ଯୋହନ 13
13
ଯୀଶୁ ତା ଚେଲାହିର୍ କାଲ୍ପାନା ନୁସ୍ତାନ୍
1ହେପାଦ୍ନା ଯିହୁଦିର୍ ନିସ୍ତାର୍ ପାର୍ବୁ ରଦିନ୍ ଆଗେ ଯୀଶୁ ପୁଚାନ୍, ହେୱାନିଙ୍ଗ୍ ପୁର୍ତିତିଙ୍ଗ୍ ପିସ୍ତି ହାନି ସମୟ୍ ଆତାତେ। ନଙ୍ଗୟ୍ ହେୱାନ୍ ଆବା ଈଶ୍ୱରତାକେ ହାନାନ୍। ହେୱାନ୍ ୱିଜୁଦିନ୍ ଇ ପୁର୍ତିତାକେ ମାନି ତା ଜାର୍ ଆଜିମାଚି ଲକ୍ବାକ୍ତିଙ୍ଗ୍ ଲାଡ୍କିଜି ମାଚାନ୍। ହେୱାନ୍ ହେୱାର୍ କାଜିଙ୍ଗ୍ ବେସି ଲାଡ଼୍ କିଜି ମାଚାନ୍। 2ହେନାଞ୍ଜ୍ ମିକାଲିଙ୍ଗ୍ ଯୀଶୁ ଆରେ ତା ଚେଲାହିର୍ ଚିଞ୍ଜେଙ୍ଗ୍ କୁଚ୍ଚି ମାଚାର୍। ହେପାଦ୍ନା ଶିମୋନ ମେହି ଇଷ୍କାରିତିୟ ଯିହୁଦା ଯୀଶୁଙ୍ଗ୍ ଶୟତାନ୍ କେଇଦ ଆହିକିଦେଙ୍ଗ୍ ମାନ୍ତ ବାବିକିଜି ମାଚାନ୍। 3ଆବା ଈଶ୍ୱର ଯୀଶୁଙ୍ଗ୍ ୱିଜୁ ବଷୟରେ ଆଦିକାର୍ ହିଜିମାଚାନ୍। ହେୱାନ୍ ଈଶ୍ୱରତାଙ୍ଗ୍ ୱାତାନ୍ନା ଆରେ ଈଶ୍ୱରତାକେ ହାନାଙ୍ଗ୍ ଇଞ୍ଜି ଯୀଶୁ ଇଦାଙ୍ଗ୍ ପୁନ୍ଞ୍ଜି ମାଚାନ୍। 4ହେୱାର୍ କୁଚ୍ଚି ତିନିହିଙ୍ଗ୍ ଯୀଶୁ ନିଙ୍ଗ୍ଞ୍ଜି ଉସ୍ପିତି ଡେଙ୍ଗା ଆଙ୍ଗି ରିକ୍ତାନ୍। ଆରେ ମେଙ୍ଗାକାଙ୍ଗ୍ ର କାଦିଆ ଗାଚିଆ ଆତାନ୍। 5ତାପାଚେ ହେୱାନ୍ ର ଗାଜା ତସ୍ଲାତାକେ ଏଜୁଙ୍ଗ୍ ଅଜି, ଚେଲାହିର୍ କାଲ୍କୁପାନା ନୁଜ୍ଦେଙ୍ଗ୍ ଆରମ୍ କିତାନ୍। ଆରେ ତା ମେଙ୍ଗାକାଙ୍ଗ୍ ହୁର୍ପିଆତି କାଦିଆ ହୁଦାଙ୍ଗ୍ କାଲ୍କୁ ପାନାଙ୍ଗ୍ ନେନ୍ଦ୍ତାନ୍।
6ଆରେ ଯୀଶୁ ଶିମୋନ ପିତର ଲାଗାୟ୍ ୱାତାନ୍। ମାତର୍ ପିତର ହେୱାନିଙ୍ଗ୍ ୱେଚ୍ଚାନ୍, “ମାପୃ, ଏନେଙ୍ଗ୍ ନା କାଲ୍ପାନା ନୁଜ୍ମା।”
7ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଇନାକା କିନାଙ୍ଗା ଏପେଙ୍ଗ୍ ନଙ୍ଗୟ୍ ପୁନୁଦେରା, ମାତର୍ ଏପେଙ୍ଗ୍ ପାଚେ ବୁଜାଆନାଦେର୍।”
8ପିତର ୱେଚ୍ଚାନ୍, “ଆକାୟ୍, ଏନେଙ୍ଗ୍ ନା କାଲ୍ପାନା ଇନାୱେଡ଼ାଙ୍ଗ୍ ପା ନୁଜ୍ମା।” ଯୀଶୁ ୱେଚ୍ଚାନ୍, “ଆନେଙ୍ଗ୍ ଯଦି ମି କାଲ୍କୁ ପାନାଙ୍ଗ୍ ନୁଜ୍ଜି ହିଦୁଙ୍ଗ୍, ଲାଗିଙ୍ଗ୍ ଏନେଙ୍ଗ୍ ନା ଲକ୍ବାକ୍ ଆଉଇ।”
9ଶିମୋନ ପିତର ହେୱାନିଙ୍ଗ୍ ୱେଚ୍ଚାନ୍, “ଏ ମାପୃ, ଏନେଙ୍ଗ୍ ନା କାଲ୍ପାନା ନୁସ୍ତି ପାଚେ ନା କେଇ ଆରେ କାପ୍ଡ଼ା ପା ନୁଜ୍ଜି ହିଦା।”
10ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଇନେର୍ ଏଜୁଙ୍ଗ୍ ଇବାତାନ୍ନା ତା କାଲ୍ପାନା ନୁଜ୍ନି ଦର୍କାର୍ ଆକାୟ୍। ମାତର୍ ହେୱାନ୍ ପୁରାପୁରି ନିର୍ମଲ୍ ମାନ୍ଗାନାନ୍। ଏନେଙ୍ଗ୍ ନିର୍ମଲ୍ ମାନାଇ ମାତର୍ ଜେକନିକାକାର୍ ଆକାୟ୍।” 11ଯୀଶୁ ପୁନ୍ଞ୍ଜି ମାଚାନ୍, ଇମ୍ଣାକାନ୍ ତାଙ୍ଗେଙ୍ଗ୍ ଶତ୍ରୁ କେଇଦ ଆହିକିଦ୍ନାନ୍, ଲାଗିଙ୍ଗ୍ ହେୱାନ୍ ୱେଚ୍ଚାନ୍, “ମି ବିତ୍ରେତାଙ୍ଗ୍ ୱିଜାକାଦେର୍ ନିର୍ମଲ୍ ଆକାୟ୍।”
12ଯୀଶୁ ତା ଚେଲାହିର୍ କାଲ୍ପାନା ନୁଜ୍ଜି ୱିସ୍ତାନ୍। ତାପାଚେ ହେୱାନ୍ କୁତ୍ତି ଆଙ୍ଗିତିଙ୍ଗ୍ ଉସ୍ପିସ୍ ପାସ୍ତିତାକେ କୁଚ୍ଚାନ୍, ଯୀଶୁ ୱେଚ୍ଚାନ୍, “ଆନେଙ୍ଗ୍ ମି କାଜିଙ୍ଗ୍ ଇନାକା କିତାଙ୍ଗ୍, ଏପେଙ୍ଗ୍ ହେଦାଙ୍ଗ୍ ବୁଜାଆତାଦେର୍କି? 13ଏପେଙ୍ଗ୍ ନାଙ୍ଗେଙ୍ଗ୍ ଗୁରୁ ଆରେ ମାପୃ ଇଞ୍ଜ୍ନାଦେରା। ହେଦାଙ୍ଗ୍ ଟିକ୍, ଇନେସ୍କି ଆନେଙ୍ଗ୍ ହେୱାନ୍ନେ। 14ଆନେଙ୍ଗ୍ ଯଦି ଗୁରୁ ଆରେ ମାପୃ। ମାତର୍ ମି କାଲ୍କୁପାନାତିଙ୍ଗ୍ ର ହଲିଆ ଲେକେ ନୁଜ୍ଦାତାଙ୍ଗ୍। ଲାଗିଙ୍ଗ୍ ଏପେଙ୍ଗ୍ ଜାର୍-ଜାର୍ କାଲ୍ପାନା ନୁଜ୍ନି କାତା। 15ଆନେଙ୍ଗ୍ ଇଦାଙ୍ଗ୍ ମି କାଜିଙ୍ଗ୍ ର ମାନି କିତିଲେକେ କିତାଙ୍ଗ୍। ଲାଗିଙ୍ଗ୍ ଏପେଙ୍ଗ୍ ଜାର୍-ଜାର୍ବିତ୍ରେ ହେଲେକେ କିନାଦେର୍। 16ଇଦାଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ରକାନ୍ ହଲିଆ ତା ମାପୃତାଙ୍ଗ୍ ଗାଜା ଆକାୟ୍। ଇମ୍ଣି ମାନାୟ୍ତିଙ୍ଗ୍ ଇନାକା କାମାୟ୍ କିଦେଙ୍ଗ୍ ପକିଆତାତ୍ନା, ହେୱାନ୍ ପକ୍ତିତି ଆବାତାଙ୍ଗ୍ ଗାଜା ଆକାୟ୍। 17ଏପେଙ୍ଗ୍ ଯଦି ଇଦାଙ୍ଗ୍ ୱିଜୁ ପୁନାଦେର୍, ଲାଗିଙ୍ଗ୍ ଏପେଙ୍ଗ୍ ଇ କାମାୟ୍ କିଜି ଆଶ୍ରିବାଦ୍ ପାୟାଆନାଦେର୍।
18ଆନେଙ୍ଗ୍ ମିଙ୍ଗେଙ୍ଗ୍ ୱିଜାକାର୍ ବିଷୟରେ ୱେଚ୍ଚୁଙ୍ଗା। ଆନେଙ୍ଗ୍ ଇମ୍ଣାକାରିଙ୍ଗ୍ ବାଚିକିତାଙ୍ଗ୍ନା, ହେୱାରିଙ୍ଗ୍ ପୁନାଙ୍ଗ୍। ମାତର୍ ଦରମ୍ ସାସ୍ତର୍ତାକେ ଇନାକା ଲେକା ମାନାତ୍, ହେଦାଙ୍ଗ୍ ଗଟାଆନାତ୍। ଇମ୍ଣାକାନ୍ ନା ହୁଦାଙ୍ଗ୍ ମେହାଆଜି ତିନାନ୍, ହେୱାନ୍ ନାଙ୍ଗେଙ୍ଗ୍ ଶତ୍ରୁ କେଇଦ ଆହିକିଦ୍ନାନ୍। 19ନଙ୍ଗୟ୍ ଇଦାଙ୍ଗ୍ ଗଟାଆୱି ଆଗେ ଆନେଙ୍ଗ୍ ମିଙ୍ଗେଙ୍ଗ୍ ଇ କାତା ୱେଚ୍ଚାନାଙ୍ଗା। ଲାଗିଙ୍ଗ୍ ଏଚେପାଦ୍ନା ଇଦାଙ୍ଗ୍ ଗଟାଆନାତ୍, ଆନେଙ୍ଗ୍ ହେ ରକ୍ଷାକିଦ୍ନାକାନ୍ ଇଞ୍ଜି ଏପେଙ୍ଗ୍ ପାର୍ତି କିନାଦେର୍। 20ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଆନେଙ୍ଗ୍ ପକ୍ତାତାକାନିଙ୍ଗ୍ ଇନେର୍ ଆହ୍ନାନ୍, ହେୱାନ୍ ନାଙ୍ଗେଙ୍ଗ୍ ଆସ୍ତାନାନ୍। ନାଙ୍ଗେଙ୍ଗ୍ ଇମ୍ଣାକାନ୍ ଆସ୍ତାନାନ୍, ହେୱାନ୍ ନାଙ୍ଗେଙ୍ଗ୍ ପକ୍ତିତି ଆବାଙ୍ଗ୍ ପା ଆହ୍ନାନ୍।”
ତାଙ୍ଗେଙ୍ଗ୍ ବିରୁଦ୍ କିନି ବିଷୟରେ ଯୀଶୁ ୱେଚ୍ଚାନ୍
(ମାଥି. ୨୬:୨୦-୨୫; ମାର୍କ. ୧୪:୧୭-୨୧; ଲୁକ. ୨୨:୨୧-୩୨)
21ଯୀଶୁ ଇ କାତା ୱେଚ୍ଚି ପାଚେ ହେୱାନ୍ ବେସିଦୁକ୍ ଆଜି ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ମି ବିତ୍ରେତାଙ୍ଗ୍ ରକାନ୍ ନାଙ୍ଗେଙ୍ଗ୍ ଶାତ୍ରୁ କେଇଦ ଆହିକିଦ୍ନାନ୍।”
22ଯୀଶୁ ଚେଲାହିର୍ ଜାର୍-ଜାର୍ ହୁଡ଼୍କା ଆତାର୍। ହେୱାର୍ ବୁଜା ଆଦେଙ୍ଗ୍ ଆଡ୍ୱାତାର୍, ଯୀଶୁ ଇନେର୍ ବିଷୟରେ ୱେଚ୍ଚାନାନା। 23ଯୀଶୁ ଚେଲାହିର୍ ବିତ୍ରେତାଙ୍ଗ୍ ରକାନ୍ ଇନେରିଙ୍ଗ୍ ଯୀଶୁ ବେସି ଲାଡ୍କିଜି ମାଚାନ୍। ହେୱାନ୍ ଯୀଶୁ ତିନିକେଇ ନିପଣ୍ କୁଚ୍ଚି ଚିନ୍ଞ୍ଜି ମାଚାନ୍। 24ଶିମୋନ ପିତର ତା ଚେଲାହିଙ୍ଗ୍ କେଇ ସାକ୍ଯା କିଜି ୱେଚ୍ଚାନ୍। ଯୀଶୁ ଇନେର୍ ବିଷୟରେ ୱେଚ୍ଚାନାନା। 25ହେ ଚେଲାହି ଯୀଶୁ ଲାଗାୟ୍ ଆରେ ଅଲପ୍ ଗେଣ୍ଜି ୱେନ୍ବାତାନ୍, “ମାପୃ ଇନେର୍ ନି ବିରୁଦ୍ତାକେ ହାନାପା?”
26ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ରୁଟିତିଙ୍ଗ୍ ଗିନାତାକେ କୁକ୍ଚି ଇନେରିଙ୍ଗ୍ ହିନାଙ୍ଗ୍, ହେୱାନ୍ ନା ବିରୁଦ୍ତାକେ ହାନାନ୍।” ଲାଗିଙ୍ଗ୍ ଯୀଶୁ ର ରୁଟି ଅଜି ଗିନାତାକେ କୁକ୍ତାନ୍ ଆରେ ଶିମୋନ ମେହିଙ୍ଗ୍ ଇଷ୍କାରିତିୟ ଯିହୁଦାଙ୍ଗ୍ ହିତାନ୍। 27ଈଷ୍କାରିୟତ ଯିହୁଦା ରୁଟି ଅତିହିଙ୍ଗ୍ ତା ବିତ୍ରେ ଶୟତାନ୍ ହଟାତ୍। ଯୀଶୁ ଈଷ୍କାରିୟତିୟ ଯିହୁଦାଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଇନାକା କିନି କାତା ହେଦାଙ୍ଗ୍ ବେଗି କିୟା।” 28ଯୀଶୁ ଈଷ୍କାରିୟତିୟ ଯିହୁଦାଙ୍ଗ୍ ଇନା କିଦେଙ୍ଗ୍ ୱେଚ୍ଚାନ୍, ହେଦାଙ୍ଗ୍ ତା ଲାଗାୟ୍ କୁଚ୍ଚାକାର୍ ଇନେର୍ ପା ବୁଜା ଆଦେଙ୍ଗ୍ ଆଡ୍ୱାତାର୍। 29ଈଷ୍କାରିୟତିୟ ଯିହୁଦା ଦଳ୍ନି ଡାବୁଙ୍ଗ୍ ପେଡ଼ି ତା ଲାଗାୟ୍ ଇଡ଼୍ଜି ମାଚାନ୍। ଲାଗିଙ୍ଗ୍ କେତ୍ଜାଣ୍ ଚେଲାହିର୍ ବାବିକିତାର୍ ଯେ, ଯୀଶୁ ହେୱାନିଙ୍ଗ୍ ପାର୍ବୁ କାଜିଙ୍ଗ୍ ଇନାକା କଡ଼୍ଦେଙ୍ଗ୍ ୱେଚ୍ଚାନ୍। ନଇଲେ ହେ ଡାବୁଙ୍ଗ୍ ଗରିବ୍ ଲଗାଙ୍ଗ୍ ଦାନ୍ ହିଦେଙ୍ଗ୍ ୱେଚ୍ନାନା।
ଯୀଶୁ ପୁନି ନିୟମ୍ ହିତି କାତା
30ଈଷ୍କାରିୟତିୟ ଯିହୁଦା ଯୀଶୁ ହିତି ରୁଟି ଆସ୍ତି ହେଦାପ୍ରେ ବାର୍ତ ହତାନ୍। ହେପାଦ୍ନା ମିସି ମାଚାତ୍।
31ଈଷ୍କାରିୟତିୟ ଯିହୁଦା ହାଚି ପାଚେ ଯୀଶୁ ୱେଚ୍ଚାନ୍, “ନଙ୍ଗୟ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଜୟ୍-ଜୟ୍ ପାୟାଆତାନ୍ନା। ଈଶ୍ୱର ପା ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତାଙ୍ଗ୍ ଜୟ୍-ଜୟ୍ ପାୟାଆତାନ୍ନା। 32ଈଶ୍ୱର ଯଦି ତାବେଣ୍ଡାଙ୍ଗ୍ ଜୟ୍-ଜୟ୍ ପାୟା ଆନାନ୍, ଲାଗିଙ୍ଗ୍ ଈଶ୍ୱର ପା ହେୱାନିଙ୍ଗ୍ ଜୟ୍-ଜୟ୍ କିନାନ୍। ହେୱାନ୍ ହେୱାନିଙ୍ଗ୍ ବେଗି ଜୟ୍-ଜୟ୍ କିଦେଙ୍ଗ୍ ହାନାନା।” 33ଯୀଶୁ ୱେଚ୍ଚାନ୍, “ନା ହିମ୍ଣାୱାକ୍ଡ଼ା କାଦେର୍, ଆନେଙ୍ଗ୍ ମିହୁଦାଙ୍ଗ୍ ଅଲପ୍ଦିନ୍ ମାନ୍ଗାନାଙ୍ଗ୍। ଏପେଙ୍ଗ୍ ନାଙ୍ଗେଙ୍ଗ୍ ଦାସ୍ତାନାଦେର୍। ଆନେଙ୍ଗ୍ ଯିହୁଦିରିଙ୍ଗ୍ ଇନାକା ୱେଚ୍ଚି ମାଚାଙ୍ଗ୍, ହେଦାଙ୍ଗ୍ ଆନେଙ୍ଗ୍ ନଙ୍ଗୟ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା। ଆନେଙ୍ଗ୍ ଇମେତାକେ ହାନାଙ୍ଗା, ଏପେଙ୍ଗ୍ ହେବେ ୱାଦେଙ୍ଗ୍ ଆଡୁଦେର୍। 34ଆନେଙ୍ଗ୍ ମିଙ୍ଗେଙ୍ଗ୍ ପୁନି ଆଦେସ୍ ହିଦ୍ନାଙ୍ଗା। ଏପେଙ୍ଗ୍ ଜାର୍-ଜାର୍ତିଙ୍ଗ୍ ଲାଡ୍ କିୟାଟ୍। ଆନେଙ୍ଗ୍ ମିଙ୍ଗେଙ୍ଗ୍ ଇନେସ୍କିଜି ଲାଡ୍ କିଦ୍ନାଙ୍ଗା, ଏପେଙ୍ଗ୍ ପା ଜାର୍-ଜାର୍ତିଙ୍ଗ୍ ହେଲେକେ ଲାଡ୍କିନି କାତା। 35ଏପେଙ୍ଗ୍ ଯଦି ଜାର୍-ଜାର୍ତିଙ୍ଗ୍ ଲାଡ୍ କିନାଦେର୍, ଲାଗିଙ୍ଗ୍ ୱିଜାକାର୍ ପୁଞ୍ଜ୍ନାର୍ ଯେ, ଏପେଙ୍ଗ୍ ନା ଚେଲା କାଦେର୍।”
ପିତର ଯୀଶୁଙ୍ଗ୍ ପୁନୁଙ୍ଗ୍ ଇଞ୍ଜି ୱେଚ୍ଚି କାତା
(ମାଥି. ୨୬:୩୧-୩୫; ମାର୍କ. ୧୪:୨୭-୩୧; ଲୁକ. ୨୨:୩୧-୩୪)
36ଶିମୋନ ପିତର ଯୀଶୁଙ୍ଗ୍ ୱେନ୍ବାତାନ୍, “ମାପୃ, ଏନେଙ୍ଗ୍ ଇମେନିପଣ୍ ହାନାୟା?” ଯୀଶୁ ୱେଚ୍ଚାନ୍, “ଆନେଙ୍ଗ୍ ଇମେନିପଣ୍ ହାନାଙ୍ଗା, ଏପେଙ୍ଗ୍ ନା ପାଚେ-ପାଚେ ନଙ୍ଗୟ୍ ହେବେ ୱାଦେଙ୍ଗ୍ ଆଡୁଦେର୍। ମାତର୍ ପାଚେ ଏପେଙ୍ଗ୍ ନା ପାଚେ-ପାଚେ ୱାନାଦେର୍।”
37ପିତର ୱେନ୍ବାତାନ୍, “ମାପୃ, ଆନେଙ୍ଗ୍ ନଙ୍ଗୟ୍ ଇନା କିଦେଙ୍ଗ୍ ନି ପାଚେ-ପାଚେ ୱାଦେଙ୍ଗ୍ ଆଡୁଙ୍ଗ୍? ଆନେଙ୍ଗ୍ ନି କାଜିଙ୍ଗ୍ ହାଃଦେଙ୍ଗ୍ ପା ରେଡି ମାନାଙ୍ଗ୍।”
38ଯୀଶୁ ୱେଚ୍ଚାନ୍, “ଏନେଙ୍ଗ୍ ଇନାକା ନା କାଜିଙ୍ଗ୍ ଜାର୍ ଜିବୁନ୍ ହିନାଇ? ଆନେଙ୍ଗ୍ ନିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, କୁଜୁ କେୱି ଆଗେ ଏନେଙ୍ଗ୍ ନାଙ୍ଗେଙ୍ଗ୍ ପୁନୁଙ୍ଗ୍ ଇଞ୍ଜି ତିନ୍ହଟ୍ ୱେଚ୍ନାୟ୍।”
Currently Selected:
ଯୋହନ 13: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
