1 Timoteo 2

Bin ut'il ya sc'an c'oponel Dios

1Ha nahil ya jtsits spisilic te ya me sc'oponic Dios, te ay bintic ya sc'ambeyic soc te ya yalbeyic wocol Dios yu'un spisil ants-winiquetic, 2soc te ajwaliletic soc spisil mach'atic ay ya'telic, scuenta yu'un lamaluc me q'uinal ya x'ayinotic soc junuc co'tantic ta sch'uhunel Dios soc lecuc jc'oblaltic a. 3Como ha lec ini soc ha lec yo'tan Dios yu'un, te Jcoltaywanej cu'untic, 4te yo'tanuc ya xcol spisil ants-winiquetic soc te yacuc xc'oht ta yo'tanic te smelelil-c'ope; 5yu'un jtuhl nax Dios ay soc jtuhl nax te mach'a ya xc'opoj yu'un ants-winiquetic ta stojol te Diose, ha te winic Jesucristo, 6te la yac' sba ta lajel yu'un smambeyel scolel spisilic, ha te la yich' halel ta testigo c'op te c'alal la sta yorahil. 7Ha scuentahil te la jquich' ca'tel ta yalel sc'op Dios soc ta jpuc-c'op soc ta maestro yu'un te jyanlumetic yu'un ya ca'be sna'ic bin ay ta ch'uhunel soc bin a te smelelil c'ope. Melel te bin ya cal ta stojol Cristo, ma jlotuc.

8Ha yu'un ya jc'an te ya sc'oponic Dios ta bayuc te winiquetic, te mayuc ilimba soc mayuc hach-c'op a ya shach sch'ul c'abic. 9Soc te scuentahiluc ya slap sc'u'-spaq'uic te antsetic, te stojiluc soc ma ba c'ax bayel ch'albilic: ha te ma ba c'ax ch'albil sjolic, o te ch'albil ta oro, perla, o slapojic c'u'ul pac'aletic te bayel stojolic, 10ac'a sch'ahl sbahic a te ta lequil a'teliletic, hich te bin ut'il ya sc'an pasel yu'un antsetic te sch'uhunejic te Diose. 11Te ants ac'a slahman sba ta snopel soc peq'ueluc yo'tan. 12Ma ba ya cac' te ya xp'ijubteswan te ants ta stojol winic o te ya scuentahin; ya me slahman sba. 13Como ha nahil la yich' pasel te Adán, patil te Eva; 14soc ma ha'uc lo'loyot te Adán, ha lo'loyot te ants, hich la sta smul a. 15Pero ya xcol ta scuenta alajel, teme ay sch'uhunel yo'tan, sc'uxul yo'tan, ch'ultesbil soc lamal yo'tan ya x'ayin.

Currently Selected:

1 Timoteo 2: TZH

Highlight

Copy