Jovan 20
20
E Isusesoro uštiba taro mule
1Rano sabajle ko prvo dive oto kurko, sar pana inele tomina i Marija Magdalena ali ko grobo hem dikhlja dai o bar cidime taro ulaz e grobosoro, 2i prastandoj dželi koro Simon Petar hem koro aver učeniko, kole o Isus but manglja, hem phenđa lenđe: “Legarde e Gospode taro grobo hem na džanaja kaj čhivde le!”
3Tegani o Petar hem okova aver učeniko iklile hem lelje te džan nakoro grobo. 4Soduj džene prastandile zajedno, ali okova dujto učeniko inele po brzo taro Petar hem prvo reslo ko grobo. 5Telilo hem dikhlja o čaršavija save adari inele pašljarde, ali na đerdinđa. 6Tegani palo leste reslja o Simon Petar, i đerdinđa ko grobo hem dikhlja o čaršavija save adari inele pašljarde. 7A i maramica savi inele e Isusese ko šero na inele zajedno e čaršavencar, nego inele ki aver strana paćardi ko jekh than. 8Tegani đerdinđa hem okova aver učeniko, okova kova prvo reslo đi o grobo, dikhlja hem poverujinđa. 9Adalese so, on pana na halile soi pisime ano Sveto lil – da o Isus valjani te uštel taro mule. 10Palo adava o učenici irinde pe pumarende.
O Isus mothoj pe e Marijaće e Magdalenaće
11A i Marija terđola ine avri ko grobo hem rovela. Hem sar rovela ine, telili 12hem dikhlja duje anđelen ko parno sar bešena adari kaj inele e Isusesoro telo – jekh ko than kaj inele lesoro šero, a o dujto ko than kaj inele lesere pre.
13A o anđelja pučle la: “Đuvlije, sose roveja?”
A oj phenđa lenđe: “Legarde mle Gospode, hem na džanav kaj čhivde le.”
14Kad adava phenđa, irinđa pe hem dikhlja e Isuse sar terđola, ali na džanđa dai ov adava.
15A o Isus pučlja la: “Đuvlije, sose roveja? Kas rodeja?”
A oj, mislindoj dai adava o manuš kova ćerela buti ano vrt, phenđa lese: “Gospodarona, ako tu legarđan le, phen maje kaj čhivđan le, hem me ka lav le.”
16Tegani o Isus phenđa laće: “Marije!”
Oj irinđa pe nakoro leste, hem ko jevrejski phenđa lese: “Rabuni!”– so značini “Učitelju.”
17A o Isus phenđa laće: “Ma zadržin man, adalese so pana na dželjum upre, koro Dad. Nego, dža koro mle phralja, hem phen lenđe: ‘Džava upre, koro mlo Dad hem tumaro Dad, koro mlo Devel hem tumaro Devel.’”
18Hem i Marija Magdalena dželi hem phenđa e učenikonenđe: “Dikhljum e Gospode!”
Hem vaćerđa lenđe okova so o Isus phenđa laće.
O Isus mothoj pe e učenikonenđe
19Ki adaja rat ko prvo dive oto kurko, kad o učenici inele zajedno, a o udara phandle adalese so darandile taro e jevrejengere šerutne, o Isus alo hem terdino maškaro lende, i phenđa lenđe: “Mir tumencar.”
20Kad adava phenđa, mothovđa lenđe o ožiljci ko ple vasta hem ple rebrija, a o učenici inele radosna so dikhle e Gospode.
21Tegani o Isus palem phenđa lenđe: “Mir tumencar. Sar so mlo Dad bičhalđa man, ađahar hem me bičhalava tumen.”
22Vaćerindoj adava, phudinđa ano lende hem phenđa lenđe: “Priminen e Svetone Duho. 23Kase oprostinena o grehija, oprostimei lenđe, a kase na oprostinena, nane lenđe oprostime.”
O Isus mothoj pe anglo Toma
24A o Toma vičime Blizanco, jekh e dešu duje učenikonendar, na inele olencar kad o Isus alo.
25Avera učenici phende lese: “Dikhljam e Gospode!”
A ov phenđa lenđe: “Đikote na dikhava o ožiljci e ekserendar olese ko vasta hem na čhivava mlo naj ko than kaj inele o ekserija hem na čhivava mlo vas lese ko rebrija, na verujinava.”
26Palo ofto dive, o učenici palem čedinde pe zajedno andre ano čher, a olencar inele hem o Toma.
Iako o udara inele phandle, o Isus đerdinđa, hem terdino maškaro lende, i phenđa: “Mir tumencar.”
27Tegani phenđa e Tomase: “Čhiv to naj akate hem dikh mle vasta. Pružin to vas, i čhiv maje ko rebrija. Hem ma više sumnjin, nego verujin.”
28A o Toma tegani phenđa lese: “Mlo Gospod hem mlo Devel!”
29A o Isus phenđa lese: “Adalese so dikhljan man, poverujinđan. Blago okolenđe kola na dikhle, a poverujinde.”
30O Isus anglo ple učenici ćerđa pana but avera čudesna znakija save nane pisime ani akaja knjiga. 31Ali akavai pisime te verujinen dai o Isus o Hrist, o Čhavo e Devlesoro, hem te šaj, verujindoj, ovel tumen dživdipe ano lesoro anav.
Currently Selected:
Jovan 20: RAB
Highlight
Share
Copy
Want to have your highlights saved across all your devices? Sign up or sign in
