ଯୋହନ 18
18
ଯୀଶୁ ଶାତ୍ରୁ କେଇଦ ଆହିଆତାନ୍
(ମାଥି. ୨୬:୪୭-୫୬; ମାର୍କ. ୧୪:୪୩-୫୦; ଲୁକ. ୨୨:୪୭-୫୩)
1ଯୀଶୁ ଇ ପାର୍ତାନା କିଜି ୱିସ୍ତି ପାଚେ, ଚେଲାହିର୍ ହୁଦାଙ୍ଗ୍ କିଦ୍ରୋଣ ନାଗୁଡ଼୍ ହେ ପାଡ଼୍କା ହାଚାନ୍। ହେବେ ର ବଗିଚା ମାଚାତ୍। ଯୀଶୁ ଆରେ ତା ଚେଲାହିର୍ ହେବେ ୱାତାର୍। 2ଇଷ୍କାରିତିୟ ଯିହୁଦା ଇବାହା ପୁନ୍ଞ୍ଜି ମାଚାନ୍। ଇନେସ୍କି ଯୀଶୁ ତା ଚେଲାହିର୍ ହୁଦାଙ୍ଗ୍ ହେ ବାହାତାକେ ୱିଜୁଦିନ୍ ହାଲ୍ଜି ମାଚାର୍। ହେ ଇଷ୍କାରିତିୟ ଯିହୁଦାନେ ଯୀଶୁଙ୍ଗ୍ ଶତ୍ରୁ କେଇଦ ଆହିକିଦେଙ୍ଗ୍ ଉପାୟ୍ କିଜି ମାଚାନ୍। 3ଲାଗିଙ୍ଗ୍ ଯିହୁଦା ର ମାନ୍ଦା ସେନାରିଙ୍ଗ୍ ଅଜି ବଗିଚାତାକେ ହାଚାନ୍। ହେୱାନ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପାରୁସିଦଳ୍ ବିତ୍ରେତାଙ୍ଗ୍ କେତ୍ଜାଣ୍ ଜାଗୁୱାଡ଼ିରିଙ୍ଗ୍ ପା ଅଜି ମାଚାନ୍, ହେୱାର୍ ହାତ୍ ଲାଇଟ୍, ଲାତର୍ ଆରେ କାଣ୍ଡାଙ୍ଗ୍ ଆସ୍ତି ହେବେ ଇକାତାର୍।
4ହେୱାନିଙ୍ଗ୍ ଇନାକା ଗଟାଆନାତ୍, ହେ ବେଣ୍ ଯୀଶୁ ଆଗେତାଙ୍ଗ୍ ପୁନ୍ଞ୍ଜି ମାଚାନ୍। ହେୱାନ୍ ହେୱାର୍ ଲାଗାୟ୍ ହାଲ୍ଜି ୱେଚ୍ଚାନ୍, “ଏପେଙ୍ଗ୍ ଇନେରିଙ୍ଗ୍ ଡେକ୍ନାଦେରା?”
5ହେ ମାନାୟାର୍ ୱେଚ୍ଚାର୍, “ନାଜରିତିୟ ଯୀଶୁଙ୍ଗ୍।” ଯୀଶୁ ୱେଚ୍ଚାନ୍, “ଆନେଙ୍ଗ୍ ନିଜେ ହେୱାନ୍।” ଯୀଶୁ ବିରୁଦ୍ତାକେ ହାଲ୍ଜି ମାଚି ଯିହୁଦା ପା ହେୱାର୍ ହୁଦାଙ୍ଗ୍ ନିଲ୍ଚି ମାଚାନ୍। 6ଏଚେପାଦ୍ନା ଯୀଶୁ ୱେଚ୍ଚାନ୍, “ଆନେଙ୍ଗ୍ ନେ ହେୱାନ୍,” ମାନାୟାର୍ ପାଚ୍ବାଗାୟ୍ ଗୁଚାଆଜି ତାରେନ୍ ଗୁର୍ତାର୍। 7ଯୀଶୁ ହେୱାରିଙ୍ଗ୍ ଆରେରଗ ୱେନ୍ବାତାନ୍, “ଏପେଙ୍ଗ୍ ଇନେରିଙ୍ଗ୍ ଡେକ୍ନାଦେରା?” ହେୱାର୍ ୱେଚ୍ଚାର୍, “ନାଜରିତିୟ ଯୀଶୁଙ୍ଗ୍।”
8ଯୀଶୁ ୱେଚ୍ଚାନ୍, “ଆନେଙ୍ଗ୍ ତ ୱେଚ୍ଚାନାଙ୍ଗା ଆନେଙ୍ଗ୍ ନେ ହେୱାନ୍। ଏପେଙ୍ଗ୍ ଯଦି ନାଙ୍ଗେଙ୍ଗ୍ ଦାସ୍ତାନାଦେରା, ଲାଗିଙ୍ଗ୍ ଇ ମାନାୟାରିଙ୍ଗ୍ ଇବେତାଙ୍ଗ୍ ହାଞ୍ଜେଙ୍ଗ୍ ପିସ୍ତି ହିୟାଟ୍।” 9ହେଲେକେ ଗଟାଆତାତ୍ ଇନେସ୍କି ଆଗେ ହେୱାର୍ତାକେ ଲେକାଆତି ଦରମ୍ ସାସ୍ତର୍ ପୁରାଆନାତ୍, “ ଏନେଙ୍ଗ୍ ନାଙ୍ଗେଙ୍ଗ୍ ଇମ୍ଣାକାରିଙ୍ଗ୍ ହିତ୍ତାୟ୍ନା ଆନେଙ୍ଗ୍ ରକାନିଙ୍ଗ୍ ପା ଆରାଇ କିଉଙ୍ଗେ।”
10ଶିମୋନ ପିତର ଲାଗାୟ୍ ର କାଣ୍ଡା ମାଚାତ୍। ହେୱାନ୍ କାଣ୍ଡା ହପ୍ଚି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିନି ହଲିଆହିଙ୍ଗ୍ ତିନାବାଗାୟ୍ନି କିତୁଲ୍ ହଣ୍ତାନ୍। ହେ ହଲିଆହି ତର୍ ମାଲ୍ଖ। 11ହେବେତାଙ୍ଗ୍ ଯୀଶୁ ପିତରତିଙ୍ଗ୍ ୱେଚ୍ଚାନ୍, “ନି କାଣ୍ଡା ନି ଲାଗାୟ୍ ଇଟା। ଆବା ଈଶ୍ୱର ନାଙ୍ଗେଙ୍ଗ୍ ଇ ଦୁକ୍ ପାୟା ଆଦେଙ୍ଗ୍ ହିତ୍ତାନ୍ନା, ଆନେଙ୍ଗ୍ ଇଦାଙ୍ଗ୍ ପାୟାଆନି ଦର୍କାର୍।”
ହାନାନ ମୁମ୍ଦ ଯୀଶୁଙ୍ଗ୍ ଅତାର୍
12ତାପାଚେ ସେନାହିର୍, ଆରେ ସେନାପତିର୍, ଆରେ, ଯିହୁଦିର୍ ଜାଗୁୱାଡ଼ିର୍ ଯୀଶୁଙ୍ଗ୍ ଆସ୍ତାର୍। 13ଆରେ ହେୱାର୍ ହେୱାନିଙ୍ଗ୍ ଗାଚ୍ଚାର୍ ଆରେ ହାନାନ ଲାଗାୟ୍ ଅସାହାଚାର୍। ହାନାନ କୟାପା ପତ୍ଲେହି ମାଚାନ୍। ହେ ବାର୍ହୁ କୟାପା ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ମାଚାନ୍। 14କୟାପା ଯିହୁଦିରିଙ୍ଗ୍ ୱେଚ୍ଚି ମାଚାନ୍, “ୱିଜୁ ମାନାୟାରିଙ୍ଗ୍ ହାର୍ କାଜିଙ୍ଗ୍ ରକାନ୍ ହାଃନାକା ହାର୍।”
ଯୀଶୁଙ୍ଗ୍ ପିତର ପୁନ୍ୱାତାଙ୍ଗ୍ନା ଇଞ୍ଜି ୱେଚ୍ଚାନ୍
(ମାଥି. ୨୬:୬୯-୭୦; ମାର୍କ. ୧୪:୬୬-୬୮; ଲୁକ. ୨୨:୫୫-୫୭)
15ଶିମୋନ ପିତର ଆରେ ଜେକନି ଚେଲାହି ଯୀଶୁ ହୁଦାଙ୍ଗ୍ ହାଚାର୍। ହେ ଚେଲାହିଙ୍ଗ୍ ରକାନ୍ ଈଶ୍ୱର ହେବାକିନି ମୁଡ଼୍ଦି ପୁଜାରିଙ୍ଗ୍ ପୁନ୍ଞ୍ଜି ମାଚାନ୍। ଲାଗିଙ୍ଗ୍ ହେୱାନ୍ ଯୀଶୁ ହୁଦାଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିନି ହାକ୍ଡ଼ି ପାତେକ୍ ହାଚାନ୍। 16ମାତର୍ ପିତର ଗେଟ୍ ବାର୍ତ ନିଲ୍ଚି ମାଚାନ୍। ଜେକନି ଚେଲା ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିଙ୍ଗ୍ ପୁନ୍ଞ୍ଜି ମାଚାନ୍, ହେଦାଙ୍ଗ୍ କାଜିଙ୍ଗ୍ ବାର୍ତ ହାଲ୍ଜି ଗେଟ୍ ଜାଗୁୱାଡ଼ି ଚାକ୍ରାଣିଙ୍ଗ୍ ୱେଚ୍ଚି ପିତରତିଙ୍ଗ୍ ବିତ୍ରେ ତାସିୱାତାନ୍। 17ହେ ଚାକ୍ରାଣି ପିତରତିଙ୍ଗ୍ ୱେନ୍ବାତାତ୍, “ଏନେଙ୍ଗ୍ ପା ଇନାକା ଇ ମାନାୟ୍ ଚେଲାହି ବିତ୍ରେତାଙ୍ଗ୍ ରକାଇ?” ପିତର ୱେଚ୍ଚାନ୍, “ଆକାୟ୍, ଆନେଙ୍ଗ୍ ଆକାୟ୍।”
18ପିନି ଆଜିମାଚାତ୍। ହଲିଆର୍ ଆରେ ଜାଗୁୱାଡ଼ି ନାଣି ତୁବ୍ଜି ମାଚାର୍। ହେୱାର୍ ଚାରିବେଣ୍ତାଙ୍ଗ୍ ନିଲ୍ଚି ନାଣି କାଇଜି ମାଚାର୍। ପିତର ପା ହେବେ ହେୱାର୍ ହୁଦାଙ୍ଗ୍ ନିଲ୍ଚି ନାଣି କାଇଜି ମାଚାନ୍।
ଯୀଶୁଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରି ପ୍ରଶ୍ନ ୱେନ୍ବାତାନ୍
(ମାଥି. ୨୬:୫୯-୬୬; ମାର୍କ. ୧୪:୫୫-୬୪; ଲୁକ. ୨୨:୬୬-୭୧)
19ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଯୀଶୁଙ୍ଗ୍ ତା ଚେଲାହିର୍ ବିଷୟରେ ଆରେ ତା ହିକ୍ଷା ବିଷୟରେ ପ୍ରଶ୍ନ ୱେନ୍ବାତାନ୍। 20ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମାନାୟାରିଙ୍ଗ୍ କୁଲାକୁଲି ହିକ୍ଷା ହିତାଙ୍ଗ୍ନା। ଆନେଙ୍ଗ୍ ୱିଜୁଦିନ୍ ପାର୍ତାନା ଇଞ୍ଜ ଆରେ ଈଶ୍ୱର ମାନି ମନ୍ଦିର୍ତାକେ ହିକ୍ଷାହିଜି ୱାତାଙ୍ଗ୍ନା। ହେବେ ୱିଜୁ ଯିହୁଦିର୍ ରବେ ଆନାର୍। ଆନେଙ୍ଗ୍ ଇମ୍ଣି ବିଷୟ ପା ଡ଼ୁକ୍ୱାଦାଙ୍ଗ୍ ୱେଚ୍ୱାତାଙ୍ଗ୍ନା। 21ଏନେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ୱେନ୍ବାଆଦ୍ନାୟା? ନା ହିକ୍ଷା ୱେଚାକାରିଙ୍ଗ୍ ୱେନ୍ବା, ଆନେଙ୍ଗ୍ ଇନାକା ୱେଚ୍ଚି ମାଚାଙ୍ଗ୍ ହେୱାର୍ ହେଦାଙ୍ଗ୍ ପୁନାର୍।”
22ଯୀଶୁ ଇ କାତା ୱେଚ୍ନିହିଙ୍ଗ୍ ଯୀଶୁ ଲାଗାୟ୍ ନିଲ୍ତାକାନ୍ ରକାନ୍ ଜାଗୁୱାଡ଼ି ହେୱାନିଙ୍ଗ୍ ମୁମ୍ଦ ଇଡ଼୍ତାନ୍। ହେୱାନ୍ ୱେଚ୍ଚାନ୍, “ଏନେଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିଙ୍ଗ୍ ଇଲେକେ ୱେଚ୍ନି କାତା ଆକାୟ୍।”
23ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଯଦି ବୁଲ୍ ୱେଚ୍ଚାତାଙ୍ଗ୍ ଲାଗିଙ୍ଗ୍ ଇବେ ମାନି ୱିଜାକାରିଙ୍ଗ୍ ନା ବୁଲ୍ ୱେଚ୍ଚି ହିୟା। ଯଦି ଆନେଙ୍ଗ୍ ୱେଚ୍କା ଟିକ୍, ଲାଗିଙ୍ଗ୍ ନାଙ୍ଗେଙ୍ଗ୍ ଏନେଙ୍ଗ୍ ଇନା କିଦେଙ୍ଗ୍ ଇଡ଼୍ଦାତାଇ?”
24ଲାଗିଙ୍ଗ୍ ହାନାନ ଯୀଶୁଙ୍ଗ୍ ଗାଚ୍ଚି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି କୟାପା ଲାଗାୟ୍ ପକ୍ତାନ୍।
ଯୀଶୁଙ୍ଗ୍ ପିତର ଆରେରଗ ପୁନୁଙ୍ଗ୍ ଇଞ୍ଜି ୱେଚ୍ଚାନ୍
(ମାଥି. ୨୬:୭୧-୭୫; ମାର୍କ. ୧୪:୬୯-୭୨; ଲୁକ. ୨୨:୫୮-୬୨)
25ଶିମୋନ ପିତର ନାଣି କାଇଜି ମାଚାନ୍। ଜେକ ମାନାୟାର୍ ହେୱାନିଙ୍ଗ୍ ୱେନ୍ବାତାର୍, “ଏନେଙ୍ଗ୍ ଇନାକା ଇୱାନ୍ ଚେଲାହି ବିତ୍ରେତାଙ୍ଗ୍ ରକାଇ? ମାତର୍ ପିତର ୱେଚ୍ଚାନ୍ ଆକାୟ୍। ଆନେଙ୍ଗ୍ ଆକାୟ୍।”
26ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିନି ହଲିଆହି ହେବେ ରକାନ୍ ମାଚାନ୍। ପିତର ଇମ୍ଣାକାନିଙ୍ଗ୍ କିତୁଲ୍ ହଣ୍ଜି ମାଚାନ୍, ହେୱାନ୍ ହେ ହଲିଆହି ହୁଦାଙ୍ଗ୍ ମାଚାନ୍। ଲାଗିଙ୍ଗ୍ ହେୱାନ୍ ୱେଚ୍ଚାନ୍, “ଆନେଙ୍ଗ୍ ବାବିକିନାଙ୍ଗା, ଆନେଙ୍ଗ୍ ବଗିଚାତାକେ ଇୱାନ୍ ହୁଦାଙ୍ଗ୍ ନିଙ୍ଗେଙ୍ଗ୍ ହୁଡ଼୍ଜି ମାନ୍ଞ୍ଚାଙ୍ଗ୍।” 27ମାତର୍ ପିତର ଆରେରଗ ୱେଚ୍ଚାନ୍, “ଆକାୟ୍ ଆନେଙ୍ଗ୍ ହେୱାନ୍ ହୁଦାଙ୍ଗ୍ ମାନ୍ୱାତାଙ୍ଗ୍।” ଟିକ୍ ହେପାଦ୍ନା ର କୁଜୁ କେତାତ୍।
ଯୀଶୁଙ୍ଗ୍ ପିଲାତ ରାଜା ମୁମ୍ଦ ଅସିହାଚାର୍
(ମାଥି. ୨୭:୧-୨-୧୧-୧୪; ମାର୍କ. ୧୫:୧-୫; ଲୁକ. ୨୩:୧-୫)
28ତାପାଚେ ହେୱାର୍ କୟାପା ଇଞ୍ଜାଙ୍ଗ୍ ଯୀଶୁଙ୍ଗ୍ ରମିୟ ଗବର୍ନର୍ ପିଲାତତାକେ ଅସିହାଚାର୍। ହେପାଦ୍ନା ନାଣାଙ୍ଗେ ଅଜଡ଼୍ଆଜି ମାଚାତ୍। ଯିହୁଦିର୍ ଇଲ୍ ବିତ୍ରେ ହାଲ୍ୱାତାର୍। ହେୱାର୍ ଜାର୍ତିଙ୍ଗ୍ ଅପବିତ୍ର କିଦେଙ୍ଗ୍ ଇଚା କିୱାଦାଙ୍ଗ୍ ମାଚାନ୍, ଇନେସ୍କି ହେୱାର୍ ନିସ୍ତାର୍ ପାର୍ବୁ ବଜି ଚିଞ୍ଜେଙ୍ଗ୍ ଇଚାକିଜି ମାଚାର୍। 29ଲାଗିଙ୍ଗ୍ ଗବର୍ନର୍ ପିଲାତ ଇଲ୍ ବାର୍ତ ଯିହୁଦିର୍ ଲାଗାୟ୍ ହାଚାନ୍। ହେୱାନ୍ ୱେନ୍ବାତାନ୍, “ଇୱାନ୍ ବିରୁଦ୍ତାକେ ଏପେଙ୍ଗ୍ ଇନାକା ଇନାଦେରା?”
30ହେୱାର୍ ୱେଚ୍ଚାର୍, “ହେୱାନ୍ ରକାନ୍ କରାପ୍ ମାନାୟ୍। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ହେୱାନିଙ୍ଗ୍ ନି ଲାଗାୟ୍ ତାସି ୱାତାପ୍ନା।”
31ଗବର୍ନର୍ ପିଲାତ ଯିହୁଦିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ହେୱାନିଙ୍ଗ୍ ଅସି ହାଲାଟ୍, ଆରେ ମୋଶା ଲେକିକିତି ନିୟମ୍ ସାସ୍ତର୍ ଅନୁସାତାଙ୍ଗ୍ ତା ବିଚାର୍ କିୟାଟ୍।” ଯିହୁଦି ନେତାର୍ ୱେଚ୍ଚାର୍, “ମାତର୍ ନି ଆଇନ୍ ଅନୁସାତାଙ୍ଗ୍ ଆପେଙ୍ଗ୍ ଇନେରିଙ୍ଗ୍ ପା ହାଃନି ଦଣ୍ଡ୍ ହିଦେଙ୍ଗ୍ ଆଡୁପ୍।” 32ଇଦାଙ୍ଗ୍ କାଜିଙ୍ଗ୍ ହେୱାନ୍ ଇନେସ୍ କିଜି ହାଃନାନ୍, ହେ ବିଷୟରେ ଯୀଶୁ ୱେଚ୍ଚିଲେକେ ପୁରାଆନାତ୍।
33ତାପାଚେ ପିଲାତ ଇଲ୍ ବିତ୍ରେ ହାଚାନ୍। ହେୱାନ୍ ତା ଲାଗାୟ୍ ଯୀଶୁଙ୍ଗ୍ କୁକ୍ତାନ୍। ହେୱାନିଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇନାକା ଯିହୁଦିର୍ ରାଜା?”
34ଯୀଶୁ ୱେଚ୍ଚାନ୍, “ଇଦାଙ୍ଗ୍ ମି ଜାର୍ ପ୍ରଶ୍ନ, କି ଜେକନିକାର୍ ନିଙ୍ଗେଙ୍ଗ୍ ନା ବିଷୟରେ ୱେନ୍ବେଦେଙ୍ଗ୍ ୱେଚ୍ଚାତାର୍ନା?”
35ପିଲାତ ୱେଚ୍ଚାନ୍, “ଆନେଙ୍ଗ୍ ରକାଙ୍ଗ୍ ଯିହୁଦି ଆକାୟ୍। ମି ଜାର୍ ମାନାୟାର୍ ଆରେ ହେୱାର୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ମିଙ୍ଗେଙ୍ଗ୍ ନା ଲାଗାୟ୍ ତାତ୍ତାର୍ନା। ଏନେଙ୍ଗ୍ ଇନା ଦସ୍ କିତାଇନା?”
36ଯୀଶୁ ୱେଚ୍ଚାନ୍, “ନା ରାଜି ଇ ପୁର୍ତିନିକା ଆକାୟ୍। ଯଦି ଇ ପୁର୍ତିନିକା ଆତାତ୍ମା, ଲାଗିଙ୍ଗ୍ ନା ହଲିଆର୍ ଜୁଜ୍ କିତାର୍ମା ଆରେ ନାଙ୍ଗେଙ୍ଗ୍ ଯିହୁଦିର୍ ଆସ୍ତେଙ୍ଗ୍ ଆଡ଼୍ଦାୱାତାର୍ମା। ମାତର୍ ନା ରାଜି ଜେକନି ବାହାତ।”
37ପିଲାତ ୱେଚ୍ଚାନ୍, “ଲାଗିଙ୍ଗ୍ ଏନେଙ୍ଗ୍ ରକାଇ ରାଜା।” ଯୀଶୁ ୱେଚ୍ଚାନ୍, “ଏନେଙ୍ଗ୍ ନାଙ୍ଗେଙ୍ଗ୍ ରାଜା ଇଞ୍ଜି ୱେଚ୍ଚାନାୟା। ଇଦାଙ୍ଗ୍ ସତ୍। ଆନେଙ୍ଗ୍ ଇଦାଙ୍ଗ୍ କାଜିଙ୍ଗ୍ ଜନମ୍ ଆତାଙ୍ଗ୍ନା। ମାନାୟାରିଙ୍ଗ୍ ସତ୍ ବିଷୟରେ ପୁନିକିଦେଙ୍ଗ୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଜଗତ୍ତାକେ ୱାତାଙ୍ଗ୍ନା। ସତ୍ତିଙ୍ଗ୍ ଲାଡ୍ କିନାକାର୍ ୱିଜୁ ମାନାୟ୍ ନା କାତା ୱେନାର୍।”
38ପିଲାତ ୱେଚ୍ଚାନ୍, “ଇନାକା ସତ୍?” ହେୱାନ୍ ଇଦାଙ୍ଗ୍ ୱେଚ୍ଚି ପାଚେ ଯିହୁଦିର୍ ଲାଗାୟ୍ ହାଚାନ୍ ଆରେ ହେୱାନ୍ ୱେଚ୍ଚାନ୍, “ଇୱାନ୍ ଲାଗାୟ୍ ଇନା ଦସ୍ ପା ଆନେଙ୍ଗ୍ ଗାଟାଆଉଙ୍ଗା। 39ପାତିବାର୍ହୁ ନିସ୍ତାର୍ ପାର୍ବୁ ନାଞ୍ଜିଙ୍ଗ୍ ଆନେଙ୍ଗ୍ ର ବନ୍ଦି ମାନାୟ୍ତିଙ୍ଗ୍ ପିସ୍ତିହିନି ନିୟମ୍ ମାଚାତ୍। ଲାଗିଙ୍ଗ୍ ଏପେଙ୍ଗ୍ ଯଦି ଇଚା କିନାଦେର୍, ଆନେଙ୍ଗ୍ ଇ ଯିହୁଦିର୍ ରାଜାଙ୍ଗ୍ ପିସ୍ତି ହିଦ୍ନାଙ୍ଗ୍।”
40ମାତର୍ ଯିହୁଦିର୍ ଗାଜାକାଟ୍ କିଜି ୱେଚ୍ଚାର୍, “ଆକାୟ୍, ଇୱାନିଙ୍ଗ୍ ଆକାୟ୍। ବାରବ୍ବାଙ୍ଗ୍ ପିସ୍ତିହିଦା।” ଇ ବାରବ୍ବା ରକାନ୍ ଚର୍ ମାଚାନ୍।
Currently Selected:
ଯୋହନ 18: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
