योहान 8

पाप कोरने वावाक माफी

1बाकीन येसु जेतुनोन बोयळा पोर गोयू. 2सोंदारे वेगुत चू ओवी मंदीरमा आव्यु; आखा माणसे तेरेनचा आव्या एने चू बोसीन तीनुक प्रचार देणे बाज गोयू. 3तेत्यार शास्त्री एने फरुशी एक बायर काजे जी भुंडला काम कोरतेली धोरायली होती, एने तिनी काजे इचमा उभराखीन येसु काजे कोया, 4“हे गुरु, जी बायर भुंडलो काम कोरतेली धोरला छे. 5नियम शास्त्राम मुसा आमु काजे आग्या आपलु छे कि ओसला बायरापोर दोगळ मार कोरु आखरी तू इनी बायरीन बारामा काय कोयने छे?” 6चे तीना काजे पारखने कोरता यी वात कोयु काहाकि तीना पोर गुणू लागाळने कोरता काहीन वात जोळे बाकीन येसु वाकु वोवीन आंगवे कोरीन धोरती पोर लिखने बाज गोयू. 7जेतार चे तीनाक पुछता रोया, ती चू सुधू होईन तीनु काजे कोयू “तुमरेमा जू चुखलु छे चू पेहेले दोगळू देये.” 8एने ओवी वाकीन धोरती पोर आंगवे कोरीन लिखने बाज गोयू. 9बाकीन चे यो सोमवीन मोटला मा गोथा नानला तोक, एक-एक जोणु जात रोया एने येसु एखलु रोय गोयू, एने ची बायोर इचमात उभी रोयी. 10येसु सुदू होईन तिनी काजे कोयू, “हे नारी, चे कां गोया? काय कुदू बी तुसेक दोंडोन आग्या नी आप्यू?” 11ची कोयी, “हे प्रभू, कुदू नी” येसु कोयू, “मे बी तुसेक दोंडोन आग्या नि आपतू; जा, एने ओवी पाप झुनी कोरती.”

येसु जोगोन दिवू

12येसु ओवी माणसो काजे कोयू “जोगोन विजावो मे छे; जू मार पोछोव आवसे चू आंदाराम नि चाले, बाकीन जीवनोन विजावो जोळसे.” 13फरुशी तीना काजे कोया, “तू खुदोन गोवायी खुद आपतलु, तारी गोवायी खोरली नि होय.” 14येसु तीना काजे जोवाब आप्यू, “भलेत मे मारी गोवायी आपतलु, ते बी मारी गोवायी खोरली छे, काहाकि मेसेक मालूम छे कि मे का गोथू आव रोयू एने का जाणे बाज रोयू? बाकीन तुमुक नि मालूम होय कि मे का गोथू आव रोयू एने का जाणे बाज रोयू. 15तुमु डीलोन अनसारे नियाव कोरतेला; मी कुदान नियाव नि कोरतेलु. 16ओगर मे नियाव कोरे बी, ती मारू नियाव खोरलू छे; काहाकि मे एखलु नि, बाकीन मेत छे, एने बास चे यु मेसेक मूकल्यु. 17तुमरा नियम शास्त्रमा बी लिखलो छे; कि दुय जोनान गोवायी खोरली रोयतली. 18एक ते मे खुद आपनी गोवायी आपो, एने दिसरू बास मारी गोवायी देतलु यु मेसेक मूकल्यु.” 19चे तीना काजे कोया, “तार बास कां छे?” येसु जोवाब आप्यू, “नि तुमु मेसेक उवखतला, नि मारा बासो काजे, ओगर मेसेक उवखता ती मारा बासो काजे बी उवखता.” 20जे वाते चू मंदीरमा प्रचार आपतू होतु ती भोंडार घोरोमा कानखुर, एने कुदू तीना काजे नि धोऱ्या काहाकि तेरी टेम हांजू तोक नि आवली होती.

खुदोन बारामा येसुन कहानी

21चू ओवी तीनु काजे कोयू, “मे जाणे बाज रोयू एने तुमु मेसेक हेरसू एने खुदोन पापोमा मोरसू; जा मे जाणे बाज रोयू, चा तुमु नि आव सोकतला.” 22इनापोरसी यहुदि माणसे कोया, “काय चू खुदो काजे मार नाखसे, जू कोयतलू, ‘जा मे जाणे बाज रोयू चा तुमु नी आव सोकतला?’” 23येसु तीनु काजे कोयू, “तुमु नेचलान छे, मे उपोर गोथू छे; तुमु जोगोन छे, मी जोगोन नि होय. 24इनान कोरता मी तुमु काजे कोयो कि खुदोन आपना पापोमा मोरसू, काहाकि ओगर तुमु भुरसू नि कोरे कि मे चू छे ती खुद आपना पापोमा मोरसू.” 25चे तीना काजे कोया, “तू कून छे?” येसु तीनु काजे कोयू, “चू छे जू सूरवात मा गोथू तुमु काजे कोयतू आव रोयू.” 26तुमरा बारामा मेसेक घोनो काहीन कोयनो एने ठेरावणो छे; बाकीन मेसेक मुकलने वावू खोरलू छे, एने जो मे तिना जुव गोथू सोमवलू चोत जोगो काजे कोयतेलु. 27चे यो नी सोमज्या कि आमुक बासोन बारामा कोय रोयू. 28तेत्यार येसु कोयू, “जेतार तुमु माणसोन पुऱ्याक उचला पोर चोळावसे, ती जानसु कि मे चू छे; मे आपना खुदो काजे काहीन नि कोरतु बाकीन जोसू मारू बास मेसेक सोमवाळ्यु तोसोत जे वाते कोय रोयू. 29मेसेक मुकलने वावू मारे पुठी छे; चे मेसेक एखलु नि छुळयु काहाकि मी हमेशा चोत काम कोरतेलु जीनासी चू खुश रोयतलु.” 30चू ये वाते कोयनेत बाज रोयू होतु ती घोना सोवटा जोना तीना पोर भुरसू कोऱ्या.

खराय तुमु छुळावसे

31तेत्यार येसु तीनु यहुदिनुक जे येसु पोर भुरसू कोरता होता, कोयू, ओगर तुमु मारा वचन पोर टेकिन रोयसे, ती छाचलीन मारा चेला ठेरायसु. 32तुमु खोरला काजे जानसु, एने तुमुक छुळावसे. 33चे तीनाक जोवाब आप्या, “आमु ते अब्राहामन पिढी मायलु छे, एने कोबी कुदान गुलाम नि होये ती तू कोसू कोरतेलू कि तुमु छुळवाय जासू?” 34येसु तीनु काजे जोवाब आप्यू, “मे तुमु काजे छाचलीन-छाचलीन कोयो कि यु कुदू पाप कोरतेलू चू पापोन गुलाम छे.” 35गुलाम हमेशा घोरमा नि रोयतलु; पुऱ्यु हमेशा रोयतलु. 36इनान कोरता ओगर पुऱ्यु तुमुक छुळावसे, ती छाचलीन तुमु छुळवाय जावू. 37मेसेक मालूम छे तू अब्राहामन पिढी मायलु छे; ते बी मारो वचन तुमरा डीलोमा जागू नि जोळतलु, इनान कोरता तुमु मेसेक मार नाखनेन कोरतेला. 38मे चोत कोरतेलु, जो मारेनचा देखलू छे; एने तुमु चोत कोरता रोयतेला यो तुमु आपना बासोन सोमवला छे. 39चू तिना काजे जोवाब आप्यू, “आमरू बास ते अब्राहामन छे” येसु तीनु काजे कोयू, “ओगर तुमु अब्राहामन पुऱ्या होता, ती अब्राहामन तोसा काम कोरता.” 40बाकीन हिमी तुमु मार सारखा माणसोक मारणे कोरतेला यु तुमुक खोरलो वचन देखाळतलू जो परमेश्वर जू सोमवतलु; ओसो ते अब्राहाम नी कोयु. 41“तुमु आपना बासोन तोसो काम कोरतेला” चे तीनाक कोया, “आमु भुंडला विचारसी नी जोनाया, आमरू एक बास चे मतलब परमेश्वर.” 42येसु तीनु काजे कोयू, “कोदि परमेश्वर तुमरू बास रोयतु, ती तुमु मार पोर मोंग कोरता; काहाकि परमेश्वर भूनी गोथू आव रोयू मे मार मारे नि आव्यु, बाकीन चू मेसेक मूकल्यु. 43तुमु मारी वात काहा नि सोमोजतेला? इनान कोरता कि तुमु मारो वचन सोमवी नि सोकतला. 44तुमु तुमरा बास भुतडासी छे एने तुमरा बासोन मोर्जी काजे पुरी कोरणे चाहतला. चू ते सुरवाती गोथूच हत्यारु एने खोरला पोर सुदू नि रोयू, काहाकि खोरलो तीनामा होतो नि जेतार चू झूट बुलतलु, ती तेरा स्वभावमा गोथूच बुलतलू; काहाकि चू झुटू छे एने झुटोन बास छे. 45बाकीन मे यो छाचलीन बुलने बाज रोयू, इनान कोरता मार पोर भुरसू नि कोरता. 46तुमरे माईन कून मेसेक पापी ठेरावतलू? ओगर मे छाचलीन बुलतलू, ती मार पोर भुरसू काहा नि कोरतेला? 47जो परमेश्वर भूनी रोयतलो, चो परमेश्वरोन वाते सोमवतलू; एने तुमु इनान कोरीन नि सोमवतला कि परमेश्वर भूनी गोथो नि होय.”

येसु एने अब्राहाम

48यो सोमवीन यहुदि तीना काजे कोया, “काय आमु वारलो नि कोरतेला कि तू सामरी छे, एने तारेमा भुंडली आत्मा छे?” 49येसु जोवाब आप्यू, “मारेमा भुंडली आत्मा नि होय; बाकीन मे मारा बासोन मान कोरतेलू, एने तुमु मारु मान नि कोरतेला.” 50बाकीन मेसेक मारी महिमा नि जुवती; होव, एक छे जो मेसेक गोवतेलो एने नियाव कोरतेला. 51मी तुमु काजे छाचलीन-छाचलीन कोय कि “ओगर कुदू माणूस मारा वचनोपोर चालतलु, ती चू ओमोर काव तोक मोत नि देखे.” 52यहुदि तीना काजे कोया, “हिमी जान लेदा कि तारेमा भुंडली आत्मा छे अब्राहाम मोर गोयू, एने भविष्य कोरता बी मोर गोयला छे; एने तू कोयतलू, ओगर कुदु मारा वचन पोर चालतलु चू मोतन सोवाद नि चाखे.” 53आमरू बास अब्राहाम ते मोरगोयु काय तू तीना गोथू बी मोटू छे? एने भविष्य कोरता बी मोर गोया तू आपना खुदो काजे काय ठेरावतलू? 54येसु जोवाब आप्यू, “ओगर मे मारा खुदोन महिमा कोरो, ती मारी महिमा काहीच नि; बाकीन मारी महिमा कोरणे वावा मारा बासोन छे, जीनु काजे तुमु कोयतेला कि चू तुमरू परमेश्वर छे. 55तुमु ते तीनाक नि जानतला बाकीन मे ते तीनाक जानतलु ओगर मी कोय कि मी तीनाक नि जानतलु ती मे तुमरेन तोसु झुटू ठेरायीस; बाकीन मे तीनाक जानतलु एने तेरा वचनोपोर चालतलु. 56तुमरु बास अब्राहाम मारा दाहळा देखनेन आसो खुश होतु; एने चू देख्यू एने खुशी कोऱ्यु.” 57यहुदि तीना काजे कोया, “हिमी तोक तू पोचास सालोन नि होयू, तीबी तू अब्राहाम काजे देख रोयू?” 58येसु तीनु काजे कोयू, “मी तुमु काजे छाचलीन-छाचलीन कोयो, कि अब्राहामन पेहेले, मी छे.” 59तेत्यार चे तीनाक मार नाखणेन कोरता दोगळा चुट्या, बाकीन येसु डूकायीन मंदीरमा गोथू निकवी गोयू.

Currently Selected:

योहान 8: BFBNT

Highlight

Copy