یوہانان 3

حضرت عیسیٰ مسیح تانگ نِیکُدیمُس۔

1نِیکُدیمُس زیرکھانّی فریسی پاجیگ یودپین، کھو یہُودی پا وانگثولپے ژوکسپے تھوسمیجیگ اینپین۔ 2جاگشیگ کھو حضرت عیسیٰ یودسا ژانلا یونگستے زیرس، ”رابّی#3‏:2 یُونانی سکادّی نانّگا لوبپونلا رابّی زیرّانوگ، نیرانگ خُدے چھوگسنے پھیبسکھانّی لوبپون اینکھانبو نگاجے شیس، چیاجونا خُدے نیامپو یودتے مانے سوجیگّانگ، نیرانگی ستانّا زادکھانّی معجزہ ستاگس گُون ستان مینیان۔“

3حضرت عیسیٰ سی کھوا لانسالس، ”نگے کھیورانّگا لدینبا لدینبا زیرّاد، نامتشوگپا سوجیگ یانگسکیار میسکیے، خُدے گیالثیدپو کھوا میتُھونگ۔“

4نِیکُدیمُسی زیرس، ”می گادپوجیگ یانگسکیار کازوگی سکییانوگ۔ کھورانگی امے چانگکھوگی نانّگا جُوگستے لان نیسپا سکیے میتھوب۔“

5حضرت عیسیٰ سی لانسالس، ”نگے کھیوجا لدینبا لدینبا زیرّاد، نامتشوگپا میجیگ چھو تانگ رُوح نے سکے میسکے، تیگون خُدے گیالثیدّی نانّگا چھا مینیان۔ 6می جیگ زوگسپوے تُھوگا پھامانے سکییانوگ، اِین نانگ رُوح نے سکییسکھانگون نی ہلژخمہ رُوح نے سکیانوگ۔ 7نگے ’کھیورانّگا یانگسکیار سکییگوس‘ زیرکھانبوا ہامالاس۔ 8لونگسپو کارُو تھادنانگ تینّا چھوگسلا گیوگا نوگ۔ کھیورانّگا تیبوے سکاد تشورّانوگ، اِین نانگ تیبو کانے یونّگاد یانگ کارُو چھاد گیوسچھا مانوگ، تینّا ژوگس، رُوح نے سکییسکھان ژانگما نیامپو اینوگ۔“

9نِیکُدیمُسی زیرس، ”کازوگی تیبو لدینبا اینوگ؟“

10حضرت عیسیٰ سی لانسالس، ” کھیرانگ بنی اِسرائیل پے شریعتی لوبپونجیگ اینتیانگ کھیورانّگا ہاگوا میدّا؟ 11نگے کھیورانّگا لدینبا لدینبا زیرّاد، نگاجے شیسکھانگون زیرّاد یانگ تھونگتے اینکھانبوے گواہ تانّگاد۔ تینیانگ کھیوجاگونّی نگاجے گواہ بوا لدینشیسّا میدوگ۔ 12نگے کھیوجاگونلا دُنیا تانگ ڈیلکھانّی سپیرا شادپین، اِین نانگ تیبوا کھیوجے دِین ماشیس۔ کالتیس نگے نامکھا تانگ ڈیلکھانّی سپیرا شادنا، کھیرانگی کازوگّا لدینشیسین۔ 13نامکھانے یونگستے اینکھان اِبنِ آدم مانپا سوجیگّانگ نامکھا ماسونگ۔ 14‏-15کازوگ ریستونگی نانّگا حضرت مُوسیٰؔ سی بنی اِسرائیل پاگون سکیوبچیسلا راگانّی رُولجیگ بیرگیکا ستاگّا تسوگسلا، اِبنِ آدمیکا ایمان کھیونگکھانگونلا تھامیدپے میتشے تھوبچیسّی پھیا کھوانگ ستاگّوساین۔“

16خُدے دُنیائی می گونلا ایزام چامسپا زادس، کھونگی کھونگرانگی بُوژا چیگ چیگ پوانگ سالّا زادس، کھونگی بُوژےکا ایمان کھیونگکھان ژانگما شی ماشیا تھامیدپے میتشے تھوبین۔ 17خُدے رانگی بُوژا دُنیائی می گونلا چھادپا چادچیسلا مانپا، کھونگ گیُودتے تھارپا سالچیسّی پھیا دُنیائی نانّگا کالا زادس۔

18بُوژےکا ایمان چوکھانگون نیالوے نانّگا مانے پھانّگا میزاد، اِین نانگ ایمان ماچوکھانگونلا نیالوے چھادپا پھوگ تشارتے این چیازیرنا کھونگونی خُدےبوژا چیگ چیگ پویکا ایمان ماچوس۔ 19تے چھادپا سالچیسّی تونبو نی۔ خُدے اوت دُنیائی نانّگا سکیودس اِین نانگ میگون اودّی سانگ مونڈیگپوا تھاد چیازیرنا کھونگونی لاسگون نگانپا یودتے اینوگ۔ 20لاس نگانپا چوکھان تشانگمے ودلا ناپھراد چوانوگ، کھونگونی لاسنگانگون جانماگونلا سنگوناین سامتے اودّی نانّگا یونّگا مانوگ۔ 21اِین نانگ ٹانگپوے لامیکا ڈولین یودکھانگون، اودّی نانّگا یونّگا تھادّانوگ، چیازیرنا کھونگونی خُدے تھوگستھادّا زادکھانّی لاس چوین یودکھانبو جانماگونّی تھونگتھوباین۔

حضرت عیسیٰ مسیح تانگ حضرت یُوؔحنّا ٰ غوتا سالکھان۔

22تیبوے ستینگنے حضرت عیسیٰ تانگ کھونگی لوبٹوگسگون گیالسانے بینگتے یہُودی ڈونگسیبگونلا سکیودس، یانگ تیرو جاگبانشیگ جُوگستے کھونگی میگونلا غوتا سالّا زادس۔

23یوحنّانگ شالیم ڈونگسیب تانگ نیموا یودکھان اینونّی نانّگا غوتا سالّادپین چیازیرنا تیرو چھو مانگپو یودپین، یانگ میگون غوتا لینّالا یونگین دوگادپین۔ 24(ای ژانگما حضرت یُوؔحنّا ٰ تسونلا کاگی سانگ سنگونلا چونگس) 25یوحنّانی لوبٹوگسگون تانگ یہُودی پاجیگی نانّگا چھو نیامپو ژانگما چوچیسّی لوگثولّی سکورلا زیرزیر سونگ۔ 26تینے یوحنّانی لوبٹوگسگون کھونگ یودسا یونگستے حضرت عیسیٰ سکورلا شادس، ”رابّی، یوردانّی لژانگسپو ے پھارکا نیرانگ نیامپو یودکھانّی می کابوے پھیا نیرانگی گواہ سالّادپین، کھونگ یانگ غوتا سالدوگ یانگ می ژانگما کھونگی کا چھاروگ۔“

27یوحنّانی لانلا مولس، ”نامتشوگپا خُدے نامکھانے گونگسپا میسال، سوجیگّانگ چانگ تھوب میتھوب۔ 28نگے نگا لدامّا زادسکھانّی مسیحا مان اِین نانگ نگا کھونگی سانگ سنگونلا ڈالڈیگ چوا کالا زادکھانبو این، زیرکھانبوے گواہ کھیوجا اینوگ۔ 29ناما نی ماگپے پھیا اینوگ، اِین نانگ ماگپے دزاو ثونگستے کھوے سکادلا نیانّانوگ، سکادپو تشورّاچیگ تھادپو چھانوگ۔ تیبویپھیا تے ناتشولبو تشورتے نگے سنیینّگانگ تھادپوے گانگ۔ 30کھونگ مینگچان یانگ نگا رینمید گیورگوس۔“

31”نامکھانے سکیودکھانبو تشانگمیسانگ جیگسپو اینوگ، نگاتانگون نی دُنیائی اینپا دُنیائی می تشولّا سپیرا تانّگانوگ۔ اِین نانگ نامکھانے سکیودکھانبو تشانگمیسانگ تھوشوگپو اینوگ۔ 32کھونگی خُدانے تشورکھان یانگ زیگسکھانگونّی گواہ سالّانوگ، اِین نانگ سوجیگّانگ کھونگی سپانگپویکا ایمان ماچوس۔ 33کھونگی لونّیکا ایمان چوکھانگونّی مسیح خُدے ٹانگپو مولکھانبوے گواہ تانگستے اینوگ۔ 34خُدے کالا زادکھانبوے خُدے جالتا مولّانوگ چیازیرنا خُدے کھونّگا ہلژخمہ رُوح تاب ماتابّا سالّا زادّوگ۔ 35یاب خُدے ثاسلا چامسپا زادپا کھونگی چیژانگما بُوژا چھاگّا ستادا زادس۔ 36بُوژےکا ایمان کھیونگکھانگونلا تھامیدپے میتشیبو تھوب تشارتے اینوگ۔ اِین نانگ بُوژےکا ایمان ماچوا کھا مانیانکھانگونلا تے میتشیبو مانے میتھوب، یانگ خُدے تھوگسثو کھونگّونّیکا لوسین۔“

Currently Selected:

یوہانان 3: LBJNT

Highlight

Copy