Luke 7

Sesu abeeluse musalitsi wu yivuunde gi kame migole

1Ve mane Sesu wuloonze maambu mene mootsu gu batu babayululungu yandi, anyingene gu divule di Kapernawum. 2Guune, gubile yivuunde gimoosi gi kame migole mi Rome. Yivuunde gyene abile ne musalitsi wandi wumoosi wuroondenge yandi mbili. Musalitsi wene abile ne wubeele wurage, bebele ne difu. 3Ve yulu yivuunde gyene tsaangu yi Sesu, asindige dikabu di bivuunde bibasifu mu yendeleende Sesu muruge gubeeluse musalitsi wandi. 4Bapule ve mbare Sesu, baleembe yandi nusigimise re: «Mutu wuwu, mutu wumunyi, bweedi yiyamuni yandi. 5Akaroondi diloongu dyetu. Yandi re wuruungise ndagu yi bibeengunu byetu bimasaambulu.» 6Kere vane Sesu ayende nawu. Ve bile yandi bebele ne ndagu, yivuunde gi kame migole asindige bambaatsi baandi mu yambile Sesu re: «Fumu, yiyagolu wupule gu me, mumbare masaandi wuyelimine muyake yu gu ndagwami. 7Re dibaandu, masaruge mabene gu yu. Te yambile ke dibigu dimoosi ve yu vane ne musalitsi wami agubeelugu. 8Me gaandi mane bivuunde ve yulwami, ne mane migole gutsi dinyaange dyami. Ve makeyambile wumoosi re: “Yende!”, akayendi, ne vekerume me wususu re: “Ruge!”, akarugi. Ne makayambili musalitsi wami re: “Vage didi!”, akavagi dyo ke wuvage.» 9Ve yulu Sesu mabigu ma yivuunde gi kame migole, agibeme. Agingugu gu piti yilaandenge yandi ne ayambile yawu re: «Mayambile yenu re nisi gu batu ba Israel, masame nene labe gitu ga gigi.» 10Ve gabugu bakime gu ndagu yi yivuunde gi kame migole, badagise musalitsi wandi keke amabeelugu.

Sesu afwangule mwaane dibagele wu mukwiili

11Ve yulu vane, Sesu ne bayikitsi baandi ne piti batu bayende yiloonge gu divule di Nayine. 12Ve pule yawu ve tsoombu divule babeengunu yikume ne batu bagwende gu manyime ne fuumbi yi mwaane dibagale wu dikike, nguyi bile mukwiili. Mbili batu ba divule dyene babile naandi. 13Ve labe Sesu mukwiili, alabe yandi ngyebe ne ayambile yandi re: «Yiyalile!» 14Agogule, agaange dikesi, batu babagaangenge dikesi basikeme, Sesu arume fuumbi re: «Mufudu dibagale, rambuge!» 15Vane ne vane: Fuumbi atsagele ne abaande yambile, Sesu ayakise yandi gu ngwandi. 16Batu bootsu bagibeme ne bagitse Nzambi re: «Mubigitsi wu munene amitse ve ganegaretu, Nzambi atsitse gu yamune yitsuku gyandi.» 17Tsangu Sesu yi dugulu musengi wu Sudé ne bitsige byotsu bi mu batungu.

Bakime ba Sa Batise ve wusu Sesu

18Bayikitsi ba Sa bayende gu wunyigule yandi maambu mene mootsu. Sa Batise atsitse bayikitsi babeyi ve ganegarawu. 19Ne asindige yawu gu Fumu Sesu mutombe yandi re: «Yire wubigu ne babigitsi re agwitse, wudigoneviingile, vore dibeviingile nde wumosi?» 20Ve pule yawu ve wusu Sesu, bayambile yandi re: «Sa mubatisi amasindige yetu mutombe yu re: “Yire wu yetu digoneviingile, vore dibeviingile nde wumosi?”» 21Mu dikyesi dyene diyambilenge yawu, Sesu abeeluse mbili batu bababile ne mabeelise ma minoongu minoongu. Ayobule batu bababile ne manyunyi mamabi. Abalule miisu ma mbili batu bababile ne pafu. 22Kere vane, ayagule bakime ba Sa re: «Gabuganu gu yambile Sa maambu mootsu matselabe yenu, ne matseyulu yenu: bababetsi ne pafu bagonelabe, bababetsi bikate bagoneyende, bababetsi ne makyedi bagonebeelugu, bababetsi ne madibe bagoneyulu, babafu bagonefwangugu, ne Musamu Wumunyi wugoneloonzu gu masaandi. 23Yinyunge gu wotsu wusakesiise wuvage gitu mu me.»

Sesu agoneyambile mu Sa

24Ve gabugu bakime basindugu ne Sa, Sesu abaande yambile dyaambu di Sa gu piti yibile vane re: «Yenu ditseyelabe nde nyi gu kumu? Mutu wu ga digangeyi ditsukumusu ne divuga? Eée! 25Ake yenu ditseyelabe nde nyi? Mutu wu dwaare bidwaari bivyogilile wunyya? Te bange wudwaare bidwaari bi mafunu mamanene, nubile ne busine, bakatsageli nde mu bandagu tsitsinene, tsi bamaate. 26Kagu yenu ditseyelabe nde nyi? Mubigitsi Nzambya? Ee, mayambile yenu re: yandi re mutu wuvyogilile nisi mubigitsi. 27Mumbare Sa re wuteendu gu mabigu ma Nzambi re:

“Maguregisile kimami mubalile yu nzile.”»

28Sesu abekoonde yambile re: «Ve ganegare bootsu bababuru ne bagyetu, gusaandi mutu wuvyogilile Sa buvuunde. Nane wumukyeki gu Bufumu bu Nzambi, re wumavyogilile yandi buvuunde.» 29Batu bootsu, nisi baboongitsi ba lepu, babayulu mayambilenge Sesu, basiinge Nzambi ne babatusu ne Sa. 30Te bafwarisi ne miloonzi mi migage babuse wusiinge naroonde Nzambi ne babuse wubatusu ne Sa.

31Sesu abekoonde yambile re: «Makebagusunu batu ba dikyesi didi nde ne nyi? Babagunu nde banyi? 32Bayi munoongu wumoosi ga bileengi batambe matsagele ve time kane ne bayambelenenge yawu ne yawu re: “Yetu ditsesigile yenu nduungu ne misuumbe, yenu disagine, ditseyimbe miimbu ma munyoongu yenu disalile.” 33Mumbare Sa Batise atseruge, asegoneyi kure yikayi batu bootsu ne asegonenu nisi malamu, ne mane yenu re: “Ane dinyunyi didibi.” 34Mwaane mutu atseruge agoneyi, agonenu malamu ne mane yenu digoneyambile re: “Labanu nge munzunzu ne dilaangi, wuyi mbaatsi baboongitsi ba lepu, ne bange mabi.” 35Te buyedi bu Nzambi bukayabunu re buyibusuungeme ke ne batu babasiinge yandi.»

Sesu gu Gugare ndagu Simu mufwarisi

36Mufwarisi wumoosi atsitse Sesu muyi gu ndagwandi, Sesu ayende ne atsagele ve take mu wuyi. 37Gu divule dyene gubile mugyetu ne monyu wu mubi. Ve yulu yandi re Sesu agoneyi gu ndagu mufwarisi, ayende guune ne yipunge gikuunzu ne dimanyi dikatsitsu re albate, gibaase ne miyoombu. 38Ne aruge ve nzime Sesu ve mbare byoru byandi nulile. Matsange mandi mabotse byoru bi Sesu, kere abunzulenge byo ne banange baandi, afifenge byo ne wugure miyoombu mu byo. 39Ve labe mufwarisi wutsitse Sesu dyaambu dyene, ataase gu murime wandi re mbe mutu wuwu nde mubigitsi wugyenze, mbe ayatsi re mugyetu wugonepele yandi wuwu nde mugyetu wune monyu wu mubi. 40Sesu akalule mufwarisi re: «Simu, mane dibigu diwuyambile yu.» Simu ayagule re: «Muloonzi yambile dyo.» 41Sesu yare: «Batu babeyi banwanenge badole gu musoombisitsi. Wumoosi anwanenge futu yi mutu wudyaanze yilime ne yirini, mususu futu yi mutu wudyaanze mugweli wumoosi ne yirini. 42Ve yawu bootsu babeyi baserungule wuvane tsoombi, musoombisitsi asambule. Ve ganegare yawu babeyi nde nyi wukevyogilile wuroonde musoombisitsi?» 43Simu agabusile Sesu re: «Mataase re nde wusambululu mbili badole.» Sesu agabusile yandi re: «Yitseyagule ke bweedi!»

44Kere vane Sesu agingugu gu mugyetu, ne ayambile ne Simu re: «Yimelabe mugyetu wuwa? Matsenyingene gu ndagwagu, yisaveege me maambe ne wutsuke byoru byami, te yandi atsetsuke me byoru ne matsange mandi, ne atsebunzule mo ne banange baandi. 45Yisasaambene nami ve tsitse yu guyake me, te ne gitsenyingene yandi, agonefife ke byoru byami. 46Yu yisagure maatsi matsulu yiyinyi gu yulu muru wami, te yandi atsegure me miyoombu mu byoru byami. 47Re dibaandu mayambile yu re: mbili mabi mandi mamasiingulu kokolu, re mu dyo, anaritsige mbili diroonde dyandi mu me. Gu wukasiingulu kokolu mu mabi ke pesu, diroonde dyandi dike pesu.» 48Kere vane Sesu ayambile ne mugyetu re: «Mabi magu matsesiingulu kokolu.» 49Bootsu babayange naandi, batasenge mu mirime re: «A wuwu munoongu mutu nde nyi? Wune dikanyi musiingile batu kokolu nisi mu mabi mawu?» 50Sesu ayambile mugyetu re: «Gitu gyagu gimayobule yu, yendenge ne polu.»

Currently Selected:

Luke 7: SNQ

Highlight

Copy