1 Samuel 14

Jonatán ya stsal filisteohetic

1Jun c'ahc'al te Jonatán snich'an Saúl, la yalbe te ya'bat te ya scuchbe a'tejibal yu'un guerra: La' me, ya xbohotic ta banti ay te jchahp filisteo soldadohetic te ay ta jehch wits, xchi. Pero ma ba la yalbe ya'iy te state.

2Te Saúl ay ta jehch Gabaa, ta ye'tal jtehc' granado te ay ta Migrón, joquimbil yu'un lajunwinic scha'bahc' (600) winiquetic, 3soc Ahías snich'an Ahitob, te yermano Icabod snich'an Finees, te snich'an Elí, te sacerdote yu'un Jehová ta Silo, te yich'oj te efod.

Mayuc mach'a sna'oj te bahem te Jonatán. 4Ta banti la sc'an ya xc'ax bahel te Jonatán yu'un ya xbaht ta banti ay te soldadohetic yu'un te filisteohetic ay muc'ul sacalch'en ta jehch ta jehch, Boses sbihil te jehch, Sene sbihil te yan jehch. 5Te jun muc'ul sacalch'en ay ta stojol norte, ta stojol Micmas, te yane ay ta stojol sur, ta stojol Gabaa. 6Hich te Jonatán la yalbe te jcuch-a'tejibal yu'un: La' me, sohlucotic bahel ta banti ay te jchahp soldado yu'un te mach'atic ma ba yich'ojic circuncisión; ay wan bin ya spasbotic te Jehová, como ma ba wocol ya ya'iy stuquel te ya yac' tsalaw, teme ay tsobolic o teme mayuc tsobolic, xchi.

7Hich la sjac' te jcuch-a'tejibal yu'une: Pasa spisil te bin ya sc'an awo'tan; ya joquinat ta spasel te bin ya sc'an awo'tan, xchi.

8Ha yu'un la yal te Jonatán: Ya sohlotic bahel ta stojol te winiquetic scuenta yu'un ya yilotic. 9Teme ya yalbotic: Mahliyahic te ya xcohotcotic te banti ayex, teme xchihique, ya jmahliytic li'i, ma ba ya xmohotic bahel te banti ayique. 10Pero teme ya yalbotic: Mohanic talel, teme xchihique, ya xmohotic bahel, yu'un la ya'botiquix ta jc'abtic te Jehová; ha me seña cu'untic abi, xchi.

11Hich schebalic la yac' sbahic ta ilel yu'un te soldadohetic yu'un te filisteohetic, hich halbotic yu'unic: Ilawilic, yacalic ta loq'uel tal ta ch'entiquil banti snac'oj sbahic te hebreohetic, xchihic. 12Te winiquetic yu'un te jchahp soldadohetic la yalbeyic te Jonatán soc te jcuch-a'tejibal yu'un: Mohanic tal te banti ayotcotic, ay bin ya ca'beyexcotic ana'ic, xchihic.

Ha yu'un te Jonatán la yalbe te jcuch-a'tejibal yu'un: T'unawon mohel, como te Jehová yac'ojix ta sc'ab Israel te filisteohetic, xchi.

13Te Jonatán stsoylajan ta mohel ta yoc sc'ab, tap'al ta spat te jcuch-a'tejibal yu'une. Te mach'atic puch'ic ta lum ta stojol Jonatán, ha la smilticlan te jcuch-a'tejibal yu'un te patil ay. 14Ta primera buelta milel ini, te Jonatán soc te jcuch-a'tejibal yu'un la smilic jtahb (20) ta tuhl winiquetic ta hich smuc'ul lugar te bin ut'il j'ohlil joc'bil lum te yugada.#14.14 j'ohlil yugada: hich smuc'ul q'uinal te ya xhu' ya stop' lum te j'a'tel-wacaxetic ta jun c'ahc'al. 15Hahch buen xiwel ta campamento, ta yohl q'uinal soc ta stojol spisilic ta jchahp soldadohetic; soc ha nix hich xiwic te mach'atic loq'uemic bahel ta spojel biluquetic, soc nihc te q'uinale; c'ax bayel xiwel.

16Te jcananetic yu'un Saúl ta Gabaa yu'un Benjamín la yilic te xquechetic ta ch'ayel bahel ta ahnel te filisteohetic. 17Ha yu'un te Saúl la yalbe te mach'atic sjoquinej: Ahtaya awilic mach'a loq'uem bahel ta jtojoltic, xchi. C'alal c'ax ta ahtayel, la yilic te ma ba chican tey a te Jonatán soc te jcuch-a'tejibal yu'un. 18Ha yu'un te Saúl la yalbe te Ahías: Ich'a tal te scaxahul te chapbil-c'op yu'un Dios, xchi. (Yu'un te scaxahul te chapbil-c'op yu'un Dios ay ta yohlilic a te snich'nab Israel.)#14.18 Hich ya yal ta hebreo. Ta griego (LXX) ya yal: Ich'a tal te efod, xchi. Yu'un ha slapojix te efod a ta stojol te israeletique.

19Pero te c'alal yac ta c'op a te Saúl soc te sacerdote, xquechet ta tulanubel te xjuyetic ta campamento yu'un te filisteohetique. Ha yu'un te Saúl la yalbe te sacerdote: Ma xawich'ix tal, xchi.

20Hich la stsob sbahic te Saúl soc spisil te mach'atic sjoquinejic, bahtic ta guerra. Tey c'oht yilic a te yac smilticlambel sbahic ta espada soc te ay bayel ch'ayem yo'tanic. 21Te hebreohetic te ayix ora sjoquinejic te filisteohetic soc te bahemic soc ta campamento, c'axic tal ta stojol te israeletic te sjoquinejic Saúl soc Jonatán. 22Ha nix hich spisil te israeletic te snac'oj sbahic ta witsiltic yu'un Efraín, c'alal la ya'iyic te yacalic ta ahnel te filisteohetic, ha nix hich baht snutsic ta ya'beyel guerra. 23Baht c'alal ta Bet-avén te guerra. Hich coltayot yu'un Jehová te Israel ta hich ora.

24Pero te winiquetic yu'un Israel ay swocolic ta hich ora, como te Saúl la yac' te ay bin ya yalic ta jamal te winiquetic, hich la yal: Bohlobuc me sc'oblal mach'ayuc a te ay bin ya swe' te ma to x'ihc'ub q'uinal a, te c'alal ma to ba ca'beyej spacol a te jcontrahe, xchi. Hich spisil te winiquetic mayuc bin la swe'ic.

25Spisilic c'ohtic ta tohyem te'etic te banti ay chab ta lum. 26Te c'alal ochic bahel te winiquetic tey ta tohyem te'etic, la yilic te ay chab yac ta malel cohel, pero mayuc mach'a la swe', yu'un la xi'ic te bin jc'axel halbiliquix ta jamal. 27Pero te Jonatán ma ba la ya'iy te bin ut'il te stat la ya'be yalic ta jamal te winiquetique; ha yu'un la shach te snahbate' yich'oj ta sc'ab, la yotses ta chab, patil la yotses ta ye; lecub sit yu'un. 28Patil c'oponot yu'un jtuhl soldado, hich halbot yu'un: Te atat hich la yac' ta halel ta jamal te winiquetic: Bohlobuc me sc'oblal te winic te ay bin ya swe' yo'tic, xchi. Ha yu'un te mayuquix yipic te winiquetique.

29La sjac' te Jonatán: Te jtat la ya'be swocol te jlumaltique. Ilawil bin ut'il lecub jsit yu'un te la jwe' jxuht' te chabe. 30¿Ma bal c'axemuc to xan hich la yich' yipic a te winiquetic te lajuc swe'beyic te bintic la yich' pojbeyel te scontrahique? ¿Ma bal tulanuc xan c'oht te tsalel ta stojol te filisteohetic te hichuque? xchi.

31Ta hich ora la stsalic te filisteohetic c'alal ta Micmas ha to ta Ajalón; pero mero luhbeniquix a. 32Ha yu'un hahch stsaquic ta ora te bintic pojbilic, la stsaquic tuminchijetic, wacaxetic, bic'tal wacaxetic, la smilic ta lum, la swe'ic soc sch'ich'el. 33Pero ay mach'atic baht yalbeyic te Saúl: Yac stahbel smulic ta stojol Jehová te winiquetic, como yacalic ta swe'el ti'bal soc sch'ich'el, xchihic c'ohel.

La yal te Saúl: ¡Ma ba jun awo'tanic! Tselbonic tal jun muc'ul ton, xchi. 34Soc la yal xan: Puca abahic ta yohlil te winiquetic, halbeyahic te ac'a yiq'uic tal swacax soc stuminchij jujutuhl, ac'a smilic li'i soc ac'a swe'ic; ma me sta smulic ta stojol Jehová ta scaj swe'el ti'bal soc sch'ich'el, xchi.

Ta yorahil nix ta ahc'abal a la yic'ticlanic bahel ta tuhlultuhl te swacaxic, c'oht smilticlanic tey a. 35Te Saúl la spasbe scajtajib ta chiq'uel mahtanil yu'un te Jehová. Ha sbabeyal buelta a te hich la spase.

36La yal te Saúl: Ha ahc'abal ini ya me xcohotic bahel ta scontrahinel te filisteohetic, ya jpojbetic sbiluquic c'alal ta sacubel q'uinal; ma me ayuc mach'a cuxul ya xhil cu'untic, xchi.

Pasa te bin lec yac awa'iy, xchihic.

Pero la yal te sacerdote: Ac'a nohpojucotic ta stojol Dios li'i ta sjoc'obeyel, xchi.

37Hich te Saúl la sjoc'obe te Diose: ¿Ya bal xcohon bahel ta stojol te filisteohetique? ¿Ya bal awa'be ta sc'ab te Israel? xchi. Pero te Jehová ma ba la sjac' ta hich ora.

38Ha yu'un la yal te Saúl: La', nohpojanic tal ta apisilic te jtsobawex yu'un soldadohetic, na'a awa'iyic bin mulil la yich'ix pasel. 39¡Yiloj Jehová te ya scoltay Israel, aunque ha'uc te jnich'an Jonatán, ya me xlaj! xchi. Mayuc mach'a la sjac' ta spisil te pueblo.

40Hich te Saúl la yalbe spisil Israel: Te ha'exe tey xawac' abahic ta jehch, te ho'on soc te jnich'an Jonatán ya cac' jbahcotic ta yan jehch, xchi.

Pasa te bin lec yac awa'iy, xchihic te winiquetique.

41Ha yu'un te Saúl hich la yalbe te Jehová te Dios yu'un Israel: Ac'a ta na'el ta scuenta spasbeyel seña ta na'el,#14.41 Hich ya yal ta hebreo. Ta griego (LXX) ya yal: ¿Bin yu'un te ma ba la ajac'beyix sc'op te a'bat awu'une? Teme ho'on ay jmul o teme ha te jnich'an Jonatán, ac'a chicnajuc ta scuenta te Urim; yan teme ha ay smulic te israeletic, ac'a chicnajuc ta scuenta te Tumin, xchi. xchi. Ha c'oht ta scuentahic Jonatán soc Saúl; hil ta libre te winiquetique. 42La yal te Saúl: Pasahic te seña ta na'el ta jtojol soc ta stojol te jnich'an Jonatán, xchi. Ha c'oht ta scuenta te Jonatán.

43Ha yu'un te Saúl la yalbe te Jonatán: Halbon ca'iy te bin apasoj, xchi.

La sjac' te Jonatán: La jpas prueba jtebuc chab ta sni'il jnahbate' te quich'oje. ¿Ya bal sc'an ya xlajon yu'un? xchi.

44La sjac' te Saúl: Hich me ac'a spasbon te Dios, soc c'ax to xan hich a, teme ma ba ya xlajat, Jonatán, xchi.

45Pero te winiquetic la yalbeyic te Saúl: ¿Ya bal spas ya xlaj ta milel te Jonatán, te mach'a la ya'iy muc'ul tsalaw ta Israel? ¡Ma hichuc! ¡Yiloj Jehová! ma me xco ta lum jlihcuc stsotsel sjol, como ha la spas ini ta scuenta te coltayel yu'un te Diose, xchihic. Hich la scoltayic ta milel te Jonatán.

46Tey laj yo'tan a te Saúl ta snutsel te filisteohetique. Te filisteohetic suhtic bahel ta slumalic.

47Te c'alal ochemix ta ajwalil yu'un Israel a te Saúl, la ya'be guerra spisil te scontra ta sjoyobal: ha te Moab, te snich'nab Amón, Edom, te ajwaliletic yu'un Soba soc te filisteohetique. Ta bayuc ya xbaht, ha ya ya'iy tsalaw. 48La stsob soldadohetic, la stsal Amalec, hich la scoltay Israel ta sc'ab te mach'atic yac spojbelic sbiluquic.

49Te snich'nab Saúl: ha te Jonatán, Isúi, soc Malquisúa. Te sbihilic te cheb yantsil-nich'nab: Merab te wixile, Mical te ihts'inale. 50Te sbihil te yihnam Saúl, Ahinoam yantsil-nich'an Ahimaas. Te sbihil te jtsobaw yu'un te soldadohetic yu'une, Abner snich'an Ner te stajun Saúl. 51Como te Cis te stat Saúl, soc Ner te stat Abner, ha'ic snich'nab Abiel.

52Te jayeb c'ahc'al cuxul te Saúl mero tulan te guerra ta stojol te filisteohetique. Te Saúl, te c'alal bin ora la yil jtuhl winic te bayel yip soc te ma xiw, la yic' ta soldadohil.

Currently Selected:

1 Samuel 14: TZH

Highlight

Copy