Zacarías 12
12
Jerusalén ya xcol ta libre
1Ha ini te sc'op Jehová sc'oblal Israel. Te Jehová te la slim bahel te ch'ulchan soc te la ya'be yich'o-ip te q'uinal, te ya ya'be sch'uhlel te ants-winiquetic, hich ya yal: 2Ya cac' te ha copa ya xc'oht te Jerusalén te ya yac' ya x'ahnlajanic spisil te pueblohetic ta sjoyobal; soc ha nix hich ya yich' contrahinel Judá te c'alal ya yich' joytayel ta guerra te Jerusalén. 3Ta hich ora ya cac' te ha muc'ul ton ya xc'oht te Jerusalén ta stojol spisil te pueblohetic; ya xlajic spisil te mach'atic ya sc'an ya sliquic hahchel. Spisil te nacionetic ta bahlumilal ya stsob sbahic ta scontrahinel. 4Ta hich ora ya jxiwteslan spisil te cawuhetic, soc ya jsohcteslambe sjolic te jmoheletic ta cawu. Pero ya cac' jsit ta stojol te sna Judá, soc ya jtup'ticlambe sit spisil te cawuhetic yu'un te nacionetique. 5Te jtsobawetic yu'un Judá hich ya yal ta yo'tanic: Ta scuenta Jehová te scuentahinej spisil, te Dios yu'unic, ay yipic te mach'atic nahinemic ta Jerusalén, xchihic. 6Ta hich ora ya cac' te hich ya xc'ohtic te jtsobawetic yu'un Judá te bin ut'il yawil c'ahc' ta yohlil busul si', soc hich te bin ut'il tsumbil c'ahc' ta yohlil tombil trigo. Ya slajinlan ta wa'el soc ta q'uexam spisil te nacionetic ta sjoyobal, pero te mach'atic nahinemic ta Jerusalén ya xnahinic yan buelta ta mero slumalic.
7Te Jehová nahil ya yac' ta libre te nahilpaq'uetic yu'un Judá, scuenta yu'un te yutsilal te sna David soc te mach'atic nahinemic ta Jerusalén ma ba c'ax hich ya xtohy sc'oblalic a te bin ut'il te sna Judá. 8Ta hich ora te Jehová ya scanantay te mach'atic nahinemic ta Jerusalén. Te mach'atic mayuc yipic, ta hich ora hich ya xc'ohtic te bin ut'il David, soc te sna David hich ya xc'oht te bin ut'il Dios, hich ya xc'oht te bin ut'il ch'ul a'bat yu'un Jehová te ya xnahilij bahel ta stojolic. 9Ta hich ora ya jlajin spisil nacionetic te ya xtal scontrahin te Jerusalén.
10Ya jmal cohel jun espíritu yu'un yutsil-o'tanil soc yu'un sc'oponel Dios ta stojol te sna David soc te mach'atic nahinemic ta Jerusalén. Ya me yilonic, ho'on te la slowonic, ya me smel yo'tanic hich te bin ya smel yo'tanic yu'un hip jtuhl nich'anil te chame, ya me x'oq'uic yu'un hich te bin ya x'oq'uic yu'un te cham ba-nich'anil. 11Ta hich ora ay me bayel oq'uel ta Jerusalén, hich te bin ut'il te oq'uel yu'un te Hadad-rimón ta spamlej yu'un Meguido. 12Ya smel yo'tan te q'uinal, te chahpalchahp na ta stuquelic: ha te mach'atic yu'un te sna David, soc parte te antsetic yu'unic; te mach'atic yu'un te sna Natán, soc parte te antsetic yu'unic; 13te mach'atic yu'un te sna Leví, soc parte te antsetic yu'unic; te mach'atic yu'un te sna Simei, soc parte te antsetic yu'unic; 14hich ta hich ta spisil ta chahp na, soc parte te antsetic yu'unique.
Currently Selected:
Zacarías 12: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.