San Mateo 2

Hulic ta lehaw p'ijil winiquetic

1C'alal ayin Jesús ta Belén te ay ta sq'uinal Judea, ta yorahil te ay ta ajwalil a te Herodes, talic ta Jerusalén p'ijil winiquetic te talemic ta stojol banti ya xloc' tal c'ahc'al, 2hich hul yalic: ¿Banti ay te ajwalil yu'un te judíohetic te ayinemixe? Como te ec' yu'un la jquilcotic ta banti ya xloc' tal c'ahc'al, ha yu'un talemotcotic ta sch'uhuntayel, xchihic.

3C'alal hich la ya'iy te ajwalil Herodes, hahch na'etel yu'un soc spisil Jerusalén. 4La stsob tal spisil te principal sacerdotehetic soc te escribanohetic yu'un te pueblo, la sjoc'obe ya'iyic banti ya x'ayin te Cristo. 5Hich la yalbeyic: Ta Belén te ay ta sq'uinal Judea, como hich ts'ihbabil hilel yu'un te jalwanej:

6Ha'at, Belén, te ayat ta sq'uinal Judá,

ma ba tut pueblohat yu'un te principaletic yu'un Judá;

como tey ya xloc' tal ta atojol jtuhl jtsobaw

te ya scuentahin te pueblo Israel cu'un, xchi.

7Ha yu'un te Herodes la sticon ta iq'uel tal ta muquen te p'ijil winiquetic, la sjoc'oy ya'iy ta lec bin ora chicnaj te eq'ue. 8La sticon bahel ta Belén, hich la yalbe bahel: Bahanic tey a, soc joc'oyahic ta lec banti ay te alale. Te c'alal yac atahic, a'bonic jna' scuenta yu'un ha nix hichon ya xbaht jch'uhuntay, xchi.

9C'alal laj ya'iybelic sc'op a te ajwalil, bahtic. Te ec' te yilojic ta stojol banti ya xloc' tal c'ahc'al, nahilij bahel yu'unic ha to c'alal quehchaj ta behel ta banti ay te alale. 10Bayel yutsil yo'tanic yu'un te c'alal la yilic te eq'ue. 11C'alal ochic bahel ta na, la yilic te alal soc te snan, ha te María. La squejan sbahic soc la sch'uhuntayic. La sjamic te yawil sc'uhlejalic, la ya'beyic smahtanin oro, pom soc mirra. 12Pero a'bot sna'ic ta swayichic te manchuc ya suhtic ta stojol Herodes. Ha yu'un yanix be a te banti suhtic bahel ta slumalique.

Bahtic ta ahnel ta Egipto

13Te c'alal suhtemiquix bahel a te p'ijil winiquetic, te ch'ul a'bat yu'un Cajwaltic chicnaj ta swayich te José, hich la yalbe: Hahchan, ic'a bahel te alal soc te snan, ahnan bahel ta Egipto. Tey me ya x'ayinex a ha to c'alal ya calbat. Como te Herodes ya me sle te alal yu'un ya smil, xchi sc'oblal.

14C'alal cux yo'tan te José, ahc'abal to a la yic' bahel te alal soc te snan, bahtic ta Egipto. 15Tey ayinic a ha to c'alal cham te Herodes, yu'un hich ya xc'oht ta pasel a te bin la yal te Cajwaltic ta scuenta te jalwanej, te hich la yal: Ta Egipto la jquic' loq'uel te Jnich'an, te xchihe.

16Te Herodes, c'alal la sna' te tse'layot yu'un te p'ijil winiquetic, bayel ilin yu'un, hich la sticon ta milel spisil te bic'tal alaletic ta Belén soc ta sjoyobal te ma to stahojic cheb ya'bilalic, hich te bin ut'il jayeb ha'bil halbot yu'un te p'ijil winiquetique. 17Hich c'oht ta pasel te bin yaloj te jalwanej Jeremías:

18Chicnaj c'op ta Ramá,

tulan mel-o'tan soc oq'uel,

ha te Raquel te yac yoq'uetaybel yalatac,

ma ba la sc'an muc'ubtesbeyel q'uinal ya'iy,

como lajic te yalataque, te xchihe.

19C'alal chamix a te Herodes, te ch'ul a'bat yu'un Cajwaltic la yac' sba ta ilel ta swayich te José ta Egipto, 20hich la yalbe: Hahchan, ic'a bahel te alal soc te snan, bahan ta sq'uinal Israel, como chamiquix te mach'atic ya c'an smilic te alale, xchi sc'oblal.

21Ha yu'un hahch te José, la yic' bahel te alal soc te snan, talic ta sq'uinal Israel. 22Pero te c'alal la ya'iy te ha Arquelao te la sjelolin ta ajwalil ta Judea te Herodes te state, la xi' te ya xbaht tey a. Pero ta swayich a'bot sna', hich baht ta sq'uinal Galilea, 23c'oht ta nahinel ta pueblo Nazaret sbihil, scuenta yu'un hich ya xc'oht ta pasel a te bin yaloj te jalwanejetic: Ya x'a'bot sbihilin Nazareno, te xchihique.

Currently Selected:

San Mateo 2: TZH

Highlight

Copy