ବାଚିକିତି ଚେଲାହିର୍ କାତା 2
2
ପବିତ୍ର ଆତ୍ମା ୱାତି ବିଷୟ
1ଯିହୁଦି ଜାତିର୍ ପେଣ୍ଟିକଷ୍ଟ ପାର୍ବୁ ୱାତାତ୍, ଲାଗିଙ୍ଗ୍ ହେୱାର୍ ୱିଜୁ ଚେଲାହିର୍ ଯିରୁଶାଲାମ୍ ସହର୍ନି ର ବାହାତାକେ ରବେ ରୁଣ୍ଡାଆତାର୍। 2ହେଦାପ୍ରେ ବେସି ଦୁକା ୱାନି ଶବଦ୍ ଲେକେ ସରଗ୍ତାଙ୍ଗ୍ ର ଶବଦ୍ ୱାତାତ୍, ଆରେ ଚେଲାହିର୍ ଇମ୍ଣି ଇଞ୍ଜ କୁଚ୍ଚି ମାଚାର୍, ହେ ଇଲ୍ ଚାରିବେଣ୍ତାଙ୍ଗ୍ ଶବଦ୍ ଆତାତ୍। 3ତାପାଚେ ହେୱାର୍ ନାଣି ଲେକେ ୱେନ୍ଦୁଲ୍ତିଙ୍ଗ୍ ହୁଡ଼୍ତାର୍, ହେଦାଙ୍ଗ୍ ରକାର୍-ରକାର୍ କିଜି ୱିଜାକାରିଙ୍ଗ୍ ୱାତାତ୍। 4ୱିଜାକାର୍ ପବିତ୍ର ଆତ୍ମାତାଙ୍ଗ୍ ପୁରାଆତାର୍, ଆରେ ଈଶ୍ୱରଆତ୍ମା ଇନେସ୍ ହେୱାରିଙ୍ଗ୍ ୱେଚ୍ଚେଙ୍ଗ୍ ସାଇଜ କିତାତ୍, ହେୱାର୍ ବିନ୍-ବିନ୍ ବାଷାତାକେ ୱେଚ୍ଚେଙ୍ଗ୍ ଲାଗାତାର୍।
5ହେପାଦ୍ନା ଈଶ୍ୱରତିଙ୍ଗ୍ ପାଣ୍ଡ୍ରାଆନି ଯିହୁଦିର୍ ପୁର୍ତିନି ବିନ୍-ବିନ୍ଜାତି ନିକାର୍ ଆରେ ବିନ୍-ବିନ୍ ଦେସ୍ତାକାର୍ ପେଣ୍ଟିକଷ୍ଟ ପାର୍ବୁଚିଞ୍ଜେଙ୍ଗ୍ ଯିରୁଶାଲାମ ସହର୍ତାକେ ୱାଜିମାଚାର୍। 6ଏଚେପାଦ୍ନା ହେ ଦୁକାଲେକେ ଶବଦ୍ ୱେଚାର୍, ହେବେ ବେସିହେନି ମାନାୟାର୍ ରୁଣ୍ଡାଆତାର୍। ଆରେ ଜାର୍-ଜାର୍ ବାଷାତାକେ ଚେଲାହିର୍ ବେଣ୍ କିନାକା ହେୱାର୍ ୱେନ୍ଞ୍ଜି ଚାନିଆଆତାର୍।
7ଆରେ ହେୱାର୍ ତ୍ରିପ୍କିସ୍ ଆରେ ଚାନିଆ ଆଜି ଜାର୍-ଜାର୍ବିତ୍ରେ ୱେଚ୍ପା ଆଦେଙ୍ଗ୍ ଲାଗାତାର୍, “ଇମ୍ଣାକାର୍ ମା ବାଷା ବେଣ୍ କିନାର୍ ହେୱାର୍ ଗାଲିଲୀ ଜିଲ୍ଲାନି ମାନାୟାର୍। 8ଲାଗିଙ୍ଗ୍ ଆସେଙ୍ଗ୍ ଇନେସ୍କିଜି ମା ଜାର୍-ଜାର୍ ବାଷାତାକେ ବେଣ୍ କିନାକା ୱେନାସା? 9ମା ବିତ୍ରେ କେତେକ୍ ହେନି ମାନାୟ୍ ପାର୍ତିଆ, ମାଦୀୟ, ଏଲାମିୟା ରାଜି ନିକାର୍, ଆରେ କେତେକ୍ ହେନି ମାନାୟ୍ ମେସପଟାମିଆ, ଯିହୁଦା ଆରେ କାପାଦକିଆ, ପନ୍ତ ଆରେ ଏସିଆ ରାଜି ନିକାପ୍, 10ଆରେ କେତେକ୍ ହେନି ମାନାୟ୍ ଫ୍ରୁଗିଆ ଆରେ ପପୁଲିଆ ରାଜି ନିକାର୍। ଆରେ କେତେକ୍ ହେନି ମିସର୍ ଦେସ୍, ଆରେ କୁରିଣି ସହର୍ ଲାଗାୟ୍ ମାନି ଲିବିୟା ରାଜିନି ମାନାୟାର୍। ଆରେ କେତେକ୍ ହେନି ରୋମ ଦେସ୍ତାଙ୍ଗ୍ ୱାଜିମାଚି ଯିହୁଦିର୍ ଆରେ ଯିହୁଦି ଦରମ୍ ମାନିକିନି ମାନାୟାର୍। 11ଆରେ କେତେକ୍ ହେନି ମାନାୟ୍ କ୍ରୀତିୟ ଆରେ ଆରିବିୟ ଦେସ୍ ନିକାସ୍। ଲାଗିଙ୍ଗ୍ ଇୱାର୍ ଇନେସ୍ ମା ଜାର୍-ଜାର୍ ବାଷାତାକେ ଈଶ୍ୱର କିଜିମାଚି ଚାନିଆଆନି କାମାୟ୍ ବିଷୟରେ ୱେଚ୍ଚେଙ୍ଗ୍ ଆଡ୍ନାରା?” 12ଆରେ ହେୱାର୍ ତ୍ରିପ୍କିସ୍ ଆରେ ଚାନିଆ ଆଜି ଜାର୍-ଜାର୍ବିତ୍ରେ ୱେଚ୍ପା ଆଦେଙ୍ଗ୍ ଲାଗାତାର୍, “ଇଦାଙ୍ଗ୍ନି ଅର୍ତ ଇନାକା?”
13ଲାଗିଙ୍ଗ୍ କେତେକ୍ ହେନି ମାନାୟାର୍ ଇନସ୍ତାକିଜି ୱେଚ୍ଚାର୍, “ଇୱାର୍ ପୁନି ଅଙ୍ଗୁର୍ ରାସ୍ ଉଣ୍ଜି ହଚ୍ଚାର୍ନା।”
ପିତର ଈଶ୍ୱରଆତ୍ମା ବିଷୟରେ ଶୁଣାୟ୍ କିତାନ୍
14ଲାଗିଙ୍ଗ୍ ଏଗାର୍ଜାଣ୍ ବାଚିକିତି ଚେଲାହିର୍ ବିତ୍ରେତାଙ୍ଗ୍ ପିତର ନିଲ୍ତାନ୍। ଆରେ ହେୱାନ୍ ଗାଜାକାଟ୍ କିଜି ମାନାୟାରିଙ୍ଗ୍ ୱେଚ୍ଚାନ୍, “ଏ ଯିହୁଦି ମାନାୟାର୍ ଆରେ ଯିରୁଶାଲାମ ସହର୍ନି ମାନାୟାର୍, ଏପେଙ୍ଗ୍ ନା କାତା ମାନ୍ଦିୟାନ୍ କିଜି ୱେନାଟ୍, ଆନେଙ୍ଗ୍ ମିଙ୍ଗେଙ୍ଗ୍ ଇ କାତା ବୁଜାଇ କିଦ୍ନାଙ୍ଗ୍। 15ଏପେଙ୍ଗ୍ ଇନେସ୍ ମାନ୍ତ ବାବିକିନାଦେରା ହେଲେକେ ଇୱାର୍ ହଚ୍ୱାତାର୍ନା। ନଙ୍ଗୟ୍ ତ ନାଡ଼ିସ୍ ନଅଟା ଆତାତ୍ନା। 16ମାତର୍ ଭବିଷ୍ଯତବକ୍ତା ଯୋୟେଲ୍, ତା ସାସ୍ତର୍ତାକେ ୱେଚ୍ଚିତି କାତା ପୁରା ଆଦେଙ୍ଗ୍, ଇଦାଙ୍ଗ୍ ମା ବିତ୍ରେ ଗଟାଆତାତ୍ନା।
17‘ଈଶ୍ୱର ୱେଚ୍ନାନ୍, ସେସ୍ଦିନ୍ତ ଆନେଙ୍ଗ୍ ୱିଜାକାର୍ ମାନାୟାରିଙ୍ଗ୍ ନା ପବିତ୍ର ଆତ୍ମା ହିନାଙ୍ଗ୍।
ଲାଗିଙ୍ଗ୍ ମି ହିମ୍ଣାୱାକ୍ଡ଼ା ଈଶ୍ୱର କାତାତିଙ୍ଗ୍ ୱେନ୍ଞ୍ଜି ମାନାୟାରିଙ୍ଗ୍ ୱେଚ୍ନାର୍,
ମି ବେଣ୍ଡିଆ କାଡ଼୍ଦେର୍ ଈଶ୍ୱରତିଙ୍ଗ୍ ହୁଡ଼୍ନାର୍,
ଆରେ ମି ବୁଡ଼ାର୍ ଆନେଙ୍ଗ୍ ହିନି କେଚ୍କଣ୍ତିଙ୍ଗ୍ ହୁଡ଼୍ନାର୍।
18ଆଁ, ହେ ଦିନ୍ତ ନାଙ୍ଗେଙ୍ଗ୍ ହେବାକିଦ୍ନି ଆଣ୍ଡ୍ରା କଗ୍ଲେକାଙ୍ଗ୍ ନା ପବିତ୍ର ଆତ୍ମା ହିନାଙ୍ଗ୍।
ଲାଗିଙ୍ଗ୍ ହେୱାର୍ ନା କାତା ୱେନ୍ଞ୍ଜି ମାନାୟାରିଙ୍ଗ୍ ୱେଚ୍ନାର୍।
19ଆନେଙ୍ଗ୍ ବାଦାଡ଼୍ତାକେ ଚାନିଆଆନି କାମାୟ୍ ଚଚ୍ଚାନାଙ୍ଗ୍।
ଆରେ ପୁର୍ତିତାକେ କେତେକ୍ ବିନ୍-ବିନ୍ ଚିନ୍ ଚଚ୍ଚାନାଙ୍ଗ୍।
ମାନାୟାର୍ ଅସ୍ପା ଆତି ନେତେର୍ ଆରେ ନାଣି ଦୁଆଁ ପୁର୍ତିନି ମାନାୟାର୍ ହୁଡ଼୍ନାର୍।
20ମାପୃଦିନ୍ ୱାୱି ଆଗେ ୱେଡ଼ା ମାଜ୍ଗା ଆନାତ୍।
ଆରେ ଲେଞ୍ଜ୍ ନେତେର୍ ଲେକେ ଆନାତ୍।
ହେ ଦିନ୍ ଗାଜା ଆରେ ବେସି ଅଜଡ଼୍ ଦିନ୍ ଆନାତ୍।
21ହେ ଦିନ୍ ୱାୱି ଆଗେ, ଇମ୍ଣାକାର୍ ରକ୍ଷା ପାୟା ଆଦେଙ୍ଗ୍ ମାପୃତାକେ ପାର୍ତାନା କିନାର୍। ହେୱାରିଙ୍ଗ୍ ହେୱାନ୍ ରକ୍ଷା କିନାନ୍।’ ”
22ଏ ଇସ୍ରାଏଲ ଜାତିନି ମାନାୟାର୍, “ୱେନାଟ୍! ନାଜରିତିୟ ସହର୍ନି ଯୀଶୁ ଇନା-ଇନା ଶାକ୍ତିନି କାମାୟ୍, ଚାନିଆଆନି କାମାୟ୍ ଆରେ ଚିନାତାଙ୍ଗ୍ ମି ଲାଗାୟ୍ ଈଶ୍ୱର ପକିଆତି ମାନାୟ୍ ଇଞ୍ଜି ଚଚିୟା ଆନାନ୍। ହେଦାଙ୍ଗ୍ କାଜିଙ୍ଗ୍ ହେୱାନ୍ତାଙ୍ଗ୍ ଈଶ୍ୱର ମିବେ ଇୱିଜୁ କାମାୟ୍ କିତାନ୍ନା। ଇଦାଙ୍ଗ୍ ଏପେଙ୍ଗ୍ ନିଜେ ପୁଚାଦେର୍ନା। 23ଈଶ୍ୱର ହେୱାର୍ ଯଜନାତାଙ୍ଗ୍ ଯୀଶୁଙ୍ଗ୍ ମି କେଇଦ ଆହିକିଦେଙ୍ଗ୍ ଉପାୟ୍ କିଜି ମାଚାନ୍। ଆରେ ଏପେଙ୍ଗ୍ ହେୱାନିଙ୍ଗ୍ ବିନ୍ଜାତିର୍ ମାନାୟାର୍ତାଙ୍ଗ୍ କୃଶକାଟ୍ତାକେ ଦୁପ୍ଚି ମାର୍ନେ ଅସ୍ତି ମାଚାଦେର୍। 24ମାତର୍ ଈଶ୍ୱର ଯୀଶୁଙ୍ଗ୍ ହାଃନିତାଙ୍ଗ୍ ରକ୍ଷା କିଜି ହେୱାନିଙ୍ଗ୍ ଆରେରଗ ଜିବୁନ୍ କିତାନ୍ନା। ଇନେସ୍କି ହାଃନି ଶାକ୍ତି ହେୱାନିଙ୍ଗ୍ ଆସ୍ତେଙ୍ଗ୍ ଆଡ୍ୱାତାତ୍। 25ଦାଉଦ ରାଜା ଯୀଶୁ ବିଷୟରେ ତା ସାସ୍ତର୍ତାକେ ଲେକିକିତାନ୍ନା।
‘ଆନେଙ୍ଗ୍ ୱିଜୁଦିନ୍ ଈଶ୍ୱରତିଙ୍ଗ୍ ହାରାମୁମ୍ ହୁଡ଼୍ଜି ମାଚାଙ୍ଗ୍,
ଇମ୍ଣାକାର୍ ନାଙ୍ଗେଙ୍ଗ୍ କଷ୍ଟ ହିଦ୍ନାକାରିଙ୍ଗ୍ ଆନେଙ୍ଗ୍ ପାଣ୍ଡ୍ରା ଆଉଙ୍ଗ୍,
ହେଦାଙ୍ଗ୍ କାଜିଙ୍ଗ୍ ହେୱାନ୍ ନା ତିନାବାଗାୟ୍ କୁଚ୍ଚାନ୍ନା।
26ଆନେଙ୍ଗ୍ ୱାରିତାଙ୍ଗ୍ ନିଙ୍ଗେଙ୍ଗ୍ ଜୟ୍-ଜୟ୍ କିଦ୍ନାଙ୍ଗ୍।
ଆନେଙ୍ଗ୍ ନିବେ ଆହାକିଜି ଜିନାଙ୍ଗ୍।
27ଇନେସ୍କି ଏନେଙ୍ଗ୍ ନାଙ୍ଗେଙ୍ଗ୍ ହାଃଜି ମାଞ୍ଜେଙ୍ଗ୍ ହିଦୁଇ।
କି ନା ହାଃତି ଗାଗାଡ଼୍ତିଙ୍ଗ୍ ଏନେଙ୍ଗ୍ ନରକ୍ତାକେ ପକ୍ତାମା।
28ଏନେଙ୍ଗ୍ ନାଙ୍ଗେଙ୍ଗ୍ ଜିବୁନ୍ନି ହାଜି ପୁଞ୍ଜେଙ୍ଗ୍ ହିତ୍ତାଇନା।
ଏନେଙ୍ଗ୍ ନା ଲାଗାୟ୍ ମାନ୍ଞ୍ଜି ନାଙ୍ଗେଙ୍ଗ୍ ବେସି ୱାରି କିଦ୍ନାଇ।’ ”
29ପିତର ଆରେରଗ ୱେଚ୍ଚାନ୍, “ଏ ଟଣ୍ଡାର୍କାଦେର୍, ମା ଆକଦାଦି ଦାଉଦ ରାଜା ବିଷୟରେ କଲାକଲି ବାବ୍ରେ ୱେଚ୍ଚାନାଙ୍ଗ୍, ହେୱାନ୍ ହାଃତାନ୍ ଆରେ ମାନାୟାର୍ ହେୱାନିଙ୍ଗ୍ ମୁଚ୍ଚାର୍। ଆରେ ନଙ୍ଗୟ୍ ପାତେକ୍ ତା ଦୁଗେର୍ ମାନାତ୍। 30ହେୱାନ୍ ରକାନ୍ ଭବିଷ୍ଯତବକ୍ତା ମାଚାନ୍। ହେଦାଙ୍ଗ୍ କାଜିଙ୍ଗ୍ ତା ଲାତ୍ରାତାଙ୍ଗ୍ ରକାନିଙ୍ଗ୍ ତା ସିଙ୍ଗାସନ୍ତାକେ କୁଚିକିନାନ୍, ଇ କାତା ଈଶ୍ୱର ପାର୍ମାଣ୍ କିଜି ଦାଉଦ ରାଜାଙ୍ଗ୍ ହିତାକା ହେୱାନ୍ ପୁନ୍ଞ୍ଜି ମାଚାନ୍। 31ଈଶ୍ୱର ନଙ୍ଗୟ୍ ଇନାକା କିଦେଙ୍ଗ୍ ହାନାନା, ଦାଉଦ ରାଜା ପୁନ୍ଞ୍ଜି, ଖ୍ରୀଷ୍ଟ ହାଃଜି ଆରେରଗ ଜିବୁନ୍ଆନି ବିଷୟରେ ୱେଚ୍ଚାତାନ୍ନା। ଇନେସ୍କି ହେୱାନ୍ ନରକ୍ତାକେ ମାନ୍ୱାତାନ୍, ଆରେ ତା ହାଃତି ଗାଗାଡ଼୍ ମୁଚ୍ଚିତାକେ ହାବ୍ୱାତାତ୍।
32ଇ ଯୀଶୁଙ୍ଗ୍ ନେ ଈଶ୍ୱର ହାଃତିତାଙ୍ଗ୍ ଆରେରଗ ଜିବୁନ୍ କିତାନ୍ନା, ହେ ବିଷୟରେ ଆସେଙ୍ଗ୍ ୱିଜାକାସ୍ ସାକି। 33ଈଶ୍ୱର ଯୀଶୁଙ୍ଗ୍ ଗାଜାୟ୍ କିଜି ତା ତିନାବାଗାୟ୍ କୁଚିକିଜି ତା ହୁଦାଙ୍ଗ୍ ସାସନ୍ କିଦେଙ୍ଗ୍ ଆଦିକାର୍ ହିତାନ୍। ଆରେ ହେୱାନ୍ ମାଙ୍ଗେଙ୍ଗ୍ ଆବା ପବିତ୍ର ଆତ୍ମା ହିତ୍ତାନ୍, ଇନେରିଙ୍ଗ୍ ଏପେଙ୍ଗ୍ ହୁଡ଼୍ନାଦେରା ଆରେ ୱେନାଦେରା। 34ଦାଉଦ ରାଜା ସରଗ୍ତାକେ ହାଲ୍ୱାଦାଙ୍ଗ୍ ମାଚାନ୍।
ମାତର୍ ହେୱାନ୍ ନିଜେ ୱେଚ୍ଚାତାନ୍ନା,
‘ମାପୃ ନା ମାପୃଙ୍ଗ୍ ୱେଚ୍ଚାନ୍,
35ଆନେଙ୍ଗ୍ ମି ଶାତ୍ରୁରିଙ୍ଗ୍ ଏଚେପାଦ୍ନା ପାତେକ୍ ମି କାଲ୍କୁ ତାରେନ୍ ତାହିୱାଉଙ୍ଗେ,
ହେପାଦ୍ନା ପାତେକ୍ ନା ତିନାବାଗାୟ୍ କୁଚ୍ଚି ମାନା।’
36ଲାଗିଙ୍ଗ୍ ୱିଜାକାଦେର୍ ଇସ୍ରାଏଲ ଜାତିରିଙ୍ଗ୍ ହାତ୍ପା ପୁନାଟ୍, ଇମ୍ଣି ଯୀଶୁଙ୍ଗ୍ ଏପେଙ୍ଗ୍ କୃଶକାଟ୍ତାକେ ଅସ୍ତାଦେର୍, ହେୱାନିଙ୍ଗ୍ ଈଶ୍ୱର, ମାପୃ ଆରେ ଖ୍ରୀଷ୍ଟ ଇ ପାଦ୍ ପାୟାଆତାନ୍ନା।”
37ଇ କାତା ୱେନ୍ଞ୍ଜି ମାନାୟାର୍ ଦୁକ୍ ଆତାର୍, ଆରେ ହେୱାର୍ ପିତର ଆରେ ଜେକନି ବାଚିକିତି ଚେଲାହିରିଙ୍ଗ୍ ୱେଚ୍ଚାନ୍, “ଟଣ୍ଡାର୍କାଦେର୍ ଆସେଙ୍ଗ୍ ଇନାକା କିନାସ୍?” 38ପିତର ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ୱିଜାକାଦେର୍ ପାପ୍ କାମାୟ୍ ପିସ୍ତି ମାପୃତାକେ ୱାଡ, ଆରେ ପାପ୍ କେମା ପାୟା ଆଦେଙ୍ଗ୍ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ଡୁବନ୍ ଆଡ, ଲାଗିଙ୍ଗ୍ ଏପେଙ୍ଗ୍ ପବିତ୍ର ଆତ୍ମାନି ଦାନ୍ ପାୟାଆନାଦେର୍। 39ଇ କାତା ମି କାଜିଙ୍ଗ୍, ମି ହିମ୍ଣାୱାକ୍ଡ଼ା କାଜିଙ୍ଗ୍ ଆରେ ବେସି ଦେହା ମାନାର୍ ହେୱାର୍ କାଜିଙ୍ଗ୍ ହିତ୍ତାନ୍ନା। ଆରେ ପା ଏଚେଜାଣ୍ତିଙ୍ଗ୍ ମାପୃ ମା ଈଶ୍ୱର ଜାର୍ ଲାଗାୟ୍ କୁକ୍ତାନାର୍, ହେ ୱିଜାକାରିଙ୍ଗ୍ ହିଦ୍ନାନ୍।” 40ଆରେ ବାରବିନି ବେଣ୍ତାଙ୍ଗ୍ ପିତର ଆଦେସ୍ ହିଜି ୱେଚ୍ଚେଙ୍ଗ୍ ଲାଗାତାନ୍, “ଏପେଙ୍ଗ୍ ଇ କରାପ୍ ମାନାୟାର୍ତାଙ୍ଗ୍ ରକ୍ଷା ପାୟାଆଡୁ।”
41ହେବେତାଙ୍ଗ୍ ଇମ୍ଣାକାର୍ ହେୱାନ୍ କାତା ୱେଚାର୍, ହେୱାର୍ ଡୁବନ୍ ଅତାର୍, ଆରେ ହେ ଦିନ୍ ପାକାପାକି ତିନ୍ ହାଜାର୍ ମାନାୟାର୍ ମଣ୍ଡ୍ଲି ହୁଦାଙ୍ଗ୍ ମେହାଆତାର୍।
ପାର୍ତି କିନାକାର୍ ରବେ ରୁଣ୍ଡାଆତି କାତା
42ହେଦିନ୍ତାଙ୍ଗ୍ ବାଚିକିତି ଚେଲାହିର୍ ହିକ୍ଷାତିଙ୍ଗ୍ ୱେଞ୍ଜେଙ୍ଗ୍ ମେହାଆତାର୍। ଆରେ ରୁଟି ଡିକ୍ତେଙ୍ଗ୍ ଆରେ ପାର୍ତାନା କିଦେଙ୍ଗ୍ ରୁଣ୍ଡାଆଜି ମାଚାର୍।
43ଆରେ ମାନାୟାର୍ ୱିଜାକାର୍ ପାଣ୍ଡ୍ରା ଆଦେଙ୍ଗ୍ ଲାଗାତାର୍। ବାଚିକିତି ଚେଲାହିର୍ ପା କେତେକ୍ ହୁଡ଼୍ୱିତି କାମାୟ୍ ଆରେ ଚାନିଆଆନି କାମାୟ୍ କିଦେଙ୍ଗ୍ ଲାଗାତାର୍। 44ଇମ୍ଣାକାର୍ ପାର୍ତି କିତାର୍ ହେୱାର୍ ରବେ ମାନ୍ଞ୍ଜି, ହେୱାର୍ ଲାଗାୟ୍ ଇନାକା ୱିଜୁ ଦନ୍ସମ୍ଫତି ମାଚାତ୍, ହେଦାଙ୍ଗ୍ ଜାର୍-ଜାର୍ବିତ୍ରେ ବାଟା କିତାର୍। 45ହେୱାର୍ ଜାର୍-ଜାର୍ ଦନ୍ ସମ୍ଫତିତିଙ୍ଗ୍ ପତାର୍। ଆରେ ଇନେରିଙ୍ଗ୍ ଏଚେକ୍ ଦର୍କାର୍ ହେ ଏଚେକ୍ ଲାକା ୱିଜାକାର୍ ବାଟା କିବାଆତାର୍। 46ଆରେ ହେୱାର୍ ର ମାନ୍ଆଜି ୱିଜୁଦିନ୍ ଈଶ୍ୱର ମାନି ମନ୍ଦିର୍ତାକେ ମେହାଆଜି ମାଚାର୍। ଆରେ ଇଞ୍ଜ-ଇଞ୍ଜ ରୁଟି ଡିକ୍ଚି ୱାରିତାଙ୍ଗ୍ ଆରେ ଶାନ୍ତିତାଙ୍ଗ୍ ତିନ୍ଞ୍ଜି ଈଶ୍ୱରତିଙ୍ଗ୍ ଜୟ୍-ଜୟ୍ କିଜି ମାଚାର୍। 47ମାତର୍ ୱିଜାକାରିଙ୍ଗ୍ ସାଙ୍ଗ ଆଜି ମାଚାର୍, ଆରେ ଈଶ୍ୱର ରକ୍ଷା କିନି ମାନାୟାରିଙ୍ଗ୍, ୱିଜୁଦିନ୍ ମଣ୍ଡ୍ଲି ହୁଦାଙ୍ଗ୍ ମେହାଇ କିଦେଙ୍ଗ୍ ଲାଗାତାର୍।
Currently Selected:
ବାଚିକିତି ଚେଲାହିର୍ କାତା 2: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
