Jovan 21
21
O Isus mothoj pe e eftane učenikonenđe
1Palo adava o Isus palem mothovđa pe ple učenikonenđe ko e Tiberijakoro jezero. A mothovđa pe ađahar: 2O Simon Petar, o Toma vičime Blizanco, o Natanailo tari Kana e Galilejakiri, e Zevedejesere čhave hem duj avera učenici inele zajedno.
3O Simon Petar phenđa lenđe: “Džava te dolav maćhen.”
A on phende lese: “Hem amen ka dža tuja.”
I džele hem đerdinde ano čamco, ali adaja rat na dolinde ništa.
4A rano sabajle, o Isus terdino ki obala, ali o učenici na džande dai ov adava.
5O Isus pučlja len: “Amalalen, dolinđen li nešto?”
A on phende lese: “Na.”
6A o Isus phenđa lenđe: “Frden i mreža ki desno strana oto čamco, hem ka dolen e maćhen.” I on frdinde i mreža hem edobor dolinde maćhen da našti ine te ikalen i mreža taro pani.
7Tegani okova učeniko kole o Isus but manglja, phenđa e Petrese: “Adavai o Gospod!”
Kad šunđa dai adava o Gospod, o Simon Petar phandlja pe o ogrtači ko maškar, adalese so inele nango, hem ripinđa ano jezero. 8A avera učenici čamcoja ale đi i obala, vucindoj i mreža e maćhencar, adalese so na inele dur oti obala – đi sar šel metarija. 9Kad iklile ki obala, dikhle i jag savi inele već thardi hem upro late maćhe hem maro.
10O Isus phenđa lenđe: “Anen nekobore maćhen adalendar save dolinđen.”
11Tegani o Simon Petar uklilo ko čamco hem ki obala ikalđa i mreža, pherdi bare maćhencar – šelu pindu trin maćhe. Ali, iako inele edobor but, i mreža na pharavdili.
12A o Isus phenđa lenđe: “Aven hem han doručko.”
Hem nijekh e učenikonendar na tromandilo te pučel le: “Ko injan tu?,” adalese so džande dai adava o Gospod.
13Tegani o Isus lelja o maro hem dinđa len, a isto ađahar hem e maćhen. 14Adava inele trito puti da o Isus mothovđa pe ple učenikonenđe sar uštino taro mule.
O Isus hem o Petar
15Kad hale maro, o Isus pučlja e Simone Petre: “Simone, čhaveja e Jovanesereja, mangeja man li više nego akala?”
O Petar phenđa lese: “Oja, Gospode, tu džane da mangava tut.”
A o Isus phenđa lese: “Parvar mle bakroren.”
16Tegani o Isus dujto puti pučlja le: “Simone, čhaveja e Jovanesereja, mangeja man li?”
A o Petar palem phenđa lese: “Oja, Gospode, tu džane da mangava tut.”
A o Isus phenđa lese: “Arakh mle bakren.”
17Tegani o Isus trito puti pučlja le: “Simone, čhaveja e Jovanesereja, mangeja man li?”
A o Petar rastužinđa pe so o Isus trito puti pučlja le: “Mangeja man li?” I phenđa lese: “Gospode, tu džane sa, hem džane da mangava tut.”
A o Isus phenđa lese: “Parvar mle bakren. 18Čače, čače vaćerava će: kad injanle terno, korkoro phandeja tut ine to pojas hem džaja kaj mangeja. Ali kad ka puranđove, ka širine te vasta, i avera ka phanden tut hem ka legaren tut kaj na mangeja.”
19O Isus adava phenđa sar te mothoj save meribnaja o Petar ka proslavini e Devle. Tegani phenđa lese: “Phir pala mande.”
O učeniko kole o Isus manglja
20O Petar irinđa pe hem dikhlja okole učeniko kole o Isus but manglja sar phirela palo lende, okova kova zaki večera pašljarđa pe nakoro Isus hem pučlja le: “Gospode, ko ka izdajini tut?”
21Kad o Petar dikhlja le, pučlja e Isuse: “Gospode, a so ka ovel akaleja?”
22A o Isus phenđa lese: “Te me mangava ov te ačhol dživdo đikote na irinav man, so isi tut adaleja? Tu phir pala mande.”
23Ađahar maškaro phralja šundilo da adava učeniko naka merel. Ali o Isus na phenđa da ov naka merel, nego: “Te me mangava te ačhol dživdo đikote na irinav man, so isi tut adaleja?”
24Adava učeniko svedočini zako sa akava hem ov sa akava pisinđa, hem amen džanaja dai lesoro svedočanstvo čačikano. 25Ali, isi pana but so o Isus ćerđa hem te ovel ine sa palo redo pisime, mislinava da sa adala knjige naka resen ine ni ko sa o sveto!
Currently Selected:
Jovan 21: RAB
Highlight
Share
Copy
Want to have your highlights saved across all your devices? Sign up or sign in
