योहान 1

आखान पेहेल वचन होतो

1आखान पेहेल वचन होतो, एने वचन परमेश्वर साते होतो, एने वचन परमेश्वर होतु. 2एने योत आखान पेहेले परमेश्वर साते होतो. 3आखो काहीन तेरेत लारे बोनलो छे, एने जो काय बोनलो छे तीनामा गोथो कानलोबी चीज तेरे बिगुर नि बोन्यो. 4तेरेमा जीवन होतो एने चो जीवन माणसोन विजावो होतो. 5विजावो आंदारलामा चोमोकोतलो छे, एने आंदारलो तीनाक स्वीकार नि कोऱ्या 6एक माणूस परमेश्वरोनचा गोथू आवीन उपजी गोयू जेरो नाव योहान होतो. 7चू गोवायी आपने आव्यु कि विजावान गोवायी आपे, काहाकि आखा तेरे लारे भुरसू लावे. 8चू खुद ते विजावो नि होतु, बाकीन तिना विजावान बारामा कोयने कोरीन आवलु होतु. 9खोरलो विजावो जो हर एक माणसोक विजावो आपतेलो छे, जोगोमा आवने वावु होतु. 10चू जोगोमा होतु, एने जोग तेरे लारे बोन्यो, एने जोग तीनाक नी उवख्यो. 11चू तेरे घोर आव्यु एने तेरा आपना माणसे तीनाक स्वीकार नि कोऱ्या. 12बाकीन जोत्रा तीनाक स्वीकार कोऱ्या, चू तीनुक परमेश्वरोन पुऱ्या बोननेन होक आप्यू, मतलब तीनुक जे तेरा नावो पोर भुरसू कोरतेला छे. 13चे ते नि लुयसी, नि डीलोन मोर्जीसी, नि माणसोन मोर्जीसी, बाकीन परमेश्वरोनचा गोथो पोयदा होयलो छे. 14एने वचन देहधारी होयो; एने दया एने खोरलायसी पुरो होईन आमरे इचमा वस्ती कोऱ्यु, एने आमु तेरी ओसी महिमा काजे देख्या, जोसो बासोन एखला जून महिमा. 15योहान तेरा बारामा गोवायी आप्यू, एने आयळीन कोयू, “यु चू छे, जेरो मे वात कोयलु कि जू मारे पोछोव आवने बाज रोयू, चू मार गोथू बोढीन छे काहाकि चू मारे गोथू पेहेले होतु.” 16काहाकि तेरी पूर्णता मा गोथू आमु आखा ली लेदला छे मतलब आशिष पोर आशिष. 17इनान कोरता कि नियम शास्त्र ते मुसान लारे आपायलो छे, बाकीन मोंग एने खोरलो येसु मसिहन लारे पूगी. 18परमेश्वर काजे कुदुबी कबी नि देख्यो, एखलुत पुऱ्यु जू बासोन खुवामा छे चू तीनाक सामने लाव्यू.

बाप्तिस्मा आपनेवावान गोवायी

(मरकुस 16:19-20)

19योहानोन गोवायी जी छे, कि जेतार यहुदि अगवा यरुशलेम गोथा पुजारू एने लेवीणूक यो पुछनेन कोरता मूकल्यु, “तू कून छे?” 20ती चू यो मान लेदू एने इनकार नि कोऱ्यु, बाकीन मान लेदू, “मे मसिह नि होय,” 21तेत्यार चे तीना काजे पुछ्या “ती कून छे? काय तू एलिया छे?” चू कोयू, “मे नि होय” “ती काय तू चू भविष्य कोरता छे?” ती चू जवाब आप्यू, “नि.” 22तेत्यार चे तीनाक पुछ्या, “ती एने तू छे कून? काहाकि आमु आमरा मुकलने वावा काजे जवाब आपजे तू आपना बारामा काय कोयतेलु छे?” 23चू कोयू, “जोसो यशयाह भविष्य कोरता कोयला छे, ‘मे बोयळाम एक आयळने वावान बुल छे कि तुमु प्रभून वाट सुधा कोरु.’” 24चे फरुशी जूव गोथा मुकलाय गोयला होता. 25चे तीना काजे यो सोवाल पुछा, “अगर तू नि मसिह छे, एने नि एलिया, एने नि चू भविष्य कोरता छे, ती तू बाप्तिस्मा काहा आपतलु?” 26योहान तीनुक जोवाब आप्यू, “मे ते पाणीसी बाप्तिस्मा आपतलु, बाकीन तुमरे इचमा एक जोणु उभू छे तीनाक तुमु नि उवखतला. 27मतलब मारे बाद आवने वावू छे, जिनान खासळान बोंद बी छिमनेन लायक नि होय.” 28जे वाते यरदन नोंदीन पार बैतनिय्याह गावमा होयी, जा योहान बाप्तिस्मा आपतू होतु.

परमेश्वरोन गाडरो

29दिसरे दाहळे चू येसु काजे आपने भूनी आवतेलु देखीन कोयू, “देखू, यु परमेश्वरोन गाडरो छे जू जोगोन पाप उचलीन लीजात रोयतलु छे. 30यु चू छे जेरे बारामा मे कोयलु होतु, एक माणूस मारे पोछोव आवने बाज रोयू चू मारे गोथु मोटू छे, काहाकि चू मारे गोथू पेहेले होतु. 31मे ते तीनाक उवखतू नि होतु, बाकीन इनान कोरता मे पाणीसी बाप्तिस्मा आपतू आयु कि चू इस्राईल पोर उपजी जाय.” 32एने योहान जी गोवायी आप्यू, “मे आत्मा काजे पेरवान तोसो सोरगोमा गोथो उतरतेलो देख्यू, एने चो तेरे उपर उभरोय गोयो. 33मे ते तीनाक उवोखतू नि होतु, बाकीन जू मेसेक पाणीसी बाप्तिस्मा आपने मूकल्यु, चू मेसेक कोयू, जीना पोर तू आत्मा काजे उतरतेलु एने उभ रोयतलु देख्यू, चू पवित्र आत्मासी बाप्तिस्मा आपनेवावू छे. 34एने मे देख्यू, एने गोवायी आप्यू कि युत परमेश्वरोन पुऱ्यु छे.”

येसुन पेहेला चेला

35दिसरे दाहळे ओवी योहान एने तेरा चेलामा गोथा दुय जोना उभा होय रोयला होता, 36एने चे येसु पोर यु जातु होतु, भावीन कोया, “देखू यु परमेश्वरोन गाडरो छे.” 37तेत्यार चे दुयू चेला तेरो यो सोमवीन येसु पोछोव जात रोया. 38येसु फिरीन तीनुक पोछोव आवतेला देख्यू एने तीनुक कोयू, “तुमु कुनीन हेरोमा छे?” चे तीना काजे कोया, “हे रब्बी (मतलब हे गुरु), तू का रोयतलु?” 39येसु तीनुक कोयू, “चालू, ती देख लेसू” तेत्यार चे जायीन तेरा रोयनेन जागा देख्या, एने तिने दाहळे तेरे साते रोया जो दोसवा घोनटान लगभग होतो. 40तीनु दुय जोनामा गोथा जे योहानोन वात सोमवीन येसु पोछोव गोयला होता, एक शिमोन पतरसोन भाश अन्द्रियास होतु. 41चू पेहेले आपनु सोगु भाश शिमोन काजे मेवीन तीनाक कोयू, “आमु काजे मसिह, मतलब मसिहा जोळ गोयू.” 42चू तीनुक येसुनचा लाव्यू येसु तेरे भूनी भावीन कोयू, “तू योहानोन पुऱ्यु शिमोन छे तू कैफा मतलब पतरस कोवायीस.”

फिलीप्पूस एने नातनियल काजे बुलावनो

43दिसरे दाहळे येसु गलीलमा जाणेन कोऱ्यु चू फिलीप काजे मेव्यू एने कोयू, “मारे पोछोव आव लाग.” 44फिलीप, अन्द्रियास एने पतरसोन सोहोर बेथसदा रोयने वावू होतु. 45फिलीप नथनेल काजे मेव्यू एने तीनु काजे कोयू, “तेरा बारामा मुसा शास्त्रमा एने भविष्य कोरता कोरला छे, चू आमु काजे जोळ गोयू; चू युसूफोन पुऱ्यु येसु नासरी छे.” 46नथनेल तीना काजे कोयू, “काय कुदु वारलो चीज नासरेथमा गोथी निकवी सोकतली?” फिलीप तीनाक कोयू, “आवीन देखले.” 47येसु नथनेल काजे आपने भूनी आवतेलु देखीन तेरा बारामा कोयू, “देखू, यु छाचलीन इस्राईल छे इनाम मोटाय नि होय.” 48नथनेल तीना काजे कोयू, “तू मेसेक कोसू उवखतलु?” येसु तीनाक जोवाब आप्यू, “इना गोथो पेहेली कि फिलीप मेसेक बुलाव्यू, जेतार तू गुलोरोन झाडो तोवे होतो तेत्यार मे तुसेक देखलू होतु.” 49नथनेल तीनाक जोवाब आप्यू, “हे रब्बी, तू परमेश्वरोन पुऱ्यु छे; तू इस्राईलोन महाराजा छे.” 50येसु तीनाक जोवाब आप्यू, “मे जो तुसे काजे कोयलु कि मे तुसेक गुलोरोन झाडो तोवे देख्यू, काय तू इनान कोरता भुरसू कोरतेलू? तू एर गोथो बी मोटला-मोटला काम देखीस.” 51एने तीना काजे कोयू, “मे तुसे काजे छाचलीन-छाचलीन कोयो कि तुमु सोरग काजे उगळलो, एने परमेश्वरोन सोरग दूतो काजे माणसोन पुऱ्या पोर उतरतेलो एने उपोर जातलो देखसु.”

Currently Selected:

योहान 1: BFBNT

Highlight

Copy