ବାଚିକିତି ଚେଲାହିର୍ କାତା 3
3
ପିତର ରକାନ୍ ଚଟା ମାନାୟ୍ତିଙ୍ଗ୍ ହାର୍କିତାନ୍
1ଦିନେକ୍ ପାର୍ତାନା କିନି ସମୟ୍ତ ମିକାହାରେସ୍ ତିନ୍ଟା ୱେଡ଼ାଙ୍ଗ୍ ପିତର ଆରେ ଯୋହନ ଈଶ୍ୱର ମାନି ମନ୍ଦିର୍ତାକେ ହାଲ୍ଜି ମାଚାର୍। 2ଜନମ୍ତାଙ୍ଗ୍ ଚଟା ମାନାୟ୍ତିଙ୍ଗ୍ ମାନାୟାର୍ ପିଣ୍ଜି ଅଜିମାଚାର୍, ଆରେ ହେୱାନିଙ୍ଗ୍ ହଲ୍ନି ତର୍ଦି ଦୁୱେର୍ତାକେ ଇଡ଼୍ଜି ମାଚାର୍। ହେୱାନ୍ ମାନ୍ଞ୍ଜି ଈଶ୍ୱର ମାନି ମନ୍ଦିର୍ ବିତ୍ରେ ହାନି ମାନାୟାର୍ତାଙ୍ଗ୍ ବିକ୍ୟା ଏନ୍ଚିମାଚାନ୍। 3ପିତର ଆରେ ଯୋହନତିଙ୍ଗ୍ ଈଶ୍ୱର ମାନି ମନ୍ଦିର୍ ବିତ୍ରେ ହାନାକା ହୁଡ଼୍ଜି, ହେ ଚଟା ମାନାୟ୍ ବିକ୍ୟା ଏନ୍ତେଙ୍ଗ୍ ଲାଗାତାନ୍।
4ପିତର ଆରେ ଯୋହନ ହେ ଚଟା ମାନାୟ୍ତିଙ୍ଗ୍ ହାରାହାଣ୍କୁ କିଜି ହୁଡ଼୍ତାର୍। ପିତର ୱେଚ୍ଚାନ୍, “ମାଙ୍ଗେଙ୍ଗ୍ ହୁଡ଼୍ଦା।”
5ହେ ଚଟା ମାନାୟ୍ ହେୱାର୍ତାଙ୍ଗ୍ ଇନାକା ପାୟାଆନି ଆହାତାଙ୍ଗ୍ ହେୱାର୍ ନିପଣ୍ ହୁଡ଼୍ଦେଙ୍ଗ୍ ଲାଗାତାନ୍।
6ମାତର୍ ପିତର ୱେଚ୍ଚାନ୍, “ରୁପା କି ହନା ନାଙ୍ଗେଙ୍ଗ୍ ହିଲୁତ୍, ମାତର୍ ନାଙ୍ଗେଙ୍ଗ୍ ଇନାକା ମାନାତ୍, ହେଦାଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ହିଦ୍ନାଙ୍ଗ୍। ନାଜରିତିୟ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ନିଙ୍ଗ୍ଞ୍ଜି ତାଙ୍ଗା।”
7ତାପାଚେ ପିତର ହେ ଚଟା ମାନାୟ୍ ତିନାକେଇ ଆସ୍ତି ନିକ୍ତାନ୍। ହେଦାପ୍ରେ ହେ ଚଟା ମାନାୟ୍ ତା ପାନାଙ୍ଗ୍ ଆରେ କାଲ୍କୁନି ଗାଟିଙ୍ଗ୍ ସାକ୍ତି ଆତାତ୍। 8ଆରେ ହେୱାନ୍ ଗୁମ୍ଜି ନିଲ୍ତାନ୍, ଆରେ ତାଙ୍ଗ୍ଦେଙ୍ଗ୍ ଲାଗାତାନ୍। ଆରେ ହେୱାନ୍ ତାଙ୍ଗୁ-ତାଙ୍ଗୁ ଆରେ ଗୁମୁ-ଗୁମୁ, ଆରେ ଈଶ୍ୱରତିଙ୍ଗ୍ ଜୟ୍-ଜୟ୍ କିଉ-କିଉ ହେୱାର୍ ହୁଦାଙ୍ଗ୍ ଈଶ୍ୱର ମାନି ମନ୍ଦିର୍ନି ପିଣ୍ଡାତାକେ ହାଚାନ୍।
9ହେବେ ମାଚି ମାନାୟ୍ ୱିଜାକାର୍ ହେୱାନିଙ୍ଗ୍ ତାଙ୍ଗ୍ନାକା ଆରେ ଈଶ୍ୱରତିଙ୍ଗ୍ ଜୟ୍-ଜୟ୍ କିନାକା ହୁଡ଼୍ତାର୍। 10ଆରେ ହେୱାର୍ ହେୱାନିଙ୍ଗ୍ ଈଶ୍ୱର ମାନି ମନ୍ଦିର୍ନି ସୁନ୍ଦର ଦୁୱେର୍ ଲାଗାୟ୍ କୁଚ୍ଚି ବିକ୍ୟା ଏନ୍ନି ମାନାୟ୍ ଇଞ୍ଜି ଚିନ୍ କିତାର୍। ହେୱାର୍ ହେୱାନିଙ୍ଗ୍ ଇନାକା ଗଟାଆଜି ମାଚାତ୍, ହେଦାଙ୍ଗ୍ ହୁଡ଼୍ଜି ହେୱାର୍ ଆଦିକ୍ ଚାନିଆ ଆଜି କାବା ଆତାର୍।
ପିତର ଶଲମନ ରାଜା ମଣ୍ଡପ୍ ଲାଗାୟ୍ ଶୁଣାୟ୍ କିତାନ୍
11ହେ ଚଟା ମାନାୟ୍ ପିତର ଆରେ ଯୋହନ୍ତିଙ୍ଗ୍ ଆସ୍ତି ମାଚାନ୍। ହେପାଦ୍ନା ମାନାୟାର୍ ଆଦିକ୍ ଚାନିଆ ଆଜି, ଶଲମନ ରାଜା ମଣ୍ଡପ୍ତାକେ ହେୱାର୍ ଲାଗାୟ୍ ୱିଜାକାର୍ ରଞ୍ଜେମାଡ୍ ହନ୍ଚି ୱାତାର୍।
12ପିତର ମାନାୟାର୍ ୱାନାକା ହୁଡ଼୍ଜି ହେୱାରିଙ୍ଗ୍ ୱେଚ୍ଚାନ୍, “ଏ ଇସ୍ରାଏଲ ଜାତିନି ମାନାୟ୍ କାଦେର୍, ଏପେଙ୍ଗ୍ ଇ ମାନାୟ୍ ବିଷୟରେ ଇନା କିଦେଙ୍ଗ୍ ଚାନିଆ ଆନାଦେରା? କି ମା ଶାକ୍ତିତାଙ୍ଗ୍ କି ମା ଦରମ୍ତାଙ୍ଗ୍ ଇୱାନିଙ୍ଗ୍ ତାଙ୍ଗ୍ନି ଶାକ୍ତି ହିତାନ୍ ଇଞ୍ଜି ବାବିକିଜି ଇନା କିଦେଙ୍ଗ୍ ମାଙ୍ଗେଙ୍ଗ୍ ହାରାହାଣ୍କୁ କିଜି ହୁଡ଼୍ଦାନାଦେରା? 13ମା ଆକଦାଦି ଅବ୍ରାହାମ, ଇସାକ ଆରେ ଯାକୁବନି ଈଶ୍ୱର, ତା ଦାସ୍ ଯୀଶୁଙ୍ଗ୍ ବେସି ସନ୍ମାନ୍ କିତାନ୍ନା। ହେ ଯୀଶୁଙ୍ଗ୍ ଏପେଙ୍ଗ୍ ହାଃନି କାଜିଙ୍ଗ୍ ଶତ୍ରୁ କେଇଦ ଆହିକିତାଦେର୍। ହେପାଦ୍ନା ପିଲାତ ରାଜା ହେୱାନିଙ୍ଗ୍ ମୁକ୍ତି କିଦେଙ୍ଗ୍ ଇଚାକିଜି ମାଚାନ୍। ମାତର୍ ଏପେଙ୍ଗ୍ ପିଲାତ ରାଜା ମୁମ୍ଦ ହେୱାନିଙ୍ଗ୍ ମୁନା କିତାଦେର୍। 14ଏପେଙ୍ଗ୍ ପବିତ୍ର ଆରେ ଦରମ୍ ମାନାୟ୍ ଯୀଶୁଙ୍ଗ୍ ପୁନୁପ୍ ଇଞ୍ଜି ମୁନା କିତାଦେର୍। ଆରେ ଏପେଙ୍ଗ୍ ରକାନ୍ ମାନାୟ୍ ମାରୁଙ୍ଗ୍ ମୁକ୍ତିକିନି କାଜିଙ୍ଗ୍ ପିଲାତ ରାଜାତାକେ ଗୁୱାରି କିତାଦେର୍। 15ମାତର୍ ଜିବୁନ୍ ହିଦ୍ନି ମାନାୟ୍ତିଙ୍ଗ୍ ଏପେଙ୍ଗ୍ ଅସ୍ତାଦେର୍। ମାତର୍ ଈଶ୍ୱର ହାଃତାକାର୍ତାଙ୍ଗ୍ ଆରେରଗ ଜିବୁନ୍ କିତାନ୍ନା। ଆସେଙ୍ଗ୍ ହେବେନି ସାକି।
16ଇ ମାନାୟ୍ତିଙ୍ଗ୍ ଏପେଙ୍ଗ୍ ହୁଡ଼୍ତାଦେର୍ନା ଆରେ ପୁଚାଦେର୍ନା, ହେୱାନ୍ ଯୀଶୁ ତର୍ଦାଙ୍ଗ୍ ପାର୍ତିକିନି କାଜିଙ୍ଗ୍ ଶାକ୍ତି ପାୟାଆତାନ୍। ହେ ଚଟା ମାନାୟ୍ ଯୀଶୁ ତର୍ଦିଙ୍ଗ୍ ପାର୍ତିକିନି କାଜିଙ୍ଗ୍ ପୁରାପୁରି ହାର୍ ଆତାନ୍ନା। ଇଦାଙ୍ଗ୍ ଏପେଙ୍ଗ୍ ହୁଡ଼୍ତାଦେର୍ନା।
17ନଙ୍ଗୟ୍, ଏ ଟଣ୍ଡାର୍କାଦେର୍, ଆନେଙ୍ଗ୍ ପୁଚାଙ୍ଗ୍ନା ଯୀଶୁଙ୍ଗ୍ ରକ୍ଷାକିଦ୍ନାକାନ୍ ଇଞ୍ଜି ପୁନ୍ୱିତି କାଜିଙ୍ଗ୍, ଏପେଙ୍ଗ୍ ଆରେ ମି ନେତାର୍ ଯୀଶୁଙ୍ଗ୍ ମାର୍ନେ ଅସ୍ତାଦେର୍ନା। 18ମାତର୍ ଭବିଷ୍ଯତବକ୍ତାରିଙ୍ଗ୍ ଈଶ୍ୱର ଆଗେ ୱେଚ୍ଚି ମାଚାନ୍ ଯେ, ଖ୍ରୀଷ୍ଟ ବେସି ଦୁକ୍କଷ୍ଟ ପାୟାଆଜି ହାଃନାନ୍। ଈଶ୍ୱର ହେଦାଙ୍ଗ୍ ପୁରା କିତାନ୍ନା। 19ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମି ପାପ୍ କାମାୟ୍ ପିସ୍ତି ମାପୃତାକେ ୱାତିସ୍, ଈଶ୍ୱର ମି ପାପ୍ ୱିଜୁ କେମା କିଦ୍ନାନ୍। 20ହେଲେକେ କିତିସ୍ ଈଶ୍ୱର ତା ଆଗେତାଙ୍ଗ୍ ବାଚିକିତି ଖ୍ରୀଷ୍ଟ ଯୀଶୁଙ୍ଗ୍ ପା ମି ଲାଗାୟ୍ ପକ୍ତାନାନ୍। 21ହେଲେକେ ୱିଜୁ ଆରେରଗ ରହିୟାଆନି ଇମ୍ଣି ସମୟନି ବେଣ୍, ଆଗେ ଈଶ୍ୱର ତା ଭବିଷ୍ଯତବକ୍ତାତାଙ୍ଗ୍ ୱେଚ୍ଚାନ୍ନା। ହେ ସମୟ୍ ୱାୱି ପାତେକ୍ ହେୱାନ୍ ସରଗ୍ଜପି ମାନ୍ଗାନାନ୍। 22ମୋଶା ଭବିଷ୍ଯତବକ୍ତା ୱେଚ୍ଚି ମାଚାନ୍, ‘ମାପୃ ଈଶ୍ୱର ମି ଟଣ୍ଡାର୍ ବିତ୍ରେତାଙ୍ଗ୍ ମି କାଜିଙ୍ଗ୍, ନା ଲେଗ୍ଦି ରକାନ୍ ଭବିଷ୍ଯତବକ୍ତାତିଙ୍ଗ୍ ପକ୍ତାନାନ୍। ଇମ୍ଣି-ଇମ୍ଣି ବିଷୟତିଙ୍ଗ୍ ହେୱାନ୍ ମିଙ୍ଗେଙ୍ଗ୍ ୱେଚ୍ଚାନାନ୍। ହେ ୱିଜୁ ବିଷୟତିଙ୍ଗ୍ ଏପେଙ୍ଗ୍ ୱେନାଦେର୍। 23ମାତର୍ ହେଲେକେ ଗଟାଆନାତ୍, ଇମ୍ଣି ମାନାୟ୍ ହେ ଭବିଷ୍ଯତବକ୍ତା ବେଣ୍ ୱେନୁନ୍, ହେୱାନିଙ୍ଗ୍ ଈଶ୍ୱର ବୁଡାଇ କିନାନ୍। ଆରେ ହେୱାନ୍ ଈଶ୍ୱର ମାନାୟ୍ ଆଦେଙ୍ଗ୍ ଆଡୁନ୍।’
24ଶାମୁଏଲ ଆରେ ତାପାଚେ ୱାନି ୱିଜୁ ଭବିଷ୍ଯତବକ୍ତାର୍ କାତା ୱେଚ୍ଚାର୍ନା, ‘ହେୱାର୍ ୱିଜାକାର୍ ପା ଇ ସମୟ୍ ବିଷୟରେ ଶୁଣାୟ୍ କିତାର୍ନା।’ 25ଏପେଙ୍ଗ୍ ହେ ଭବିଷ୍ଯତବକ୍ତାର୍ ମେହି କାଦେର୍, ଆରେ ମି ଲାତ୍ରା କାଜିଙ୍ଗ୍ ପୁର୍ତିନି ୱିଜୁ ମାନାୟାର୍ ଆଶ୍ରିବାଦ୍ ପାୟାଆନାର୍, ଇ କାତା ଈଶ୍ୱର ଅବ୍ରାହାମ ଆରେ ମା ଆକଦାଦିର୍ତାକେ ପାର୍ମାଣ୍ କିଜି ମାଚାର୍, ଏପେଙ୍ଗ୍ ହେ ପାର୍ମାଣ୍ନି ମେହି କାଦେର୍। 26ଈଶ୍ୱର ତା ଦାସ୍ ଯୀଶୁଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି ମି ଲାଗାୟ୍ ପକ୍ତାତାନ୍ନା। ଇନେସ୍ ହେୱାନ୍ ମିଙ୍ଗେଙ୍ଗ୍ ଜାର୍-ଜାର୍ କରାପ୍ କାମାୟ୍ତାଙ୍ଗ୍ ରକ୍ଷା କିଜି ଆଶ୍ରିବାଦ୍ କିଦ୍ନାନ୍।”
Currently Selected:
ବାଚିକିତି ଚେଲାହିର୍ କାତା 3: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
