Zacarías 11
11
1¡Líbano, jama te ochibaletic awu'un,
ac'a lajuc ta c'ahc' te cedrohetic awu'une!
2Ahcanajan, ciprés,
como buchix te cedro,
como jimbilic cohel te t'ujbil te'etique.
Ahcanajanic, jihte'etic yu'un Basán,
como ts'etbilix te tohyem te'etique.
3Chican te ahcanajel yu'un te jcanan-tuminchijetic,
como lajix te yutsil aquetic yu'unique;
chican xjuyetic te tut choj,
como lajix te yutsil pimil ha'maletic ta Jordán.
Te jcananetic te ma xtuhunic
4Hich yaloj te Jehová, te Dios cu'un: Canantaya te tuminchijetic te chapal sc'oblalic te ya yich'ic milele. 5Ya xmilotic yu'un te mach'atic ya smanic, ma muliluc ya ya'iyic. Te mach'atic ya schonic, hich ya yalic: Wocol yal Jehová, yu'un jc'ulejonix, xchihic. Ni ha'uc te jcananetic yu'unic ya sna'beyic yo'bolil sbahic. 6Ha yu'un ma ba ya jna'beyix yo'bolil sbahic te mach'atic nahinemic ta q'uinal, xchi te Jehová. Tuhlultuhl ya cac'ticlan ta sc'ab spat-xuhc soc ta sc'ab te ajwalil yu'unique. Ya me sjinic te q'uinale, ma ba ya jcoltay loq'uel ta sc'abic, xchi.
7Ha yu'un la jcanantay te tuminchijetic te chapal sc'oblalic ya yich'ic milel, ha te pobrehetic yu'un te jtsohb tuminchijetique. La jle cheb nahbate'eletic: te june la jca'be sbihilin Yutsil-o'tanil, te yane Junax ayic; hich la jcanantay te tuminchijetique. 8Ta junax u la jloq'ues oxtuhl jcananetic, como c'ax co'tan yu'unic, soc ha'ic nix la yihlayonic.
9Ha yu'un hich la jcal: ¡Ma ba ya x'ochonix ta jcanantaywanej awu'unic! ¡Teme ay ya xcham, ac'a chamuc; teme ay ya xch'ay, ac'a ch'ayuc! Te jayeb xan ya xhilic, talel c'axel ac'a sti'ticlan sbahic, la jcut.
10Patil la jtsac te jnahbate' Yutsil-o'tanil sbihil, la jwac', hich la jihn te chapbil-c'op te la jchap soc spisil te nacionetique. 11Ta hich ora jihn te chapbil-c'op, soc hich la sna'ic te pobrehetic yu'un te jtsohb tuminchijetic te yac yilbelonic te ha te sc'op te Jehová. 12Hich la jcalbe: Teme lec yac awa'iyic, tojbonic ca'tel; teme ma'uque, ac'a hiluc, la jcut. Ha yu'un la stojonic lajuneb scha'winic (30) ta sehp plata.
13Hich la yalbon te Jehová: Otsesa ta stsobojibal taq'uin, ¡ha te lequil jtojol yu'unique! xchi. Hich la jtsac te lajuneb scha'winic (30) ta sehp plata, la jcotses ta stsobojibal taq'uin yu'un te sna Jehová. 14Patil la jwac' te yan nahbate'el, ha te Junax ayic te sbihil, yu'un ya xjihn te jun yo'tan sbahic te Judá soc Israel.
15Hich la yalbon te Jehová: Ich'beya yan buelta te bintic ya xtuhun yu'un jtuhl jcanan te ma sna' q'uinal. 16Como ya jchicnajtes ta q'uinal jtuhl jcanan te ma ba ya scanantay te tuminchijetic te howiyemic, ma ba ya sle te alal tuminchij, ma ba ya spoxtay te waq'uem sbaquel, ma ba ya yic' bahel te lajem yip; ha ya swe'be sbaq'uetal te banti juhp'enic, soc ya sbots'be loq'uel te slots'.
17¡Ay me swocol te jcanan te ma xtuhun,
te ya yihquitay hilel te tuminchijetique!
¡Ac'a yich' ehchentesbeyel sc'ab ta espada,
soc te swa'el sit!
¡Ac'a taquijuc te sc'ab,
soc jc'axel ac'a tup'uc te swa'el sit!
xchi te Jehová.
Currently Selected:
Zacarías 11: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.