Gálatas 5
5
Jc'axel ayinanic ta libre
1Te Cristo la yac'otiquix ta libre scuenta yu'un libre ayotic, ha yu'un jc'axel ayinanic ta libre, ma me xawac' abahic xan ta chuquel ta yugo yu'un mosohinel.
2Ho'on Pablohon ya calbeyex, teme yac awac' abahic ta a'beyel circuncisión, mayuc sc'oblal ya xc'oht awu'unic a te Cristo. 3Yan buelta ya cal, spisil winiquetic te ya yac' sbahic ta a'beyel circuncisión, ya sc'an ya spas spisil bin ya yal te Ley. 4Te jayebex te yac acuyic te ha toj ya xc'ohex ta scuenta te Ley, la aloq'ues abahic ta stojol te Cristo; yahlemex ta stojol te yutsil-o'tanil. 5Yan te ho'otcotic, ta scuenta te Espíritu yacotcotic ta smahliyel ta scuenta sch'uhunel co'tancotic te bin smuc'ulinej co'tancotic, ha te toj ya x'ilototcotic yu'un Dios, 6como ta stojol Cristo Jesús ma ha'uc ay sc'oblal teme quich'ojtic circuncisión o teme ma ba quich'ojtic circuncisión, ha ay sc'oblal te ay sch'uhunel co'tantic te ya x'a'tej ta scuenta sc'uxul co'tantic.
7Ta nahilal lec hahchex ta ahnimal, ¿mach'a la scomex ta sch'uhunel te smelelil c'ope? 8Te bin la ya'beyex anopic ini ma ha'uc talem ta stojol te mach'a la yiq'uex. 9Hich ay ta halel: Jteb nax levadura ya spajubtes spisil te we'bale, xchi. 10Ta scuenta te Cajwaltic sch'uhunej co'tan te ma ba yan bin yac anopique; pero te mach'a yac schebalc'optaybelex ya me x'a'bot castigo, mach'ayuc a. 11Quermanotac, teme yacon to ta yalel te ya sc'an circuncisión, ¿bin yu'unix a hiche te yacon ta uts'inel? Te hichuque, la yich'ix loq'uesel te bin chopol ya ya'iyic sc'oblal te cruz. 12¡Ayuc ya yehchentes sbahic ta c'axel te mach'atic yac sjimbelex awo'tanique!
13Ha'ex, quermanotac, ic'bilex scuenta yu'un libre ya x'ayinex; pero ma yu'unuc libre ayex ta spasel te bin ya smulan abaq'uetalic; ha me ya sc'an te talel c'axel yac awa'batin abahic ta scuenta sc'uxul awo'tanic. 14Como spisil te bin ya yal te Ley ya xc'oht ta pasel ta jp'ahl nax c'op ini: C'ux me xawa'iy ta awo'tan apat-axuhc hich te bin ut'il c'ux yac awa'iy aba ta awo'tan, xchi. 15Yan teme talel c'axel yac ati'ti' abahic soc yac alajin abahic, ila me abahic te manchuc jc'axel yac alajin abahique.
Te ya'tel ch'ich'-baq'uet soc te sit ya yac' te Espíritu
16Ha yu'un ya calbeyex, behenanic ta scuenta te Espíritu, ma me xapasic te bintic ya sc'an te apoco'-talelic, 17como te bin ya sc'an te jpoco'-taleltic ha scontrahinej te Espíritu, soc te bin ya sc'an te Espíritu ha scontrahinej te jpoco'-taleltique. Scontrahinej sbahic ta schebalic, hich ma xhu' awu'unic spasel te bin yac ac'an yac apasique. 18Teme ayex ta tojobtesel bahel yu'un te Espíritu, ma ba cuentahimbilex yu'un te Ley. 19Jamal chican te ya'tel te jpoco'-taleltic yu'un mulil: ha te antsiwej, antsinel, bin ilobtic sba, ma'q'uexlalil, 20sch'uhunel loc'omba, ilojel, contrahinwanej, tijtamba-c'op, xut'xut'-o'tanil, ilimba, tsaltamba-c'op, hach-c'op, jatamba, 21ti'ti'o'tantaywanej, yacubel, spasel bohlq'uin, soc yantic bintic pajal soc. Ya jtsitsex yu'un spisil ini, hich te bin ut'il la jcalbeyex ta nahil to, te mach'atic hich ya spasulanic ma ba ya x'a'bot yich'ic te cuentahinel yu'un te Diose.
22Yan te sit ya yac' te Espíritu, ha te sc'uxul-o'tanil, tse'el-o'tanil, lamal q'uinal, ya xcuhch yu'un, yutsil-o'tanil, jun-o'tanil, sch'uhunel-o'tanil, 23manso-o'tanil, soc ya xhu' yu'un scomel sba; mayuc ley te ya scontrahinlan ini. 24Como te mach'atic yu'unic Cristo, yac'ojiquix ta lajel ta cruz te spoco'-talelic te ya smulan spasel te bintic ya sc'an te sbaq'uetalique. 25Teme cuxulotic ta scuenta te Espíritu, ac'a behenucotic ta scuenta te Espíritu. 26Ma me jtoy jbahtic, ma me cuts'in jbahtic soc ma me talel c'axeluc ya jti'ti'o'tantay jbahtic.
Currently Selected:
Gálatas 5: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.