ବାଚିକିତି ଚେଲାହିର୍ କାତା 5
5
ହନନିୟ ଆରେ ତା ଡକ୍ରୁହି ଶପିରା
1ହନନିୟ ତର୍ଦାକାନ୍ ର ମାନାୟ୍ ମାଚାନ୍, ତା ଡକ୍ରୁହି ତର୍ ଶପିରା ମାଚାତ୍। ହେୱାନ୍ ପା ତା ଜମିତାଙ୍ଗ୍ ର ବାଗ୍ ପତାନ୍। 2ଆରେ ତା ଡକ୍ରୁହିଙ୍ଗ୍ ୱେଚ୍ଚି ଜମି ପତି ଡାବୁଙ୍ଗ୍ ଅଲପ୍ ହେୱାର୍ କାଜିଙ୍ଗ୍ ଇଡ଼୍ତାନ୍, ଆରେ ବାକି ଡାବୁଙ୍ଗ୍ ତାହିୱାଜି ବାଚିକିତି ଚେଲାହିର୍ କାଲ୍ପାନା ତାରେନ୍ ଇଡ଼୍ତାନ୍।
3ଇଦାଙ୍ଗ୍ ହୁଡ଼୍ଜି ପିତର ୱେଚ୍ଚାନ୍, “ଏ ହନନିୟ, ଏନେଙ୍ଗ୍ ଇନା କିଦେଙ୍ଗ୍ ଶୟତାନ୍ ସାଇଜତାଙ୍ଗ୍ ଇନା କିଦେଙ୍ଗ୍ ପବିତ୍ର ଆତ୍ମାତିଙ୍ଗ୍ ମିଚ୍ କାତା ୱେଚ୍ଚାଇ। ଏନେଙ୍ଗ୍ ଇନାକା ଜମି ପତି ଡାବୁଙ୍ଗ୍ତାଙ୍ଗ୍ ର ବାଗ୍ ଡ଼ୁକ୍ଚି ଇଟ୍ୱାତାଇ କି? 4ହେ ଜମି ପୱିଆଗେ ନିଦାଙ୍ଗ୍ ହିଲ୍ୱାତାତ୍ କି? ପତି ପାଚେ ହେ ଜମିନି ଡାବୁଙ୍ଗ୍ ନି ଆଦିକାର୍ ହିଲାତାତ୍ କି? ଲାଗିଙ୍ଗ୍ ଏନେଙ୍ଗ୍ ମାନ୍ ବିତ୍ରେ ମିଚ୍ କାତା ୱେଚ୍ଚେଙ୍ଗ୍ ଇନେସ୍ ବାବିକିତାଇ? ଏନେଙ୍ଗ୍ ମାନାୟାର୍ ଆଗେ ମିଚ୍ ୱେଚ୍ୱାତାଇ। ମାତର୍ ଏନେଙ୍ଗ୍ ଈଶ୍ୱରତିଙ୍ଗ୍ ମିଚ୍ ୱେଚ୍ଚାଇ।”
5ଇ ୱିଜୁବେଣ୍ ୱେଚିଦାପ୍ରେ ହନନିୟ ଆଲ୍ଟା ଆଜି ଗୁର୍ଜି ହାଃତାନ୍। ହେବେ ମାଚି ମାନାୟାର୍ ଇବେଣ୍ ୱେନ୍ଞ୍ଜି ବେସି ପାଣ୍ଡ୍ରା ଆତାର୍। 6ତାପାଚେ ବେଣ୍ଡିଆ ହିମ୍ଣାଙ୍ଗ୍ ୱାଜି ହେୱାନିଙ୍ଗ୍ କାଦିଆତାଙ୍ଗ୍ ହୁର୍ପାତାର୍, ଆରେ ବାର୍ତ ଅଜି ମୁଚ୍ଚାର୍।
7ପାକାପାକି ତିନ୍ ଗଣ୍ଟା ପାଚେ ତା ଡକ୍ରୁହି ଶପିରା ହେବେ ୱାତାତ୍। ମାତର୍ ଇ ଗଟ୍ନା ବିଷୟରେ ଅଲପ୍ପା ପୁନୁୱାଦାଙ୍ଗ୍ ମାଚାତ୍। 8ପିତର ହେଦେଲିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ମି ଜମିତିଙ୍ଗ୍ ଏଚେକ୍ ଡାବୁକାଙ୍ଗ୍ ପସି ମାଚାଦେର୍ କି?”
ହେଦେଲ୍ ୱେଚ୍ଚାତ୍, “ଆଁ ଏଚେକ୍ନେ ପତାପ୍।”
9ତାପାଚେ ପିତର ହେଦେଲିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ର ମାନ୍ଆଜି ପବିତ୍ର ଆତ୍ମାତିଙ୍ଗ୍ ଇନାକାଦେଙ୍ଗ୍ ପରିକ୍ଷା କିତାଦେର୍? ହୁଡ଼ା, ଇମ୍ଣାକାର୍ ନି ଡକ୍ରାଦିଙ୍ଗ୍ ଦୁଗେର୍ତାକେ ମୁଚ୍କାତାର୍, ହେୱାର୍ ଦୁୱେର୍ ଲାଗାୟ୍ ଏକିୱାତାରେ, ଆରେ ହେୱାର୍ ନିଙ୍ଗେଙ୍ଗ୍ ପା ମୁଚ୍ଚେଙ୍ଗ୍ ପିଣ୍ଜି ଅଦ୍ନାର୍।”
10ହେଦାପ୍ରେ ହେଦେଲ୍ ପା ପିତର କାଲ୍ ତାରେନ୍ ଆଲ୍ଟା ଆଜି ଗୁର୍ଜି ହାଃତାତ୍। ଆରେ ବେଣ୍ଡିଆ ହିମ୍ଣାଙ୍ଗ୍ ଇଲ୍ ବିତ୍ରେ ୱାଜି ହେଦେଲିଙ୍ଗ୍ ହାଃତାକା ହୁଡ଼୍ଜି ବାର୍ତ ପିଣ୍ଜି ଅତାର୍। ଆରେ ତା ଡକ୍ରାହି ଲାଗାୟ୍ ହେଦେଲିଙ୍ଗ୍ ମୁଚ୍ଚାର୍। 11ଯିରୁଶାଲାମ ସହର୍ତାକେ ମାନି ୱିଜୁ ମଣ୍ଡ୍ଲିନି ପାର୍ତି କିନାକାର୍ ବେସି ପାଣ୍ଡ୍ରା ଆତାର୍। ଆରେ ଏଚେଜାଣ୍ ଇ କାତା ୱେଚ୍ପା ଆନାକା ୱେଚାର୍ ହେୱାର୍ ପା ବେସି ପାଣ୍ଡ୍ରା ଆତାର୍।
ବାଚିକିତି ଚେଲାହିର୍ ଚିନା ଆରେ ଚାନିଆଆନି କାମାୟ୍ କିତି କାତା
12ବାଚିକିତି ଚେଲାହିର୍ ମାନାୟାର୍ ବିତ୍ରେ ବେସି ଚିନା ଆରେ ଚାନିଆଆନି କାମାୟ୍ କିତାର୍। ଆରେ ୱିଜୁ ଯୀଶୁଙ୍ଗ୍ ପାର୍ତିକିନି ୱିଜାକାର୍ ର ମାନ୍ଆଜି ଈଶ୍ୱର ମାନି ମନ୍ଦିର୍ ପିଣ୍ଡାନି ଶଲମନ ମଣ୍ଡପ୍ତାକେ ରୁଣ୍ଡାଆଜି ମାଚାର୍। 13ଇମ୍ଣାକାର୍ ଯୀଶୁଙ୍ଗ୍ ପାର୍ତି କିୱାଦାଙ୍ଗ୍ ମାଚାର୍, ହେୱାର୍ ହୁଦାଙ୍ଗ୍ ମେହାଆଦେଙ୍ଗ୍ ଶାସ୍ କିୱାଦାଙ୍ଗ୍ ମାଚାର୍। ମାତର୍ ମାନାୟାର୍ ବାଚିକିତି ଚେଲାହିରିଙ୍ଗ୍ ସନ୍ମାନ୍ କିଜି ମାଚାର୍। 14ଆରେ ଆଦିକ୍ତାଙ୍ଗ୍ ଆଦିକ୍ ଆଣ୍ଡ୍ରା ହିମ୍ଣାଙ୍ଗ୍ ଆରେ କଗ୍ଲେକ୍ ପାର୍ତି କିଜି ମାପୃ ହୁଦାଙ୍ଗ୍ ମେହାଆଦେଙ୍ଗ୍ ଲାଗାତାର୍। 15ବାଚିକିତି ଚେଲାର୍ ଚାନିଆଆନି କାମାୟ୍ କିଜି ମାଚାର୍। ହେଦାଙ୍ଗ୍ କାଜିଙ୍ଗ୍ ପିତର ୱାନିହିଙ୍ଗ୍ ତା ଡ଼ିଗାଆଜି ହାର୍ ଆଏର୍ ଇଞ୍ଜି ମାନାୟାର୍ ରଗିୟାରିଙ୍ଗ୍ ପିଣ୍ଜି ଅଜି ରାସ୍ତା କାଟାତାକେ ଟାଟି ଆରେ କାଟେଲ୍ତାକେ ହୁଚ୍ପିସ୍ ମାଚାର୍। 16ବାଚିକିତି ଚେଲାହିର୍ତାକେ ଯିରୁଶାଲାମ ସହର୍ନି ଚାରିବେଣ୍ତି ସହର୍ନି ମାନାୟାର୍ ପା ରଗିୟାରିଙ୍ଗ୍ ଆରେ ବୁତ୍ଆତ୍ମା ଡୁୟାଆତାକାରିଙ୍ଗ୍ ତାସି ରବେଆଜି ମାଚାର୍। ଆରେ ହେୱାର୍ ୱିଜାକାର୍ ହାର୍ଆତାର୍।
ଯିହୁଦି ନେତାର୍ ବାଚିକିତି ଚେଲାହିରିଙ୍ଗ୍ ଇନସ୍ତା କିତାର୍
17ପାଚେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଆରେ ତା ହାଙ୍ଗ୍ଦି ସାଦୁକିଦଳ୍ ଆକାର୍ ଆତାର୍। 18ଆରେ ବାଚିକିତି ଚେଲାରିଙ୍ଗ୍ ଆସ୍ତି ଜଇଲ୍ ଇଞ୍ଜ ଇଡ଼୍ତାର୍। 19ମାତର୍ ମାପୃତି ର ଦୁତ୍ ମିକା ୱାଜି ଜଇଲ୍ ଇଲ୍ନି ଦୁୱେର୍ ୱିଜୁ ଜେତାନ୍ ଆରେ ହେୱାରିଙ୍ଗ୍ ବାର୍ତ ହପ୍ଚି ୱେଚ୍ଚାନ୍, 20“ହାଲାଟ୍, ଈଶ୍ୱର ମାନି ମନ୍ଦିର୍ତାକେ ନିଲ୍ତି ମାନାୟାରିଙ୍ଗ୍ ଇ ୱିଜ୍ୱି ଜିବୁନ୍ ବିଷୟରେ ୱିଜୁବେଣ୍ ୱେଚାଟ୍।”
21ଦୁତ୍ ୱେଚ୍ଚି ହିସାବ୍ରେ ହେୱାର୍ ନାଣାଙ୍ଗେ ଈଶ୍ୱର ମାନି ମନ୍ଦିର୍ତାକେ ହଣ୍ଜି ହିକ୍ଷାହିଦେଙ୍ଗ୍ ଲାଗାତାର୍। ଲାଗିଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଆରେ ତା ହାଙ୍ଗ୍ଦାକାର୍ ଇସ୍ରାଏଲ ଜାତିନି ପ୍ରାଚିନାରିଙ୍ଗ୍ କୁକ୍ଚି ର ଗାଜା ବିଚାର୍ କିତାର୍। ବାଚିକିତି ଚେଲାରିଙ୍ଗ୍ ଜଇଲ୍ ଇଞ୍ଜାଙ୍ଗ୍ ତାହିୱାଦେଙ୍ଗ୍ ମନ୍ଦିର୍ ଜାଗୁୱାଡ଼ିରିଙ୍ଗ୍ ପକ୍ତାର୍। 22ମାତର୍ ଜାଗୁୱାଡ଼ିର୍ ହାଲ୍ଜି ଜଇଲ୍ ଇଞ୍ଜ ହେୱାରିଙ୍ଗ୍ ଗାଟାଆୱାଦାଙ୍ଗ୍ ଲେଉଟା ଆଜି ୱାତାର୍ ଆରେ ପକ୍ତାକାରିଙ୍ଗ୍ ୱେଚ୍ଚାର୍, 23“ଜଇଲ୍ ଇଲ୍ ବନ୍ଦ୍ ଆତାତ୍ନା, ଆରେ ଦୁୱେର୍ତାକେ ଜାଗୁୱାଡ଼ିର୍ ନିଲ୍ତାକା ଆପେଙ୍ଗ୍ ହୁଡ଼୍ତାପ୍। ମାତର୍ ଆପେଙ୍ଗ୍ ଦୁୱେର୍ ଜେତି ପାଚେ ଆପେଙ୍ଗ୍ ଇନେରିଙ୍ଗ୍ ପା ଗାଟା ଆୱାତାପ୍।”
24ଇ ୱିଜୁବେଣ୍ ୱେନ୍ଞ୍ଜି ଈଶ୍ୱର ମାନି ମନ୍ଦିର୍ନି ଜାଗୁୱାଡ଼ିର୍, ମୁଡ଼୍ଦାକାନ୍ ଆରେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିର୍ ଇବେଣ୍ ୱେନ୍ଞ୍ଜି ଇନାକା କିନାସ୍ ଇନାକା ଆକାୟ୍ ଇଞ୍ଜି କାବା ଆତାର୍। ଇନେସ୍କି ଇ ଗଟ୍ନାନି ପାଡ଼୍ ଇନାକା ଆନାତ୍ ଇଞ୍ଜି ବାବିକିଜି ମାଚାର୍।
25ହେପାଦ୍ନା ରକାନ୍ ୱାଜି ହେୱାରିଙ୍ଗ୍ କାବୁର୍ ୱେଚ୍ଚାନ୍, “ହୁଡ଼ାଟ୍, ଏପେଙ୍ଗ୍ ଇମ୍ଣି ମାନାୟାରିଙ୍ଗ୍ ଜଇଲ୍ ଇଞ୍ଜ ଇଡ଼୍ଜି ମାଚାଦେର୍, ହେୱାର୍ ମନ୍ଦିର୍ତାକେ ନିଲ୍ଚି ମନାୟାରିଙ୍ଗ୍ ହିକ୍ଷା ହିନାରା।”
26ହେପାଦ୍ନା ଜାଗୁୱାଡ଼ିର୍ନି ମୁଡ଼୍ଦାକାନ୍ ତା ଜାଗୁୱାଡ଼ିର୍ ହୁଦାଙ୍ଗ୍ ମନ୍ଦିର୍ତାକେ ହାଚାର୍। ମାତର୍ ମାନାୟାର୍ ହେୱାରିଙ୍ଗ୍ କାଲ୍କୁ ହୁଦାଙ୍ଗ୍ ଇଡ଼୍ନାର୍ ଇଞ୍ଜି ପାଣ୍ଡ୍ରାଆଜି ଚେଲାହିରିଙ୍ଗ୍ ଦିରେ କିଜି ହେ ବିଚାର୍କିନି ବାହାତାକେ କୁକ୍ଚି ଅତାର୍।
27ଜାଗୁୱାଡ଼ିର୍ ବାଚିକିତି ଚେଲାହିରିଙ୍ଗ୍ ତାହିୱାଜି ଗାଜା ବିଚାର୍କିନି ବାହାନି ମାଦି ନିଲି କିତାର୍। ହେବେତାଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ହେୱାରିଙ୍ଗ୍ ୱେନ୍ବାତାନ୍, 28“ଆପେଙ୍ଗ୍ ମିଙ୍ଗେଙ୍ଗ୍ ଯୀଶୁ ତର୍ଦାଙ୍ଗ୍ ହିକ୍ଷାହିଦେଙ୍ଗ୍ ମୁନା କିତ୍ତାପ୍ନା। ମାତର୍ ଏପେଙ୍ଗ୍ ତା ବିଷୟରେ ଯିରୁଶାଲାମ ସହର୍ନି ବେସି ମାନାୟାରିଙ୍ଗ୍ ହିକ୍ଷା ହିତାଦେର୍ନା। ଇ ମାନାୟ୍ତିଙ୍ଗ୍ ନେତେର୍ ହପ୍ଚି ଟ୍ରାକ୍ତି ଦସ୍ ମା ଜପି ଲେଦି କିଦ୍ଦେଙ୍ଗ୍ ଇଚା କିନାଦେରା।”
29ମାତର୍ ପିତର ଆରେ ଜେକନି ବାଚିକିତି ଚେଲାହିର୍ ୱେଚ୍ଚାର୍, “ମାନାୟ୍ ବେଣ୍ ୱେନି ବାଦୁଲ୍ ଈଶ୍ୱର କାତା ମାନିକିନି ଦର୍କାର୍। 30ଇମ୍ଣି ଯୀଶୁଙ୍ଗ୍ ଏପେଙ୍ଗ୍ କୃଶକାଟ୍ତାକେ ଦୁପ୍ଚି ଅସ୍ତି ମାଚାଦେର୍, ହେୱାନିଙ୍ଗ୍ ମା ଆକଦାଦିର୍ନି ଈଶ୍ୱର ନିକ୍ତାନ୍ନା। 31ଈଶ୍ୱର ହେୱାନିଙ୍ଗ୍ ସରଗ୍ଜପି ଅଜି ଆଦିକାର୍ ହିତାନ୍ନା, ଆରେ ହେୱାନ୍ ଯୀଶୁଙ୍ଗ୍ ଉଦାର୍ କିଦ୍ନାକାନ୍ ଲେକେ ରସ୍ତାନ୍ନା। ଇନେସ୍କି ହେୱାନ୍ ଇସ୍ରାଏଲ ଜାତିନି ମାନାୟାରିଙ୍ଗ୍ ତା ପାପ୍ କାମାୟ୍ ପିସ୍ତି ଈଶ୍ୱରତାକେ ୱାଦେଙ୍ଗ୍ ସାଇଜ କିନାନ୍। ଆରେ ହେୱାର୍ ପାପ୍ତିଙ୍ଗ୍ କେମା କିନାନ୍। 32ଆରେ ଆପେଙ୍ଗ୍ ଇୱିଜୁ ବିଷୟନି ସାକି ମାନାପ୍। ଈଶ୍ୱର ତା ଆଦେସ୍ ମାନି କିନାକାରିଙ୍ଗ୍ ତା ପବିତ୍ର ଆତ୍ମା ହିତାନ୍ନା, ହେୱାନ୍ ପା ହେବେନି ସାକି ମାନାନ୍।”
33ଇବେଣ୍ ୱେନ୍ଞ୍ଜି ବିଚାର୍କିନି ମିଟିଙ୍ଗ୍ ନିକାର୍ ବେସି ରିସାଆତାର୍। ଆରେ ହେୱାରିଙ୍ଗ୍ ଅହ୍ନି କାଜିଙ୍ଗ୍ ଉପାୟ୍ କିତାର୍। 34ମାତର୍ ଗମଲିୟେଲ ତର୍ଦାକାନ୍ ରକାନ୍ ପାରୁସି, ହେ ବିଚାର୍କିନି ବାହାତାକେ ନିଲ୍ଚି ବାଚିକିତି ଚେଲାହିରିଙ୍ଗ୍ ବାର୍ତ ହାଞ୍ଜେଙ୍ଗ୍ ଆଦେସ୍ ହିତାନ୍। ହେୱାନ୍ ରକାନ୍ ପଣ୍ଡିତ୍ ମାଚାନ୍, ଯିହୁଦିର୍ ୱିଜାକାର୍ ହେୱାନିଙ୍ଗ୍ ସନ୍ମାନ୍ କିଜି ମାଚାର୍। 35ଆରେ ହେୱାନ୍ ବିଚାର୍କିନି ମିଟିଙ୍ଗ୍ ନିକାରିଙ୍ଗ୍ ୱେଚ୍ଚାନ୍, “ଏ ଇସ୍ରାଏଲ ଜାତିନି ମାନାୟ୍ କାଦେର୍, ଏପେଙ୍ଗ୍ ଇୱାରିଙ୍ଗ୍ ଇନାକା କିଦେଙ୍ଗ୍ ମାନ୍ କିନାଦେରା, ହେଦାଙ୍ଗ୍ତିଙ୍ଗ୍ ମାନ୍ଦିୟାନ୍ କିଜି ବାବିକିଜି ହୁଡ଼ାଟ୍। 36ଇନେସ୍କି ଇଦାଙ୍ଗ୍ ଆଗେ ତିଉଦା ତର୍ଦାକାନ୍ ରକାନ୍ ମାନାୟ୍ ନିଙ୍ଗ୍ଞ୍ଜି ଜାର୍ତିଙ୍ଗ୍ ବେସି ଗାଜାକାଙ୍ଗ୍ ଇଞ୍ଜି ବାବିକିଜି ମାଚାନ୍। ଆରେ ଚାର୍ଶଜାଣ୍ ମାନାୟ୍ ତା ହୁଦାଙ୍ଗ୍ ମେହାଆତାର୍, ଆରେ ହେୱାନ୍ ହାଃତାନ୍, ଆରେ ଏଚେଜାଣ୍ ତାପାଚେ ମାଚାର୍, ହେୱାର୍ ୱିଜାକାର୍ ଚିନ୍ବିନ୍ ଆତାର୍। ଆରେ ତା କାମାୟ୍ ପା ପୁରା ଆୱାତାତ୍। 37ହେ ମାନାୟ୍ ପାଚେ ଗାଲିଲୀ ଜିଲ୍ଲାତାକେ ମାନି ଯିହୁଦା ତର୍ଦାକାନ୍ ରକାନ୍ ସର୍ବେ କିନିହିଙ୍ଗ୍, ହେୱାନ୍ କେତ୍ଜାଣ୍ ମାନାୟାରିଙ୍ଗ୍ ଅଜି ରମିୟ ସର୍କାର୍ତିଙ୍ଗ୍ ବିରଦ୍ କିତାର୍। ହେୱାନ୍ ପା ନଷ୍ଟ ଆତାନ୍। ଆରେ ଏଚେଜାଣ୍ ତାପାଚେ ମାଚାର୍, ହେୱାର୍ ୱିଜାକାର୍ ଚିନ୍ବିନ୍ ଆତାର୍।”
38ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନଙ୍ଗୟ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, “ଏପେଙ୍ଗ୍ ଇ ମାନାୟାରିଙ୍ଗ୍ ଇନାକା କିୱାଦାଙ୍ଗ୍ ପିସ୍ତି ହିୟାଟ୍, ଇୱାର୍ କାମାୟ୍ ଯଦି ମାନାୟ୍ତାଙ୍ଗ୍ ଆଜି ମାନ୍ଗାନାତ୍, ଲାଗିଙ୍ଗ୍ ହେୱାର୍ ପା ନଷ୍ଟ ଆନାର୍। 39ମାତର୍ ଯଦି ଇଦାଙ୍ଗ୍ ଈଶ୍ୱରତାଙ୍ଗ୍ ଆଜି ମାନାତ୍, ଲାଗିଙ୍ଗ୍ ଏପେଙ୍ଗ୍ ହେୱାରିଙ୍ଗ୍ ନଷ୍ଟ କିଦେଙ୍ଗ୍ ଆଡୁଦେର୍। ଆରେ ଏପେଙ୍ଗ୍ ଈଶ୍ୱର ବିରୁଦ୍ତାକେ ଜୁଜ୍ କିନିଲେକେ ଆନାତ୍।”
40ବିଚାର୍କିନି ମିଟିଙ୍ଗ୍ନି ମାନାୟାର୍ ତା ବେଣ୍ତାଙ୍ଗ୍ ରାଜି ଆତାର୍। ଆରେ ବାଚିକିତି ଚେଲାହିରିଙ୍ଗ୍ ଲାଗେ କୁକ୍ଚି ହେୱାରିଙ୍ଗ୍ କର୍ଡା ହୁଦାଙ୍ଗ୍ ଟ୍ରାକ୍ତାର୍ ଆରେ ଯୀଶୁ ତର୍ଦାଙ୍ଗ୍ ଶୁଣାୟ୍ କିୱେଦେଙ୍ଗ୍ ଆଦେସ୍ ହିଜି ପିସ୍ତି ହିତାର୍।
41ବାଚିକିତି ଚେଲାହିର୍ ହେ ବିଚାର୍କିନି ମିଟିଙ୍ଗ୍ ଇଞ୍ଜାଙ୍ଗ୍ ୱାରିଆଜି ହାଚାର୍। ଇନେସ୍କି ଯୀଶୁ ତର୍ କାଜିଙ୍ଗ୍ ଦୁକ୍କଷ୍ଟ ପାୟାଆନି ଜଗ୍ଯ ଇଞ୍ଜି ହେୱାର୍ ପୁନ୍ଞ୍ଜି ମାଚାର୍। 42ଆରେ ହେୱାର୍ ୱିଜୁଦିନ୍ ଈଶ୍ୱର ମାନି ମନ୍ଦିର୍ତାକେ ଆରେ ଇଞ୍ଜ-ଇଞ୍ଜ ହିକ୍ଷାହିଜି ମାଚାର୍। ଆରେ ଯୀଶୁ ନେ ଖ୍ରୀଷ୍ଟ ଇ ହାର୍ଦିକାବୁର୍ ହେୱାର୍ ୱେଚ୍ଚି ଲାଗାତାର୍।
Currently Selected:
ବାଚିକିତି ଚେଲାହିର୍ କାତା 5: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
