1 Samuel 13
13
Ya ya'beyic guerra te filisteohetic
1Ayix jun ha'bil yochel ta ajwalil a te Saúl; soc te c'alal ayix ta ajwalil cheb ha'bil a#13.1 Ay yan antiguo hunetic te ya yalic: Ay lajuneb scha'winic (30) ya'bilal a te Saúl te c'alal och ta ajwalil, ay ta ajwalil yu'un Israel cheb yoxwinic (42) ha'bil. 2 Te Saúl la stsa... 2la stsa j'ohlil swaxacbahc' (3,000) winiquetic yu'un Israel; ho'bahc' (2,000) ta tuhl joquinot yu'unic ta Micmas soc ta witsiltic yu'un Bet-el, j'ohlil yoxbahc' (1,000) ta tuhl la sjoquinic Jonatán ta Gabaa yu'un Benjamín. Te jayeb xan hil la sticonlan suhtel ta snahilpaq'uic. 3Te Jonatán la ya'be guerra te jchahp filisteo soldadohetic te ayic ta Gabaa; hich la ya'iyic te filisteohetique. Ha yu'un te Saúl la yac' ta oq'uesinel xulubil ta spahmal q'uinal, hich la yal: ¡Ac'a me ya'iyic te hebreohetique! xchi.
4Spisil Israel la ya'iyic te la yich' halel: Te Saúl la ya'be guerra te jchahp soldado yu'un te filisteohetic, te xchihe, soc te ilobtic sba ilotix te Israel yu'un te filisteohetique. Ha yu'un la stsob sbahic te pueblo ta stojol Saúl ta Gilgal. 5Hich te filisteohetic la stsob sbahic ta ya'beyel guerra te Israel: oxpic soc ho'lajunbahc' (30,000) carretahetic yu'un guerra, ho'lajunbahc' (6,000) ta tuhl winiquetic cajajtic ta caballo, soc hich yipal soldadohetic te bin ut'il shi'al sti'il mar. Mohic talel soc la spasic scampamentohic ta Micmas, ta stojol banti ya xloc' tal c'ahc'al yu'un Bet-avén.
6Te c'alal la yilic te winiquetic yu'un Israel te ma xhu' yu'unic (como mero tembilic te pueblo), la snac' sbahic ta ch'en, ta pimil q'uinal, ta sc'uhb muc'ul tontiquil, ta be-ha' ch'entiquil soc ta hotbil yawil. 7Ay hebreohetic te sohlic bahel ta jehch muc'ul-ha' Jordán ta sq'uinal Gad soc ta sq'uinal Galaad; pero te Saúl hil ta Gilgal stuquel, soc spisil te winiquetic te la st'unic yacalic ta nihquel yu'un xiwel.
8La smahliy huqueb c'ahc'al, hich te bin ut'il halbot yu'un Samuel; pero te Samuel ma ba c'oht ta Gilgal, soc yacaliquix ta ahnel loq'uel te winiquetique. 9Ha yu'un la yal te Saúl: Ic'bonic tal te scohtol chic'bil mahtanil soc te mahtanil scuenta lamal q'uinal, xchi. Hich te Saúl la yac' te scohtol chic'bil mahtanil.
10Te c'alal lajel to ta yac'bel a te scohtol chic'bil mahtanil, tal te Samuel. Te Saúl loc' bahel ta spatbeyel yo'tan. 11Hich la yal te Samuel: ¿Bin la apas? xchi.
La sjac' te Saúl: Te c'alal la jquil te yacalic ta ahnel loq'uel te winiquetic soc te ma ba talat ta yorahil te awaloj, soc te stsobojix sbahic ta Micmas te filisteohetic, 12hich la jcal: Ya me xco tal ya'bonic guerra ta Gilgal te filisteohetic, soc ma to ba jc'ambeyej coltayel a te Jehová, xchihon. Ha yu'un la jquil te la sc'an te ya cac' te scohtol chic'bil mahtanil, xchi.
13Hich halbot yu'un te Samuel: Ma xana' te bin la apase. Te lajuc ach'uhumbe te mandar te la yalbat te Jehová te Dios awu'un, la yac' te stalel ayic ta ajwalil ta Israel te ats'umbal te hichuque. 14Pero ma ba ya xhiliquix ta ajwalil te ats'umbale. Te Jehová la slehix jtuhl winic te lec yo'tan yu'un, ha la yac' te jtsobaw ya xc'oht yu'un te pueblo yu'une, ta scaj te ma ba la ach'uhumbe te mandar la yalbat te Jehová, xchi.
15Hich hahch te Samuel, loc' bahel ta Gilgal, mo bahel ta Gabaa yu'un Benjamín. Te Saúl la yahtay te winiquetic te sjoquinej, ay wan lajunwinic scha'bahc' (600) ta tuhl. 16Te Saúl, Jonatán te snich'an soc te mach'atic sjoquinejic, hilic ta Gabaa yu'un Benjamín; te filisteohetic spasoj scampamentohic ta Micmas. 17Oxchahp soldadohetic loq'uic hahchel ta campamento yu'un te filisteohetic: jchahp baht ta sbehlal Ofra, ta stojol sq'uinal Sual, 18jchahp baht ta Bet-horón, te yoxebal baht ta sti'il q'uinal te ya yil cohel ta spamlej yu'un Zeboim, ta stojol te jochol taquin q'uinal.
19Ta spahmal sq'uinal Israel mayuc jtuhluc jten-taq'uin, como la yalic te filisteohetic: Scuenta yu'un ma ba ya spasic espada o lanza te hebreohetic, xchihic. 20Ha yu'un spisil Israel ya xbahtic ta stojol filisteohetic ta ya'beyel ye arado, azadón, echej o pico yu'unic. 21Jun pim#13.21 6 gramos plata la stojic yu'un ya'beyel ye arado soc azadonetic, soc jun ta yoxebal siclo#13.21 4 gramos plata ta ya'beyel ye echej soc staq'uinal sni'il tijo-wacaxetic. 22Ha yu'un ta yorahil te guerra mayuc espada o lanza ta sc'abic te mach'atic la sjoquinic te Saúl soc Jonatán, ha nax stuquel te Saúl soc Jonatán te snich'an te ay yu'unique.
23Ay jchahp soldado yu'un te filisteohetic te bahtic c'alal banti ya spas sohlel ta nopol Micmas.
Currently Selected:
1 Samuel 13: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
