1 Corintios 13

Sc'oblal c'uxul-o'tanil

1Teme ya xc'opojon ta sc'op winiquetic soc sc'op ch'ul a'batetic, pero teme mayuc sc'uxul co'tan, hich c'ohemon te bin ut'il campana te xcancon sc'op, o te bin ut'il platillo te stsintson sc'ope. 2Teme ya cal sc'op-jalwanej soc na'bil cu'un spisil bintic wocol ta na'el soc spisil bintic ay ta na'el, teme ay bayel sch'uhunel co'tan te ha ya sjelbe yawil witsiltic ta scuenta, pero teme mayuc sc'uxul co'tan, tojol ayon. 3Teme ya jq'uebenlambe spisil jbiluc te pobrehetic, soc teme ya cac' ta chiq'uel te jbaq'uetal, pero teme mayuc sc'uxul co'tan, mayuc bin ya jta a.

4Te c'uxul-o'tanil spisil ya xcuhch yu'un,

bayel yutsil yo'tan;

mayuc sbic'tal yo'tan, ma stoy sba;

5ma xjelaw ta stojol yan,

mayuc st'ut'il, ma x'ilin,

ma xyac' ta yo'tan te bin chopol ya xpasbot;

6ma tse'eluc yo'tan yu'un te bin ma stojiluc,

ha tse'el yo'tan yu'un te bin smelelil.

7Spisil wocol ya xc'ax yu'un,

spisil ya sch'uhun, spisil ya smahliy,

spisil ya xcuhch yu'un.

8Mayuc bin ora ya xlaj sc'oblal te c'uxul-o'tanil, yan te sc'op-jalwanej ya me xquehchaj; ya xch'abic bahel te bayel ta chahp c'opiletic; te bintic ay ta na'el, ya xch'ay bahel. 9Ma ts'acaluc te bintic jna'ojtic soc ma ts'acaluc ya caltic te sc'op-jalwanej; 10pero te c'alal ya xtal te bin ts'acale, ya xch'ay bahel te bin ma ts'acaluc. 11Te c'alal alalon to a, hich c'opojon te bin ut'il alal, hich snopojibal cu'un te bin ut'il alal, hich co'tan te bin ut'il alal; pero te c'alal winiconix a, hil cu'un spisil te bin scuenta alal. 12Ta ora ini yaxinal nax ya quiltic ta espejo; pero ta patil ya me quilbetic sit ta jsitic nix. Ta ora ini ma ba ts'acal jna'oj; pero ta patil ya me jna'be sba hich te bin ut'il ya sna'bon jba. 13Ha yu'un ay oxeb te bin ma xlaj sc'oblal: ha te sch'uhunel-o'tanil, te smuc'ul-o'tanil soc te sc'uxul-o'tanil; pero ta yoxebal ha muc' sc'oblal te c'uxul-o'tanile.

Currently Selected:

1 Corintios 13: TZH

Highlight

Copy