1 Samuel 28
28
1Ta hich ora la stsob sbahic te soldadohetic yu'un te filisteohetic yu'un ya ya'be guerra te Israel. Te Aquis la yalbe te David: Na'a me te yac ajoquinon bahel ta guerra soc te winiquetic awu'une, xchi.
2La sjac' te David: Lec ay, ya me awil bin ya xhu' ya spas te a'bat awu'une, xchi.
Lec ay, ya cac'at ta jcanan cu'un te jayeb c'ahc'al cuxulon, xchi te Aquis.
Saúl soc j'ic'-ch'uhlelal ants ta Endor
3Te Samuel chamenix a, spisil Israel la yoq'uetayiquix soc la smuquiquix ta Ramá ta slumal. Te Saúl stenojix loq'uel ta q'uinal a te j'ic'-ch'uhlelaletic soc te jna'ojeletique.
4Te filisteohetic la stsob sbahic, tal spas scampamentohic ta Sunem. Hich te Saúl la stsob spisil Israel, la spas scampamentohic ta Gilboa. 5Te Saúl c'alal la yil te campamento yu'un te filisteohetic, la xi', u'untaybot yo'tan yu'un xiwel. 6Te Saúl la sjoc'obe te Jehová, pero te Jehová ma ba la sjac' ta scuenta swayich o ta Urim o jalwanejetic. 7Ha yu'un te Saúl la yalbe te a'batetic yu'un: Lehbonic jtuhluc ants te ya sna' yiq'uel tal ch'uhlelal, yu'un ya xbohon ta sjoc'obeyel, xchi.
Te a'batetic yu'un la sjaq'uic: Ay jtuhl ants ta Endor te ya sna' yiq'uel tal ch'uhlelal, xchihic.
8Hich te Saúl la slap yan c'u'ul, hich la syanijtes sba a. Ta ahc'abal baht soc cheb winiquetic ta sc'oponel te antse, hich c'oht yalbe: Awocoluc, c'opombon jun ch'uhlelal, ic'bon tal te mach'a ya calbat, xchi.
9La sjac' te antse: Ana'oj te bin la spas te Saúl, te la stenticlan loq'uel ta q'uinal te j'ic'-ch'uhlelaletic soc te jna'ojeletic. ¿Bin yu'un yac awa'bon jyacol yu'un ya xlajon? xchi.
10Pero te Saúl la yal ta jamal ta stojol Jehová, hich la yal: ¡Yiloj Jehová! mayuc bin chopol ya xc'oht ta acuenta yu'un, xchi.
11Ha yu'un la yal te antse: ¿Mach'a a te yac ac'an te ya quic'bat tal? xchi.
Ic'bon tal te Samuel, xchi te Saúl.
12Te ants c'alal la yil te Samuel, tulan hahch ta aw yu'un soc hich la yalbe te Saúl: ¿Bin yu'un la alo'loyon? ¡Ha'at Saulat! la yut.
13Hich la yal te ajwalil: Ma xiwat. ¿Bin la awil? xchi.
Ya quil espíritu te yac ta mohel tal ta q'uinal, xchi te antse.
14¿Bin yilel? xchi te Saúl.
Yac ta talel jtuhl mamal te potsol ta snahtil-c'u', xchi te antse.
Te Saúl la sna' te ha te Samuel. La spahcan sba ta lum ta stojol.
15Te Samuel hich la yalbe te Saúl: ¿Bin yu'un yac awuts'imbelon te la awac' mohucon tal? xchi.
La sjac' te Saúl: Ayon ta tulan wocol; ya ya'bon guerra te filisteohetic, soc spihtesejonix te Diose. Ma ba ya sjac'bonix jc'op ta scuenta jalwanejetic o ta wayichiletic. Ha yu'un la jquic'at scuenta yu'un yac awalbon te bin ya sc'an ya jpas, xchi.
16La sjac' te Samuel: ¿Bin yu'un ho'on yac ajoc'obon, teme Jehová la spihtesatix soc teme ha acontra c'ohemix? 17Te Jehová hich la spasbat te bin la yal ta jcuenta. La spojbatix te awa'tel ta ajwalil, ha la ya'beyix te amohlol David. 18Te bin ut'il ma ba la ach'uhumbe sc'op te Jehová, soc ma ba la apas te bin la sc'an te sc'ahc'al yilimba Jehová ta stojol Amalec, ha scuentahil te hich la spasbat yo'tic te Jehová. 19Te Jehová ya me yac' ta sc'ab filisteohetic te Israel soc te ha'ate. Pajel ha'at soc anich'nab ya me ajoquinonic li'i. Soc te Jehová ya me yac' ochuc ta sc'ab filisteohetic te soldadohetic yu'un Israel, xchi.
20Ora nax puch' ta lum te Saúl, bayel xiw yu'un te bin la yal te Samuel. Mayuquix yip, como sjunal c'ahc'al soc sjunal ahc'abal mayuc bin la swe'. 21Tal ta stojol Saúl te antse, c'alal la yil te u'untaybot yo'tan yu'un xiwel, hich la yalbe: Te awa'bat la sch'uhumbatix ac'op; ma ba la jxi' te ya xlajon, la jpas te bin la awalbon. 22Ha yu'un, awocoluc, ich'beya ta cuenta te sc'op te a'bat awu'une. Ya cac' jtebuc we'elil ta atojol yu'un ya xwe'at, scuenta yu'un hich yac awich' xan awip a te c'alal ya xbahate, xchi. 23Ma ba la sc'an te Saúl, hich la yal: Ma ba ya jwe', xchi.
Pero te a'batetic yu'un soc te ants la ya'be fuersa, hich la sch'uhun. Hahch ta lum, la shuhcan sba ta ba wayibal. 24Te ants ay jcoht tut juhp'en wacax ta sna; ora baht smil. Soc la swots' harina, la spas ta pan te ma ba yich'oj levadura. 25La ya'be ta stojol Saúl soc te a'batetic yu'un, hich we'ic, patil bahtic ta yorahil nix ta ahc'abal.
Currently Selected:
1 Samuel 28: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
