योहान 7

येसु एने तेरा भाश

1इनी वातोन ओवतेन येसु गलीलमा फिरतू रोयू; काहाकि यहुदि तीनाक मार नाखनेन कोरता होता, इनान कोरता चू यहुदियामा फिरनेन नि कोरतू होतु. 2यहुदियान मंडपोन तिवार साते होतु. 3इनान कोरता तेरा भाशे तीना काजे कोया, “न्या गोथू यहुदियामा जा, कि यो काम तू कोरतेलु तीनाक तारा चेला चा बी देखे. 4काहाकि ओसो काय नि होये जू नोवलाय जाणो जुवे, एने डूकायीन काम कोरे कोदि तू यो काम कोरतेलु छे, ती आपना खुदो काजे जोगोमा देखाळ.” 5काहाकि तेरा भाशे बी तेर पोर भुरसू नि कोरता होता. 6तेत्यार येसु तीनु काजे कोयू, “मारी टेम हिमी तोक नि आवी, बाकीन तुमरेन कोरता आखी टेम छे. 7जोग तुमरे पोर दुष्मोनी नि कोर सोकतलो, बाकीन चो मारे साते दुष्मोनी कोरतेला काहाकि मी तेरे खिलापमा जी गोवायी आपलु छे कि तेरा कामे भुंडला छे. 8तुमु तीहीवारोमा जावू; मी हिमी इना तीहीवारोमा नि जातु, काहाकि हिमी तोक मारू टेम पुरू नि होये.” 9चू तीनु काजे जी वाते कोयीन गलीलमा रोय गोयू.

खोपळान तीहीवारोमा येसु

10बाकीन जेतार तेरा भाशे तीहीवारोमा जात रोया ती चू खुद बी, भीळमा नि बाकीन माणू कि गुप्त रुपसी गोयू. 11यहुदि तीहीवारोमा तीनाक यो कोयीन हेरने बाज गोया, “चू का छे?” 12एने माणसोमा तेरे बारामा चुराये-चुराये जुदा वाते होया काहनला कोयता होता, “चू वारला माणूस छे” एने कहानला कोयता होता, “नि, चू माणसो काजे भनकावतलु छे.” 13ते बी यहुदियान बिकोन मारे कुदु माणूस तेरे बारामा उगाळीन नि बुलतु होतु.

तीहीवारोमा येसुन प्रचार

14जेतार तीहीवारोन आदु दाहळू होय गोयू; ती येसु मंदीरमा जायीन सिकाळने बाज गोयू. 15तेत्यार यहुदिया नोवलायी कोरता जायीन कोया, “इनाक बिना भोननेन ग्यान कां गोथो आव लाग्यो?” 16येसु तीनुक जोवाब आप्यू, “मारू संदेश मारू नि होय, बाकीन मेसेक मुकलने वावान छे. 17कोदि कुदू तेरी मोर्जी पोर चालनेन कोरे, ती चू इना सिकापोनोन बारामा जान लेसे कि यो परमेश्वर जुव गोथो छे कि मे मारे जुव गोथू कोरतेलू छे. 18जू आपनेनचा गोथो काहीन कोरतेलु छे, चू आपनीत बोढाई चाहतलु छे; बाकीन जो आपुक मुकलने वावान महिमा जुवतली छे चू खोरलू छे, एने तीनामा अधोरमोन नि होय. 19काय मुसा तुमुक नियम शास्त्र नि आप्यू? ते बी तुमरेमा गोथू कुदु नियम शास्त्र पोर नि चालता तुमु काहा मेसेक मार नाखने हिंड रोया?” 20माणसे जोवाब आप्या, “तारेमा भुंडली आत्मा छे कून तूसेक मार नाखने हिंड रोया?” 21येसु तीनुक जोवाब आप्यू, “मे एक काम कोऱ्यु, एने तुमु आखा नोवलायी कोरतेला. 22इनान कोरता मुसा तुमु काजे सुंता कोरनेन आग्या आपलु छे (यो नि कि यो मुसा जुव गोथो छे बाकीन बाप दादा जुवू गोथो चालतो आव रोयो), एने तुमु शब्बाथोन दाहळे सुंता कोरतेला छे. 23जेतार शब्बाथोन दाहळे माणसोन सुंता कोरतेला काहाकि मुसान नियम शास्त्रान आग्या टोव नि जाय, ती तुमु मार पोर काहा इनान कोरता रीस कोरतेला कि मे शब्बाथोन दाहळे एक माणूस काजे पुरा रितीसी वारू कोऱ्यु. 24मूय देखीन नियाव मा कोरु, बाकीन खोरो-खोरो नियाव कोरु.”

काय येसुत मसिह छे?

25तेत्यार कहानास यरुशलेममा रोयने वावा कोयने लाग्या, “काय यु चू नी होय जीनाक मार नाखनेन कोशिश कोरणे बाज रोया? 26बाकीन देखू, चू ते उजोनतु वाते कोरतेलू एने कुदू तीना काजे काय नि कोयतलू काय सरदारे छाचलीन जान गोया कि यु मसिह छे? 27इनाक ते आमु उवेखतला कि यु कां वावू छे; बाकीन मसिह जेतार आवसे तेत्यार कुदू नि उवखे कि चू कां वावू छे.” 28तेत्यार येसु मंदीरमा प्रचार कोरतू जायीन आयळीन कोयु, “तुमुक मेसेक जानतला छे, एने जोबी जानतला छे कि मे कां वावू छे मे ते आपसुत नि आव्यु, बाकीन मेसेक मुकलने वावू खोरलू छे, तीनाक तुमु नी जानतला. 29मी तीनाक जानतलु छे काहाकि मे तेरे जुवू गोथू छे एने चू मेसे मुकेललु छे.” 30इनापोरसी चे तीनाक धोरावने हिंड्या, ते बी कुदू तीना पोर हात नि नाख्या काहाकि तेरु टेम हिमी तोक नि आवलु होतु. 31ते बी भीळ मायला जुदा माणसे तीना पोर भुरसू कोऱ्या, एने कोयने बाज गोया, “मसिह जेतार आवसे ती काय एरे गोथा मोटला चमत्कार देखाळसे.” 32फरुशी माणसे तेरे बारा ये वाते डूकाय डूकायन कोरता होता; एने पुढाऱ्या एने फरुशी तीनाक धरणे सिपायळाक मुकल्या. 33इनापोर येसु कोयू मे थुलिक वार तुमरे साते छे ओवतेन मारा मुकलने वावानचा जात रोष, 34तुमु मेसेक हेरसू बाकीन तुमुक नि जुळो; एने जा मे छे चा तुमु नि आव सकतला. 35यहुदि आपसामा कोया यु का जासे कि होयू आपनुक नि जुळे? काय यु तिना यहुदिनचा जासे जे युनानीमा वेरा वेर होय रोया होता, एने युनानी काजे बी संदेश आपसे? 36जी काय वात छे जी चू कोयू, कि “तुमु मेसेक हेरसू, बाकीन नि जोळे; एने मे जा छे, चा तुमु नि आव सोकतला?”

जीवनोन पाणीन नद्या

37तीहीवारोन आखरी दाहळे, जू खास दाहळू छे, येसु उभू रोयू एने आयळीन कोयू, “कोदि कुदू तीसलो होसे ती मारेंचा आवे एने पिये. 38जू मार पोर भुरसू कोरसे, जोसो पवित्र शास्त्रमा आवलो छे, ‘तेरा डीलोमा गोथो जीवनोन पाणीन नोदी वोयीन निकवसे.’” 39चू यो वचन पवित्र आत्मान बारामा कोयू, जीनाक तेरे पोर भुरसू कोरणे वावा लेनेपोर होता; काहाकि आत्मा हिमी तोक नि उतरलू होतु, काहाकि येसु हिमी तोक आपना महिमा काजे नि पुगलू होतु. 40तेत्यार गोरदीमा गोथा कहानास जे वाते सोमवीन कोया, “छाचलीन यु चू भविष्य कोरता छे.” 41दिसरा कोया, “यु मसिह छे” बाकीन काहनास कोया, “काहा? काय मसिह गलीलमा गोथू आवसे? 42काय पवित्र शास्त्रमा यो नि आव्यो मसिह दाऊदन पिढीमा गोथू एने बेथलेहेम गावोमा गोथू आवसे, जा दाऊद रोयतु होतु?” 43आखरी तेरे वोजेसी माणसोमा फुट पोडी. 44तीनामा गोथा काहनास तीना काजे धोरणेन कोरता होता, बाकीन कुदु तीना पोर हात नि नाख्या. 45तेत्यार सिपायळा प्रधान पुजारू एने फरुशीनचा पोछा फिरीन आव लाग्या; चे तीनु काजे कोया, “तुमु तीना काजे काहा नि लाव्या?”

यहुदि अगवान अविस्वास

46सिपायळा जोवाब आप्या, “कानला माणसे कोबी नि ओसा वाते कोऱ्या कि, 47फरुशी तीनुक जोवाब आप्या, काय तुमु बी भोंगलाय गोया? 48काय सरदारोमा गोथा नि ती फरुशीमा गोथा कुदू बी तेरे पोर भुरसू कोरला छे? 49बाकीन जे माणसे शास्त्राक नि जानतला, शापित छे.” 50निकदेम यु पेहेले तेरो जुव आवलु होतु तेरेमायलू एक होतु, चू कोयू, 51“काय आपनी नियम कहाना माणसो काजे जेतार तोक पेहेले तेरी सोमवीन जान लेये कि चू काय कोरतेलू छे, गुणावू ठेरावतली छे?” 52चे तीना काजे जोवाब आप्या, “काय तू बी गलीलोन छे? हेर एने देख कि गलीलमा गोथो कुदू भविष्य कोरता उपजनो नि जुवे.” 53तेत्यार चे आखा आपना-आपना घोर निकवीन जात रोया.

Currently Selected:

योहान 7: BFBNT

Highlight

Copy