San Mateo 8

Jesús la slecubtes jtuhl jc'a'elchamel

1C'alal co tal ta wits te Jesús, bayel ants-winiquetic t'unot yu'un. 2Ay tal jtuhl winic te yich'oj c'a'elchamel, hul squejan sba ta stojol te Jesús, hich la yal: Cajwal, teme yac ac'an ya xhu' yac alecubteson, xchi.

3Te Jesús la shach sc'ab, la ya'be ta stojol, hich la yal: Yacuc, ya jlecubtesat, xchi. Ora ch'ay te sc'a'elchamel. 4Ha yu'un halbot yu'un te Jesús: Ilawil, ma me ayuc mach'a xawalbe ya'iy. Bahan, ac'a aba ta ilel ta stojol te sacerdote, soc ac'a te mahtanil yaloj Moisés, scuenta testigo ya xc'oht ta stojolic, xchi sc'oblal.

Jesús la slecubtesbe ya'bat jtuhl capitán-soldado

5C'alal och ta Capernaum te Jesús, tal ta c'oponel yu'un jtuhl capitán-soldado, hul ta sc'anel coltayel, 6hich la yal: Cajwal, ay jtuhl ca'bat puch'em ta jna, chamen schihal yoc sc'ab, bayel swocol yu'un, xchi hulel.

7Halbot yu'un te Jesús: Ya xbohon, ya xbaht jlecubtes, xchi.

8La sjac' te capitán-soldado: Cajwal, ma fuerzahuc te ha'at ya xbahat ta jna. Ha nax te yacuc xc'opojat, hich ya xlecub te ca'bate. 9Como te ho'one pasbilon ta mandar, soc ay soldadohetic te ya jpas ta mandar, ya calbe te jtuhle: Bahan, hich ya xbaht, soc ya calbe te yane: La', hich ya xtal; soc ya calbe te ca'bat: Pasa ini, hich ya spas, xchi.

10C'alal hich la ya'iy te Jesús, bayel yutsil la ya'iy, hich la yalbe te mach'atic t'umbilic yu'un: Jamal ya calbeyex, mayuc jtahoj ta Israel mach'a hich ay sch'uhunel yo'tan te bin ut'il ini. 11Ya calbeyex te ay tsobol ya xtalic ta stojol banti ya xloc' tal c'ahc'al soc ta banti ya xmahl c'ahc'al, pajal ya xc'oht shuhcan sbahic soc Abraham, Isaac, soc Jacob ta banti ay te cuentahinel yu'un te ch'ulchan. 12Yan te al-nich'aniletic te sc'oblal ayic ta cuentahinel yu'un te ch'ulchan ya xch'ojotic loq'uel ta fuera ta yihc'al q'uinal, tey ya xc'oht yoq'uetay sbahic soc ya sc'uxuxan yehic a, xchi. 13Ha yu'un te Jesús la yalbe te capitán-soldado: Bahan hiche, hich ya xc'oht ta pasel te bin ut'il ach'uhunej, xchi. Tey nix ta yorahil a lecub te ya'bate.

Jesús la slahmajtes te chamel snihal-me'el Pedro

14C'alal c'oht ta sna Pedro te Jesús, la yil te tsacbil ta c'ahc' soc ay ta swayib te snihal-me'el te Pedro. 15Ha yu'un la snit hahchel ta sc'ab, ora quehchaj te sc'ahc'ale; hich hahch ta mac'linwanej ta ora.

16Ta yihc'ubel q'uinal la yiq'uic tal bayel mach'atic ay pucuj ta yo'tanic; ta sc'op nax la sloq'ueslan te pucujetic soc la slecubteslan spisil te jchameletique. 17Hich c'oht ta pasel te bin yaloj te jalwanej Isaías: Ha la yich'botic te chamel cu'untic soc la scuchbotic te bin c'ux ya ca'iytic, te xchihe.

Mach'atic c'an st'unic te Jesús

18C'alal la yil te Jesús te joytaybil yu'un bayel ants-winiquetic, la yal mandar te ya xbahtic ta jehch ha'. 19Tal jtuhl escribano, hich la yalbe: Maestro, ya jt'unat ta bayuc ya xbahat, xchi.

20Pero la yal te Jesús: Te waxetic ay sch'enic, soc ay spechechic te ha'mal mutetique, yan te Nich'anil ay ta scuenta winic ma xweht ta banti ya smehtsan sba stuquel, xchi.

21Ay yan jnopojel yu'un te hich la yal: Cajwal, a'bon permiso te nahil ya xbaht jmuc hilel te jtate, xchi.

22Hich halbot yu'un te Jesús: T'unawon; ha nix ac'a smuc sbahic te mach'atic pajal chamen soque, xchi sc'oblal.

Jesús la scom ic' soc mar

23Och ta barco te Jesús soc t'unot ochel yu'un te jnopojeletic yu'une. 24Hahch ta ixtalanel ta tulan ic' te mar, ya c'an muluc te barco yu'un tulan stselajan te mar; pero wayal a te Jesús. 25Tal ta tijel yu'un te jnopojeletic, hich la yalic: ¡Cajwal, coltayawotic! ¡Ya me xlajotic! la yutic.

26Halbotic yu'un: ¿Bin yu'un ya xiwex, winiquetic te mayuc lec sch'uhunel awo'tanic? xchi sc'oblalic. Hich la stehc'an sba te Jesús, tulan la scom te ic' soc te mar, mero lamal hil te q'uinale. 27Xcham yo'tanic yu'un te winiquetic, hich la yalic: ¿Mach'a winiquil ini, te ch'uhumbil smandar yu'un ic' soc mar? xchihic.

Cheb winiquetic ay pucuj ta yo'tanic

28C'alal loc' ta jehch ti'mar ta sq'uinal te gadarenohetic, tal ta tahel yu'un cheb winiquetic te ay pucuj ta yo'tanic te loq'uic tal ta banti muquenaletic, bayel ya x'uts'inwanic, mayuc mach'a ya xhu' ya xc'axic tey ta be. 29Hich la yawtayic te Jesús: ¿Bin awochelotcotic a, Jesús Snich'anat Dios? ¿Tal bal awac'otcotic ta wocol te ma to ba stahoj yorahil? xchihic ta aw.

30Ay jtsohb bayel chitametic te namal to yac ta we'el tey a. 31Te pucujetic la yalbeyic wocol te Jesús: Teme yac atenotcotic loq'uel, tey me xawac'otcotic ochel ta jtsohb chitametic, xchihic.

32Bahanic, xchi sc'oblalic. Hich loq'uic soc bahtic ta banti ay te jtsohb chitametique. Spisil te jtsohb chitametic la sch'oj ochel sbahic ta mar te banti cohel sti'il, tey chamic a. 33Ahnic bahel te mach'atic yac scanantaybelic, baht yalic ta pueblo spisil te bintic c'oht ta pasel soc te bin pasbotic te winiquetic ay pucuj ta yo'tanic. 34Hich spisil te pueblo loc' tal stahic te Jesús, c'alal la yilic, la yalbeyic wocol te yacuc xloc' bahel tey ta slumalique.

Currently Selected:

San Mateo 8: TZH

Highlight

Copy