ଯୋହନ 17
17
ଯୀଶୁ ତା କାଜିଙ୍ଗ୍ ଈଶ୍ୱରତାକେ ପାର୍ତାନା କିନାନ୍
1ଯୀଶୁ ଇୱିଜୁ କାତା ୱେଚ୍ଚି ପାଚେ ସରଗ୍ ନିପଣ୍ ହୁଡ଼୍ତାନ୍। ଆରେ ହେୱାନ୍ ପାର୍ତାନା କିତାନ୍, “ଏ ଆବା ଈଶ୍ୱର, ନଙ୍ଗୟ୍ ସମୟ୍ ୱାତାତ୍ନା। ଏନେଙ୍ଗ୍ ଜାର୍ ହିମ୍ଣାତିଙ୍ଗ୍ ଜୟ୍-ଜୟ୍ କିୟା, ଇନେସ୍କି ହିମ୍ଣା ନିଙ୍ଗେଙ୍ଗ୍ ଜୟ୍-ଜୟ୍ କିଦେଙ୍ଗ୍ ଆଡ଼୍ଦାନାନ୍। 2ଏନେଙ୍ଗ୍ ହେୱାନିଙ୍ଗ୍ ୱିଜୁ ମାନାୟ୍ ଜାତିତିଙ୍ଗ୍ ଆଦିକାର୍ ହିତାଇନା। ଇନେସ୍କି ଏନେଙ୍ଗ୍ ହେୱାନିଙ୍ଗ୍ ଇମ୍ଣାକାରିଙ୍ଗ୍ ହିତାଇନା, ହେୱାରିଙ୍ଗ୍ ହେ ହିମ୍ଣା ୱିଜ୍ୱି ଜିବୁନ୍ ହିନାନ୍। 3ଏନେଙ୍ଗ୍ ରକାୟ୍ ସତ୍ ଈଶ୍ୱର, ନିଙ୍ଗେଙ୍ଗ୍ ଆରେ ଏନେଙ୍ଗ୍ ପକ୍ତିତି ଯୀଶୁ ଖ୍ରୀଷ୍ଟଙ୍ଗ୍ ପୁନାକା ନେ ୱିଜ୍ୱି ଜିବୁନ୍। 4ଏନେଙ୍ଗ୍ ନାଙ୍ଗେଙ୍ଗ୍ ଇମ୍ଣି କାମାୟ୍ ହିତ୍ତାଇନା, ହେଦାଙ୍ଗ୍ ଆନେଙ୍ଗ୍ ପୁରା କିତାଙ୍ଗ୍ନା। ଆରେ ଆନେଙ୍ଗ୍ ମିଙ୍ଗେଙ୍ଗ୍ ପୁର୍ତିତାକେ ଜୟ୍-ଜୟ୍ କିତ୍ତାଙ୍ଗ୍ନା। 5ଆବା ଈଶ୍ୱର, ପୁର୍ତି ରହ୍ୱିତି ଆଗେ ନି ହୁଦାଙ୍ଗ୍, ନା ଇମ୍ଣି ଜୟ୍-ଜୟ୍ ମାଚାତ୍, ହେଦାଙ୍ଗ୍ କାଜିଙ୍ଗ୍ ଏନେଙ୍ଗ୍ ନାଙ୍ଗେଙ୍ଗ୍ ପା ନି ହୁଦାଙ୍ଗ୍ ଜୟ୍-ଜୟ୍ କିଦା।
6ଏଲେଙ୍ଗ୍ ପୁର୍ତିନି କେତ୍ଜାଣ୍ ମାନାୟାର୍ ନିଙ୍ଗେଙ୍ଗ୍ ପୁନ୍ଞ୍ଚାର୍ନା, ହେୱାର୍ ନି ଲକ୍ ମାଚାର୍, ଆରେ ଏନେଙ୍ଗ୍ ହେୱାରିଙ୍ଗ୍ ନାଙ୍ଗେଙ୍ଗ୍ ହିତ୍ତାଇନା। ହେୱାର୍ ନି ହିକ୍ଷାତିଙ୍ଗ୍ ମାନିକିତାର୍ନା। 7ନଙ୍ଗୟ୍ ହେୱାର୍ ପୁନାର୍, ଏନେଙ୍ଗ୍ ନାଙ୍ଗେଙ୍ଗ୍ ଇନାକା ୱିଜୁ ହିତ୍ତାଇନା, ହେ ୱିଜୁ ନିବେତାଙ୍ଗ୍ ୱାତାତ୍ନା। 8ଇନେସ୍କି ନାଙ୍ଗେଙ୍ଗ୍ ଏନେଙ୍ଗ୍ ଇମ୍ଣି ହିକ୍ଷାହିଜି ମାନ୍ଞ୍ଚାଇ, ଆନେଙ୍ଗ୍ ହେ ହିକ୍ଷାତିଙ୍ଗ୍ ମାନାୟାରିଙ୍ଗ୍ ହିତାଙ୍ଗ୍ନା। ହେୱାର୍ ହେଦାଙ୍ଗ୍ତିଙ୍ଗ୍ ଆସ୍ତାର୍ନା। ହେୱାର୍ ପୁଞ୍ଜେଙ୍ଗ୍ ଆଡ଼୍ତାର୍ ଯେ, ଆନେଙ୍ଗ୍ ହାତ୍ପା ମିବେତାଙ୍ଗ୍ ୱାତାଙ୍ଗ୍ନା, ଆରେ ଏନେଙ୍ଗ୍ ନାଙ୍ଗେଙ୍ଗ୍ ପକ୍ତାତାଇନା ଇଞ୍ଜି ହେୱାର୍ ପାର୍ତି କିଦ୍ନାରା।
9ଆନେଙ୍ଗ୍ ହେୱାର୍ କାଜିଙ୍ଗ୍ ନଙ୍ଗୟ୍ ପାର୍ତାନା କିନାଙ୍ଗା। ଆନେଙ୍ଗ୍ ପୁର୍ତିନି ମାନାୟାର୍ କାଜିଙ୍ଗ୍ ପାର୍ତାନା କିଉଙ୍ଗା। ଆନେଙ୍ଗ୍ ହେୱାରିଙ୍ଗ୍ ପାର୍ତାନା କିନାଙ୍ଗା, ଇମ୍ଣାକାରିଙ୍ଗ୍ ଏନେଙ୍ଗ୍ ହିଜିମାନ୍ଞ୍ଚାଇ। ଇନେସ୍କି ହେୱାର୍ ମିୱାର୍। 10ନାଦି ଇନାକା ୱିଜୁ ମାନାତ୍, ହେ ୱିଜୁ ନିଦି, ଆରେ ନିଦି ଇନାକା ୱିଜୁ ମାନାତ୍, ହେଦାଙ୍ଗ୍ୱିଜୁ ନାଦି। ଇ ମାନାୟାର୍ ନାଙ୍ଗେଙ୍ଗ୍ ଜୟ୍-ଜୟ୍ କିଦ୍ନାର୍। 11ଆନେଙ୍ଗ୍ ନଙ୍ଗୟ୍ନି ଲାଗାୟ୍ ୱାନାଙ୍ଗା। ଆନେଙ୍ଗ୍ ନଙ୍ଗୟ୍ ପୁର୍ତିତାକେ ଆରେ ମାନୁଙ୍ଗ୍। ମାତର୍ ଇ ମାନାୟାର୍ ପୁର୍ତିତାକେ ମାନାର୍। ହେ ପବିତ୍ର ଆବା ଈଶ୍ୱର, ଏନେଙ୍ଗ୍ ହେୱାରିଙ୍ଗ୍ ହାର୍ଦାଙ୍ଗ୍ ଇଟା। ଇନେସ୍କି ଏନେଙ୍ଗ୍ ଆରେ ଆନେଙ୍ଗ୍ ଏକ୍ ମାନାସ୍, ହେଲେକେ ହେୱାର୍ ରବେଆଜି ଏକ୍ ଆଦେଙ୍ଗ୍ ଆଡ୍ନାର୍। 12ଆନେଙ୍ଗ୍ ଏଚେପାଦ୍ନା ହେୱାର୍ ହୁଦାଙ୍ଗ୍ ମାଚାଙ୍ଗ୍, ଆନେଙ୍ଗ୍ ନି ତର୍ ଆରେ ସାକ୍ତିତାଙ୍ଗ୍ ହେୱାରିଙ୍ଗ୍ ୱିଜୁଦିନ୍ ରକ୍ଷା କିଜି ମାଚାଙ୍ଗ୍। ହେ ତର୍ ନାଙ୍ଗେଙ୍ଗ୍ ଏନେଙ୍ଗ୍ ହିଜିମାନ୍ଞ୍ଚାଇ। ଆନେଙ୍ଗ୍ ହେୱାରିଙ୍ଗ୍ ରକ୍ଷା କିଜି ମାଚାଙ୍ଗ୍। ଆରେ ଦରମ୍ ସାସ୍ତର୍ ପୁରା ଆନି କାଜିଙ୍ଗ୍, ହେୱାର୍ ବିତ୍ରେତାଙ୍ଗ୍ ରକାନ୍ ପା ନଷ୍ଟ ଆଦେଙ୍ଗ୍ ହିୱାଦାଙ୍ଗ୍ ମାଚାଙ୍ଗ୍।
13ଆନେଙ୍ଗ୍ ନି ଲାଗାୟ୍ ନଙ୍ଗୟ୍ ୱାନାଙ୍ଗା। ମାତର୍ ଆନେଙ୍ଗ୍ ପୁର୍ତିତାକେ ମାନୁ-ମାନୁ ଇ ୱିଜୁ କାଜିଙ୍ଗ୍ ପାର୍ତାନା କିନାଙ୍ଗା। ଆନେଙ୍ଗ୍ ଇୱିଜୁ ୱେଚ୍ନାଙ୍ଗା, ଇନେସ୍କି ଇ ମାନାୟାର୍ ନାବେ ମାନି ୱାରି ପାୟାଆନାର୍। ଆନେଙ୍ଗ୍ ଇଚା କିନାଙ୍ଗା, ନା ୱାରି ହେୱାର୍ କାଜିଙ୍ଗ୍ ପୁରା ଆୟେତ୍। 14ଆନେଙ୍ଗ୍ ହେୱାରିଙ୍ଗ୍ ନି ହିକ୍ଷା ହିତାଙ୍ଗ୍ନା। ଆରେ ଇ ପୁର୍ତିନି ମାନାୟାର୍ ହେୱାରିଙ୍ଗ୍ ଗିଣ୍ କିତାର୍ନା। ଇନେସ୍କି ହେୱାର୍ ଇ ପୁର୍ତି ନିକାର୍ ଆକାୟ୍, ହେଲେକେ ଆନେଙ୍ଗ୍ ପା ଇ ପୁର୍ତି ନିକାଙ୍ଗ୍ ଆକାଇ। 15ଏନେଙ୍ଗ୍ ହେୱାରିଙ୍ଗ୍ ପୁର୍ତିତାଙ୍ଗ୍ ଅଦେଙ୍ଗ୍ ୱେଚ୍ଚୁଙ୍ଗା। ମାତର୍ ଆନେଙ୍ଗ୍ ହେୱାରିଙ୍ଗ୍ ଶୟତାନ୍ତାଙ୍ଗ୍ ରକ୍ଷା କିଜି ଇଡ଼୍ଦେଙ୍ଗ୍ ପାର୍ତାନା କିନାଙ୍ଗା। 16ଆନେଙ୍ଗ୍ ଇନେସ୍ ପୁର୍ତି ନିକାଙ୍ଗ୍ ଆକାୟ୍, ହେୱାର୍ ହେଲେକେ ଇ ପୁର୍ତି ନିକାର୍ ଆକାୟ୍। 17ଲାଗିଙ୍ଗ୍ ଏନେଙ୍ଗ୍ ନି ସତ୍ କାଜିଙ୍ଗ୍ ହେୱାରିଙ୍ଗ୍ ପବିତ୍ର କିୟା। ନି ହିକ୍ଷା ଆନାତା ସତ୍। 18ଏନେଙ୍ଗ୍ ନାଙ୍ଗେଙ୍ଗ୍ ଇନେସ୍ଲେକେ ଇ ପୁର୍ତିତାକେ ପକ୍ଚି ମାନ୍ଞ୍ଚାଇ ଆନେଙ୍ଗ୍ ହେୱାରିଙ୍ଗ୍ ପୁର୍ତିତାକେ ପକ୍ନାଙ୍ଗା। 19ଆରେ ହେୱାର୍ ପା ସତ୍ତାଙ୍ଗ୍ ପବିତ୍ର ଆନି ଦର୍କାର୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନିଜେ ପବିତ୍ର ମାନାଙ୍ଗ୍।”
ଯୀଶୁ ୱିଜୁ ପାର୍ତି କିନାକାର୍ କାଜିଙ୍ଗ୍ ପାର୍ତାନା କିତାନ୍
20ଆରେରଗ ଯୀଶୁ ୱେଚ୍ଚାନ୍, “ଇ ମାନାୟାର୍ କାଜିଙ୍ଗ୍ ନେ ଆନେଙ୍ଗ୍ ପାର୍ତାନା କିଉଙ୍ଗା, ମାତର୍ ଇନେର୍ ନାଙ୍ଗେଙ୍ଗ୍ ପାର୍ତିକିନି ୱିଜାକାର୍ କାଜିଙ୍ଗ୍ ପା ପାର୍ତାନା କିନାଙ୍ଗା। 21ଏ ଆବା ଈଶ୍ୱର, ଆନେଙ୍ଗ୍ ନିବେ ପାର୍ତାନା କିଦ୍ନାଙ୍ଗା, ଇନେସ୍ ପାର୍ତି କିନାକାର୍ ରବେ ଆଦେଙ୍ଗ୍ ଆଡ୍ନାର୍। ଇନେସ୍କି ଏନେଙ୍ଗ୍ ନାବେ ମାନାଇ ଆରେ ଆନେଙ୍ଗ୍ ନିବେ ମାନାଙ୍ଗ୍। ହେଲେକେ ଇୱାର୍ ପା ମାବେ ମାନ୍ଗାନାର୍। ଲାଗିଙ୍ଗ୍ ଏନେଙ୍ଗ୍ ନାଙ୍ଗେଙ୍ଗ୍ ପକ୍ତାତାଇନା ଇଞ୍ଜି ପୁର୍ତିନି ୱିଜୁ ମାନାୟାର୍ ପାର୍ତିକିନାର୍।
22ନାଙ୍ଗେଙ୍ଗ୍ ଏନେଙ୍ଗ୍ ଇମ୍ଣି ଜୟ୍-ଜୟ୍ ହିତ୍ତାଇନା, ଆନେଙ୍ଗ୍ ହେଦାଙ୍ଗ୍ ଇ ମାନାୟାରିଙ୍ଗ୍ ହିତାଙ୍ଗ୍ନା। ହେଦାଙ୍ଗ୍ କାଜିଙ୍ଗ୍ ହେୱାର୍ ରବେଆଜି ଏକ୍ ଆନାର୍। ଇନେସ୍କି ଏନେଙ୍ଗ୍ ଆରେ ଆନେଙ୍ଗ୍ ଏକ୍ ଆତାସ୍ନା। 23ଆନେଙ୍ଗ୍ ହେୱାର୍ତାକେ ମାନ୍ଗାନାଙ୍ଗ୍, ଆରେ ଏନେଙ୍ଗ୍ ନାବେ ମାନ୍ଗାନାଇ। ଲାଗିଙ୍ଗ୍ ହେୱାର୍ ପୁରା ଏକ୍ ଆଦେଙ୍ଗ୍ ଆଡ୍ନାର୍। ହେଦାଙ୍ଗ୍ ଆତିସ୍ ଇ ପୁର୍ତିନି ମାନାୟାର୍ ପୁଞ୍ଜେଙ୍ଗ୍ ଆଡ୍ନାର୍, ଏନେଙ୍ଗ୍ ନାଙ୍ଗେଙ୍ଗ୍ ପକ୍ତାତାଇନା। ଇ ପୁର୍ତିନି ମାନାୟାର୍ ପୁନାର୍, ଏନେଙ୍ଗ୍ ନାଙ୍ଗେଙ୍ଗ୍ ଇନେସ୍ ଲାଡ୍କିଜି ମାନ୍ଞ୍ଚାଇ, ହେଲେକେ ଇ ମାନାୟାରିଙ୍ଗ୍ ପା ଲାଡ୍ କିୟା। 24ଏ ଆବା ଈଶ୍ୱର, ଏନେଙ୍ଗ୍ ନାଙ୍ଗେଙ୍ଗ୍ ଇମ୍ଣି ମାନାୟାରିଙ୍ଗ୍ ହିତ୍ତାଇନା, ଆନେଙ୍ଗ୍ ଇଚା କିନାଙ୍ଗ୍, ଆନେଙ୍ଗ୍ ମାନି ୱିଜୁ ବାହାତାକେ ହେୱାର୍ ନା ହୁଦାଙ୍ଗ୍ ମାନେର୍। ଆନେଙ୍ଗ୍ ଇଚା କିନାଙ୍ଗ୍, ହେୱାର୍ ନା ଅଜଡ଼୍ ହୁଡ଼େର୍। ଇ ଅଜଡ଼୍ ଏନେଙ୍ଗ୍ ନାଙ୍ଗେଙ୍ଗ୍ ହିତ୍ତାଇନା, ଇନେସ୍କି ଏନେଙ୍ଗ୍ ପୁର୍ତି ରହ୍ୱିତି ଆଗେ ନାଙ୍ଗେଙ୍ଗ୍ ଲାଡ୍ କିତ୍ତାୟ୍।
25ଏ ଦରମ୍ ଆବା ଈଶ୍ୱର ନିଙ୍ଗେଙ୍ଗ୍ ପୁର୍ତି ପୁଞ୍ଜୁତେ, ମାତର୍ ଆନେଙ୍ଗ୍ ନିଙ୍ଗେଙ୍ଗ୍ ପୁନ୍ଞ୍ଚାଙ୍ଗ୍ନା। ଏନେଙ୍ଗ୍ ଯେ ନାଙ୍ଗେଙ୍ଗ୍ ପକ୍ତାତାଇନା ହେଦାଙ୍ଗ୍ ପୁଚାର୍ନା। 26ଏନେଙ୍ଗ୍ ଇନେସ୍ ହେଦାଙ୍ଗ୍ ଆନେଙ୍ଗ୍ ହେୱାର୍ତାକେ ୱେଚ୍ଚାଙ୍ଗ୍ନା, ଆରେରଗ ହେୱାର୍ତାକେ ଚଚ୍ନାଙ୍ଗ୍। ତାପାଚେ ନା କାଜିଙ୍ଗ୍ ନିଦାଙ୍ଗ୍ ଇନେସ୍ ଲାଡ୍ ମାନାତ୍, ହେଲେକେ ଲାଡ୍ ହେୱାର୍ତାକେ ମାନ୍ଗାନାତ୍ ଆରେ ଆନେଙ୍ଗ୍ ହେୱାର୍ତାକେ ବାହା କିନାଙ୍ଗ୍।”
Currently Selected:
ଯୋହନ 17: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
