Gálatas 4
4
1Te bin ya jc'an ya cal, ha ini: Teme alal to te mach'a ya yich'be hilel sbiluc te stat, pajal c'ohem soc moso, aunque ha yajwal spisil, 2ay ta cuentahinel yu'un jcanantaywanejetic soc jcuentahinwanejetic ha to c'alal ya sta yorahil te chapal yu'un te state. 3Ha nix hichotic, te c'alal alalotic to a, ayotic ta mosohil yu'un te bintic scuenta te bahlumilale. 4Pero te c'alal la sta yorahil, Dios la sticon tal te Snich'an, te alatayot yu'un ants soc cuentahinot yu'un te Ley, 5scuenta yu'un ya yac' ta libre te mach'atic cuentahimbilic yu'un te Ley, scuenta yu'un ya x'ic'ototic ta al-nich'anil. 6Te bin ut'il yal-snich'anex Dios, ha la ya'beyex ta awo'tanic te Espíritu yu'un te Snich'an, te hich ya yal: ¡Abba, Jtat! xchi. 7Ha yu'un ma ba mosohatix, ha al-nich'anilatix; soc te bin ut'il al-nich'anilat, Dios la yac' te yac awich'be hilel te bintic ay yu'un ta scuenta Cristo.
Tsitsel yu'un ma ba ya yac' xan sbahic ta mosohil
8Ta nahil to, te c'alal ma ba la ana'beyic sba te Diose, ayex ta mosohil yu'un bintic ma ha'uc diosetic. 9Pero yo'tic, te bin ut'il yac ana'beyiquix sba te Diose, o lec xan ya caltic te na'bilexix abahic yu'un Dios, ¿bin yu'un te ya xcha'suhtex xan ta apatic ta stojol te bintic mayuc yip soc te bintic scuenta bahlumilal, te c'an awac' xan abahic ta mosohil yu'un? 10Yac acanantayic c'ahc'aletic, uhetic, te ya sjel sba snahtil soc scomil c'ahc'al, soc te ha'biletique. 11Ya jxi' te tojol a'tejemon ta awohlilic.
12Awocolicuc, quermanotac, hichuc me ya xc'ohex te bin ut'il te ho'one, como ha nix hich c'ohon te bin ut'il ayexe. Mayuc bin chopol la apasbonic, 13pues ana'ojic te ta scaj chamel te la jcalbeyex awa'iyic ta shahchibal te lec yach'il c'ope. 14Aunque c'ax awocolic yu'un te ayon ta chamel, ma ba la ap'ajonic soc ma ba la awihlayonic yu'un, hich la awic'onic te bin ut'il ch'ul a'bat yu'un Dios, hich te bin ut'il Cristo Jesús. 15¿Banti ayix a te yutsil awo'tanic te ay ta nahil to? Como ya cal ta testigo-c'op, te hu'uc awu'unic, la aloq'ues asitic yu'un yac awa'bonic te hichuque. 16¿Yu'un bal acontra c'ohemonix yu'un te la jcalbeyex te bin melele?
17Te yantic xut'et yo'tanic ta atojolic, pero ma ha'uc yu'un alequilic; ha nax ya sc'anic te parte yac awac' abahic ta jtojolcotic, scuenta yu'un ayuc xut'et awo'tanic ta stojolic a. 18Lec te ay xut'et awo'tanic spisil ora yu'un te bin leque, ma ha'uc nax te c'alal joquinejex a. 19Cal-jnich'nabex, te yac ta c'axel xan jwocol yu'un yac calataybelex ha to c'alal ya xchicnaj te stalel Cristo ta awo'tanic, 20co'tan ayucon ta awohlilic ta ora ini soc te yacuc xyanij te bin ut'il ya xc'opojon, yu'un xna'et co'tan awu'unic.
Sc'oblal Sara soc Agar
21Halbonic ca'iy, ha'ex te yac ac'anic cuentahinel yu'un te Ley, ¿ma bal lajuc awa'iyic bin ya yal te Ley? 22Como ts'ihbabil hilel te ay cheb snich'nab te Abraham, te jtuhle, ha yal te moso-ants, te yane, ha yal te ants ay ta libre. 23Te yal te moso-ants ayin ta scuenta ch'ich'-baq'uet, yan te yal te ants te ay ta libre, ayin ta scuenta te bin yaloj te Diose. 24Ha sloc'ombahil c'op ini, como te cheb antsetic, ha seña yu'un te cha'chahp chapbil-c'op; te jchahp tal ta wits Sinaí te la yalatay te mach'atic ayic ta mosohil; ha te Agar. 25Como te Agar, ha te wits Sinaí te ay ta sq'uinal Arabia, soc pajal c'ohem soc te Jerusalén te ay ta ora ini te pajal ay ta mosohil soc te yalataque. 26Yan te Jerusalén ta toyol, libre ay stuquel, ha jnantic te ho'otique, 27como hich ts'ihbabil:
¡Tse'eluc me awo'tan,
ha'at jma'alat te ma ba alajemat;
awonan soc yutsil awo'tan,
ha'at te ma ba yac awa'iybe sc'uxul alajel!
como c'ax hich ay yalatac a te ants te ihquitaybil
te bin ut'il te ants te ay smamalal, xchi.
28Ha yu'un, quermanotac, ho'otic al-nich'anotic ta scuenta te bin yaloj Dios, hich te bin ut'il Isaac. 29Pero hich te bin ut'il ta namey, te mach'a ayin ta scuenta ch'ich'-baq'uet la yuts'in te mach'a ayin ta scuenta te Espíritu, ha nix hich ta ora ini. 30Pero ¿bin ya yal ta Shun Dios?: Tena loq'uel soc yal te moso-ants, como ma pajaluc ya x'a'bot yich' hilel bintic ay yu'un te stat soc te yal te ants te libre ay, xchi. 31Ha yu'un, quermanotac, ma ha'uc yalotic te moso-ants, ha yalotic te ants te libre ay.
Currently Selected:
Gálatas 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.