ଯୋହନ 12
12
ବେଥନିଆ ନାସ୍ ରଞ୍ଜେଲ୍ କଗ୍ଲେ ଯୀଶୁ କାଲ୍ପାନାକାଙ୍ଗ୍ ବାସ୍ନା ଚିକାଣ୍ ୱାକ୍ତାତ୍
(ମାଥି. ୨୬:୬-୧୩; ମାର୍କ. ୧୪:୩-୯)
1ଯୀଶୁ ନିସ୍ତାର୍ ପାର୍ବୁ ଆନି ଚଅଦିନ୍ ଆଗେ ବେଥନିଆ ନାଟ ହାଚାନ୍। ଇମେତାକେ ହାଃତି ଲାଜରତିଙ୍ଗ୍ ଆରେରଗ ଜିବୁନ୍ କିଜି ମାଚାନ୍। 2ହେବେ ଯୀଶୁ କାଜିଙ୍ଗ୍ ର ବଜି କିଜି ମାଚାର୍। ମାର୍ଥା ବୁଲାଇ କିଜି ହିଜିମାଚାତ୍। ଯୀଶୁ ହୁଦାଙ୍ଗ୍ ଲାଜର୍ ପା ବଜି ଚିଞ୍ଜେଙ୍ଗ୍ କୁଚ୍ଚି ମାଚାନ୍। 3ହେପାଦ୍ନା ମରିୟମ ଅଦା ଲିଟର୍ ବେସି ଦାମ୍କିୟା ବାସ୍ନା ଚିକାଣ୍ ତାସିୱାଜି, ଯୀଶୁ କାଲ୍ପାନାକାଙ୍ଗ୍ ୱାକ୍ତାତ୍। ତାପାଚେ ହେୱାନିଙ୍ଗ୍ ତା କାପ୍ଡ଼ାନି ତେମୁଲ୍ ହୁଦାଙ୍ଗ୍ ନେନ୍ନ୍ଦି ହିତାତ୍। ହେ ଇଲ୍ ଚିକାଣ୍ନି ବାସ୍ନାତାଙ୍ଗ୍ ଗମ୍କା ଆଜି ହାଚାତ୍।
4ଇଷ୍କାରିତିୟ ଯିହୁଦା ତର୍ଦାକାନ୍ ରକାନ୍ ଯୀଶୁ ଚେଲାହିର୍ ବିତ୍ରେତାଙ୍ଗ୍ ହେୱାନ୍ ରକାନ୍ ଚେଲାହି ମାଚାନ୍। ହେୱାନ୍ ଯୀଶୁ ବିରୁଦ୍ତାକେ ଇଞ୍ଜି ମାଚାନ୍। ମରିୟମ କିତି କାମାୟ୍ ହେୱାନିଙ୍ଗ୍ ହାର୍ ହୱିତିଲେ ହେୱାନ୍ ୱେଚ୍ଚାନ୍, 5“ଇ ଚିକାଣ୍ନି ଦାମ୍ ତିନ୍ଶ ଗଟା ରୁପା ଡାବୁଙ୍ଗ୍। ଇ ବାସ୍ନା ଚିକାଣ୍ତିଙ୍ଗ୍ ପସି ହେ ଡାବୁଙ୍ଗ୍ ଗରିବ୍ ଲକାରିଙ୍ଗ୍ ହିନି କାତା ମାଚାତ୍।” 6ମାତର୍ ଇଷ୍କାରିତିୟ ଯିହୁଦା ଗରିବ୍ ଲକାର୍ କାଜିଙ୍ଗ୍ ଚିନ୍ତା କିୱାଦାଙ୍ଗ୍ ମାଚାନ୍। ହେୱାନ୍ ଚର୍ ମାଚିଲେ ଇ କାତା ୱେଚ୍ଚାନ୍। ହେୱାନ୍ ଚେଲାହିର୍ କାଜିଙ୍ଗ୍ ଡାବୁଙ୍ଗ୍ ପେଡ଼ି ତା ଲାଗାୟ୍ ଇଡ଼୍ଜି ମାଚାନ୍। ଆରେ ହେୱାନ୍ ଲାଗାୟ୍ ର ପେଡ଼ି ମାଚାତ୍, ଆରେ ପେଡ଼ିତାକେ ଚର୍ କିତି ଡାବୁଙ୍ଗ୍ ଇଡ଼୍ଜି ମାଚାନ୍।
7ଯୀଶୁ ୱେଚ୍ଚାନ୍, “ମରିୟମତିଙ୍ଗ୍ ବାଙ୍ଗାଇ କିମାଟ୍। ହେ ଚିକାଣ୍ ରୁଣ୍ଡାଇକିଜି ନା ଦୁଗେର୍ ରସ୍ତେଙ୍ଗ୍ ନେଞ୍ଜେଙ୍ଗ୍ ଇଦାଙ୍ଗ୍ କିତାତ୍ନା। 8ମି ଲାଗାୟ୍ ୱିଜୁଦିନ୍ ଗରିବ୍ ମାନାୟାର୍ ମାନ୍ଗାନାର୍, ମାତର୍ ଆନେଙ୍ଗ୍ ୱିଜୁଦିନ୍ ମିହୁଦାଙ୍ଗ୍ ମାନ୍ଗୁଙ୍ଗ୍।”
ଯିହୁଦି ନେତାର୍ ଲାଜର୍ତିଙ୍ଗ୍ ଅସ୍ତେଙ୍ଗ୍ ଉପାୟ୍ କିତାର୍
9ଯୀଶୁ ବେଥନିଆ ନାଟ ମାନାକା ବେସିହେନି ଯିହୁଦିର୍ ୱେଚାର୍। ଲାଗିଙ୍ଗ୍ ହେୱାନିଙ୍ଗ୍ ଆରେ ଲାଜରତିଙ୍ଗ୍ ହୁଡ଼୍ଦେଙ୍ଗ୍ ହାଚାର୍। ଲାଜାର୍ତିଙ୍ଗ୍ ହାଃତାକାନିଙ୍ଗ୍ ଯୀଶୁ ଜିବୁନ୍ କିଜି ମାଚାନ୍, 10ଲାଗିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ପା ଲାଜରତିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍। 11କେତେକ୍ ହେନି ଯିହୁଦିର୍ ଲାଜର୍ ହାଃତିତାଙ୍ଗ୍ ଜିବୁନ୍ ଆତାକା ହୁଡ଼୍ଜି, ହେୱାର୍ ତା ନେତାରିଙ୍ଗ୍ ପିସ୍ତି ଯୀଶୁଙ୍ଗ୍ ପାର୍ତି କିତାର୍। ହେଦାଙ୍ଗ୍ କାଜିଙ୍ଗ୍ ଯିହୁଦିର୍ ଲାଜାର୍ତିଙ୍ଗ୍ ପା ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍।
ଯିରୁଶାଲାମ ସହର୍ତାକେ ଯୀଶୁ ହାଚାନ୍
(ମାଥି. ୨୧:୧-୧୧; ମାର୍କ. ୧୧:୧-୧୧; ଲୁକ. ୧୯:୨୮-୪୦)
12ଆର୍କାତ୍ ନାଞ୍ଜିଙ୍ଗ୍ ଯୀଶୁ ଯିରୁଶାଲାମ ସହର୍ତାକେ ୱାନାନା ଇଞ୍ଜି ମାନାୟାର୍ ୱେଚାର୍। ଇ ମାନାୟାର୍ ବେସିହେନି ନିସ୍ତାର୍ ପାର୍ବୁଚିଞ୍ଜେଙ୍ଗ୍ ୱାଜିମାଚାର୍। 13ହେୱାର୍ କାଜ୍ରି ଡାଡ଼ିଙ୍ଗ୍ ଆସ୍ତି ଯୀଶୁଙ୍ଗ୍ ହୁଡ଼୍ଦେଙ୍ଗ୍ ହାଚାର୍।
ହେୱାର୍ ୱାରିତାଙ୍ଗ୍ ଗାଜା କାଟ୍ତାଙ୍ଗ୍ ୱେଚ୍ଚେଙ୍ଗ୍ ଲାଗାତାର୍,
“ହେୱାନିଙ୍ଗ୍ ଜୟ୍-ଜୟ୍ କିୟାଟ୍, ଇନେର୍ ମାପୃ ତର୍ଦାଙ୍ଗ୍ ୱାନାନ୍,
ଈଶ୍ୱର ହେୱାନିଙ୍ଗ୍ ଆଶ୍ରିବାଦ୍ କିୟେନ୍, ଈଶ୍ୱର ଇସ୍ରାଏଲନି ରାଜାଙ୍ଗ୍ ଆଶ୍ରିବାଦ୍ କିନାନ୍।”
14ଏଚେପାଦ୍ନା ଯିରୁଶାଲାମ୍ ସହର୍ତାଙ୍ଗ୍ ୱାନିହିଙ୍ଗ୍ ଯୀଶୁ ର ଗଦତିଙ୍ଗ୍ ଗାଟାଆତାନ୍ ଆରେ ତା ଜପି କୁଚ୍ଚାନ୍। ଲେକାମାଚାତ୍, ହେଦାଙ୍ଗ୍ ଦରମ୍ ସାସ୍ତର୍ନି ବେଣ୍ ଲେକେ ପୁରା ଆତାତ୍।
15“ଏ ସିୟୋନ ଦେସ୍, ପାଣ୍ଡ୍ରା ଆମାଟ୍।
ହୁଡ଼ାଟ୍ ମି ରାଜା ୱାନାନା। ହେୱାନ୍ ର ଗଦହିମ୍ଣା ଜପି କୁଚ୍ଚି ୱାନାନା।”
16ହେପାଦ୍ନା ଯୀଶୁ ଚେଲାହିର୍ ଇ ଗଟ୍ନାତିଙ୍ଗ୍ ପାର୍ତୁମ୍ ବୁଜା ଆଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। ମାତର୍ ମାନାୟାର୍ ହେୱାନିଙ୍ଗ୍ ଜୟ୍-ଜୟ୍ କିତିଲେଙ୍ଗ୍ ଚେଲାହିର୍ ବୁଜାଆତାର୍। ଇଦାଙ୍ଗ୍ ତା ବିଷୟରେ ଦରମ୍ ସାସ୍ତର୍ତାକେ ଲେକାଆଜି ମାଚାତ୍। ଆରେ ହେୱାର୍ ହେଲେକେ କିତାର୍।
17ଯୀଶୁ ଏଚେପାଦ୍ନା ଲାଜରତିଙ୍ଗ୍ ହାଃତାକାନିଙ୍ଗ୍ ଜିବୁନ୍ କିତାନ୍, ଆରେ ହେୱାନିଙ୍ଗ୍ କବର୍ ବାଟା ବିତ୍ରେତାଙ୍ଗ୍ ବାର୍ତ ହପ୍ତାନ୍, ହେପାଦ୍ନା ତା ହୁଦାଙ୍ଗ୍ ବେସିହେନି ମାନାୟ୍ ମାଚାର୍। ହେ ମାନାୟାର୍ ଯୀଶୁ କିତି କାମାୟ୍ ବିଷୟରେ ଜେକନିକାରିଙ୍ଗ୍ ୱେଚ୍ଚି ମାଚାର୍। 18ଏଚେପାଦ୍ନା ହେୱାର୍ ୱେଚାର୍ ଯେ ଯୀଶୁ ଚାନିଆଆନି କାମାୟ୍ କିତାନ୍ନା, ଲାଗିଙ୍ଗ୍ ବେସିହେନି ମାନାୟ୍ ହେୱାନିଙ୍ଗ୍ ହୁଡ଼୍ଦେଙ୍ଗ୍ ହାଚାର୍। 19ଲାଗିଙ୍ଗ୍ ପାରୁସିଦଳ୍ ହେୱାର୍ ବିତ୍ରେ କାତାବାର୍ତା ଆତାର୍, “ହୁଡ଼୍ନାଦେରା ମା ୱିଜୁ ଉପାୟ୍ ବେକାରେ ଆନାତା। ହୁଡ଼ାଟ୍, ପୁର୍ତିନି ମାନାୟାର୍ ତାପାଚେ-ପାଚେ ହାଚାରେ।”
ଜିବୁନ୍ ଆରେ ମାରାଣ୍ ବିଷୟରେ ଯୀଶୁ ୱେଚ୍ଚାନ୍
20ନିସ୍ତାର୍ ପାର୍ବୁ ତିନିହିଙ୍ଗ୍ ପୁଜା କିଦେଙ୍ଗ୍ ଯିରୁଶାଲାମ ସହର୍ତାଙ୍ଗ୍ ହାଲ୍ଜି ମାଚି ମାନାୟାର୍ ବିତ୍ରେତାଙ୍ଗ୍ କେତ୍ଜାଣ୍ ବିନ୍ଜାତିନି ମାନାୟ୍ ମାଚାର୍। 21ହେ ଗାଲିଲୀ ଜିଲ୍ଲାନି ବେଥ୍ସାଇଦା ସହର୍ନି ମାନାୟାର୍ ପିଲିପ ଲାଗାୟ୍ ହାଚାର୍। ବେଥ୍ସାଇଦା ସହର୍ନି ମାନାୟାର୍ ୱେଚ୍ଚାର୍, “ଆଜ୍ଞା, ଆପେଙ୍ଗ୍ ଯୀଶୁଙ୍ଗ୍ ହୁଡ଼୍ଦେଙ୍ଗ୍ ଇଚା କିନାପା।” 22ପିଲିପ ଆନ୍ଦ୍ରିୟଙ୍ଗ୍ ହାଲ୍ଜି ଇ କାତା ୱେଚ୍ଚାନ୍, ତାପାଚେ ଆନ୍ଦ୍ରିୟ ଆରେ ପିଲିପ ହାଲ୍ଜି ଯୀଶୁଙ୍ଗ୍ ୱେଚ୍ଚାର୍।
23ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ନଙ୍ଗୟ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଦୁକ୍କଷ୍ଟ ପାୟାଆନିଦିନ୍ ଲାଗେ ୱାତାତେ। 24ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ର ଗହମ୍ ମେଦ୍ନିତ ଆର୍ଜି ହାତ୍ପା ହାଃନି କାତା। ତାପାଚେ ହେ ମାଞ୍ଜି ଗାଜା ଆଜି ବେସି ପାଡ଼୍ ହିନାତ୍। ମାତର୍ ହେ ଗହମ୍ ଇନାୱେଡ଼ାଙ୍ଗ୍ ପା ହାଃୱିତିସ୍, ଲାଗିଙ୍ଗ୍ ଇ ଗହମ୍ ୱିଜୁଦିନ୍ ର ଗହମ୍ ଆଜି ନେ ମାନ୍ଗାନାତ୍। 25ଜାର୍ ଜିବୁନ୍ତିଙ୍ଗ୍ ଇନେର୍ ରକ୍ଷା କିଦେଙ୍ଗ୍ ମାନ୍ କିନାନ୍, ହେୱାନ୍ ହେଦାଙ୍ଗ୍ ହାରାଇ କିନାନ୍। ମାତର୍ ଇନେର୍ ତା ଜିବୁନ୍ତିଙ୍ଗ୍ ଆରାଇ କିନାନ୍, ହେୱାନ୍ ୱିଜ୍ୱି ଜିବୁନ୍ ପାୟାଆନି କାଜିଙ୍ଗ୍ କିନାନା। 26ଇନେର୍ ନାଙ୍ଗେଙ୍ଗ୍ ହେବା କିଦ୍ନାର୍ ଲାଗିଙ୍ଗ୍ ହେୱାନ୍ ନା ପାଚେ ୱାଏନ୍। ଆରେ ଆନେଙ୍ଗ୍ ଇମେତାକେ ମାନ୍ଗାନାଙ୍ଗ୍, ହେବେ ନାଙ୍ଗେଙ୍ଗ୍ ହେବା କିଦ୍ନାକାର୍ ପା ନା ହୁଦାଙ୍ଗ୍ ମାନ୍ଗାନାର୍। ଇମ୍ଣାକାର୍ ନାଙ୍ଗେଙ୍ଗ୍ ହେବା କିଦ୍ନାର୍, ଲାଗିଙ୍ଗ୍ ନା ଆବା ଈଶ୍ୱର ହେୱାରିଙ୍ଗ୍ ସନ୍ମାନ୍ ହିନାନ୍।
ଯୀଶୁ ଜାର୍ ହାଃନି ବିଷୟରେ ୱେଚ୍ଚାନ୍
27ଆନେଙ୍ଗ୍ ନଙ୍ଗୟ୍ ବେସି କଷ୍ଟତାକେ ମାନାଙ୍ଗ୍, ଆନେଙ୍ଗ୍ ଇନାକା ୱେଚ୍ନାଙ୍ଗ୍? ‘ଏ ଆବା ଈଶ୍ୱର, ନାଙ୍ଗେଙ୍ଗ୍ ଇ ଦୁକ୍ କଷ୍ଟତାଙ୍ଗ୍ ଉଦାର୍ କିଦା,’ ମାତର୍ ଇ ଦୁକ୍କଷ୍ଟ ପାୟା ଆଦେଙ୍ଗ୍ ଆନେଙ୍ଗ୍ ୱାତାଙ୍ଗ୍ନା। 28ଏ ଆବା ଈଶ୍ୱର, ନି ତର୍ଦିଙ୍ଗ୍ ଜୟ୍-ଜୟ୍ ଆୟେତ୍।” ହେପାଦ୍ନା ସରଗ୍ ଜପିତାଙ୍ଗ୍ ଇବେଣ୍ ୱାତାତ୍, “ଆପେଙ୍ଗ୍ ହେ ତର୍ଦିଙ୍ଗ୍ ଜୟ୍-ଜୟ୍ କିତ୍ତାପ୍ନା। ଆପେଙ୍ଗ୍ ହେଦାଙ୍ଗ୍ ଆରେରଗ କିଦ୍ନାପ୍।” 29ହେବେ ନିଲ୍ତି ମାନାୟାର୍ ଇବେଣ୍ ୱେଚାର୍। ହେୱାର୍ ହେ ବେଣ୍ତିଙ୍ଗ୍ ବାଦାଡ଼୍ ଗାର୍ଜା ଆନାକା ଇଚାର୍। ମାତର୍ ଜେକନିକାର୍ ୱେଚ୍ଚାର୍, “ଯୀଶୁଙ୍ଗ୍ ରକାନ୍ ସରଗ୍ନି ଦୁତ୍ ବେଣ୍ କିତାତ୍।”
30ଯୀଶୁ ମାନାୟାରିଙ୍ଗ୍ ୱେଚ୍ଚାନ୍, “ହେ ବେଣ୍ ମି କାଜିଙ୍ଗ୍ ମାଚାତ୍, ନା କାଜିଙ୍ଗ୍ ଆକାୟ୍। 31ନଙ୍ଗୟ୍ ଇ ପୁର୍ତିତିଙ୍ଗ୍ ବିଚାର୍କିନି ଦିନ୍ ଏକିୱାତାତ୍, ଇ ପୁର୍ତିତିଙ୍ଗ୍ ସାସନ୍ କିନି ଶୟତାନ୍ତିଙ୍ଗ୍ ବାର୍ତ ତୁସିହିନି ଦିନ୍ ୱାତାତ୍। 32ନାଙ୍ଗେଙ୍ଗ୍ ଏଚେପାଦ୍ନା କୃଶକାଟ୍ତାକେ ଦୁପ୍ନାର୍, ହେପାଦ୍ନା ଆନେଙ୍ଗ୍ ୱିଜାକାରିଙ୍ଗ୍ ନା ଲାଗାୟ୍ ଅସାହାନାଙ୍ଗ୍।” 33ଯୀଶୁ ଇନେସ୍କିଜି ହାଃନାନ୍, ହେଦାଙ୍ଗ୍ତିଙ୍ଗ୍ ଚଚ୍ଚେଙ୍ଗ୍ ହେୱାନ୍ ହେଲେକେ ୱେଚ୍ଚାନ୍।
34ମାନାୟାର୍ ୱେଚ୍ଚାର୍, “ମୋଶା ଲେକିକିତି ନିୟମ୍ ସାସ୍ତର୍ତାକେ ୱେଚାପ୍ନା, ଖ୍ରୀଷ୍ଟ ୱିଜୁଦିନ୍ କାଜିଙ୍ଗ୍ ଜିବୁନ୍ ମାନ୍ଗାନାନ୍। ଲାଗିଙ୍ଗ୍ ଏନେଙ୍ଗ୍ ଇନା କିଦେଙ୍ଗ୍ ୱେଚ୍ନାୟା ଯେ, ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ସରଗ୍ଜପି ହାନାନ୍? ଇ ସରଗ୍ତାଙ୍ଗ୍ ୱାତି ମାନାୟ୍ ହିମ୍ଣା ଇନେର୍?”
35ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ମି ଲାଗାୟ୍ ଆରେ ଅଲପ୍ଦିନ୍ ଅଜଡ଼୍ ମାନ୍ଗାନାତ୍। ଲାଗିଙ୍ଗ୍ ଅଜଡ଼୍ ମି ଲାଗାୟ୍ ମାନି ପାତେକ୍ ତାଙ୍ଗାଟ୍। ଲାଗିଙ୍ଗ୍ ମାଜ୍ଗା ମିଙ୍ଗେଙ୍ଗ୍ ଆସ୍ତେଦେଙ୍ଗ୍ ଆଡ଼୍ଦୁତ୍। ମାଜ୍ଗାତାକେ ତାଙ୍ଗ୍ନାକାନ୍ ଇମେନିପଣ୍ ହାନାନା ପୁଞ୍ଜେଙ୍ଗ୍ ଆଡୁନ୍। 36ଲାଗିଙ୍ଗ୍ ମି ଲାଗାୟ୍ ଅଜଡ଼୍ ମାନି ପାତେକ୍ ହେୱାନ୍ତାକେ ପାର୍ତିକିୟାଟ୍। ଲାଗିଙ୍ଗ୍ ଏପେଙ୍ଗ୍ ଅଜଡ଼୍ନି ମାଜିକାଦେର୍ ଆନାଦେର୍।” ଯୀଶୁ ଇ କାତା ୱେଚ୍ଚି ପାଚେ ହେୱାର୍ତାଙ୍ଗ୍ ହାଚାନ୍। ହେୱାନ୍ ଇଲେଗ୍ଦି ବାହାତାକେ ମାଚାନ୍, ହେୱାନିଙ୍ଗ୍ ମାନାୟାର୍ ଦାସ୍ତେଙ୍ଗ୍ ଆଡ୍ୱାତାର୍।
ଯୀଶୁଙ୍ଗ୍ ଯିହୁଦିର୍ ପାର୍ତି କିୱାତାର୍
37ଯୀଶୁ ବେସି ଚାନିଆଆନି କାମାୟ୍ କିତାନ୍। ମାନାୟାର୍ ଇୱିଜୁ ହୁଡ଼୍ଜି ପା ପାର୍ତି କିୱାତାର୍। 38ଇନେସ୍ ଲେକେ ଭବିଷ୍ଯତବକ୍ତା ଯିଶାୟ ଇନାକା ୱେଚ୍ଚି ମାଚାନ୍ ହେଦାଙ୍ଗ୍ ସତ୍ ଆତାତ୍, ହେୱାନ୍ ୱେଚ୍ଚି ମାଚାନ୍,
“ଏ ମାପୃ, ଆପେଙ୍ଗ୍ ୱେଚ୍ଚି କାତାତିଙ୍ଗ୍ ଇନେର୍ ପାର୍ତି କିତ୍ତାର୍?
ଇନେର୍ ମାପୃନି ସାକ୍ତି ହିତାର୍ନା?”
39ହେୱାର୍ ପାର୍ତି କିଦେଙ୍ଗ୍ ଆଡ୍ୱାଦାଙ୍ଗ୍ ମାଚାର୍, ଇନେସ୍କି ଯିଶାୟ ଆରେ ପା ୱେଚ୍ଚି ମାଚାନ୍।
40“ଈଶ୍ୱର ମାନାୟାରିଙ୍ଗ୍ କାଣା କିତାନ୍ନା।
ହେଦାଙ୍ଗ୍ କାଜିଙ୍ଗ୍ ହେୱାର୍ ଇନାକା ହୁଡ଼୍ଦେଙ୍ଗ୍ ଆଡୁର୍ କି ବୁଜା ଆଦେଙ୍ଗ୍ ଆଡୁର୍।
ହେଦାଙ୍ଗ୍ କାଜିଙ୍ଗ୍ ଈଶ୍ୱର ଇଦାଙ୍ଗ୍ ୱେଚ୍ଚାନ୍ନା।
ତାପାଚେ ଆନେଙ୍ଗ୍ ହେୱାରିଙ୍ଗ୍ ହାର୍ କିନାଙ୍ଗ୍।”
41ଯିଶାୟ ଇ କାତା ୱେଚ୍ଚି ମାଚାନ୍, ଇନେସ୍କି ହେୱାନ୍ ଈଶ୍ୱର ଗୌରବ ହୁଡ଼୍ଜି ମାଚାନ୍। ଲାଗିଙ୍ଗ୍ ହେୱାନ୍ ଯୀଶୁ ବିଷୟରେ ଏଲେଙ୍ଗ୍ ୱେଚ୍ଚାନ୍। 42ମାତର୍ ଯୀଶୁଙ୍ଗ୍ ବେସିହେନି ପାର୍ତି କିତାର୍। ଏଲେଙ୍ଗ୍ କି କେତେକ୍ ଯିହୁଦି ନେତାର୍ ପା ହେୱାନିଙ୍ଗ୍ ପାର୍ତି କିତାର୍। ମାତର୍ ହେୱାର୍ ପାରୁସିଦଳ୍ ନିକାରିଙ୍ଗ୍ ପାଣ୍ଡ୍ରାଆଜି ମାଚାର୍। ଲାଗିଙ୍ଗ୍ ହେୱାର୍ ପାର୍ତିକିନି ବିଷୟରେ କୁଲାକୁଲି ୱେଚ୍ୱାତାର୍। ଏଚେପାଦ୍ନା ପାରୁସିଦଳ୍ ହେୱାରିଙ୍ଗ୍ ପାର୍ତାନା ଇଞ୍ଜାଙ୍ଗ୍ ହପ୍ତାନାର୍ ଇଞ୍ଜି ହେୱାର୍ ପାଣ୍ଡ୍ରା ଆତାର୍। 43ହେ ମାନାୟାର୍ ଈଶ୍ୱରତାଙ୍ଗ୍ ଜୟ୍-ଜୟ୍ ପାୟାଆନି ବାଦୁଲ୍ ମାନାୟାର୍ ଜୟ୍-ଜୟ୍ ପାୟା ଆଦେଙ୍ଗ୍ ମାନ୍ କିଜି ମାଚାର୍।
ଯୀଶୁ ହିକ୍ଷାତିଙ୍ଗ୍ ମାନିକିୱି କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ବିଚାର୍ କିନାନ୍
44ତାପାଚେ ଯୀଶୁ ଗାଜାକାଟ୍ କିଜି ୱେଚ୍ଚାନ୍, “ନାବେ ଇନେର୍ ପାର୍ତି କିଦ୍ନାର୍, ହେୱାନ୍ ନାବେ ଆକାଇ, ମାତର୍ ଇନେର୍ ନାଙ୍ଗେଙ୍ଗ୍ ପକ୍ତାତାନ୍ନା, ହେୱାନ୍ତାକେ ପାର୍ତିକିନାର୍। 45ନାଙ୍ଗେଙ୍ଗ୍ ଇମ୍ଣାକାନ୍ ହୁଡ଼୍ଦାନାନ୍, ହେୱାନ୍ ନାଙ୍ଗେଙ୍ଗ୍ ପକ୍ତାତାକାନିଙ୍ଗ୍ ହୁଡ଼୍ତାନ୍। 46ଆନେଙ୍ଗ୍ ଅଜଡ଼୍ଲେକେ ପୁର୍ତିତାକେ ୱାତାଙ୍ଗ୍ନା। ଇନେର୍ ନାଙ୍ଗେଙ୍ଗ୍ ପାର୍ତି କିଦ୍ନାର୍, ହେୱାନ୍ ଇନାୱେଡ଼ାଙ୍ଗ୍ ପା ମାଜ୍ଗାତାକେ ମାନୁନ୍। 47ଇମ୍ଣାକାର୍ ନା ହିକ୍ଷାତିଙ୍ଗ୍ ୱେନାର୍, ମାତର୍ ହେ ହିକ୍ଷାତିଙ୍ଗ୍ ମାନିକିଉର୍। ଆନେଙ୍ଗ୍ ହେ ମାନାୟାରିଙ୍ଗ୍ ବିଚାର୍ କିଦେଙ୍ଗ୍ ୱାୱାତାଙ୍ଗ୍ନା। ମାତର୍ ଆନେଙ୍ଗ୍ ଇ ପୁର୍ତିନି ମାନାୟାରିଙ୍ଗ୍ ଉଦାର୍ କିଦେଙ୍ଗ୍ ୱାତାଙ୍ଗ୍ନା। 48ଇନେର୍ ନା ହିକ୍ଷାତିଙ୍ଗ୍ ୱେନୁନ୍ ଆରେ ମାନିକିଉନ୍, ହେୱାରିଙ୍ଗ୍ ବିଚାର୍ କିଦେଙ୍ଗ୍ ରକାନ୍ ମାନାନ୍। ଆନେଙ୍ଗ୍ ଇମ୍ଣି କାତା ୱିଜୁ ୱେଚ୍ଚାଙ୍ଗ୍ନା ହେ କାତା ସେସ୍ଦିନ୍ତ ବିଚାର୍ ଆନାତ୍। 49ଇନେସ୍କି ଆନେଙ୍ଗ୍ ନା ହିକ୍ଷା ହିଦୁଙ୍ଗା, ମାତର୍ ଇମ୍ଣି ଆବା ଈଶ୍ୱର ନାଙ୍ଗେଙ୍ଗ୍ ସରଗ୍ତାଙ୍ଗ୍ ନାଙ୍ଗେଙ୍ଗ୍ ପକ୍ତାତାନ୍ନା, ଇୱିଜୁ ଆଦେସ୍ ହିନି କାଜିଙ୍ଗ୍ ନାଙ୍ଗେଙ୍ଗ୍ ହିକ୍ଷା ହିତ୍ତାନ୍ନା। 50ଆନେଙ୍ଗ୍ ପୁନାଙ୍ଗ୍, ନା ଆବା ଈଶ୍ୱର ଇନାକା ଆଦେସ୍ ହିଦ୍ନାନ୍, ହେ ଆଦେସ୍ତାଙ୍ଗ୍ ୱିଜ୍ୱି ଜିବୁନ୍ ୱାନାତ୍। ଲାଗିଙ୍ଗ୍ ଆନେଙ୍ଗ୍ ଇନାକା ୱେଚ୍ତାଙ୍ଗ୍ନା, ହେଦାଙ୍ଗ୍ ୱେଚ୍ନି କାଜିଙ୍ଗ୍ ନାଙ୍ଗେଙ୍ଗ୍ ନା ଆବା ଈଶ୍ୱର ୱେଚ୍ଚାତାନ୍ନା।”
Currently Selected:
ଯୋହନ 12: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
