय वाते छे, ती तुमु चालता-चालता आपोसमा कोयतेला?” चे उदास मा रोय गोया. 18यो सोमवीन तिंदरे मायलु क्लियुपास नावोन एक जोणु कोयू, “काय तू यरुशलेममा एखलु परदेशी छे, जू नि जानतलु कि इनू दाहळामा तीनामा काय होयलो छे?” 19येसु तीनु काजे पुछु, “कहानली वाते?” चे तीनु काजे कोया, “येसु नासरीन बारामा जू परमेश्वर एने आखा माणसोन साते काम एने वचनमा ताकत भविष्य कोरता होतु, 20एने प्रधान पुजारू एने आमरा सरदारे तीनाक धोराव देदा कि तिना पोर मोरनेन आग्या आपाय जाय; एने तीना काजे ख्रुस पोर चोळाव्या. 21बाकीन आमु काजे आस होती कि युत इस्राईल काजे छुटकारू आपसे. इनी आखा वातो सिवाय इनी घोटणाक होयली तिसरो दाहळू छे, 22एने आमरेमा गोथा घोना सोवटा बायराबी आमुक नोवलाय मा घाल देदला छे, जे वेगात मोळवाट्या पोर गोयला होता;. 23एने जेतार तेरो डील नि जोळ्यो ती यो कोयता जायीन आव्या कि आमुक सोरग दूतोन दर्शन जोळ्यो, चे कोया कि चू जीवतलु छे. 24तेत्यार आमरा दुस्ती दोरोमा गोथू एक मोळवाट्यामा गोयू, एने जोसा बायरा कोयला होता तोसोच देख्यू; बाकीन तीना काजे नि देख्यू.” 25तेत्यार येसु तीनु काजे कोयू, “हे बिन ओकल्या, एने भविष्य कोरतान आखा वातो पोर भुरसू कोरणेमा मतीमंद्या. 26काय गोरोज नि होती कि मसिह जो दुख उचलीन आपनी महिमामा जाय?” 27तेत्यार चू मुसा काजे एने आखा भविष्य कोरता गोथू सूरवात कोरीन आखा पवित्र शास्त्रमा गोथू आपना बारामा लिखली वातोन मतलब, तीनु काजे सोमजाड देदू.

28तोतरातमा चे तीना गावोन साते पुग गोया. चे जाता होता, एने तिनान ढोंगोसी ओसो मालूम पोळ्यो कि तीनाक ओगो जाणे जुवतो होतो. 29बाकीन चे यो कोयीन तीनाक रुक्या, “आमरे साते रोय, काहाकि सांतो होयने बाज रोयो एने दाहळू जादा ढोव गोयलु छे,” तेत्यार चू तिंदरे साते रोयने कोरीन माही गोयू. 30जेतार चू तिंदरे साते खाणो खाणे बोश्यू, ती चू रुटू लीन धन्यवाद कोऱ्यु एने तीनाक तुडीन तीनुक आपने बाज गोयू. 31तेत्यार तिंदरा डूवा उगळी गोया; एने चे तीनाक उवखी लेदा, एने चू तिंदरा डूवा गोथू डूकाय गोयू. 32चे आपसामा कोया, “जेतार चू वाटी पोर आमरे पुठी वाते कोरतू होतु एने पवित्र शास्त्रन मतलब आमुक सोमजाडतू होतु, ती काय आमरा मोनोमा उतेजन नि पोयदा होयो?” 33चे तिने टेमे उठीन यरुशलेममा जात रोया, एने तीनु ग्यारा काजे एने तिंदरा साथीदार काजे एखठा देख्या. 34चे कोयता होता, “प्रभू छाचलीन जीव उठलु छे, एने शिमोन काजे देखाय पोळ्यु.” 35जेतार चे वाटीपोरला वाते तीनुक कोय देदा एने यो बी कि चे तीनाक रुटू खाणेन टेमे कोसा उवख्या.

येसुन चेलापोर उतरणो

(मत्ती 28:16-20; मरकुस 16:14-18; योहान 20:19-23)

36चे ये वाते कोयनेत बाज रोया होता कि चू खुद तिंदरे इचमा आवीन उभू रोयू, एने चू कोयू, “तुमुक शांती जोळे.” 37बाकीन चे घाबराय गोया एने बिह गोया, एने सोमज्या कि आमु कहानला भुतडा काजे देख रोया. 38येसु तीनु काजे कोयू, “काहा घाबराय गोया? एने तुमरा मोनोमा काय विचार आव रोया? 39मारा हात एने मारा पायो काजे देखू कि मी चू छे मेसेक छिमीन देखू, काहाकि आत्मा काजे हाडका मास नि रोयतलो जोसो मारेमा देख रोया.”

40यो कोयीन चू तीनुक तेरा हात पाय देखाळ्यू. 41तेत्यार खुशीन मारे चे भुरसू नी कोऱ्या. एने चे नोवलायी कोरता होता, ती चू तीनुक पुछु, “काय न्या तुमरे जुवू काहीन खाणो छे?” 42चे तीनाक भुंजला माछांन टूकडू आप्या. 43चू लीन तिंदरे सामने खादु. 44एने चू तीनुक कोयू, “जी मारी वाते छे, जी मे तुमरे साते रोयीण तुमु काजे कोयलु होतु कि गोरोज छे कि जोतरा वाते मुसान शास्त्राम एने भविष्य कोरतान एने शास्त्रान किताबमा मारा बारामा लिखलो छे चो आखो पुरो होये.” 45तेत्यार चू पवित्र शास्त्र सोमोजनेन कोरता तिंदरी समज उगाळ देदू. 46एने तीनु काजे कोयू, “यो लिखलो छे कि मसिह दुख हाकलसे, एने तिसरे दाहळे मोरलामा गोथु जीव उठसे, 47एने यरुशलेम गोथो आखा जात्यामा मोन फिरावोन एने पापोन माफी प्रचार तिनान नावसी कोराय जासे. 48तुमु इनी आखी वातोन गोवा छे. 49एने देखू, जेबी वायदू मारू बास कोरलु छे, मे तीना काजे तुमरे पोर उतारीस एने जेतार तोक सोरगोमा गोथो ताकत नि जोळे, तेत्यार तोक तुमु इना सोहोरोमा रोय रोयू.”

येसुन सोरगोमा जाणो

(मरकुस 16:19-20)

50तेत्यार चू तीनुक बैतनिय्याह तोक बारथे ली आव्यु, एने आपनु हात उचा कोरीन तीनु काजे आशिष आप्यू; 51एने तीनुक आशिष आपतू जाईन ओलोग होय गोयू एने सोरगोमा चुटाय गोयू. 52तेत्यार चे तीना काजे नोमोन कोरीन मोटी खुशीसी यरुशलेममा जात रोया; 53एने चे लोगातार मंदीरमा रोयीन परमेश्वरोन स्तुती कोऱ्या कोरता होता.

Currently Selected:

लुका 24: BFBNT

Highlight

Copy