Marko 10
10
O rom thaj e romnji si jek telo thaj naj lenđe muklo te rastavin pes
1O Isus đelotar okotar thaj đelo ande judejske krajurja, preko e reka e jordanošći. Thaj palem avilo leste o but o them, a vo sago vi uvek sikavelas len. 2Avile dži leste varesave fariseja thaj phučline les gajda te iskušin les: “Dali tromal o rom te rastavilpe katar piri romnji?” 3A o Isus phučla len: “So o Mojsije zapovedisardas tumenđe?” 4A von phendine: “O Mojsija muklas e romešće te del pešće romnja rastavno lil thaj askal šaj mućel lat.” 5Askal o Isus phendas lenđe: “O Mojsije ramosarda tumenđe godoja zapoved zbog tumare barune ile. 6Ali, ando početko kana o Del sa ćerdas, ‘ćerda len muško thaj žensko.’ 7‘Zato o rom mućela pire dade thaj pire deja thaj avel jek pire romnjasa, 8thaj von duj džene avena jek telo’ gajda naj majbut duj nego jek telo. 9Zato o manuš neka či rastavil okova so o Del sastavisarda.”
10A kana sas palem andre ando ćher, e učenikurja phučline les pale godova. 11A o Isus phendas lenđe: “Ko rastavilpe katar piri romnji thaj lel aver romnja, ćerel preljub prema piri prvo romnji. 12Thaj e romnji, ako rastavil pes katar piro rom thaj lel aver rome, ćerel preljub.”
O Isus blagoslovil e čhavren
13Varesave manuša anenas anglo Isus pire čhavren te čhol pire vas pe lende thaj blagoslovil len, a e učenikurja godova braninas lenđe. 14Kana o Isus dikhla so ćeren, holjajlo thaj phenda lenđe: “Mućen e čhavroren te aven mande. Thaj na branin lenđe, kaj kasavenđe pripadil e Devlesko carstvo. 15Čačes phenav tumenđe: ko či primil e Devlesko carstvo sago cikno čhavro, sigurno či dela ande leste.” 16Askal dijas mrtiko e čhavren, čhutas pire vas pe lende thaj blagoslovisarda len.
Phare si e barvalenđe te den ande Devlesko carstvo
17Kana o Isus sas palem po drom, prastajas dži leste varesavo manuš, pelo pe koča angle leste thaj phučla les: “Lačheja sikamneja, so trubul te ćerav te naslediv o večno trajo?” 18A o Isus phendas lešće: “Sostar man akhares lačheja? Khonik naj lačho osim o jedino o Del. 19E zapovesti džanes: ‘Na mudar, na ćer preljub, na čor, na svedočisar hohamne, na prevarisar, poštuisar ćire dades thaj ćire deja!’ ” 20A o manuš phendas lešće: “Sikamneja, sa gadava inćarav katar mungro ternipe.” 21O Isus dikhla pe leste pherdo ljubavi thaj phendas lešće: “Još samo jek falil tuće: dža thaj bićin sa so si tut thaj e love de e čorenđe thaj avela tut barvalipe ando nebo. Askal av thaj sledi man.” 22Čim o Isus godova phendas lešće, o manuš mukla po muj. Rastužisajlo thaj đelotar, kaj či kamlas te bićinel piro baro barvalipe.
23O Isus dikhla oko peste, thaj phendas pire učenikonenđe: “Sar si phare e barvalenđe te den ande Devlesko carstvo!” 24E učenikurja začudisajle pe godova so phendas. Zato o Isus palem phendas lenđe: “Čhavralen mungralen, sar si phare te den ande Devlesko carstvo. 25Maj loće si e kamilaće te naćhel kroz e suvjaće kan nego e barvalešće te del ande Devlesko carstvo.” 26E učenikurja još maj but začudisajle, thaj phučenas jek avres: “Pa ko askal šaj te spasil pes?” 27A o Isus dikhla pe lende thaj phenda: “E manušenđe si godova nemoguće, ali e Devlešće naj, kaj e Devlešće si sa moguće.” 28Askal o Petar phenda e Isusešće: “Ake, amen muklam sa thaj teljardam pale tute.” 29Askal o Isus phendas: “Čačes phenav tumenđe, svako ko muklas pesko ćher, ili pe phralen, ili pe phejen, ili pe dade thaj pe deja, ili pe čhavren, ili pe njive pale mande thaj pale Bahtali nevimata, 30akana, ande akaja vrjama, sigurno dobila šel drom majbut: ćhera, phrala, pheja, deja, čhavra, thaj phuvja. Ali sa godolesa avena vi e progonurja, a ande vrjama savi avela, večno trajo. 31A but okola save si akana prve, avena poslednje, a okola poslednje avena prve.”
O Isus po trito drom mothol pale piro smrto thaj pale piro vaskrsenje
32Kana o Isus thaj lešće učenikurja teljardine karingal o Jerusalim, a o Isus džalas angle lende, e učenikurja sas začudime kaj džal ando Jerusalim, a okolen save džanas pale leste lijas e dar. O Isus palem lijas e dešuduje učenikonen pe rig thaj motholas lenđe so avela lesa: 33“Ake das ando Jerusalim. Okote man, e Čhaves e Manušešće, predaina ande vas e šorvale rašajenđe thaj e sikavnenđe e Mojsiješće zakonestar thaj von osudina man po smrto. Askal predaina man ke okola save naj židovurja 34thaj von marena muj mandar, čhungarena man, bičuina man, thaj mudarena man. Ali me trin đes pale godova uštava andar e mule.”
O Isus sikavel sar te služisaras averenđe
35Askal avile dži ko Isus o Jakov thaj o Jovano, e Zevedejevešće čhave, thaj phendine lešće: “Sikamneja, kamas te ćeres pale amende sa so zamolisa tut.” 36A o Isus phučla len: “So kamen te ćerav pale tumende?” 37A von phendine lešće: “Muk amen te bešas tusa kana deja ande ćiri nebesko slava, pe počasne thana, jek pe ćiri desno rig a aver pe ćiri levo rig.” 38A o Isus phenda lenđe: “Či džanen so manđen. Dali šaj pijen andar o tahtaj andar savo me pijava ili te bolen tumen sago kaj me bolava man?” 39A von phendine: “Šaj.” Pe godova o Isus phenda lenđe: “Ej čačes pijena andar o tahtaj patnje andar savo me pijava thaj bolena tumen ande patnje sago kaj me bolava man. 40Ali naj mungro te odrediv ko bešela pe mungri levo ili desno rig. Godola thana pripadin okolenđe pale kaste o Del odredisardas.” 41Kana godova ašundine e aver deš učenikurja, holjajle po Jakov thaj po Jovano. 42O Isus akharda len peste thaj phendas lenđe: “Tumen džanen kaj okola save inćarenpe kaj si e manušenđe vladarja, vladin pe lende, thaj okola save si majbare lendar volin te gospodarin lenca. 43Ali maškar tumende nek či avel gajda, nego savo kamel te avel majbaro maškar tumende, neka avel tumaro sluga. 44Thaj ko kamel te avel maškar tumende prvo, neka savorenđe avel robo. 45Kaj ni me, o Čhavo e Manušesko, či avilem te služin manđe nego te me služiv averenđe, thaj te dav mungro trajo sar poćin pale e but manuša.”
O Isus sastarel e kores
46Askal aresline ando gav o Jerihon. Kana o Isus, lešće učenikurja thaj o but o them inkljenas andar o Jerihon, pašo drom bešelas o koro prosijako, savo akhardolas Vartimej, so značil e Timejesko čhavo. 47Kana ašunda kaj godova naćhel o Isus andar o Nazaret, počnisardas te čhol muj: “Isuse e Davidešće Čhaveja, smiluisar tut manđe!” 48But džene opomenisardine les te ačhel, ali vo još majzurale čholas muj: “E Davidešće Čhaveja, smiluisar tut manđe!” 49O Isus ačhilo thaj phendas: “Akharen les akaring!” Von akhardine e kore manuše thaj phendine lešće: “Hrabro, ušti! O Isus akharel tut.” 50O koro manuš čhuda pestar o ogrtači, huklo pe pungre thaj avilo anglo Isus. 51O Isus phučla les. “So kames te ćerav pale tute?” O koro manuš phendas: “Sikavneja, kamav te šaj te dikhav.” 52A o Isus phenda lešće: “Dža, ćiro paćipe sastarda tut!” Thaj o koro odma šaj dićhelas, thaj teljarda dromeja palo Isus.
Currently Selected:
Marko 10: RČB
Highlight
Share
Copy
Want to have your highlights saved across all your devices? Sign up or sign in
