Dela 3
3
O Petar sastarel e banđe manušes
1Kana jekhar o Petar thaj o Jovano džanas ando Hramo pe molitva, ande trin saturja palo mismeri, 2varesave džene inđarenas jećhe manušes savo sas bango katar piro bijandipe. Thaj svako đes čhonas les anglo Hramosko vudar savo akhardolas Divna, te prosil katar okola manuša kaj avenas ando Hramo. 3Kana dikhla e Petre thaj e Jovane kaj kamen te den ando Hramo, manglas lendar love.
4A o Petar e Jovanova lačhe dikhla pe leste thaj phendas lešće: “Dik pe amende.” 5O bango manuš lačhe dikhla pe lende, kaj ažućarelas te vareso dobil lendar. 6A o Petar phendas lešće: “Naj man ni rup ni sunakaj, ali okova so si man godova dav tut: ando alav e Isuse Hristosko andar o Nazaret, ušti thaj phir!”
7O Petar askal astardas e manušes palo desno vas thaj vazda les. Ande godova časo e manušešće stopala thaj lešće zgloburja pe pungre odma zurajle, 8a o manuš huklo pe pešće pungre thaj ačhilo te phirel. Askal dijas lenca ando Hramo, phirelas, hutelas thaj slavilas e Devles. 9Sa e manuša dikhline les sar phirel thaj ašunenas sar slavil e Devles. 10Kana pindžardine kaj si vo okova isto manušes savo bešelas pašo Hramsko vudar savo akhardolas Divna thaj prosilas, sas but začudime thaj zadivime zbog godova so sas lešće. 11Sar o manuš či durjolas katar o Petar thaj katar o Jovano, sa o them začudime prastajine lende ando Solomonosko tremo.
O Petar propovedil ando Hramo
12Kana o Petar godova dikhla phendas e themešće: “Izraelcurja, sostar akava čudil tumen? Sostar dićhen ande amende sago kaj amen amare snagava ili godoleja kaj sam pobožne ćerdam te akava manuš phirel? 13O Del e Avraamesko, e Isakosko thaj e Jakovesko, o Del amare pradadengo, proslavisarda pire slugas e Isuse, saves tumen dine te avel mudardo thaj odreknisardine tumen lestar anglo Pilato kana vo već odlučisarda te mućel les. 14Odreknisardine tumen katar o Isus savo sas Sveco thaj Pravedniko, a mangline te mućelpe tumenđe o ubica. 15Tumen mudardine e Isuse kastar avel o trajo, ali o Del vazda les andar e mule, pale soste sam amen svedokurja.
16Zbog o paćipe ande Isusesko alav zurajlo akava manuš saves tumen pindžaren thaj kas akana dićhen. O paćipe ando Isus ćerda akale manušes te avel potpuno sasto, sago kaj vi korkoro šaj dićhen.
17Phralalen, džanav kaj tumen sago vi tumare poglavarja ćerdine akava e Isuseja ando bidžanglipe. 18O Del gajda pherdas okova so majsigo phendas kroz o muj sa e prorokonengo – kaj lesko Hristos patila. 19Zato pokajin tumen thaj obratin tumen e Devlešće te jartol pe tumenđe tumare e bezeha, 20askal avela tumenđe katar o Gospod e vrjama palo duhovno odmor thaj o Gospod palem bičhalela tumenđe e Isuse, saves već odredisardas te avel Hristo. 21Vo moraš te ačhel ando nebo sa dok či avel e vrjama kana o Del sa obnovila. Pale godova o Del još dumut mothodas kroz pire svete prorokurja. 22Kaj o Mojsije phendas:
‘O Gospod, tumaro Del, vazdela tumenđe
prorokos katar tumaro them
sago kaj sem me.
Leste čhon kan ande sa
so phenel tumenđe!
23A ko god či čhola kan ke godova proroko,
neka avel iskorenime andar o them!’
24Thaj sa e prorokurja save mothonas, katar o Samuilo thaj katar okola posle leste, najavinas akala đesa. 25Tumen sen naslednikurja palo obećanje saves o Del dijas prekal e prorokurja thaj e učesnikurja sen ando savez saves o Del sklopisardas tumare pradadenca, kaj o Del phendas e Avraamešće:
‘Ćiro potomko avela blagoslov
sa e themenđe pe phuv.’
26O Del vazdas pire slugas e Isuse thaj prvo bičhalda les tumenđe te blagoslovil tumen thaj te savoren odvratil katar tumaro bilačhipe.”
Currently Selected:
Dela 3: RČB
Highlight
Share
Copy
Want to have your highlights saved across all your devices? Sign up or sign in
