ବାଚିକିତି ଚେଲାହିର୍ କାତା 4
4
ଯିହୁଦିର୍ ମିଟିଙ୍ଗ୍ କିନିତାକେ ପିତର ଆରେ ଯୋହନ
1ପିତର ଆରେ ଯୋହନ ମାନାୟାର୍ ଲାଗାୟ୍ କାତା ୱେଚ୍ନିହିଙ୍ଗ୍, ଈଶ୍ୱର ହେବାକିନି ମୁଡ଼୍ଦି ପୁଜାରିର୍, ମନ୍ଦିର୍ନି ସେନାନି ମୁଡ଼୍ଦି ମାନାୟ୍ ଆରେ ସାଦୁକିଦଳ୍ନି ମାନାୟାର୍ ହେୱାର୍ ଲାଗାୟ୍ ଇକାତାର୍। 2ବାଚିକିତି ଚେଲାହିର୍ ଯୋହନ ଆରେ ପିତର ମାନାୟାରିଙ୍ଗ୍ ହିକ୍ଷାହିଜି ମାଚାର୍। ଆରେ ଯୀଶୁ କାତା ଆସ୍ତି ହାଃତାକାର୍ତାଙ୍ଗ୍ ଆରେରଗ ଜିବୁନ୍ଆନି ବିଷୟରେ ଶୁଣାୟ୍ କିଜି ମାଚାର୍। ହେଦାଙ୍ଗ୍ କାଜିଙ୍ଗ୍ ହେୱାର୍ ରିସାଆଜି ମାଚାର୍। 3ଲାଗିଙ୍ଗ୍ ହେୱାର୍ ବାଚିକିତି ରିକାର୍ ଚେଲାହିରିଙ୍ଗ୍ ଆସ୍ତାର୍। ହେନାଞ୍ଜ୍ ମିକାହାରେସ୍ ଆଜି ମାଚିଲେ ହେୱାର୍ ହେୱାରିଙ୍ଗ୍ ଆରର ଦିନ୍ ଜଇଲ୍ତାକେ ଇଡ଼୍ତାର୍। 4ମାତର୍ ଈଶ୍ୱର କାତା ୱେନି ମାନାୟାର୍ ବିତ୍ରେତାଙ୍ଗ୍ କେତେକ୍ ହେନି ଯୀଶୁଙ୍ଗ୍ ପାର୍ତି କିତାର୍। ହେ ପାର୍ତିକିନାକାର୍ତାଙ୍ଗ୍ ପାକାପାକି ପାଞ୍ଚ୍ ହାଜାର୍ ଆଣ୍ଡ୍ରା ହିମ୍ଣାଙ୍ଗ୍ ମାଚାର୍।
5ତା ଆର୍କାତ୍ ନାଞ୍ଜିଙ୍ଗ୍ ଯିହୁଦିର୍ ନେତାର୍, ପ୍ରାଚିନ୍ ଆରେ ପଣ୍ଡିତାର୍ ଯିରୁଶାଲାମ ସହର୍ତାକେ ରବେ ଆତାର୍। 6ହେ ନେତାର୍ ବିତ୍ରେତାଙ୍ଗ୍ ହାନାନ ତର୍ଦି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି, କୟାପା ତର୍ଦାକାନ୍ ର ମାନାୟ୍, ଯୋହନ ତର୍ଦାକାନ୍ ର ମାନାୟ୍, ଆଲେକ୍ଜାଣ୍ଡ୍ରିଆ ତର୍ଦାକାନ୍ ର ମାନାୟ୍, ଆରେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଲାତ୍ରାନି ୱିଜାକାର୍ ମାନାୟ୍ ହେବେ ମାଚାର୍। 7ହେୱାର୍ ବାଚିକିତି ରିକାର୍ ଚେଲାରିଙ୍ଗ୍ ମାଦି ନିଲିକିଜି ୱେନ୍ବେଦେଙ୍ଗ୍ ଲାଗାତାର୍, “ଇନା ଶାକ୍ତିତାଙ୍ଗ୍ କି ଇନେର୍ ତର୍ଦାଙ୍ଗ୍ ଏପେଙ୍ଗ୍ ଇୱାନିଙ୍ଗ୍ ହାର୍ କିତାଦେର୍ନା?”
8ହେବେତାଙ୍ଗ୍ ପିତର ପବିତ୍ର ଆତ୍ମା ପୁରାଆଜି ହେୱାରିଙ୍ଗ୍ ୱେଚ୍ଚାନ୍, “ଏ ଯିହୁଦିର୍ ନେତାର୍ କାଦେର୍ ଆରେ ପ୍ରାଚିନ୍ କାଦେର୍, ୱେନାଟ୍! 9ର ରଗିୟା ମାନାୟ୍ତିଙ୍ଗ୍ ହାର୍ କିତି ବିଷୟରେ, ନେଞ୍ଜେଙ୍ଗ୍ ଯଦି ମାଙ୍ଗେଙ୍ଗ୍ ଇନେସ୍ ହାର୍ କିତାଇ ଇଞ୍ଜି ମାନାୟାର୍ ବିଚାର୍ କିଦ୍ନାର୍, 10ଲାଗିଙ୍ଗ୍ ଏପେଙ୍ଗ୍ ୱିଜାକାଦେର୍ ଆରେ ୱିଜୁ ଇସ୍ରାଏଲ ଲାତ୍ରାନି ମାନାୟ୍ ପୁନାଟ୍ ଯେ, ଇମ୍ଣି ନାଜରିତିୟ ସହର୍ତାଙ୍ଗ୍ ୱାତି ଯୀଶୁ ଖ୍ରୀଷ୍ଟଙ୍ଗ୍ ଏପେଙ୍ଗ୍ କୃଶକାଟ୍ତାକେ ଅସ୍ତାଦେର୍ନା, ମାତର୍ ଈଶ୍ୱର ହେୱାନିଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିତାନ୍ନା। ତା ତର୍ଦାଙ୍ଗ୍ ଇ ମାନାୟ୍ ହାର୍ ଆଜି ମି ଲାଗାୟ୍ ନିଲ୍ତାନ୍ନା।
11‘ଏପେଙ୍ଗ୍ ଇଲ୍ ରହ୍ନାକାଦେର୍, ଏପେଙ୍ଗ୍ ଇମ୍ଣି କାଲ୍ତିଙ୍ଗ୍ ଗାଚ୍ଚେଙ୍ଗ୍ ମାନ୍କିୱାତାଦେର୍,
ହେ କାଲ୍ କୁନାଦିନି ମୁଡ଼୍ଦି କାଲ୍ ଆତାତ୍। ହେ ମୁଡ଼୍ଦି କାଲ୍ ଯୀଶୁ।’
12ଯୀଶୁଙ୍ଗ୍ ପିସ୍ତି ଆରେ ଇନେର୍ତାକେ ପା ଉଦାର୍ ଗାଟାଆଦୁତ୍। ଇନେସ୍କି ବାଦାଡ଼୍ ତାରେନ୍ ମାନାୟାର୍ ବିତ୍ରେତାଙ୍ଗ୍ ହେଲେକେ ଇନେର୍ ତର୍ ହିଲୁତ୍, ତା ତର୍ଦାଙ୍ଗ୍ ରକ୍ଷା ପାୟାଆନାସ୍।”
13ହେୱାର୍ ପିତର ଆରେ ଯୋହନ ସାହାସ୍ ହୁଡ଼୍ଜି, ଆରେ ହେୱାର୍ ପାଟ୍ ପଡ଼ିକିୱାତାର୍ ଆରେ ବୁଦି ହିଲାକାର୍ ଇଞ୍ଜି ପୁନ୍ଞ୍ଜି, ଇଦାଙ୍ଗ୍ ବୁଜାଆଜି ଚାନିଆଆତାର୍। ଆରେ ହେୱାର୍ ଯୀଶୁ ହୁଦାଙ୍ଗ୍ ମାଚାର୍ ଇଞ୍ଜି ହେୱାରିଙ୍ଗ୍ ଚିନ୍ କିତାର୍। 14ଆରେ ହେ ଚଟାତାଙ୍ଗ୍ ହାର୍ଆତି ମାନାୟ୍ ପିତର ଆରେ ଯୋହନ ହୁଦାଙ୍ଗ୍ ନିଲ୍ତାକା ହୁଡ଼୍ଜି, ହେୱାର୍ ବିରୁଦ୍ତାକେ ଇନାକା ୱେଚ୍ଚେଙ୍ଗ୍ ଆଡ୍ୱାତାର୍। 15ପାଚେ ହେ ବିଚାର୍କିନି ଇଞ୍ଜ ମାନି ମାନାୟାର୍ ପିତର ଆରେ ଯୋହନତିଙ୍ଗ୍ ବାର୍ତ ହାଞ୍ଜେଙ୍ଗ୍ ଆଦେସ୍ ହିତାର୍। ପାଚେ ହେୱାର୍ ବିତ୍ରେ ୱେଚ୍ପା ଆଦେଙ୍ଗ୍ ଲାଗାତାର୍, “ଇୱାର୍ କାଜିଙ୍ଗ୍ ଇନାକା କିନାସ୍?
16ଇନେସ୍କି ଇୱାର୍ ରଞ୍ଜାଙ୍ଗ୍ ଗାଜା ଚାନିଆଆନି କାମାୟ୍ କିତାର୍ନା। ଇଦାଙ୍ଗ୍ ଯିରୁଶାଲାମ ସହର୍ତାକେ ମାନି ମାନାୟାର୍ ହୁଡ଼୍ତାର୍ନା। ଇ କାତାତିଙ୍ଗ୍ ଆସେଙ୍ଗ୍ ଆହ୍ୱାତାପ୍ନା ଇଞ୍ଜି ୱେଚ୍ଚେଙ୍ଗ୍ ଆଡୁସ୍। 17ମାତର୍ ଇ ଚାନିଆଆନି କାମାୟ୍ ବିଷୟରେ ଆଦିକ୍ ମାନାୟାର୍ ଇନେସ୍ ପୁଞ୍ଜେଙ୍ଗ୍ ଆଡୁର୍, ହେଦାଙ୍ଗ୍ କାଜିଙ୍ଗ୍ ଯୀଶୁ ତର୍ଦାଙ୍ଗ୍ ଜେକନିକାରିଙ୍ଗ୍ ଇନାକାପା ୱେଚ୍ୱେଦେଙ୍ଗ୍, ହେୱାରିଙ୍ଗ୍ ଆସେଙ୍ଗ୍ ପାଣ୍ଡ୍ରୁ କିନାସ୍।” 18ପାଚେ ମିଟିଙ୍ଗ୍ତାକେ କୁଚ୍ଚି ମାଚି ମାନାୟାର୍ ହେୱାରିଙ୍ଗ୍ କୁକ୍ଚି ଯୀଶୁ ତର୍ଦାଙ୍ଗ୍ ଅଲପ୍ପା ୱେଚ୍ୱେଦେଙ୍ଗ୍ କି ହିକ୍ଷା ହିୱେଦେଙ୍ଗ୍ ଦମ୍କାଇକିଜି ଆଦେସ୍ ହିତାର୍।
19ମାତର୍ ପିତର ଆରେ ଯୋହନ ହେୱାରିଙ୍ଗ୍ ୱେଚ୍ଚାର୍, “ଈଶ୍ୱର ବେଣ୍ ୱେନି ବାଦୁଲ୍ ମି ବେଣ୍ ୱେନାକା ଈଶ୍ୱର କାଣ୍କୁକାଙ୍ଗ୍ ଟିକ୍ କି ବୁଲ୍, ହେଦାଙ୍ଗ୍ ଏପେଙ୍ଗ୍ ବିଚାର୍ କିୟାଟ୍। 20ଇନେସ୍କି ଆପେଙ୍ଗ୍ ଇନା-ଇନାକା ହୁଡ଼୍ତାପ୍ନା ଆରେ ୱେଚାପ୍ନା, ହେ ୱିଜୁ ୱେଚ୍ୱାଦାଙ୍ଗ୍ ଆପେଙ୍ଗ୍ ମାଞ୍ଜେଙ୍ଗ୍ ଆଡୁପ୍।”
21ହେବେତାଙ୍ଗ୍ ହେ ମିଟିଙ୍ଗ୍ ଇଲ୍ନି ମାନାୟାର୍ ହେୱାରିଙ୍ଗ୍ ଦଣ୍ଡ୍ ହିଦେଙ୍ଗ୍ ଇମ୍ଣି ଉପାୟ୍ ପା ଗାଟା ଆୱିତିଲେ, ହେୱାରିଙ୍ଗ୍ ପାଣ୍ଡ୍ରୁକିଜି ପିସ୍ତାର୍, ଲାଗିଙ୍ଗ୍ ଇନାକା ଗଟାଆଜି ମାଚିସ୍, ହେଦାଙ୍ଗ୍ କାଜିଙ୍ଗ୍ ମାନାୟ୍ ୱିଜାକାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିଦେଙ୍ଗ୍ ଲାଗାତାର୍। 22ଇନେସ୍କି ଇମ୍ଣି ମାନାୟ୍ ଚାନିଆଆନି କାମାୟ୍ତାଙ୍ଗ୍ ହାର୍ ଆଜି ମାଚାନ୍, ହେୱାନ୍ ଚାଲିଶ୍ ବାର୍ହୁତାଙ୍ଗ୍ ଆଦିକ୍ ମାଚାନ୍।
ପାର୍ତିକିନି ମାନାୟାର୍ ପାର୍ତାନା କିତାର୍
23ପିତର ଆରେ ଯୋହନ ଯିହୁଦି ନେତାର୍ ମିଟିଙ୍ଗ୍ ଇଞ୍ଜାଙ୍ଗ୍ ହସି ତା ହାଙ୍ଗ୍ଦାକାର୍ତାକେ ହାଚାର୍। ଆରେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିର୍ ଆରେ ପ୍ରାଚିନ୍ ହେୱାରିଙ୍ଗ୍ ଇନା-ଇନାକା ୱେଚ୍ଚି ମାଚାର୍, ହେ ୱିଜୁ ତା ହାଙ୍ଗ୍ଦାକାରିଙ୍ଗ୍ ୱେଚ୍ଚାର୍। 24ହେୱାର୍ ହେ ବେଣ୍ ୱେନ୍ଞ୍ଜି ର ମାନ୍ତାଙ୍ଗ୍ ଈଶ୍ୱରତିଙ୍ଗ୍ ଗାଜାକାଟ୍ କିଜି ପାର୍ତାନା କିଜି ୱେଚ୍ଚାର୍, “ଏ ମାପୃ, ଏନେଙ୍ଗ୍ ବାଦାଡ଼୍, ପୁର୍ତି, ହାମ୍ଦୁର୍ ଆରେ ହେବେ ମାନି ୱିଜୁ ବିଷୟତିଙ୍ଗ୍ ରସ୍ତାଇନା। 25ମା ଆକଦାଦି ଦାଉଦ ରାଜା ମିଙ୍ଗେଙ୍ଗ୍ ହେବା କିତ୍ତାନ୍। ଏନେଙ୍ଗ୍ ହେୱାନିଙ୍ଗ୍ ପବିତ୍ର ଆତ୍ମାତାଙ୍ଗ୍ ୱେଚ୍ଚାଇନା,
‘ଇନା କିଦେଙ୍ଗ୍ ବିନ୍ଜାତିନି ମାନାୟାର୍ ରିସା ଆନାଦେରା,
ଆରେ ଇସ୍ରାଏଲ ଜାତିନି ମାନାୟାର୍ ବେକାରେ ଇନା କିଦେଙ୍ଗ୍ ଈଶ୍ୱର ବିରଦ୍ତାକେ ଜଜ୍ନା କିନାରା।
26ଈଶ୍ୱର ବିରଦ୍ତାକେ ଆରେ ତା ବାଚିକିତି ଖ୍ରୀଷ୍ଟ ବିରଦ୍ତାକେ,
ପୁର୍ତିନି ରାଜାର୍ ଯୁଜ୍ କିଦେଙ୍ଗ୍ ନିଲ୍ତାର୍,
ଆରେ ଜେକନି ସାସନ୍ କିନାକାର୍ ହେୱାର୍ ହୁଦାଙ୍ଗ୍ ମେହାଆଜି ରବେ ଆତାର୍।’
27ଈଶ୍ୱର ଏନେଙ୍ଗ୍ ବାଚିକିତି ପବିତ୍ର ଯୀଶୁ ଖ୍ରୀଷ୍ଟ ନିଙ୍ଗେଙ୍ଗ୍ ବେସି ହେବାକିଜି ମାନ୍ଞ୍ଚାନ୍। ମାତର୍ ଇ ଯିରୁଶାଲାମ ସହର୍ତାକେ ହେରୋଦ ରାଜା ଆରେ ପନ୍ତିୟ ପିଲାତ ରାଜା, ବିନ୍ଜାତିନି ଆରେ ଇସ୍ରାଏଲ ଜାତିନି ମାନାୟାର୍ ହୁଦାଙ୍ଗ୍ ମେହାଆଜି ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍। 28ନି ଶାକ୍ତିତାଙ୍ଗ୍ ଆଗେ ଇନା-ଇନାକା କିଦେଙ୍ଗ୍ ଇଚାକିଜି ମାଚାଇ, ହେଦାଙ୍ଗ୍ନେ ହେୱାର୍ କିତାର୍ନା। 29ଏ ମାପୃ ନଙ୍ଗୟ୍ ହେୱାର୍ ମାଙ୍ଗେଙ୍ଗ୍ ଅସ୍ତାନାପ୍ ଇଞ୍ଜି ପାଣ୍ଡ୍ରୁ କିଦ୍ନାରା ହେ ବିଷୟରେ ଏନେଙ୍ଗ୍ ଅଲପ୍ ବାବିକିଜି ହୁଡ଼ା। ଆରେ ନି ହେବାକିନି ଇ ମାନାୟାରିଙ୍ଗ୍ ନି ବିଷୟରେ ସାହାସ୍ ହୁଦାଙ୍ଗ୍ ୱେଚ୍ଚେଙ୍ଗ୍ ଶାକ୍ତି ହିୟା। 30ଆରେ ଏନେଙ୍ଗ୍ ବାଚିକିତି ପବିତ୍ର ଦାସ୍ ଯୀଶୁ ତର୍ଦାଙ୍ଗ୍ ମାନାୟାରିଙ୍ଗ୍ ହାର୍କିଦେଙ୍ଗ୍, ଚିନ୍ ଚଚ୍ଚେଙ୍ଗ୍ ଆରେ ଚାନିଆଆନି କାମାୟ୍ କିଦେଙ୍ଗ୍ ମାଙ୍ଗେଙ୍ଗ୍ ସାଇଜକିଦା।”
31ହେୱାର୍ ପାର୍ତାନା କିତି ପାଚେ, ଇମ୍ଣି ବାହାତାକେ ରବେଆଜି ମାଚାର୍, ହେ ବାହାତିଙ୍ଗ୍ ଈଶ୍ୱର ଲେପ୍ତାନ୍। ଆରେ ହେବେ ମାନି ୱିଜାକାର୍ ପବିତ୍ର ଆତ୍ମା ପୁରାଆଜି, ଆରେ ସାସ୍ତାଙ୍ଗ୍ ଈଶ୍ୱର କାତା ୱେଚ୍ଚେଙ୍ଗ୍ ଲାଗାତାର୍।
ପାର୍ତି କିନାକାର୍ ଦନ୍ସମ୍ଫତି ହାମାନ୍ ଆଦିକାର୍ ମାଚାତ୍
32ପାର୍ତିକିନି ମାନାୟାର୍ ର ମାନ୍ ଆରେ ର ଆତ୍ମା ଆଜି ମାଚାର୍। ହେୱାର୍ ବିତ୍ରେତାଙ୍ଗ୍ ଇନେର୍ ପା ଜାର୍ ଦନ୍ ସମ୍ପତିତିଙ୍ଗ୍ ନାଦାଙ୍ଗ୍ ଇଞ୍ଜି ଇନ୍ୱାଦାଙ୍ଗ୍ ମାଚାର୍। ମାତର୍ ହେୱାର୍ ୱିଜୁ ବିଷୟତିଙ୍ଗ୍ ହାମାନ୍ ଆଦିକାର୍ ମାଚାତ୍। 33ବାଚିକିତି ଚେଲାହିର୍ ଈଶ୍ୱର ଶାକ୍ତିତାଙ୍ଗ୍ ଯୀଶୁ ହାଃଜି ଆରେରଗ ଜିବୁନ୍ଆତି ବିଷୟରେ ସାସ୍ତାଙ୍ଗ୍ ଶୁଣାୟ୍ କିଦେଙ୍ଗ୍ ଲାଗାତାର୍। ଆରେ ହେୱାରିଙ୍ଗ୍ ଈଶ୍ୱର ଦୟାକିଜି ମାଚାନ୍। 34ଏଚେଜାଣ୍ତିଙ୍ଗ୍ ଜମି କି ଇଲ୍ ମାଚାତ୍, ହେୱାର୍ ହେଦାଙ୍ଗ୍ ପସି ହେ ଡାବୁଙ୍ଗ୍ ତାସି ବାଚିକିତି ଚେଲାହିର୍ କାଲ୍ପାନା ତାରେନ୍ ଇଡ଼୍ଜି ମାଚାର୍। ହେଦାଙ୍ଗ୍ କାଜିଙ୍ଗ୍ ହେୱାର୍ ବିତ୍ରେତାଙ୍ଗ୍ ଇନେରିଙ୍ଗ୍ ପା ଅବାବ୍ ଆୱାତାତ୍। 35ଇନେସ୍କି ଇମ୍ଣାକାରିଙ୍ଗ୍ ଏଚେକ୍ ଦର୍କାର୍ଆନି ଏଚେକ୍ ହେ ବାଚିକିତି ଚେଲାହିର୍ ହିଜି ମାଚାର୍। 36ଲେବି ଲାତ୍ରାନି ଯୋଷେପ ତର୍ଦାକାନ୍ ରକାନ୍ ମାନାୟ୍ ମାଚାନ୍। ହେୱାନ୍ କୁପ୍ର ଦ୍ୱିପ୍ ନିକାନ୍ ମାଚାନ୍, ବାଚିକିତି ଚେଲାହିର୍ ହେୱାନିଙ୍ଗ୍ ବର୍ଣ୍ଣବା ଇଞ୍ଜି ତର୍ ହିତାର୍। ଇ ତର୍ନି ଅର୍ତ, ସାଇଜ କିନାକାନ୍। 37ହେୱାନ୍ତାକେ ଅଲପ୍ ଜମି ମାଚାତ୍, ହେୱାନ୍ ହେଦାଙ୍ଗ୍ ପସି ହେ ଡାବୁଙ୍ଗ୍ ତାସି ବାଚିକିତି ଚେଲାହିର୍ କାଲ୍ପାନା ତାରେନ୍ ଇଡ଼୍ତାନ୍।
Currently Selected:
ବାଚିକିତି ଚେଲାହିର୍ କାତା 4: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
