ବାଚିକିତି ଚେଲାହିର୍ କାତା 1
1
ଯୀଶୁ ପବିତ୍ର ଆତ୍ମାଙ୍ଗ୍ ପକ୍ତେଙ୍ଗ୍ କାତାହିତାନ୍
1-2ଲାଡ୍ନି ଥୀୟଫିଲ, ଯୀଶୁ ତା ବାଚିକିତି ଚେଲାହିରିଙ୍ଗ୍ ପବିତ୍ର ଆତ୍ମା ସାଇଜତାଙ୍ଗ୍ ଆଦେସ୍ ହିଜି, ଆରେ ଈଶ୍ୱର ତାଙ୍ଗେଙ୍ଗ୍ ସରଗ୍ଜପି ଅନି ପାତେକ୍, ଯୀଶୁ ତା ହାର୍ଦିକାବୁର୍ ଶୁଣାୟ୍ କିନି ଦିନ୍ତାଙ୍ଗ୍, ହେୱାନ୍ ଇନା-ଇନା କାମାୟ୍ ଆରେ ହିକ୍ଷାହିଜି ମାଚାନ୍, ହେ ୱିଜୁ ବିଷୟରେ ନା ପାର୍ତୁମ୍ ବହିତାକେ ଲେକିକିତାଙ୍ଗ୍ନା। 3ଯୀଶୁ ନିଜେ ଦୁକ୍କଷ୍ଟ ପାୟାଆଜି କୃଶକାଟ୍ତାକେ ହାଃତି ପାଚେ, ହେୱାନ୍ ଆରେରଗ ଜିବୁନ୍ ପାୟାଆତାନ୍। ଆରେ ତା ବାଚିକିତି ଚେଲାହିରିଙ୍ଗ୍ ଜାର୍ତିଙ୍ଗ୍ ଜିବୁନ୍ ଆତାଙ୍ଗ୍ନା ଇଞ୍ଜି ଚଚିୟାଆତାନ୍। ହେୱାନ୍ ଚାଲିଶ୍ ଦିନ୍ ପାତେକ୍ ବାରମ୍-ବାରମ୍ ହେୱାରିଙ୍ଗ୍ ଚଚିୟାଆତାନ୍। ଆରେ ହେୱାନ୍ ଈଶ୍ୱର ସାସନ୍ ରାଜିନି ବିଷୟରେ ହେୱାରିଙ୍ଗ୍ ୱେଚ୍ଚି ମାଚାନ୍।
4ଦିନେକ୍ ହେୱାନ୍ ହେୱାର୍ ହୁଦାଙ୍ଗ୍ ଚିଞ୍ଜେଙ୍ଗ୍ କୁଚ୍ଚି ମାଚାନ୍। ହେପାଦ୍ନା ହେୱାନ୍ ହେୱାରିଙ୍ଗ୍ ଇ ଆଦେସ୍ ହିତାନ୍, “ଆବା ଈଶ୍ୱର ମିଙ୍ଗେଙ୍ଗ୍ ଇମ୍ଣି କାତା ହିତ୍ତାନ୍ନା। ଆନେଙ୍ଗ୍ ମିଙ୍ଗେଙ୍ଗ୍ ଇ କାତା ବିଷୟରେ ଆଗେ ୱେଚ୍ଚାତାଙ୍ଗ୍ନା। ଲାଗିଙ୍ଗ୍ ହେ କାତାନି ପୁରଷ୍କାର୍ ପାୟାଆୱି ପାତେକ୍ ଏପେଙ୍ଗ୍ ଯିରୁଶାଲାମ ସହର୍ତାକେ କାସିମାନାଟ୍। 5ଡୁବନ୍ହିନି ଯୋହନ ମାନାୟାରିଙ୍ଗ୍ ଏଜୁକାଙ୍ଗ୍ ଡୁବନ୍ହିଜି ମାଚାନ୍। ମାତର୍ ଅଲପ୍ଦିନ୍ ପାଚେ ଏପେଙ୍ଗ୍ ପବିତ୍ର ଆତ୍ମାତାଙ୍ଗ୍ ଡୁବନ୍ ଆନାଦେର୍।”
ଆବା ଈଶ୍ୱର ଯୀଶୁଙ୍ଗ୍ ସରଗ୍ଜପି ଅତାନ୍
6ଦିନେକ୍ ବାଚିକିତି ଚେଲାହିର୍ ଯୀଶୁ ହୁଦାଙ୍ଗ୍ ରବେ ଆତାର୍। ହେପାଦ୍ନା ହେୱାର୍ ହେୱାନିଙ୍ଗ୍ ୱେନ୍ବାତାର୍, “ମାପୃ, ନଙ୍ଗୟ୍ ଏନେଙ୍ଗ୍ ରମିୟ ସରକାର୍ତିଙ୍ଗ୍ ଆରାଇ କିଜି ଇସ୍ରାଏଲନି ଦେସ୍ତିଙ୍ଗ୍ ଆରେରଗ ହିନାଇ କି?”
7ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇୱିଜୁ ବିଷୟ ଇନାୱେଡ଼ାଙ୍ଗ୍ ଗଟାଆନାତ୍ ହେ ସମୟତିଙ୍ଗ୍ ଏପେଙ୍ଗ୍ ପୁଞ୍ଜେଙ୍ଗ୍ ଦର୍କାର୍ ଆକାୟ୍। ହେଦାଙ୍ଗ୍ ଆବା ଈଶ୍ୱରତି ନେ ଆଦିକାର୍ ମାନାତ୍। 8ମାତର୍ ଏପେଙ୍ଗ୍ ର ବିଷୟ ପୁନି ଦର୍କାର୍ ଯେ, ପବିତ୍ର ଆତ୍ମା ମି ଜପି ୱାନାତ୍, ଆରେ ଏପେଙ୍ଗ୍ ଶାକ୍ତି ପାୟ୍ଆନାଦେର୍। ହେପାଦ୍ନା ଏପେଙ୍ଗ୍ ଯିରୁଶାଲାମ ସହର୍, ଯିହୁଦା ଜିଲ୍ଲାନି ଚାରିବେଣ୍ତାଙ୍ଗ୍ ଆରେ ଶମିରଣିୟ ଜିଲ୍ଲା ଆରେ ପୁର୍ତିନି ଚାରିବେଣ୍ତାଙ୍ଗ୍ ନା ବିଷୟରେ ମାନାୟାରିଙ୍ଗ୍ ୱେଚ୍ନାଦେର୍।”
9ହେୱାନ୍ ୱିଜୁବେଣ୍ ତା ଚେଲାହିରିଙ୍ଗ୍ ୱେଚ୍ଚାନ୍। ତାପାଚେ ହେୱାର୍ ହୁଡ଼ୁ-ହୁଡ଼ୁ ଈଶ୍ୱର ହେୱାନିଙ୍ଗ୍ ସରଗ୍ତାକେ ଅତାନ୍। ହେୱାନ୍ ବାଦାଡ଼୍ ବିତ୍ରେ ହାଚିଲେ ହେୱାର୍ ଆରେ ହୁଡ଼୍ୱାତାର୍ଦେ। 10ହେୱାନ୍ ସରଗ୍ଜପି ହାନିହିଙ୍ଗ୍ ତା ଚେଲାହିର୍ ବାଦାଡ଼୍ଜପି ହୁଡ଼୍ଜି ମାଚାର୍, ହେଦାପ୍ରେ ଡ଼ିଞ୍ଜ୍ନି ହେନ୍ଦ୍ରା ଉସ୍ପିତି ରସଗ୍ନି ରି ଦୁତ୍କୁ ହେୱାର୍ ଲାଗାୟ୍ ନିଲ୍ତିକ୍। 11ଦୁତ୍କୁ ହେୱାରିଙ୍ଗ୍ ୱେଚ୍ଚିକ୍, “ହେ ଗାଲିଲୀ ଜିଲ୍ଲାନି ମାନାୟ୍ କାଦେର୍, ଇନା କିଦେଙ୍ଗ୍ ନଙ୍ଗୟ୍ ପାତେକ୍ ଏପେଙ୍ଗ୍ ବାଦାଡ଼୍ ନିପଣ୍ ହୁଡ଼୍ଜି ନିଲ୍ତାଦେର୍ନା? ଇ ଯୀଶୁ ଇନେରିଙ୍ଗ୍ ଈଶ୍ୱର ସରଗ୍ଜପି ଅତାନ୍ନା, ଆରେ ଏପେଙ୍ଗ୍ ଇନେସ୍ କିଜି ହାନାକା ହୁଡ଼୍ତାଦେର୍ନା ହେଲେକେ ନେ ଆରେରଗ ପୁର୍ତିତାକେ ୱାନାକା ହୁଡ଼୍ନାଦେର୍।”
ମତିୟଙ୍ଗ୍ ଚେଲା ରସ୍ତାନ୍
12ସରଗ୍ଦୁତ୍କୁ ବାଚିକିତି ଚେଲାହିର୍ତାଙ୍ଗ୍ ହାଚି ପାଚେ, ହେୱାର୍ ଜିତ୍ମାର୍ ମାନି ମାଡ଼ିତାଙ୍ଗ୍ ଯିରୁଶାଲାମ ସହର୍ତ ଲେଉଟା ଆଜି ୱାତାର୍। ଜିତ୍ମାର୍ ମାନି ମାଡ଼ି ଯିରୁଶାଲାମ ସହର୍ କଚଣ୍ତ, ଜମ୍ନିଦିନ୍ ର କିଲମିଟର୍ ଦେହାମାଚାତ୍। 13ହେୱାର୍ ହେ ସହର୍ ବିତ୍ରେ ହାଚାର୍। ଆରେ ହେୱାର୍ ମାନି ଇଲ୍ନି ଜପ୍ଣି ପାଉଜ୍ତ ହାଚାର୍। ହେବେ ମାନି ଚେଲାହିର୍ ତର୍ ଇଲେକେ ପିତର, ଯୋହନ, ଯାକୁବ, ଆନ୍ଦ୍ରିୟ, ପିଲିପ, ଥୋମା, ବାର୍ଥଲମି, ମାଥିଉ, ଆଲ୍ପି ମେହି, ଯାକୁବ, ଦେସ୍ ହେବାକିନି ଶିମୋନ ଆରେ ଯାକୁବ ମେହି ଯିହୁଦା।
14ଇ ବାଚିକିତି ଚେଲାହିର୍ ହୁଦାଙ୍ଗ୍ କେତେକ୍ ଜେକନି କଗ୍ଲେକ୍, ଆରେ ଯୀଶୁ ତେହି ମରିୟମ, ଆରେ ତା ଟଣ୍ଡାହିର୍ ହୁଦାଙ୍ଗ୍ ମେହାଆଜି ର ମାନ୍ କିଜି ପାର୍ତାନା କିଜି ମାଚାର୍।
15ହେବେ ପାକାପାକି ଶହେ କଡ଼େ ଜାଣ୍ ମାଚାର୍। ହେପାଦ୍ନା ପିତର ହେୱାର୍ ବିତ୍ରେ ନିଲ୍ଚି ୱେଚ୍ଚାନ୍,
16“ଟଣ୍ଡାର୍କାଦେର୍, ଇମ୍ଣି ଯିହୁଦା ଯୀଶୁଙ୍ଗ୍ ମାନାୟାର୍ କେଇଦ ଆହିକିଦେଙ୍ଗ୍ ସାଇଜ କିଜି ମାଚାନ୍, ତା ବିଷୟରେ ପବିତ୍ର ଆତ୍ମା ଦାଉଦ ରାଜାତାଙ୍ଗ୍ ୱେଚ୍ଚି ମାଚାନ୍। ହେ ଯିହୁଦା ବିଷୟରେ ଦରମ୍ ସାସ୍ତର୍ତାକେ ଲେକାଆତି ବିଷୟ ପୁରା ଆନି ଦର୍କାର୍ ମାଚାତ୍। 17ଯୀଶୁ ହେୱାନିଙ୍ଗ୍ ପା ମା ଲେକେ ବାଚିକିଜି ମାଚାନ୍, ଆରେ ହେୱାନ୍ ପା ହେବାକିନି ପାଦ୍ ପାୟାଆଜି ମାଚାନ୍।
18ଯିହୁଦା ଯୀଶୁଙ୍ଗ୍ ଯିହୁଦି ନେତାର୍ କେଇଦ ଆହିକିତାନ୍। ଆରେ ହେୱାର୍ ହେୱାନିଙ୍ଗ୍ ଡାବୁଙ୍ଗ୍ ହିଜି ମାଚାର୍। ତାପାଚେ ଯିହୁଦା ହେ ନେତାରିଙ୍ଗ୍ ଡାବୁଙ୍ଗ୍ ଲେଉଟାୟ୍ କିତାନ୍। ଆରେ ଯିହୁଦା ହାଲ୍ଜି କକ୍ଲା ପାଟିଆଆଜି ତାରେନ୍ କାପ୍ଡ଼ା କିଜି ଆର୍ତିଲେ ତା ପଟ ପାଡ଼୍ଜି ୱାହିଙ୍ଗ୍ ହତ୍ତିକ୍। ଲାଗିଙ୍ଗ୍ ଯିହୁଦି ନେତାର୍ ହେ ଡାବୁଙ୍ଗ୍ ହୁଦାଙ୍ଗ୍ ର ଜମି କଡ଼୍ତାର୍। 19ଯିରୁଶାଲାମ ସହର୍ନି ମାନାୟାର୍ ଇ ୱିଜୁବେଣ୍ ପୁଚାର୍। ଲାଗିଙ୍ଗ୍ ହେୱାର୍ ତା ବାଷାତାଙ୍ଗ୍ ହେ ଜମି ତର୍ ‘ଆକେଲ ଦାମା’ ଇ ତର୍ନି ଅର୍ତ ନେତେର୍ ଜମି ଇଞ୍ଜି ତର୍ ହିତାର୍।
20ଇନେସ୍କି ଦାଉଦ ରାଜା ତା କେର୍କଣ୍ ବହିତାକେ ଲେକିକିତାନ୍ନା,
‘ତା ଇଲ୍ କାଲି ଆଜି ମାନେତ୍,
ହେ ଇଞ୍ଜ ଇନେର୍ ପା ବାହା କିମେର୍।’
ଦାଉଦ ରାଜା ଇଦାଙ୍ଗ୍ ଜେକନି ବହିତ ପା ଲେକିକିତାନ୍,
‘ତା ପାଦ୍ ଜେକନିକାନ୍ ପାୟା ଆୟେନ୍।’ ”
21-22ଲାଗିଙ୍ଗ୍, ମାପୃ ଯୀଶୁ ଆରେରଗ ଜିବୁନ୍ଆଜି ନିଙ୍ଗ୍ନି ବିଷୟରେ ସାକି ଆନି କାଜିଙ୍ଗ୍ ଯିହୁଦା ବାଦୁଲ୍ରେ ଆରେ ରକାନ୍ ମାନି ଦର୍କାର୍। ଯୋହନତାଙ୍ଗ୍ ଯୀଶୁ ଡୁବନ୍ ଅନି ଆରମ୍ତାଙ୍ଗ୍, ଆରେ ହେୱାନ୍ ସରଗ୍ଜପି ହାନିପାତେକ୍ ଇମ୍ଣାକାର୍ ମା ହୁଦାଙ୍ଗ୍ ମାଚାର୍, ହେୱାର୍ ବିତ୍ରେତାଙ୍ଗ୍ ରକାନିଙ୍ଗ୍ ବାଚିକିନି ଦର୍କାର୍।
23ହେବେ ହେୱାର୍ ରିୟାରିଙ୍ଗ୍ ବାଚିକିତାର୍। ହେ ରୱାନ୍ ତର୍ ଜୁସ୍ତ ଟାଇଟେଲ୍ ମାନି ଯଶେପ୍ତିଙ୍ଗ୍ ଇନେରିଙ୍ଗ୍ ବର୍ଶବା ଇଞ୍ଜି ଇନାର୍, ଆରେ ରୱାନ୍ ତର୍ ମଥିୟ। 24-25ହେୱାର୍ ଇଲେକେ ପାର୍ତାନା କିତାର୍, “ଏ ମାନ୍ତି କାତା ପୁନି ମାପୃ, ଯିହୁଦା ବାଚିକିତି ଚେଲା ପାଦ୍ ପିସ୍ତି, ଇମ୍ଣି ବାହାତାକେ ହାନିକାତା ହେୱାନ୍ ହାଲ୍ୱାଦାଙ୍ଗ୍ ହାଃତାନ୍ ହେ ବାହାତାକେ ହାଞ୍ଜେଙ୍ଗ୍, ତା ବାଦୁଲ୍ରେ ଇ ରିୟାର୍ ବିତ୍ରେତାଙ୍ଗ୍ ଇନେରିଙ୍ଗ୍ ବାଚିକିତାୟ୍ନା, ମାଙ୍ଗେଙ୍ଗ୍ ୱେଚ୍ଚା।” 26ଆରେ ହେୱାର୍ ହେ ରିୟାର୍ ତର୍ଦାଙ୍ଗ୍ ଲାଟ୍ରି ପୁଟାଇ କିତାର୍। ମଥିୟ ତର୍ଦାଙ୍ଗ୍ ଲାଟ୍ରି ପୁଟା ଆତାତ୍। ତାପାଚେ ହେୱାନ୍ ଏଗାର୍ଜାଣ୍ ବାଚିକିତି ଚେଲାହିର୍ ହୁଦାଙ୍ଗ୍ ମାହା ଆତାନ୍।
Currently Selected:
ବାଚିକିତି ଚେଲାହିର୍ କାତା 1: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
