Marko 9

1O Isus majdur phendas lenđe: “Čačes phenav tumenđe, si akate varesave kaj ačhen maškar tumende, von sigurno či merena dok majsigo či dićhena e Devlesko carstvo kaj avel ande sila.”

O Isus sikavel piri slava e učenikonenđe

2Šov đes majposle o Isus lija pesa e Petre, e Jakove thaj e Jovane thaj đelo lenca pe vuči gora, kaj sas lenca korkoro thaj okote angle lende promenisajlo e Isusesko izgled. 3Lešće drze ćerdile blistavo, gajda parne sar ni jek manuš pe phuv naštik parnjardasas len. 4Pe godova angle lende sikadilo o proroko o Ilija thaj o Mojsija thaj line te ćeren svato e Isuseja. 5A o Petar phendas e Isusešće: “Sikavneja, lačhe si kaj sam akate! Te vazdas trin senice: jek pale tute, jek palo Mojsije thaj jek palo Ilija.” 6O Petar či džanelas so aver te mothol kaj lija len e bari dar. 7Askal sikadilo jek oblako thaj učharda len pire senkava thaj askal ašundilo o glaso andar o oblako: “Akava si mungro volime Čhavo! Les ašunen.” 8Thaj katar jekhar kana e učenikurja dikhline oko peste, majbut khonikas či dikhline osim e Isuse.

9Thaj kana fuljenas katar e gora, o Isus naredisardas lenđe kaj či troman te mothon khonikašće so dikhline, dok vo, o Čhavo e Manušesko, či uštel andar e mule. 10Von inćardine godova pale peste, ali ćerdine svato maškar pende so gndilas o Isus kana phenda kaj “uštela andar e mule.” 11Askal e učenikurja phučline les: “Sostar e sikavne e Mojsiješće zakonestar phenen kaj majsigo katar o Mesija trubul te avel o Ilija?” 12O Isus phenda lenđe: “Čačes o Ilija avela prvo thaj sa obnovila, ali sostar si askal ramome ando Sveto lil palo Čhavo e Manušesko kaj but patila thaj kaj avela odbacime? 13A me phenav tumenđe: O Ilija već avilo, a von ćerdine lesa sar kamlape lenđe, sago kaj si pala leste vi ramome.”

O Isus tradel e bilačhe duho andar o čhavro

14Kana o Isus thaj lešće okola trin učenikurja boldinepe katar e gora ke aver učenikurja, dikhline e bute themes oko lende thaj e sikavnen e Mojsiješće zakonestar sar traden pe e učenikonenca. 15A o them kana dikhlas kaj avel o Isus, zurale iznenadisajle thaj odmah prastaine te pozdravin les. 16O Isus phučla len: “Oko soste traden tumen lenca?” 17A jek manuš andar o them phendas lešće: “Sikamneja, andem tute mungre čhaves, savo naštik te ćerel svato, kaj si ande leste o bilačho duho thaj zbog godova si nemo. 18Kana astarel les, čhudel les pe phuv, thaj e spuma del lešće po muj, škripol e dandenca thaj kočilpe. Phučlem ćire učenikonen te traden e nemo duhos andar leste, ali von našti tradine les.” 19O Isus pe godova phendas lenđe: “O bipaćivalo naraštajona, dži kaj još trubula te avav tumenca? Dži kaj još trpiva tumen? Anen e čhavre mande.” 20Thaj von andine e čhavres leste. Kana o duho dikhla e Isuse, odmah zurale ćhinosardas e čhavres, savo pelo pe phuv thaj ačhilo te valjilpe pe sa e riga, a po muj delas lešće e spuma. 21O Isus askal phučla lešće dades: “Kozom vrjama si kasavo?” O dad phendas: “Katar lesko ciknipe. 22Svako cara o duho čhudel les vi ande jag vi ando paj te mudarel les. Ali te šaj vareso te ćeres, smiluisar tut amenđe thaj pomožisar amen!” 23O Isus phendas lešće: “Phučes man: ‘Te šaj’? Sa si moguće okolešće savo paćal!” 24A e čhavesko dad odmah čhutas muj: “Paćav! Pomožisar manđe te majbut paćav!” 25Kana o Isus dikhlas kaj sa majbut them prastajas dži lende, strogo ukorisarda e bilačhe duho gajda kaj phendas: “Duhona savo phandaves e manušenđe čhibja te naštik ćeren svato thaj lenđe kan te aven kašuće, zapovediv tuće inklji andar leste thaj majbut na te boldes tut ande leste!” 26Thaj o bilačho duho čhutas muj thaj zurale ćhinosardas e čhavres thaj inkljisto andar leste. A o čhavro ačhilo te pašljol tele sago mulo thaj but džene phendine kaj mulo. 27Ali o Isus lija les palo vas, vazda les opre thaj o čhavro uštilo. 28Kana dija andre ando ćher, lešće učenikurja phučline les korkoro pe rig: “Sostar amen naštik tradam godole bilačhe duhos?” 29A o Isus mothodas lenđe: “Akaja vrsta šaj tradel pe samo e molitvava.”

O Isus palem nagovestil piro smrto

30Kana đeletar okotar, naćhenas kroz e Galileja. A o Isus či kamla te o them pale godova džanel, 31kaj sikavelas pire učenikonen gajda kaj phenelas lenđe: “Me, o Čhavo e Manušesko, avava dino ande vas e bilačhe manušenđe thaj von mudarena man, ali pale trin đes me uštav andar e mule.” 32Ali e učenikurja či haćardine so motholas, a sas lenđe dara te phučen les.

Ko si majbaro ande Devlesko carstvo

33Kana o Isus thaj lešće učenikurja aresle ando Kafarnaum thaj kana dine ando ćher, o Isus phučla len: “So godova tradenas tumen dromesa maškar tumende?” 34A von khanči či mothonas kaj e dromesa tradenas pe jek avresa ko si maškar lende majbaro. 35Askal o Isus bešlo, akhardas peste e dešuduje apostolen thaj phenda lenđe: “Ko kamel te avel prvo neka avel maškar savorende zadnjo thaj neka avel sluga savorenđe!” 36Askal lija jećhe čhavre, čhutale maškar lende, dijale mrtiko thaj phendas: 37“Ko prihvatil jećhe kasave cikne čhavre zbog mande, man prihvatil. A ko man prihvatil, či prihvatil samo man već e Devles savo bičhalda man.”

O Isus phenel ko naj protiv leste, godova si lesa

38O Jovano phenda e Isusešće: “Sikavneja, dikhlam jećhe manuše sar ande ćiro alav tradel e bilačhe duhonen. Amen phendam lešće te na ćerel godova kaj či džal pale tute thaj naj jek amendar.” 39O Isus phendas lenđe: “Na branin lešće, kaj khonik ko ćerel čudo ande mungro alav či mothol bi lačhipe pale mande. 40Kaj, ko naj protiv amende, godova si pale amende. 41Kaj, ko del tumen samo vi tahtaj paj zato kaj sen e Hristošće učenikurja, čače phenav tumenđe: godova manuš sigurno dobila piri nagrada.”

O Isus sikavel sar te na peras ando bezeh

42“Ko crdel po bezeh jećhe katar kala ciknen save ande mande paćan, majlačhe avilosas lešće te unglaven lešće o mlinsko bar pe kor thaj te čhuden les ando jezero. 43Te crdel tut ćiro vas po bezeh, čhin ćo vas tutar. Kaj majlačhe si tuće bi vastengo te des ando večno trajo, nego liduj vastenca te džas ande pakao, ande večno jag savi nikad či mudardola, 44[kaj lengo ćermo či merela thaj e jag či mudardola]. 45Te crdel tu ćiro pungro po bezeh, čhin ćo pungro tutar. Kaj majlačhe si tuće bi pungrengo te des ando večno trajo, nego liduj pungrenca te aves čhudino ando pakao, 46[kaj lengo ćermo či merela thaj e jag či mudardola]. 47Te crdel tu ćiri jakh po bezeh, inkal ći jakh tutar. Kaj majlačhe si tuće te des ande Devlesko carstvo jećhe jakhasa, nego te avel tut liduj jakha, a te aves čhudino ando pakao, 48kaj lengo ćermo či merela thaj e jag či mudardola. 49Kaj svako avela šilado e jagasa sago kaj si e žrtva šiladi e loneja. 50O lon si lačho. Ali te o lon hasarel pesko londipe sova lonđarena? Aven sago o lon thaj trajin ando miro jek avresa!”

Currently Selected:

Marko 9: RČB

Highlight

Copy