1 Timoteo 3
3
Bin yilel ya sc'an te ancianohetic
1Ha mero smelelil c'op ini: Teme ay mach'a yo'tanuc ya yich' ya'tel ta anciano,#3.1 O: obispo, ha te mach'a ya yich' ya'tel ta yilbeyel ya'tel yan. buen lec a'tel te ya sc'ane. 2Te anciano ya sc'an te mayuc bin ya sutot ta c'op yu'un, te jtuhl nax yihnam, ya stsahtay sba, ya xhu' scombel sba, lec stalel, ya x'otseswan ta sna, ya xhu' yu'un p'ijubteswanej, 3ma xyacub, lec yo'tan, ma orahuc ya x'ilin, lamaluc yo'tan soc ma xbic'taj yo'tan yu'un c'uhlejalil. 4Ya sc'an te sbehlal ya scuentahin mach'atic ay yu'un ta sna, te ya xch'uhumbot smandar yu'un te yal-snich'nab soc ich'bil ta cuenta yu'unic. 5(Como te mach'a ma sna' scuentahinel te mach'atic ay yu'un ta sna, ¿bin ut'il c'an hu'uc yu'un scuentahinel te iglesia yu'un Dios?) 6Ma ocheluc to ta sch'uhunel Dios, teme repente ya stoy sba, te hich pajal ya x'a'bot stoj smul soc te pucuje. 7Soc ya sc'an te lec sc'oblal yu'un te mach'atic ma ba sch'uhunejic Dios, scuenta yu'un hich ma xbohlob sc'oblal soc ma xyacot yu'un te pucuje.
Bin yilel ya sc'an te diáconohetic
8Ha nix hich te diáconohetic, ya sc'an te lec sc'oblalic, smelelil bin ya yalic, ma sna'ic yacubel, soc ma xbic'taj yo'tanic yu'un slehel taq'uin te ma stojiluc; 9ya sc'an te mayuc bin ya xhalbot ta yo'tanic a ya sch'uhunic te bin muquen ay yu'un te bin ay ta ch'uhunel. 10Nahil ac'a yich'ic tsajel; patil ya xhu' ya yich' ya'telic ta diáconohil, teme mayuc bin smulinejic. 11Ha nix hich te antsetic,#3.11 O: te yihnamic, ya sc'an te lec sc'oblalic, ma xlehawanic ta c'op, ya sc'an ya sna'ic stsahtayel sbahic soc jun yo'tanic ta stojol spisil bintic ay ta scuentahic spasele. 12Te diáconohetic ya sc'an te jtuhl nax yihnam, soc te ya sna'ic scuentahinel ta lec te yal-snich'nabic soc mach'atic ay yu'un ta sna. 13Como te mach'atic lec ya x'a'tejic ta diáconohil ya stahic ich'el ta cuenta soc ya stahic bayel yip yo'tanic ta sch'uhunel te Cristo Jesús.
Te bin muquen ay ta sch'uhunel Dios
14Aunque sc'oblal ya xtal quilat ta ora, pero la jts'ihbabat ini 15scuenta yu'un, teme ma ba ora c'ohone, ya me ana' bin ya sc'an yac apas ta sna te Diose, ha te iglesia yu'un te cuxul Dios, te yoyal soc te yich'o-ip yu'un te smelelil c'ope. 16C'ax muc' sc'oblal te bin muquen ay ta ch'uhunel te Diose, hich te bin ut'il ya yal:
Ha chicnaj#3.16 Ay antiguo hunetic te ya yal: Dios chicnaj ta ch'ich'-baq'uet,
ac'ot ta na'el yu'un te Espíritu te toj yo'tan,
ilot yu'un te ch'ul a'batetic,
halbot sc'oblal ta yohlil te jyanlumetic,
ch'uhunot ta bahlumilal,
ic'ot mohel ta utsilal.
Currently Selected:
1 Timoteo 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
