ଯୋହନ 19
19
ଯୀଶୁଙ୍ଗ୍ ହାଃନି ଦଣ୍ଡ୍ ହିତାର୍
(ମାଥି. ୨୭:୧୫-୩୧; ମାର୍କ. ୧୫:୬-୨୦; ଲୁକ. ୨୩:୧୩-୨୫)
1ତାପାଚେ ଗବର୍ନର୍ ପିଲାତ ଯୀଶୁଙ୍ଗ୍ ଅସାହାଲ୍ଜି କର୍ଡା ହୁଦାଙ୍ଗ୍ ଟ୍ରାକ୍ତେଙ୍ଗ୍ ଆଦେସ୍ ହିତାନ୍। 2ଆରେ ସେନାର୍ ଯୀଶୁଙ୍ଗ୍ ରାଜା ଇଞ୍ଜି ଇନସ୍ତା କିଦେଙ୍ଗ୍ ୱାଙ୍ଗା କଲର୍ ଆଙ୍ଗି ଉସ୍ପିକିତାର୍, ଆରେ କାପ୍ଡ଼ାତାକେ ୱାଡ଼ି ମାର୍ ମୁକୁଟ୍ରସ୍ତି ତୁଜି କିତାର୍। 3ତାପାଚେ ଯୀଶୁଙ୍ଗ୍ ସେନାର୍ ଇନସ୍ତା କିଦେଙ୍ଗ୍ ଚେରାଆଜି ୱେଚ୍ଚାର୍, “ଏ ଯିହୁଦିର୍ ରାଜା ନିଙ୍ଗେଙ୍ଗ୍ ଜୱାର୍।” ଆରେ ହେୱାର୍ ଯୀଶୁଙ୍ଗ୍ ଚାପ୍ଡ଼ା ଇଡ଼୍ଦେଙ୍ଗ୍ ଲାଗାତାର୍।
4ପିଲାତ ଗବର୍ନର୍ ବାର୍ତ ୱାଜି ଯିହୁଦିରିଙ୍ଗ୍ ୱେଚ୍ଚାନ୍, “ନଙ୍ଗୟ୍ ଆନେଙ୍ଗ୍ ହେୱାନିଙ୍ଗ୍ ମି ଆଗେ ତାସି ୱାନାଙ୍ଗା। ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚି ହିଦ୍ନାଙ୍ଗା ଯେ, ଆନେଙ୍ଗ୍ ତା ବିରୁଦ୍ତାକେ ଇମ୍ଣି ଦସ୍ ଗାଟାଆଉଙ୍ଗା।” 5ତାପାଚେ ଯୀଶୁଙ୍ଗ୍ ବାର୍ତ ତାସିୱାତାର୍। ହେୱାନ୍ ୱାଡ଼ି ହାସ୍ନି ମୁକୁଟ୍ ଆରେ ୱାଙ୍ଗା କଲର୍ନି ଆଙ୍ଗି ଉସ୍ପି ମାଚାନ୍। ପିଲାତ ଗବର୍ନର୍ ୱେଚ୍ଚାନ୍, “ହୁଡ଼ାଟ୍, ହେୱାନ୍।”
6ହେୱାନିଙ୍ଗ୍ ହୁଡ଼୍ତି ଦାପ୍ରେ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଜାଗୁୱାଡ଼ିର୍ ଚେରାଆଜି ୱେଚ୍ଚାର୍, “ହେୱାନିଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍, ହେୱାନିଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍।” ମାତର୍ ପିଲାତ ଗବର୍ନର୍ ୱେଚ୍ଚାନ୍, “ଏପେଙ୍ଗ୍ ହେୱାନିଙ୍ଗ୍ ଅଜି କୃଶକାଟ୍ତାକେ ଦୁପ୍ଚି ଅହାଟ୍, ମାତର୍ ଆନେଙ୍ଗ୍ ତା ବିରୁଦ୍ତାକେ ଇମ୍ଣି ଦସ୍ ପା ଗାଟାଆଉଙ୍ଗା।”
7ଯିହୁଦିର୍ ୱେଚ୍ଚାର୍, “ମୋଶା ଲେକିକିତି ନିୟମ୍ ସାସ୍ତର୍ତାଙ୍ଗ୍ ହେୱାନ୍ ହାଃନି ଦଣ୍ଡ୍ ପାୟାଆନି ଦର୍କାର୍। ଇନେସ୍କି ହେୱାନ୍ ଜାର୍ତିଙ୍ଗ୍ ଈଶ୍ୱର ମେହି ଇଞ୍ଜି ୱେଚ୍ନାନା।”
8ପିଲାତ ଗବର୍ନର୍ ଇଦାଙ୍ଗ୍ ୱେନ୍ଞ୍ଜି ବେସି ପାଣ୍ଡ୍ରା ଆତାନ୍। 9ହେୱାନ୍ ତାଞ୍ଜ ହାଚାନ୍, ଆରେ ଯୀଶୁଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇମେତାଙ୍ଗ୍ ୱାତାଇନା?” ମାତର୍ ଯୀଶୁ ଇନାକାପା ୱେଚ୍ୱାତାନ୍। 10ପିଲାତ ଗବର୍ନର୍ ୱେଚ୍ଚାନ୍, “ଏନେଙ୍ଗ୍ ଇନାକା ନା ହୁଦାଙ୍ଗ୍ ବେଣ୍ କିଦୁଇ? ମାନ୍ତ ଇଟା, ନିଙ୍ଗେଙ୍ଗ୍ ମୁକ୍ତି ହିନାକା କି କୃଶକାଟ୍ତାକେ ଦୁପ୍ତେଦେଙ୍ଗ୍ ପା ମା ଆଦିକାର୍ ମାନାତ୍।”
11ଯୀଶୁ ୱେଚ୍ଚାନ୍, “ନା ଜପି ମି ଇମ୍ଣି ଆଦିକାର୍ ମାନାତ୍ ଇଞ୍ଜି ଏନେଙ୍ଗ୍ ୱେଚ୍ନାୟା, ହେ ଆଦିକାର୍ ଈଶ୍ୱର ନିଙ୍ଗେଙ୍ଗ୍ ହିତ୍ତାନ୍ନା। ଲାଗିଙ୍ଗ୍ ଇନେର୍ ନାଙ୍ଗେଙ୍ଗ୍ ନି କେଇଦ ହିତ୍ତାନ୍ନା, ତା ପାପ୍ ଆରେ ଗାଜା।”
12ଇଦାଙ୍ଗ୍ ପାଚେ ପିଲାତ ଗବର୍ନର୍ ଯୀଶୁଙ୍ଗ୍ ମୁକ୍ତି କିଦେଙ୍ଗ୍ ଉପାୟ୍ କିତାନ୍। ମାତର୍ ଯିହୁଦି ମାନାୟାର୍ ଆଲାଆଜି ୱେଚ୍ଚାର୍, “ଏନେଙ୍ଗ୍ ଯଦି ଇୱାନିଙ୍ଗ୍ ମୁକ୍ତି କିନାଇ, ଲାଗିଙ୍ଗ୍ ଏନେଙ୍ଗ୍ କାଇସର୍ ମିତ୍ର ଆକାୟ୍। ଇନେର୍ ଜାର୍ତିଙ୍ଗ୍ ରାଜା ଇଞ୍ଜି ଦାବି କିନାରା, ହେୱାନ୍ କାଇସର୍ ମହା ରାଜାଙ୍ଗ୍ ବିରୁଦ୍ତାକେ ୱେଚ୍ନାନା।”
13ପିଲାତ ଗବର୍ନର୍ ଯିହୁଦି ମାନାୟାର୍ ଇବେଣ୍ ୱେଚ୍ଚାନ୍। ଲାଗିଙ୍ଗ୍ ହେୱାନ୍ ଯୀଶୁଙ୍ଗ୍ ବିଚାର୍କିନି ମଣ୍ଡପ୍ତାକେ ତାସିୱାତାନ୍। ଏବ୍ରୀ ବେଣ୍ତାକେ ଗବ୍ବଥା ଇଞ୍ଜି ଇନାର୍। ପିଲାତ ଗବର୍ନର୍ ମଣ୍ଡପ୍ତାକେ ମାନି ବିଚାର୍କିନି ବାହାତାକେ କୁଚ୍ଚାନ୍। 14ହେ ଦିନ୍ ନିସ୍ତାର୍ ପାର୍ବୁ ଆଡ଼୍ଦିନ୍ତି ରହ୍ନି ଦିନ୍ନି ବାର୍ଟା ୱେଡ଼ା ଆଜି ମାଚାତ୍। ପିଲାତ ଗବର୍ନର୍ ଯିହୁଦିରିଙ୍ଗ୍ ୱେଚ୍ଚାନ୍, “ମି ରାଜାଙ୍ଗ୍ ହୁଡ଼ାଟ୍।”
15ଯିହୁଦିର୍ ଗାଜାକାଟ୍ କିଜି ୱେଚ୍ଚାର୍, “ଇୱାନିଙ୍ଗ୍ ଦେହା ଅସାହାଲାଟ୍। ଇୱାନିଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍।” ପିଲାତ ଗବର୍ନର୍ ଯିହୁଦିରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ଇନାକା ଇଚା କିନାଦେରା? ଆନେଙ୍ଗ୍ ମି ରାଜାଙ୍ଗ୍ କୃଶକାଟ୍ତାକେ ଦୁପ୍ଚି ଅହ୍ନାଙ୍ଗ୍?” ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଚେରାଆଜି ୱେଚ୍ଚାର୍, “କାଇସର୍ ମହା ରାଜା ନେ ମା ରାଜା।”
16ଲାଗିଙ୍ଗ୍ ପିଲାତ ଗବର୍ନର୍ ଯୀଶୁଙ୍ଗ୍ କୃଶକାଟ୍ତାକେ ଅସ୍ତେଙ୍ଗ୍ ହେୱାର୍ କେଇଦ ସର୍ପି କିଜି ହିତାନ୍। ଲାଗିଙ୍ଗ୍ ସେନାର୍ ଯୀଶୁଙ୍ଗ୍ ଅତାର୍।
ଯୀଶୁଙ୍ଗ୍ କୃଶକାଟ୍ତାକେ ଦୁପ୍ତାର୍
(ମାଥି. ୨୭:୩୨-୪୪; ମାର୍କ. ୧୫:୨୧-୩୨; ଲୁକ. ୨୩:୨୬-୪୩)
17ସେନାର୍ ଯୀଶୁଙ୍ଗ୍ ତା ଜାର୍ କୃଶକାଟ୍ ପିଣ୍ଡିକିଜି କାପ୍ଡ଼ାନି କପ୍ରି ଲେକେ ଚଞ୍ଜ୍ନିବାହାତାକେ ଅସିହାଚାର୍। ହେ ବାହାତିଙ୍ଗ୍ ଏବ୍ରୀ ବେଣ୍ତାକେ ଗଲ୍ଗତା ଇନାର୍। 18ହେ ବାହାତାକେ ହେୱାର୍ ଯୀଶୁଙ୍ଗ୍ କୃଶକାଟ୍ତାକେ ଦୁପ୍ତାର୍। ଯୀଶୁଙ୍ଗ୍ ମାଦି ଇଡ଼୍ଜି ତା ତିନା ବାଗାଇ ଆରେ ରକାନିଙ୍ଗ୍ ଡେବା ବାଗାଇ ରକାନିଙ୍ଗ୍ କୃଶକାଟ୍ତାକେ ଦୁପ୍ତାର୍। 19ପିଲାତ ରାଜା ର ମାର୍ ପାଟା ରସ୍ତି ଯୀଶୁଙ୍ଗ୍ ଦୁପ୍ତି କୃଶକାଟ୍ ଜପି ବଡ୍ ଇଡ଼୍ତାର୍। ହେ ପାଟାତାକେ ହେଲେକେ ଲେକାଆଜି ମାଚାତ୍, “ଏ ନାଜରିତିୟ ଯୀଶୁ, ଯିହୁଦିର୍ ରାଜା।” 20ଯୀଶୁଙ୍ଗ୍ କୃଶକାଟ୍ତାକେ ଦୁପ୍ତି ବାହା ଯିରୁଶାଲାମ୍ ସହର୍ ଲାଗାୟ୍ ମାଚାତ୍। ଆରେ ବେସିହେନି ଯିହୁଦିର୍ ହେ ପାଟାତାକେ ଲେକାଆତାକା ପଡ଼ିକିତାର୍। ଇଦାଙ୍ଗ୍ ଏବ୍ରୀ, ଲାଟିନ୍ ଆରେ ଗ୍ରୀକ୍ ବେଣ୍ତାକେ ଲେକାଆଜି ମାଚାତ୍।
21ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ପିଲାତ ରାଜାଙ୍ଗ୍ ୱେଚ୍ଚାନ୍, “ଯିହୁଦିର୍ ରାଜା ଇଞ୍ଜି ଲେକିକିୱାଦାଙ୍ଗ୍। ମାତର୍ ଆନେଙ୍ଗ୍ ଯିହୁଦିର୍ ରାଜା ଇଞ୍ଜି ଲେକିକିୟାଟ୍।”
22ପିଲାତ ରାଜା ୱେଚ୍ଚାନ୍, “ଆନେଙ୍ଗ୍ ଇନାକା ଲେକିକିତାଙ୍ଗ୍ନା, ହେଦାଙ୍ଗ୍ ବାଦ୍ଲାଇ କିଉଙ୍ଗ୍।”
23ଯୀଶୁଙ୍ଗ୍ କୃଶକାଟ୍ତାକେ ଦୁପ୍ତି ପାଚେ ସେନାର୍ ତା ହେନ୍ଦ୍ରାପାଟା ଅତାର୍। ଆରେ ହେୱାର୍ ତା ହେନ୍ଦ୍ରାପାଟାତିଙ୍ଗ୍ ଚାରି ବାଗ୍ କିତାର୍। ୱିଜାକାର୍ ସେନାର୍ ର-ର ବାଗ୍ ଇଡ଼୍ତାର୍। ହେୱାର୍ ତା ଉସ୍ପିତି ଆଙ୍ଗି ପା ଅତାର୍। ଇଦାଙ୍ଗ୍ ତାରେନ୍ତାଙ୍ଗ୍ ଜପି ପାତେକ୍ ସିଲାଇ କିୱାଦାଙ୍ଗ୍ ମାଚାତ୍। ମାତର୍ ହେ ଆଙ୍ଗିତିଙ୍ଗ୍ କେଇଦ ଡ଼ଚ୍ଚାକା। 24ଲାଗିଙ୍ଗ୍ ହେୱାର୍ ଜାର୍-ଜାର୍ ବେଣ୍କିବାଆତାର୍, “ଆସେଙ୍ଗ୍ ଇଦାଙ୍ଗ୍ତିଙ୍ଗ୍ କେଚ୍ଚି ବାଗ୍ କିଉସ୍। ଇଦାଙ୍ଗ୍ ଇନେର୍ ଇନାକା ପାୟାଆନାର୍, ହେଦାଙ୍ଗ୍ ପୁଞ୍ଜେଙ୍ଗ୍ ଆସେଙ୍ଗ୍ ଲାଟ୍ରି ପୁଟାଇ କିନାସ୍।” ଇଦାଙ୍ଗ୍ କାଜିଙ୍ଗ୍ ଦରମ୍ ସାସ୍ତର୍ନି ବେଣ୍ ପୁରା ଆତାତ୍, “ହେୱାର୍ ଜାର୍-ଜାର୍ବିତ୍ରେ ନା ଆଙ୍ଗି ବାଗ୍ କିତାର୍, ଆରେ ନା ଉସ୍ପିତି ଆଙ୍ଗି କାଜିଙ୍ଗ୍ ଲାଟ୍ରି ପୁଟାଇ କିତାର୍।” ଲାଗିଙ୍ଗ୍ ସେନାର୍ ହେଲେକେ କିତାର୍। 25ଯୀଶୁ ତେହି ତା କୃଶକାଟ୍ ଲାଗାୟ୍ ନିଲ୍ଚି ମାଚାତ୍, ହେବେ ତାଞ୍ଜିୟା ତଣ୍ଦେହି, କ୍ଲପା ଡକ୍ରୁହି ମରିୟମ, ଆରେ ମଗ୍ଦଲିନି ସହରନି ମରିୟମ ପା ନିଲ୍ଚି ମାଚିକ୍। 26ଯୀଶୁ ତା ତେହିଙ୍ଗ୍ ହୁଡ଼୍ତାନ୍। ଆରେ ହେୱାନ୍ ତା ଲାଡ୍ ଚେଲାହିଙ୍ଗ୍ ପା ତା ଲାଗାୟ୍ ନିଲ୍ତାକା ହୁଡ଼୍ତାନ୍। ତା ତେହିଙ୍ଗ୍ ୱେଚ୍ଚାନ୍, “ଏ ନା ଆୟା, ଏହେଁ ହୁଡ଼ା, ନି ମାଜି!” 27ତାପାଚେ ଯୀଶୁ ତା ଚେଲାହିଙ୍ଗ୍ ୱେଚ୍ଚାନ୍, “ହୁଡ଼ା ମିଞ୍ଜ୍ୟା।” ଆରେ ତା ଚେଲାହି ଯୀଶୁ ତେହିଙ୍ଗ୍ ତାଞ୍ଜ ଅସାହାଚାନ୍।
ଯୀଶୁ ହାଃତି କାତା
(ମାଥି. ୨୭:୪୫-୫୬; ମାର୍କ. ୧୫:୩୩-୪୧; ଲୁକ. ୨୩:୪୪-୪୯)
28ତାପାଚେ ଯୀଶୁ ଦରମ୍ ସାସ୍ତର୍ ପୁରା ଆନି କାଜିଙ୍ଗ୍ ହେୱାନ୍ ୱେଚ୍ଚାନ୍, “ନାଙ୍ଗେଙ୍ଗ୍ ଏସ୍କି କିଦ୍ନାତା।” 29ହେବେ ର ଟାଙ୍ଗାତାକେ ବାର୍ତି ହଇନି ଅଙ୍ଗୁର୍ ରାସ୍ ବାର୍ତିକିଜି ଇଡ଼୍ଜି ମାଚାର୍। ହେୱାର୍ ର ସ୍ପଞ୍ଜ୍ତିଙ୍ଗ୍ ରାସ୍ତାକେ କୁକ୍ଚି ବେଡ୍ଗାତାକେ ଚାନ୍ଞ୍ଜି ଯୀଶୁ ୱେଇଦ ଡୁପ୍ତାର୍। 30ଆରେ ଯୀଶୁ ହେ ରାସ୍ ଉଣ୍ଜି ୱେଚ୍ଚାନ୍, “ଇଦାଙ୍ଗ୍ ୱିସ୍ତାତ୍”। ତାପାଚେ ହେୱାନ୍ କାପ୍ଡ଼ାତିଙ୍ଗ୍ ତାରେନ୍ କିଜି ହାଃତାନ୍।
ଯୀଶୁଙ୍ଗ୍ ବାଲା ହୁଦାଙ୍ଗ୍ କୁନ୍ଦ୍ତି କାତା
31ହେ ଦିନ୍ ନିସ୍ତାର୍ ପାର୍ବୁ ରହ୍ନି ଦିନ୍ ମାଚାତ୍। ତା ଆର୍କାତ୍ ନାଞ୍ଜିଙ୍ଗ୍ ଜମ୍ନିଦିନ୍ ମାଚାତ୍। ଲାଗିଙ୍ଗ୍ ଯିହୁଦିର୍ ଇଚା କିୱାଦାଙ୍ଗ୍ ମାଚାର୍ ଯେ, ହାଃତି ଗାଗାଡ଼୍ କୃଶକାଟ୍ ଜପି ଜମ୍ନିଦିନ୍ ପାତେକ୍ ଜଲାଆଜି ମାନେତ୍। ଲାଗିଙ୍ଗ୍ ହେୱାର୍ ପିଲାତ ରାଜାଙ୍ଗ୍ ୱେଚ୍ଚା, ଯୀଶୁଙ୍ଗ୍ କାଲ୍କୁ ଡିକ୍ତେଙ୍ଗ୍ ଆଦେସ୍ ହିଦା। ଇନେସ୍କି ହେୱାନ୍ ବେଗି ହାଃନାନ୍, ଆରେ ତା ଗାଗାଡ଼୍ କୃଶକାଟ୍ତାଙ୍ଗ୍ ତାରେନ୍ ଜୁତ୍ତେଙ୍ଗ୍ ଗୁୱାରି କିତାର୍। 32ଲାଗିଙ୍ଗ୍ ସେନାର୍ ୱାଜି ଯୀଶୁ ହୁଦାଙ୍ଗ୍ କୃଶକାଟ୍ତାକେ ଦୁପ୍ଚି ମାଚି ହେ ରିୟାରିଙ୍ଗ୍ କାଲ୍କୁ ଡିକ୍ତାର୍। 33ମାତର୍ ହେୱାର୍ ଏଚେପାଦ୍ନା ଯୀଶୁ ଲାଗାୟ୍ ୱାତାର୍, ହେପାଦ୍ନା ହେୱାର୍ ହୁଡ଼୍ତାର୍ ଯେ, ହେୱାନ୍ ହାଃତାନେ। ଲାଗିଙ୍ଗ୍ ହେୱାର୍ ତା କାଲ୍କୁକାଙ୍ଗ୍ ଡିକ୍ୱାତାର୍। 34ମାତର୍ ରକାନ୍ ସେନା ବାଲା ହୁଦାଙ୍ଗ୍ ତା ନେଞ୍ଜାଡାକିତାକେ କୁନ୍ଦ୍ତାନ୍। ସାଙ୍ଗେ-ସାଙ୍ଗେ ତା ନେଞ୍ଜାଡାକିତାଙ୍ଗ୍ ନେତେର୍ ଆରେ ଏଜୁଙ୍ଗ୍ ହତ୍ତିକ୍। 35ଇନେର୍ ଇଦାଙ୍ଗ୍ ହୁଡ଼୍ତାର୍ନା ହେୱାନ୍ ୱେଚ୍ଚାନ୍ନା। ତା କାଜିଙ୍ଗ୍ ଏପେଙ୍ଗ୍ ପା ୱେନ୍ଞ୍ଜି ପାର୍ତି କିନାଦେର୍। ହେୱାନ୍ ଇନାକା ୱେଚ୍ନାନ୍, ହେଦାଙ୍ଗ୍ ସତ୍। ହେୱାନ୍ ପୁନାନ୍ ଯେ, ହେୱାନ୍ ସତ୍ ୱେଚ୍ନାନ୍। 36ଇନେସ୍କି ଦରମ୍ ସାସ୍ତର୍ତାକେ ଇନାକା ଲେକା ଆଜିମାନାତ୍ ଇୱିଜୁ ଗାଟା ଆତାତ୍ନା, “ତା ରଞ୍ଜାଙ୍ଗ୍ ପେଣ୍ ପା ଡିଙ୍ଗୁତ୍।” 37ଆରେରଗ ଦରମ୍ ସାସ୍ତର୍ତାକେ ଲେକା ମାନାତ୍, “ହେୱାର୍ ଇନେରିଙ୍ଗ୍ ବାଲା ହୁଦାଙ୍ଗ୍ କୁନ୍ତିସ୍, ହେୱାନିଙ୍ଗ୍ ମାନାୟାର୍ ହୁଡ଼୍ନାର୍।”
ଯୀଶୁ ଦୁଗେର୍
(ମାଥି. ୨୭:୫୭-୬୧; ମାର୍କ. ୧୫:୪୨-୪୭; ଲୁକ. ୨୩:୫୦-୫୬)
38ତାପାଚେ ହାରାମାତିଆନି ଯୋଷେପ ତର୍ଦାକାନ୍ ରକାନ୍ ମାନାୟ୍ ପାଣ୍ଡ୍ରା ଆୱାଦାଙ୍ଗ୍ ରମିୟ ସର୍କାର୍ ପିଲାତତାକେ ହାଲ୍ଜି ଯୀଶୁ ହାଃତି ମାଡ଼ାତିଙ୍ଗ୍ କୃଶକାଟ୍ତାଙ୍ଗ୍ ଜୁତ୍ତି ମୁଚ୍ଚେଙ୍ଗ୍ ଅନୁମତି ଏନ୍ତାନ୍। ଯୋଷେପ ଯୀଶୁ ଚେଲାହି ମାଚାନ୍। ମାତର୍ ହେୱାନ୍ ମାନାୟାରିଙ୍ଗ୍ ହେଦାଙ୍ଗ୍ ୱେଚ୍ୱାତାନ୍, ଇନେସ୍କି ହେୱାନ୍ ଯିହୁଦିରିଙ୍ଗ୍ ପାଣ୍ଡ୍ରାଆଜି ମାଚାନ୍। ପିଲାତ ଗବର୍ନର୍ ଯୋଷେପତିଙ୍ଗ୍ ଯୀଶୁ ଗାଗାଡ଼୍ତିଙ୍ଗ୍ ଅଦେଙ୍ଗ୍ ଆଦିକାର୍ ହିତାନ୍। ଲାଗିଙ୍ଗ୍ ଯୋଷେପ ୱାଜି ଯୀଶୁ ହାଃତି ଗାଗାଡ଼୍ତିଙ୍ଗ୍ ଅତାନ୍। 39ନିକଦିମ ପା ଯୋଷେପ ହୁଦାଙ୍ଗ୍ ହାଚାନ୍। ହେୱାନ୍ ପାର୍ତୁମ୍ ଯୀଶୁ ହୁଦାଙ୍ଗ୍ ମିକାଲିଙ୍ଗ୍ ମେହାଆଦେଙ୍ଗ୍ ହାଲ୍ଜି ମାଚାନ୍। ଆରେ ତା ହୁଦାଙ୍ଗ୍ କାତା ଆଜି ମାଚାନ୍। ହେୱାନ୍ ଯୀଶୁ ଗାଗାଡ଼୍ତାକେ ଇତ୍ପେଦେଙ୍ଗ୍ ତିରିଶ୍ ତିନ୍ କେଜି ବାସ୍ନା ଚିକାଣ୍ ଆଗେତାଙ୍ଗ୍ ତାସି ୱାଜିମାଚାନ୍। 40ଯିହୁଦିର୍ ଦୁଗେର୍ ହିନି ବିଦିତାଙ୍ଗ୍ ହେୱାର୍ ରିକାର୍ ଯୀଶୁ ହାଃତି ଗାଗାଡ଼୍ତିଙ୍ଗ୍ ବାସ୍ନା ଚିକାଣ୍ ହୁଦାଙ୍ଗ୍ ହାର୍ଦି ପାତାଡ଼୍ ହେନ୍ଦ୍ରାତାଙ୍ଗ୍ ହୁର୍ପାତାର୍। 41ଯୀଶୁଙ୍ଗ୍ ଇମେତାକେ କୃଶକାଟ୍ତାକେ ଦୁପ୍ଚି ମାଚାର୍, ହେ ବାହା ଲାଗାୟ୍ ର ବଗିଚା ମାଚାତ୍। ହେ ବିଗିଚାତାକେ ର ପୁନି ଦୁଗେର୍ ମାଚାତ୍, ଇମେତାକେ ଆଗେତାଙ୍ଗ୍ ଇନେରିଙ୍ଗ୍ ମୁଚ୍ୱାଦାଙ୍ଗ୍ ମାଚାର୍। 42ଯିହୁଦିର୍ ଜମ୍ନିବାର୍ ଆରମ୍ ଆୱି ଆଗେ ଶୁକୁରୁବାର୍ ମାଚାତ୍, ହେୱାର୍ ରହ୍ନି କାମାୟ୍ ୱିହ୍ନି କାଜିଙ୍ଗ୍ ହେୱାର୍ ଯୀଶୁ ହାଃତି ଗାଗାଡ଼୍ତିଙ୍ଗ୍ ହେବେ ମୁଚ୍ଚାର୍, ଇନେସ୍କି ହେ ଦୁଗେର୍ ଲାଗାୟ୍ ମାଚାତ୍।
Currently Selected:
ଯୋହନ 19: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
