1 Samuel 27
27
David ay ta sq'uinal filisteohetic
1Hich la yal ta yo'tan te David: Ya me sta yorahil te ya xlajon ta sc'ab te Saúl. Ha lec ya xbohon ta ahnel ta sq'uinal filisteohetic, scuenta yu'un hich ma ba ya sna'onix a te Saúl, soc ma ba ya slehonix ta sjoyobal sq'uinal Israel, hich me ya xcolon ta sc'ab a, xchi. 2Ha yu'un te David soc te lajunwinic scha'bahc' (600) swinictac joquimbil yu'un, hahchic ta behel, c'ohtic ta Aquis snich'an Maoc, ajwalil yu'un Gat. 3Te David soc te swinictac nahinic soc Aquis ta Gat, jujutuhl soc te mach'atic ay yu'une. Te David joquinot yu'un schebal yihnam, ha te Ahinoam te talem ta Jezreel soc te Abigail te me'ba' ants yu'un Nabal ta Carmel. 4C'alal halbot te Saúl te baht ta ahnel ta Gat te David, la yihquitay slehel.
5Te David hich la yalbe te Aquis: Teme lecon ta asit, a'bon lugar ta banti junuc tut pueblo yu'un ya xnahinon tey a. Como ¿bin yu'un ya sjoquinat ta nahinel ta pueblo yu'un ajwalil te a'bat awu'une? xchi.
6Hich te Aquis la ya'be ta hich ora te Siclag. Ha scuentahil te ha yu'un ajwaliletic yu'un Judá c'oht te Siclag c'alal ora. 7Te David halaj ta nahinel jun ha'bil soc chaneb u ta sq'uinal filisteohetic. 8Te David ya xmo bahel soc te winiquetic yu'un ta spojbeyel sbiluquic te gesuretic, gezrahetic soc te amalequetic; como nameyix te nahinemic tey ta q'uinal c'alal Shur ha to ta sq'uinal Egipto. 9Te David c'alal loc' bahel ta q'uinal ta poj-biluquetic, mayuc jtuhluc ants-winic te cuxul la yihquitay hilel. Ya yic'ticlan bahel te tuminchijetic, wacaxetic, burrohetic, camellohetic soc sc'u' spaq'uic, patil ya suht bahel ta stojol Aquis. 10C'alal hich ya xjoc'obot yu'un Aquis: ¿Banti c'ohex ta poj-biluquetic nax? teme xchihe, hich ya yal te David: Ta Neguev yu'un Judá, o ta Neguev yu'un Jerameel, o ta Neguev yu'un te queneohetic, xchi.#27.10 Neguev: o: stojol sur.
11Te David mayuc jtuhluc ants-winic ya yac' te cuxul a ya xc'oht ta Gat, yu'un hich ya yal: Scuenta yu'un ma xyac'otic ta na'el a, te hich ya yalic: Hich la spas te David, te xchihique. Hich la spasulan te jayeb c'ahc'al nahin ta sq'uinal te filisteohetique. 12Te Aquis ya sch'uhun te bin ya yal te David, hich ya yal ta yo'tan: Te David jc'axel ihlaybil c'ohtix yu'un te slumal Israel, hich a'bat cu'un ya xc'oht spisil ora, xchi yu'un.
Currently Selected:
1 Samuel 27: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
