1 Corintios 12

Mahtaniletic yu'un te Espíritu

1Quermanotac, ya jc'an te yac ana'ic bin ut'il ay sc'oblal te mahtaniletic yu'un te Espíritu. 2Yac ana'ic te c'alal ma to ach'uhunejic Dios a, ic'otex bahel ta howiyel ta banti ay uma' loc'ombahetic. 3Ha yu'un ya ca'beyex ana'ic te mayuc mach'a te ya xc'opoj ta scuenta te Espíritu yu'un Dios te ya yal: Bohlobuc sc'oblal Jesús, soc mayuc mach'a ya xhu' ya yal: Ha Ajwalil te Jesús, te xchihe, te ma ha'uc ya yal ta scuenta te Ch'ul Espíritu.

4Ay bayel ta chahp mahtaniletic, pero junax te Espíritu. 5Ay bayel ta chahp a'teliletic, pero jtuhl nax te Ajwalil. 6Soc ay bayel ta chahp bintic ay ta pasel, pero junax Dios te ya spasticlambe ta stojol spisilic. 7Pero ta jujutuhl ya x'a'bot chicnajuc te ya'tel te Espíritu scuenta yutsil slequil spisilic. 8Ay mach'a ya x'a'bot p'ijil-c'op ta scuenta te Espíritu; ay yan ya x'a'bot p'ijil-o'tanil scuenta sna'beyel scuentahil, ha nix te Espíritu te ya x'a'bot yu'une; 9ay yan ya x'a'bot sch'uhunel yo'tan, ha nix te Espíritu te ya x'a'bot yu'une; ay yan ya x'a'bot mahtanil yu'un slahmajtesel chamel, ha nix te Espíritu te hich ya x'a'bot yu'une; 10ay yan ya x'a'bot spas jchahp a'teliletic; ay yan ya x'ac'ot ta yalel sc'op-jalwanej; ay yan ya x'a'bot stsahtay espírituhetic; ay yan ya x'ac'ot ta c'op ta yan c'opiletic; ay yan ya x'a'bot sna' sc'asesel yan c'opiletic. 11Pero ta spisil ini ha nix ya spas te Espíritu, ha ya spucticlambe ta tuhlutuhl ha chican bin ya sc'an yo'tan stuquel.

12Hich te bin ut'il bayel ta chahp bintic ay ta baq'uet, pero junax ay; aunque bayel ta chahp, pero junax baq'uet ay; hich nix ay te Cristo. 13Como ta scuenta junax Espíritu te junax baq'uet c'ohotic ta scuenta ich'-ha', teme ha judíohetic, griegohetic, mosohetic o mach'atic libre ayic; ta jpisiltic ac'ot cuch'tic junax Espíritu.

14Te baq'uet ma jchahpuc nax ay, ay bayel ta chahp. 15Teme hich ya yal te ocal: Te bin ut'il ma c'abalucon, ma yu'unucon te baq'uet, teme xchihe, ¿yu'un bal mayuc ta baq'uet abi? 16Soc teme hich ya yal te chiquinil: Te bin ut'il ma sitilucon, ma yu'unucon te baq'uet, teme xchihe, ¿yu'un bal mayuc ta baq'uet abi? 17Te ha'uc sitil spisil te baq'uet, ¿banti ya ya'iyix c'op? Te ha'uc chiquinil spisil, ¿banti ya yich'ix ic'? 18Pero Dios la yac'ticlan jujuchahp ta baq'uet ha chican bin ut'il la sc'an yo'tan stuquel. 19Te jchahpuc ta spisil, ¿banti ayix a te baq'uete? 20Ay bayel ta chahp, pero junax te baq'uete.

21Te sitil ma xhu' ya yalbe te c'abal: Ma xtuhunat cu'un, ma xchihuc, ha nix hich te jolal ma xhu' ya yalbe te yoc: Ma xtuhunex cu'un, ma xchihuc. 22Pues te bintic ay ta baq'uet te sjel te mayuc yipic, ha bayel ya xtuhun; 23soc te bintic ay ta baq'uet te sjel te mayuc sc'oblal, c'ax ich'bil ta cuenta cu'untic; soc te bintic ay te ma ich'bilic ta cuenta, c'ax to xan ya quich'tic ta cuenta, 24como te bintic ay cu'untic te ich'bilic ta cuenta, mayuc bintic ya xtuhun yu'unic. Dios la schahpan te baq'uet te ha bayel sc'oblal c'ohem te bintic peq'uel sc'oblal, 25scuenta yu'un mayuc wohc'owohc' ayic a te baq'uet, pero ta chahpalchahp talel c'axel ya sna'be yo'bolil sbahic. 26Teme ay swocol junuc, pajal ya ya'iybe swocol sc'uxul, soc teme ay junuc te ya x'ich'ot ta muc', spisilic tse'el yo'tanic yu'un.

27Ha'ex sbaq'uetalex Cristo soc jujutuhlex yu'unex te sbaq'uetal. 28Ta iglesia, Dios la yac' nahil jpuc-c'opetic, schebal jalwanejetic, yoxebal jp'ijubteswanejetic, patil te mach'atic ya spasic jchahp a'teliletic, patil te mach'atic ya slahmajtes jchameletic, mach'atic ya xcoltaywanic, mach'atic ya xcuentahinwanic, mach'atic ay smahtan ya xc'opojic ta yan c'opiletic. 29¿Spisil bal jpuc-c'opetic? ¿Spisil bal jalwanejetic? ¿Spisil bal jp'ijubteswanejetic? ¿Spisil bal ya spasic jchahp a'teliletic? 30¿Spisil bal ay smahtan yu'un slahmajtesel jchameletic? ¿Spisil bal ya xc'opojic ta yan c'opiletic? ¿Spisil bal ya sc'ases yan c'opiletic? 31Ha me xac'anic te mahtaniletic te c'ax leque.

Pero ya ca'beyex awilic te mero lequil behe.

Currently Selected:

1 Corintios 12: TZH

Highlight

Copy