San Mateo 7

Sc'oblal yilbeyel ya'tel yan

1Ma me xawilbeyic ya'tel yan, scuenta yu'un ma ba ya x'ilot awa'telic a te ha'exe, 2como te bin ut'il yac awilbeyic ya'tel yan, hich nix ya x'ilot te awa'telic, soc te bin yilel yac ap'isbeyic, ha ni me hich yac awich'ic p'isbeyel. 3¿Bin yu'un yac awil te c'a'pal ochem ta sit te awermano, te ma ba yac awil te ts'amte' ay ta asit? 4¿Bin yu'un hich yac awalbe te awermano: A'bon jloq'uesbat te c'a'pal ochem ta asit, te xchihat, pero ha'at ay ts'amte' ta asit? 5¡Jchebal-o'tanat! Ha nahil xaloq'ues te ts'amte' ay ta asit, hich ya xhu' yac awil ta lec te yac aloq'uesbe te c'a'pal ay ta sit te awermano.

6Ma me xawa'beyic yixtalan ts'i'etic te bin ch'ultesbil, soc ma me xach'ojic bahel perlahetic ta stojol chitametic, scuenta yu'un ma ba ya sts'o'ic ta teq'uel soc te ya suhtic tal sbutsticlanex hilel.

Sc'oponel Dios soc te t'ujbil mandaril

7C'anahic, hich me ya x'a'botex. Lehahic, hich me yac atahic ta lehel. C'opojanic, hich me ya xjambotex. 8Como spisil te mach'atic ya sc'anic, ya me x'a'botic; te mach'a ya sle, ya me sta ta lehel; te mach'a ya stij puerta, ya me xjambot.

9¿Ay bal mach'a ta awohlilic, teme ya xc'ambot pan yu'un te yal-snich'an, ton bal ya ya'be swe'? 10O teme ya xc'ambot chay, ¿chan bal ya ya'be? 11Teme ha'ex te chopolex yac ana'ic ya'beyel lequil mahtanil te awal-anich'anic, ¿ma bal c'axuc to xan hich a te Atatic ay ta ch'ulchan ya yac'ticlambe bintic lec te mach'atic ay bin ya xc'ambot yu'unique?

12Ha yu'un spisil te bintic lec yac ac'an ya spasbeyex te yantique, ha nix hich xapasbeyic, yu'un hich ay ta Ley soc te bin yalojic te jalwanejetique.

Sc'oblal te tut puerta

13Ochanic bahel ta tut puerta; como muc' te puerta soc jamal te be te ya xbaht ta ch'ayel, soc tsobol mach'atic ya x'ochic tey a. 14Pero tut te puerta soc tut te be ya xbaht ta cuxlejal, mayuc tsobol mach'atic ya x'ochic tey a.

Ta scuenta sit yac ana'beyic sba

15Tsahtaya me abahic ta stojol te lotil jalwanejetic te sc'u'inejic snuhculel tuminchijetic, pero ta yutil ha ti'awal chojetic. 16Ya me ana'beyic sba ta scuenta te site. ¿Ya bal yich' tulel ts'usub ta ch'ixetic, o higo ta ch'ix-te'? 17Spisil te lequil te', lec sit ya yac'ticlan; yan te te' te ma lecuc, ma lecuc sit ya yac'ticlan. 18Te lequil te', ma xhu' ya yac' sit te ma lecuc; ha nix hich te te' te ma lecuc, ma xhu' ya yac' lec sit. 19Spisil te' te ma lecuc sit, ya yich' ts'etel soc ya yich' otsesel ta c'ahc'. 20Ha yu'un yac ana'be sba ta scuenta bin yilel te site.

Mayuc bin ora la jna'beyex abahic

21Ma spisiluc te mach'atic ya yalbonic: Cajwal, Cajwal, xchihic, te ya x'ochic te banti ay te cuentahinel yu'un te ch'ulchan, ha nax te mach'atic ya spasbeyic te bin ya sc'an yo'tan te Jtat ay ta ch'ulchan. 22Ta hich ora ay me tsobol mach'atic hich ya yalbonic: Cajwal, Cajwal, ¿yu'un bal ma ba la jpucbatcotic ta halel ac'op ta scuenta abihil, soc ta scuenta abihil la jloq'ueslancotic pucujetic, soc ta scuenta abihil la jpasticlancotic jchahp a'teliletic? xchihic me ta jtojol. 23Pero jamal ya calbeyic: Mayuc bin ora la jna'beyex abahic. Loc'anic ta jtojol, ha'ex te chopol awa'telique, ya me cutic.

Te cheb yich'o-ip

24Mach'ayuc a te ya ya'iy te c'op ini soc te ya spas te bin ya yal, ha ya jpaj soc jtuhl p'ijil winic te la spas sna ta sba muc'ul ton. 25Tal tulan ha'al, soc tal snojel ha' soc tulan ic', tulan la smaj te na, pero ma ba buch, como yich'oj hahchel yip ta sba muc'ul ton. 26Yan te mach'a ya ya'iy te c'op ini pero ma ba ya spas te bin ya yal, ha ya jpaj soc jtuhl winic te mayuc sp'ijil, te la spas sna ta hi'ileltic. 27Tal tulan ha'al, soc tal snojel ha' soc tulan ic', tulan la smaj te na, ora buch soc jc'axel jihn te nahe, xchi te Jesús.

28C'alal laj yo'tan ta c'op te Jesús, xcham yo'tanic te ants-winiquetic yu'un te nohptesel yu'une, 29como hich ya xnohpteswan te bin ut'il mach'a ay tulan ya'tel, ma hichuc te bin ut'il te escribanohetique.

Currently Selected:

San Mateo 7: TZH

Highlight

Copy