2 Corintios 6
6
1Ha yu'un te bin ut'il joc jbahcotic ta a'tel soc Dios, ya jtsitsexcotic te manchuc tojoluc ya xc'oht te la awich'iquix c'uxultayel yu'un Dios. 2Como hich ya yal:
Ta yorahil ich'tel ta cuenta la jca'iybat ac'op,
soc ta sc'ahc'alel colel la jcoltayat, xchi.
Ha yorahilix ini, ha'ix sc'ahc'alel colel.
3Mayuc mach'a ya ca'becotic te ya sc'ohchin sbahic a, scuenta yu'un ma ba ya xbohlob sc'oblal te ca'telcotic ta stojol Dios. 4Pero ta spisil hich ya cac'cotic ta na'el te ha a'batotcotic yu'un Dios te bin ut'il bayel cuhchem cu'uncotic, soc te c'alal ayotcotic ta uts'inel, c'alal mayuc bin la jtahcotic, c'alal ay jwocolcotic, 5c'alal ayotcotic ta majel, ta chuquel, ta tenel ta c'op, ta tulan a'tel, ta yahwayel, ta wi'nal; 6ya xchicnaj ta scuenta te lecubtesbil jcuxlejalcotic, te ay bin na'bil cu'uncotic, te cuhchem cu'uncotic, te ay yutsil co'tancotic, te ay Ch'ul Espíritu ta co'tancotic, ay sc'uxul co'tancotic ta melel; 7ya xchicnaj ta scuenta te smelelil c'op ya calcotic soc ta scuenta te yu'el Dios, ta scuenta te quich'oj ca'tejibcotic yu'un te bin stojil ta pasel, te ay ta jwa'elcotic soc ta jq'uexamcotic; 8ta scuenta te ay ich'bilotcotic ta muc' soc te ay ma ba ich'bilotcotic ta muc', te ay ma lecuc jc'oblalcotic soc te ay lec jc'oblalcotic; cuybilotcotic ta jlo'loywanej, pero smelelil bin ya calcotic; 9sjel te ma ba na'bil jbahcotic, pero na'bil jbahcotic; chamenotcotic ya ya'iyic, pero cuxulotcotic; quich'ojcotic majel, pero ma ba lajotcotic yu'un; 10hich ya'iyel te jmeloj co'tancotic, pero spisil ora tse'el co'tancotic; hich ya'iyel te pobre ayotcotic, pero tsobol mach'atic ya xc'uhlejub ta jcuentacotic; hich ya'iyel te mayuc bin ay cu'uncotic, pero spisil bintic ay cu'uncotic.
11Quermanotac corintohetic, jamal la jc'oponexcotic, soc la jambeyexcotic te co'tancotique. 12Mayuc la jmuc ta co'tancotic te bin ut'il c'uxex ta co'tancotic, yan te ha'exe ma ba ajamoj awo'tanic ta jtojolcotic. 13Scuenta yu'un hich nix awo'tanic te bin ut'il te co'tancotic, hich ya jc'oponex te bin ut'il cal-jnich'nab: Jama awo'tanic ec.
Templohotic yu'un te cuxul Dios
14Ma me junuc yugo awu'unic soc te mach'a ma ba sch'uhunejic Dios, como ¿bin ut'il jun ya xc'oht soc te bin stojil te bin ma stojiluc? Soc ¿bin ut'il jun ya xc'oht te sacal q'uinal soc te yihc'al q'uinale? 15¿Bin ut'il c'an junuc yo'tan sba soc Cristo te Satanás? Soc ¿bin ut'il c'an junuc yo'tan soc te mach'a sch'uhunej te mach'a ma ba sch'uhuneje? 16¿Bin ut'il te jun ya schap sc'opic te templo yu'un Dios soc te loc'ombahetique? Ha'ex templohex yu'un te cuxul Dios, hich te bin ut'il yaloj te Diose:
Ya xnahinon soc ya xbehenon ta yohlilic;
ho'on Dioson yu'unic ya xc'ohon,
soc ha pueblo cu'un ya xc'ohtic.
17Ha yu'un loc'anic tal ta yohlilic,
parte me xawac' abahic, xchi te Cajwaltique.
Ma me xapiquic te bin bohloben sc'oblal,
hich ya quiq'uex ta jtojol a.
18Ho'on Atatonic ya xc'ohon,
ha'ex ach'ix queremetic cu'un ya xc'ohex,
xchi te Cajwaltic te spisil ya xhu' yu'une.
Currently Selected:
2 Corintios 6: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
