San Mateo 3

Yalel sc'op Dios te Juan J'ac'-ich'-ha'

1La sta yorahil tal te Juan te J'ac'-ich'-ha', hahch yal sc'op Dios ta jochol taquin q'uinal yu'un Judea, 2hich la yal: Suhtesa awo'tanic, como nopolix yorahil te cuentahinel yu'un te ch'ulchane, xchi. 3Ha nix te mach'a halbot sc'oblal yu'un te jalwanej Isaías:

Ha sc'op te mach'a hich ya x'awon ta jochol taquin q'uinal:

¡Chahpambeyahic sbe te Cajwaltic,

tojobtesbeyahic te behetic yu'une! xchi.

4Te Juan sc'u'inej stsotsel camello, soc nuhcul schucoj sch'uht a; ha swe'el te c'ulub soc chab. 5Loq'uic tal ta stojol te mach'atic ayic ta Jerusalén, spisil mach'atic ayic ta sq'uinal Judea soc spisil mach'atic nahinemic ta sjoyobal te muc'ul-ha' Jordán. 6Jamal la yal smulic, hich ac'ticlambot yich'ic ha' yu'un ta muc'ul-ha' Jordán.

7C'alal la yil te Juan te tal tsobol fariseohetic soc saduceohetic ta banti yac yac'bel ich'-ha', hich la yalbe: ¡Ha'ex sts'umbalex ti'awal chanetic! ¿mach'a la yalbeyex te ya me x'ahnex bahel ta stojol te ilimba talel yac? 8Ac'a chicnajuc sit te ya yac' ta ilel te suhtemix awo'tanic. 9Ma me hichuc xawal ta awo'tanic: Ha jtatcotic te Abraham, ma me xchihuquex, como ya calbeyex, te Dios ya xhu' ya sutp'in ta yal-snich'an Abraham ha'i tonetic ini. 10Te echej chapalix yu'un sbojel te slohp' te te'etique. Ha yu'un spisil te te'etic te ma ba lec sit ya yac' ya yich' ts'etel soc ya yich' otsesel ta c'ahc'.

11Melel te ho'one ha nax ya ca'beyex awich'ic ha' ta scuenta suhtesel-o'tanil, yan te mach'a yac ta talel ta jpat, te ma xtuhunon yu'un yich'beyel bahel step, ha toyol xan ya'tel a te bin ut'il te ho'one. Ha me ya ya'beyex awich'ic te Ch'ul Espíritu soc c'ahc'. 12Stsacojix ta sc'ab te sweluyojibal, ya yic'ay a te bin busul ta amac' yu'une. Ya me yotses ta yawil te trigo yu'un, soc te sts'ubil ya me schic' ta c'ahc' te mayuc bin ora ya xtup', xchi sc'oblalic.

A'bot yich' ha' Jesús

13Hahch tal ta Galilea te Jesús, tal ta Jordán ta banti ay te Juan, yu'un ya x'a'bot yich' ha' yu'un. 14Pero wocol la sc'an te Juan, hich la yal: Ya sc'an te ha'at yac awa'bon quich' ha', ¿ha'at bal ya xtalat ta jtojol? xchi.

15La sjac' te Jesús: Hich ac'a c'ohtuc ta ora ini, como hich ya sc'an ya jc'ohtestic ta pasel spisil bin stojil ta pasel, xchi. Hich la sch'uhun te Juan.

16Laj nax yich'bel ha' a te Jesús, loc' tal ta ha', jahm te ch'ulchan, soc la yil te Espíritu yu'un Dios yac ta cohel tal hich te bin ut'il stsuhmut soc luhtsaj ta stojol. 17Ay c'op chicnaj ta ch'ulchan te hich la yal: Ha Jnich'an ini te c'ux ta co'tan, te bayel yutsil co'tan ta stojol, xchi.

Currently Selected:

San Mateo 3: TZH

Highlight

Copy