Jovan 17

O Isus molini pese

1Kad sa adava o Isus vaćerđa, vazdinđa plo šero nakoro nebo, hem phenđa: “Dade, alo o vreme. Proslavin te Čhave, sar te šaj o Čhavo proslavini tut. 2Adalese so, tu dinđan le vlast upreder đijekh manuš te del večno dživdipe sarijenđe kolen tu dinđan le. 3A akavai o večno dživdipe: te pendžaren tut, e jekhe čačikane Devle, hem e Isuse Hriste, kole tu bičhalđan. 4Me tut proslavinđum ki phuv ađahar so završinđum i buti savi dinđan man te ćerav. 5A akana tu proslavin man kora tute, Dade, esavka slavaja savi ine man kora tute angleder nego so o sveto inele ćerdo.”

O Isus molini e učenikonenđe

6“Mothovđum to anav e manušenđe kolen dinđan man taro akava sveto. On inele kle hem tu dinđan len maje hem on ićerde pe ko to Lafi. 7Akana džanen da sa so dinđan man avela tutar. 8Adalese so, dinđum len o lafija save tu dinđan maje hem on prihvatinde len hem čače halile da me aljum tutar, hem poverujinde da tu bičhalđan man. 9Olenđe molinava. Na molinava zako sveto, nego zako okola kolen dinđan man, adalese soi on kle. 10Sa soi mlo, kloi, hem sa soi klo, mloi, a me injum proslavime prekalo lende. 11Me na injum više ano sveto, ali oni ano sveto, a me avava kora tute. Svetona Dade, arakh len te anaveja, save dinđan maje, te oven jekh sar so amen injam jekh. 12Đikote injumle olencar, arakhljum len e anaveja save dinđan man. Arakhljum len hem nijekh olendar na propelo, sem okolestar kovai osudime ki propast, sar te pherđol o Sveto lil.

13A akana avava kora tute, ali akava vaćerava sar pana injum ko sveto, sar te šaj te ovel len ana pumende o pherdipe oti mli radost. 14Dinđum len to Lafi, a o sveto zamrzinđa len, adalese so on nane oto sveto, sar so hem me na injum oto sveto. 15Na molinava te le len taro sveto, nego te arakhe len e Bišukarestar. 16On nane oto sveto, sar so hem me na injum oto sveto. 17Posvetin len te čačipnaja; o čačipei to Lafi. 18Sar so tu man bičhalđan ano sveto, ađahar hem me len bičhalđum ano sveto 19hem korkore man posvetinava zako olenđe, hem on te oven posvetime čačipnaja.”

O Isus molini pe sarijenđe kola verujinena

20“Ali, na molinava samo lenđe, nego hem okolenđe kola prekalo olengoro lafi ka poverujinen ana mande, 21te šaj sare oven jekh. Sar so injan tu, Dade, ana mande hem me ana tute, ađahar hem on nek oven jekh ana amende, te šaj o sveto te poverujini da tu bičhalđan man. 22Me dinđum len i slava savi tu man dinđan, te oven jekh sar so amen injam jekh 23– me ano lende, a tu ana mande – te oven savršena ano jedinstvo, te šaj o sveto džanel da tu bičhalđan man hem da len mangljan sar so mangljan man.

24Dade, mangava okola kolen dinđan man te oven mancar adari kaj me injum hem te dikhen mli slava, savi dinđan man adalese so mangljan man angleder nego so o sveto inele ćerdo. 25Pravednona Dade, iako o sveto na pendžari tut, me pendžarava tut, hem akala džanen da tu bičhalđan man. 26Mothovđum lenđe to anav hem pana ka mothovav le, te šaj o mangipe saveja tu mangljan man ovel ano lende, hem me ano lende.”

Currently Selected:

Jovan 17: RAB

Highlight

Copy